2 Kánáníkɔ̀ 30 - Ɓǎsɔ́ɔ̀ Báɓòɔ̀

Wa naɓaà ma ɓó Zĩ̀ìn-Kɔ̃in-hwɔ̀ɔ̀ pa jè

¹ Sɔ̀ìn ɓóɛ gboɛɛ, Hɛ́sèkádyà ɖoɓo ma céè-ɖɛ̀ ɖé Éézùɖùɛ̀-nyɔ̀ ɓěɔ̀ kè Júɖà-nyɔ̀ séín ɓěɔ̀ gbo, dè Ífèɖèìn nììn xwéɖé-dùɔ̀ kè Mànásì nììn xwéɖé-dùɔ̀ kɔ̃, ɓɛ́ wa ké ɖé Bounɓoɔ̀ gbǒɔ̀ gbo dyi ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓɛ́ wa ké ɖé Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ Zĩ̀ìn-Kɔ̃in-hwɔ̀ɔ̀ pàìn.

² Kã́áɔ̀ kè ɔ gɔ̌mànà-nyɔ̀ vɛ̀nɛ̀ ɓěɔ̀ ɔ kè nyɔ tɔ̀ɔ̀ séín ɓěɔ̀ hwòɖǒ ɖǎa ma gbɔ po, ɓɛ́ wa ké Zĩ̀ìn-Kɔ̃in-hwɔ̀ɔ̀ pa ɖé dɛ̀nɛ̀ɔ̀ sɔ̃́ nììnɔ̀ xwíníín.

³ Wa se ma hwɔɔ̀ paa ɓɛ́ìn ɓóɛ ti ɓɛ̀ɖɛ̀ìn dyíɔ̀ mú, sepóɛɖé sáa-zà-nyɔ̀ ɓěɔ̀ ɓáún-ɓáún séè ma wa mìɔùn mú hwɔ ke, mɔɔ ké nyɔ ɓěɔ̀ séè ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú dyí poìn ke.

⁴ Ké kã́áɔ̀ kè nyɔ ɓěɔ̀ hwòɖǒ dè ma dyi ɓá ɖɛ waà hwòɖǒ po ma kà gbɔɛɛ jè dyí.

⁵ Ɔ jèɛɛ, waà hwòɖǒ poɛ ma gbɔ, ɓɛ́ wa ké ma wuɖui po ɖé Éézùɖùɛ̀-ɓòɖòɔ̀ dà séín, sɔ̀ìn ɖé Bèsíɓà-hwɔ̀ɖɔ̀ɔ̀ mú, nyinià ɖé Dɛ̃́ìn-hwɔ̀ɖɔ̀ɔ̀ múɛ, nìí ɓɛ́ nyɔ ɓěɔ̀ ké dyí poìn, ɓɛ́ wa ké Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ Zĩ̀ìn-Kɔ̃in-hwɔ̀ɔ̀ ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú pàìn, sepóɛɖé nyɔ kúɖúú se ma hwɔɔ̀ dà dyúáɖò pàǐn nì kà ɔ jè nyu ma kà céèɛ̀ ɖé Gèɖèpɔ́ɔ̀ gma-cèè-ɖɛ̀ɔ̀ múɛ.

⁶ Ké kíá ɓě mu ma Éézùɖùɛ̀-ɓòɖòɔ̀ kè Júɖà-ɓòɖòɔ̀ dà séín. Wa kpa ma céè-ɖɛ̀ sɔ̀ìn ɖé kã́áɔ̀ kè ɔ gɔ̌mànà-nyɔ̀ vɛ̀nɛ̀ ɓěɔ̀ gboɛ, kà kã́áɔ̀ nyuɛ ma kà cɛ̃ɛ kɛ. Céè-ɖɛ̀ɔ̀ wuɖu ɖá, “Óó Éézùɖùɛ̀-nyɔ̀ ɓě, ɓě dyi Bounɓo mɔ̀à ɓě ɓǎ Ééɓòɖòhɛ̃́ɛ̀ kè Áázè ɔ kè Jékɔ̀ɛ̀ Gèɖèpɔ́ɔ̀ kɛɛ gbo ɖe. Nìí, ɔ mu ɓě mɔ̀ùn gbo gmɔ̀ìn ɖe, ɓě mɔ̀ nyɔ xwéɖé wè ɓɛ́ ɓě póà Àsíwíɖíà-kã̀ǎ ɓěɔ̀ xwaún wɛ̃.

⁷ Ɓě mɛ ɓɔ́ nìɛ̀ kà ɓě ɓǎ ɓě kè ɓě ɖíí ɓěɔ̀ nì zɔ̃̌ɔ̀ kà kɛ. Wa táà ma Bounɓo mɔ̀à wa ɓǎ nììn ɓǎ ɓěɛ̀ Gèɖèpɔ́ɔ̀ kɛɛ dyi. Ɔ jèɛɛ, ɔ nyu ma wa nyɔ-díɖí-tàɓàìn-ɖɛ̀ mú kà ɓě mìɔùn nyuàà dyéɛ kɛ.

⁸ Ɓó kàǔn wɛ̃ɛ, ɓě ɓɔ́ dú kùmùɛ̀n kà ɓě ɓǎ ɓě nyuɛ ma kà kɛ, kɛɛ ɓě mɛ zàìn ɓě mìɔùn Bounɓoɔ̀ xwáɖáún, ɓɛ́ ɓě ké ɔ gbǒ hwɛ̀ǐn-hwɛ̀ǐnɔ̀ mú dyi. Ɔ mɔ̀ gbǒ ɓɛ́ ɔ ɖǎ nyu ké ɔ ɖǎ mú hwɛ̀ ɓó sè-ná-sèɛ̀ tiín nyɛ. Ɓě dyi, ɓɛ́ ɓě ké Bounɓo mɔ̀à ɓěɛ̀ Gèɖèpɔ́ɔ̀ kɛɛ ɓiè, nìí ɓɛ́ ɔ dyoɖo-hwòɖòɔ̀ ké wáɖá ɓá ɓě jè dyí.

⁹ Ɔ jǔ ké ɓě dyi Bounɓoɔ̀ gbo gmɔ̀ìn ɖe ní, nìí, Bounɓoɔ̀ muɛ nyuùn ɓɛ́ nyɔ ɓě nyuà ɓěɛ̀ ɖíí ɓěɔ̀ kè ɓěɛ̀ dyú ɓěɔ̀ toɛ̀-kpɔ̃-nyɔ̀ múɛɛ ké wa wìǐn dyé, ɓɛ́ wa ké ɓóɖó nìà kɛ kɔ̃ ɖe dyi, sepóɛɖé Bounɓo mɔ̀à ɓěɛ̀ Gèɖèpɔ́ɔ̀ kɛɛ mɔ̀ jĩ́á-jè kè wìì Gèɖèpɔ́ɔ̀. Ɓě dyi ɔ gbo gmɔ̀ìn ɖe ní, ɔ se ɓě dyúa xwáɖáún pòɛ̌n mu.”

¹⁰ Ké kíá ɓěɔ̀ nyu ma sɔ̀ hwɔɖɔ ɖò mú mu ɖò mú ɖé Ífèɖèìn-ɓòɖòɔ̀ kè Mànásì-ɓòɖòɔ̀ dà séín, ké wa mu tee ké wa dyɛ̀ìn Zɛ́ɓíúɖɔ̀ùn-ɓòɖòɔ̀. Kɛɛ nyɔ ɓěɔ̀ ɖú ma wa kéɛ̀ kpàǐ, ké wa nì ma wa dyɔ́ ɓaɖauń pū.

¹¹ Kɛɛ nyɔ ɖò-ɖò wè mɔ̀ nyɔ sɔ̀ ma ɖé Ásè nììn xwéɖé-dùɔ̀ kè Mànásì nììn xwéɖé-dùɔ̀ ɔ kè Zɛ́ɓíúɖɔ̀ùn nììn xwéɖé-dùɔ̀ múɛɛ mɔ̀ nyɔ dyà ma wa mìɔùn ɓíɖíi, ké wa dyi ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú.

¹² Ɓó kɔ̃in ɖeɛɛ, Gèɖèpɔ́ɔ̀ nyuɛ ké Júɖà-nyɔ̀ ɓěɔ̀ hwɔìn ma hwòɖǒǔn, ké wa nyu ɖɛ ɓɛ́ kã́áɔ̀ kè ɔ gɔ̌mànà-nyɔ̀ vɛ̀nɛ̀ ɓěɔ̀ pòìn ma kà wa náún dyììn ɖé Bounɓoɔ̀ wuɖuɔ̀ múɛ.

Wa pa Zĩ̀ìn-Kɔ̃in-hwɔ̀ɔ̀ ní

¹³ Ké nyɔ ɓáún-ɓáún poìn ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú dyí, ɖé dɛ̀nɛ̀ɔ̀ sɔ̃́ nììnɔ̀ mú, ɓɛ́ wa ké Bɛɖɛɛ̀-Se-Dyáìn-Ɖɛ̀-Gbo-Nì-hwɔ̀ɔ̀ pa. Nyɔ ɓěɔ̀ zi ma dyí vòɛ̌n mìɔ.

¹⁴ Ké wa ɖú ma sáa-kɔ̃-zàìn-gbàà ɓě kè nyɔ́ún-nɔ̀mɔ̀-ɖɛ̀ fɔ̃̀ìn-naín séín ɓě nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ dyí, ké wa wáɖá wa ɖé Kídɔ̀nɔ̀ Bɔɔ-kpàɔ̀ kɔ̃.

¹⁵ Ké wa ɖáɓá ma ɓáɖáá-dyù ɓě ɓá Zĩ̀ìn-Kɔ̃in-hwɔ̀ɔ̀ jè dyíɛɛ ɓó dɛ̀nɛ̀ɔ̀ sɔ̃́ nììnɔ̀ wé ɓaɖa-bùè sè hĩinyɛ nììnɔ̀ ɓaɖa. Ɓó tia ɓaɖaa, dɛ̃ nyu ma sáa-zà-nyɔ̀ ɓě kè Ɖíìváà-nyɔ̀ ɓě ɓɛ́ wa séè ma wa mìɔùn mú hwɔ keɛ, ké wa hwɔ wa mìɔùn mú, ké wa dyà ma fɔ̃ɔ-sàǎ-zàìn-ɖɛ̀ ɓě ɖé Bounɓoɔ̀ gbǒɔ̀ mú.

¹⁶ Ké wa ɖò-ɖò séín ɖú ma waà pá ɓěɔ̀ dyí ɖe kà Mózè mɔ̀à Gèɖèpɔ́ɔ̀ gbo-nì-nyɔ̀ɔ̀ kɛɛ gmaɔ̀ nyuà cɛ̃ɛ kɛ. Ké Ɖíìváà-nyɔ̀ ɓěɔ̀ nyí ma nyúà-ɖɛ̀ ɓěɔ̀ nyɔmɔɔ̀ sáa-zà-nyɔ̀ ɓěɔ̀ xwa, ké sáa-zà-nyɔ̀ ɓěɔ̀ mɛ́nɛ́ìn ma nyɔmɔɔ̀ dyi.

¹⁷ Ɓó tia ɓaɖaa, nyɔ ɓáún-ɓáún nì ma ɖé vòò-nyɔ̀ ɓěɔ̀ hwìɛ̀, ké wa séè ma wa mìɔùn mú hwɔ ke. Ɔ jèɛɛ, Ɖíìváà-nyɔ̀ ɓěɔ̀ ɓéɖé wa ké ma ɓáɖáá-dyù ɓě ɓá Zĩ̀ìn-Kɔ̃in-hwɔ̀ɔ̀ jè dyíɛɛ ɖáɓá ɓó nyɔ séín ɓě ɓɛ́ wa se ma mú hwɛ̀ɛ jè, nìí ɓɛ́ ɓáɖáá-dyù ɓěɔ̀ ké wáká kpá ɓó Bounɓoɔ̀ bìì.

¹⁸ Nyɔ ɓáún-ɓáún ɓě sɔ̀ ma ɖé Ífèɖèìn-ɓòɖòɔ̀ kè Mànásì-ɓòɖòɔ̀ kè Ɛ́sàkà-ɓòɖòɔ̀ ɔ kè Zɛ́ɓíúɖɔ̀ùn-ɓòɖòɔ̀ kɔ̃, ké wa se wa mìɔùn mú hwɔ, kɛɛ wɛ̃́ɛ́ kɛɛ, wa ɖi ma Zĩ̀ìn-Kɔ̃in-hwɔ̀ɔ̀ ɖò, ké ɔ se ɓéɖé ɔ ké ma ná nì kà Gèɖèpɔ́ɔ̀ gmaɔ̀ nyuà cɛ̃ɛ kɛ. Wa nyuɛ ma náa, sepóɛɖé Hɛ́sèkádyà ɖǎ ma wa bìì ɓaà kĩ́ín, ké ɔ ɖá, “Bounɓo, mɔ̀ kɔ̃̀ kpeɖe nɔ̀mɔ̀à dyíin nyɛɛ, m̀ mɛ zĩ̀ìn nyɔ séín ɓě

¹⁹ ɓɛ́ wa se mú hwɛ̀ ɓó hwɔ nìà kɛ jè kà gma ɓě ɓá nì gbǒ hwɛ̀ǐn-hwɛ̀ǐnɔ̀ jè dyíɛɛ nyuà cɛ̃ɛ kɛɛ kɔ̃in, sepóɛɖé wa sí mɔ̀ Bounɓo mɔ̀à wa ɓǎ nììn ɓǎ ɓěɛ̀ Gèɖèpɔ́ɔ̀ kɛɛ kíɖíí hwòɖǒɛ̀-ɖé-hwɛ̀-kà.”

²⁰ Ké Bounɓoɔ̀ wɔ̃́ ma Hɛ́sèkádyàà ɓaà-wùɖùɔ̀, ké ɔ se ma nyɔ ɓěɔ̀ gǎ kɔ̃ tò.

²¹ Ké nyɔ séín ɓě ɓɛ́ wa nì ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ pa ma Bɛɖɛɛ̀-Se-Dyáìn-Ɖɛ̀-Gbo-Nì-hwɔ̀ɔ̀ ɓó wé mɛ̀nɛ̌ìn-sɔ̃́ xwíníín ɖé múà vɛ̀nɛ̀ mú. Ké Ɖíìváà-nyɔ̀ ɓěɔ̀ kè sáa-zà-nyɔ̀ ɓěɔ̀ ɓàìn ma Bounɓoɔ̀ ɓó wé kè wé xwíníín, ké wa ɓèɖèìn ma Bounɓoɔ̀ gbo hwòɖǒɛ̀-ɖé-hwɛ̀-kà.

²² Ké Hɛ́sèkádyà ɓàìn ma Ɖíìváà-nyɔ̀ ɓě ɓɛ́ wa nàìn ma kà nyɔ ɓěɔ̀ nɔ̀mɔ̀ dyíin ɖé Bounɓoɔ̀ ɓiè-ɓièɔ̀ múɛ. Kǎà nyɔ ɓěɔ̀ ɖi ma hwɔɔ̀ ɖii-ɖɛ̀ɔ̀ ɓó wé mɛ̀nɛ̌ìn-sɔ̃́ xwíníín. Wa nì ma gbo-kpɔ̃ìn-sàǎ-zàìn-ɖɛ̀ ɓě nyuɛń, ké wa nì ma Bounɓo mɔ̀à wa ɓǎ nììn ɓǎ ɓěɛ̀ Gèɖèpɔ́ɔ̀ kɛɛ zùo poɛń.

Hwɔɔ̀ sɔ̃́ nììnɔ̀

²³ Sɔ̀ìn ɓóɛ gboɛɛ, nyɔ séín ɓěɔ̀ poìn ma wuɖuí, ɓɛ́ wa ké ma hwɔɔ̀ pa ɓó wé mɛ̀nɛ̌ìn-sɔ̃́ ɖò ɖe. Ɔ jèɛɛ, wa pàìn ma hwɔɔ̀ wé mɛ̀nɛ̌ìn-sɔ̃́ ɖò ɖe ɖé múà mú.

²⁴ Ɓó tia ɓaɖaa, Hɛ́sèkádyà mɔ̀à Júɖà-kã̀ǎɔ̀ kɛɛ nyí ma nyɔ séín ɓěɔ̀ ɓìɖǐ ɓíɔ́ táázĩ̀ìn ɖò kè ɓáɖáá táázĩ̀ìn mɛ̀nɛ̌ìn-sɔ̃́ ɓó sáa-zàìn-ɖɛ̀ jè, ké gɔ̌mànà-nyɔ̀ vɛ̀nɛ̀ ɓěɔ̀ nyí ma nyɔ ɓěɔ̀ ɓìɖǐ ɓíɔ́ táázĩ̀ìn ɖò kè ɓáɖáá táázĩ̀ìn ɓaɖa-bùè. Ké sáa-zà-nyɔ̀ ɓěɔ̀ ɓáún-ɓáún hwɔ ma wa mìɔùn mú.

²⁵ Ké Júɖà-nyɔ̀ séín ɓěɔ̀ kè sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ kè nyɔ séín ɓě ɓɛ́ wa sɔ̀ ma ɖé Éézùɖùɛ̀-ɓòɖòɔ̀ kɔ̃ɛ kè ɖíà ɓě ɓɛ́ wa sɔ̀ ma ɖé Éézùɖùɛ̀-ɓòɖòɔ̀ kɔ̃ɛ ɔ kè ɖíà ɓě ɓɛ́ wa nì ma ɖé Júɖà-ɓòɖòɔ̀ kɔ̃ɛɛ séín kpá ma múàǔn nyɛ̀nɛ̀ɛ̀.

²⁶ Múà dyíìn ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú dyi, sepóɛɖé sɔ̀ìn ɖé Sã́ɖómà mɔ̀à Dèɓéɛ̀ dyú-gàà ɓɛ́ ɔ mɔ̀ ma kà Éézùɖùɛ̀-ɓòɖòɔ̀ kã́áɔ̀ kɛɛ nììn tiín nyɛɛ, hwɔ ɓɛ́ kà nìà kɛɛ séè ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú kpá ɖò.

²⁷ Sɔ̀ìn ɓóɛ gboɛɛ, sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ nyànà ma dyi, ké wa po ma nyɔ ɓěɔ̀ mana kɔ̃. Ké Gèɖèpɔ́ɔ̀ wɔ̃́ ma waà wuɖuɔ̀, sepóɛɖé waà ɓaà-wùɖùɔ̀ nyini ɖé dyɔún mɔ̀à ɔ cĩ́-naín hwɛ̀ǐn-hwɛ̀ǐnɔ̀ kɛɛ mú.