2 Kánáníkɔ̀ 29 - Ɓǎsɔ́ɔ̀ Báɓòɔ̀

Hɛ́sèkádyà mɔ̀à Júɖà-kã̀ǎɔ̀ kɛɛ jè

¹ Hɛ́sèkádyà nyuá ma zɔ̃ kpáɖá-nyɔ sè hm̀m̌ ti ɓɛ́ ɔ dè ma kã́á-kũ̀àɔ̀ gbɔ kɛ. Ɔ kɔ̃̀ ma ɓóɖóɔ̀ wuɖuí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓó zɔ̃ kpáɖá-nyɔ sè mɛ̀nɛ̌ìn-hĩinyɛ xwíníín. Ɔ ɖeɛ̀ nyɛ́nɛ́ mɔ̀ ma Àbíjà. Ɔ mɔ̀ ma Zɛ́kɔ̀wáɖádyàà dyú-màà.

² Hɛ́sèkádyà nyu ma ɖɛ dè Bounɓoɔ̀ hwìɖǐiɛ kà ɔ ɓǎ nììn ɓǎ Dèɓé nyuɛ zɔ̃̌ɔ̀ kà kɛ.

Gèɖèpɔ́ɔ̀ gbǒɔ̀ mú-hwɔ-hwɔ

³ Ɖé Hɛ́sèkádyàà ɓóɖó-wuɖuí-kɔ̃̀-zɔ̃̀ɔ̀ kĩ́ín-kĩ́ínɔ̀ dɛ̀nɛ̀ kĩ́ín-kĩ́ínɔ̀ múɛɛ, ɔ kaà ma Bounɓoɔ̀ gbǒɔ̀ wɔ̃ ɓěɔ̀, ké ɔ nɔ̀mɔ̀ìn ma wa dyíin ɖe.

⁴ Ké ɔ poìn ma sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ dyí ɖé gbǒɔ̀ kɔ̃̀pã́ùn hwɔà ɖé dyóɖó-xwáɖáún-wóɖóìn-naínɔ̀ dyíɛɛ mú.

⁵ Ké ɔ cɛ̃ɛ ma wa gbo, ké ɔ ɖá, “Ɖíìváà-nyɔ̀ ɓě, ɓě tò ní wuɖuɔ̀ ɖùǔ gbo. Ɓě hwɔ ɓě mìɔùn mú, ɓɛ́ ɓě ké Bounɓo mɔ̀à ɓě ɓǎ nììn ɓǎ ɓěɛ̀ Gèɖèpɔ́ɔ̀ kɛɛ gbǒɔ̀ mú hwɔ, ɓɛ́ ɓě ké zɛ̀nɛ̌-ɖɛ̀ séín ɖé gbǒ hwɛ̀ǐn-hwɛ̀ǐnɔ̀ mú dyi zà.

⁶ Sepóɛɖé à ɓǎ ɓěɔ̀ se ma Bounɓoɔ̀ kíɖíí síɛń nì ɖe, ké wa ɖǎ Bounɓo mɔ̀à à Gèɖèpɔ́ɔ̀ kɛɛ nàmàǔn bũ̌ nyu. Wa ɖǎ Bounɓoɔ̀ jè dyi táà, ké wa ɖǎ ɔ cĩ́-naínɔ̀ kɔ̃ín pòìn.

⁷ Ké wa ɖǎ gbǒɔ̀ sí-xwíníínɔ̀ kã, ké wa ɖǎ ɖáùnpò ɓěɔ̀ mɔ́ìn. Wa ní fɔ̃ nyɔ́ún-nɔ̀mɔ̀-ɖɛ̀ ɖò ɖe, mɔɔ ké wa ní nyu fɔ̃ɔ-sàǎ-zàìn-ɖɛ̀ ɖò ɓó Éézùɖùɛ̀ Gèɖèpɔ́ɔ̀ bìì, ɖé pá hwɛ̀ǐn-hwɛ̀ǐnɔ̀ mú ɖe.

⁸ Ɔ jèɛɛ, Bounɓoɔ̀ dyoɖoɔ̀ dyià Júɖà-ɓòɖòɛ̀ kè Jùɖúsɛ̀ɖɛ̀ìn-hwɔ̀ɖɔ̀ɛ̀ kɔ̃ɛ̀. Ké ɔ ɖǎ à nyɔ-fã̀àǔn-po-ɖɛ̀ kè nyɔ-díɖí-tàɓàìn-ɖɛ̀ ɔ kè pĩɔ́-dyi-ɓàɖàìn-ɖɛ̀ mú nyu kà ɓě mìɔùn nyuàà dyéɛ kɛ.

⁹ Ɓě dyéɛ kà à ɓǎ ɓě ɖǎ gàsíà dyúa sè, ké à dyú-gàà kè à dyú-màà ɔ kè à gmàà ɓě ɖǎ toɛ̀-kpɔ̃-nyɔ̀ jǔ ɓó ɖɛ nìà kɛ jèɛ.

¹⁰ “Ɓó kàǔn wɛ̃ɛ, ní hwòɖǒ ɖǎa gbɔ po, ɓɛ́ ḿ kè Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ ké wuɖu dè, nìí ɓɛ́ ɔ dyoɖo-hwòɖò ku wɔ̃ɔ̀ ké wáɖá ɓá à jè dyí.

¹¹ Ní ɖíí ɓě, ɓěǐn ɖá ɓɛ́ ɓě ké póɖó nyu, sepóɛɖé Bounɓoɔ̀ ɖǎ ɓě gã, ɓɛ́ ɓě ké ɓó ɔ dyúa dyi nyànà, ɓɛ́ ɓě ké ɔ kũ̀à nyu, ɓɛ́ ɓě ké ɔ bìì sáa zà.”

¹² Hwɛ̀ ké Ɖíìváà-nyɔ̀ ɓěɔ̀ sɔ̀ ma dyí, ɓɛ́ wa ké ma kũ̀àɔ̀ nyu. Wa sɔ̀ ma gbǒ-xwíníín ɖò-ɖò ɓě mú. Nyɔ ɓě sɔ̀ ma Kóhà nììn gbǒ-xwíníínɔ̀ múɛɛ mɔ̀ Máhà ɓɛ́ ɔ mɔ̀ ma Àmásàìɛ̀ dyú-gàà kɛ kè Jóɛ̀ ɓɛ́ ɔ mɔ̀ ma Ázàwíɖíàà dyú-gàà kɛ. Ké nyɔ ɓě sɔ̀ ma Mɛ̀wáɖáwìɖì nììn gbǒ-xwíníínɔ̀ múɛɛ mɔ̀ Kísì ɓɛ́ ɔ mɔ̀ ma Áɖìɛ̀ dyú-gàà kɛ kè Ázàwíɖíà ɓɛ́ ɔ mɔ̀ ma Jɛ́hàɖéòɛ̀ dyú-gàà kɛ. Ké nyɔ ɓě sɔ̀ ma Gésɔ̀ùn nììn gbǒ-xwíníínɔ̀ múɛɛ mɔ̀ Jóàà ɓɛ́ ɔ mɔ̀ ma Zímàà dyú-gàà kɛ kè Ídɛ̃̀ìn ɓɛ́ ɔ mɔ̀ ma Jóàà dyú-gàà kɛ.

¹³ Ké nyɔ ɓě sɔ̀ ma Ɛ̀ɖìzáfàùn nììn gbǒ-xwíníínɔ̀ múɛɛ mɔ̀ Sĩ́wìɖì kè Jɛ̀dyíò. Ké nyɔ ɓě sɔ̀ ma Ásàfì nììn gbǒ-xwíníínɔ̀ múɛɛ mɔ̀ Zɛ́kɔ̀wáɖádyà kè Màtánìà.

¹⁴ Ké nyɔ ɓě sɔ̀ ma Hémàùn nììn gbǒ-xwíníínɔ̀ múɛɛ mɔ̀ Jɛ̀híò kè Símì. Ké nyɔ ɓě sɔ̀ ma Jɛ̀ɖúfùùn nììn gbǒ-xwíníínɔ̀ múɛɛ mɔ̀ Sɛ̀mádyà kè Dyùzíè.

¹⁵ Wa poìn waà ɖíí-gàà ɓěɔ̀ dyí, ké wa hwɔ wa mìɔùn mú, ké wa mu ma ɖé Bounɓoɔ̀ gbǒɔ̀ gbo kà kã́áɔ̀ nyuɛ ma kà wa gbo cɛ̃ɛ dyììn ɖé Bounɓoɔ̀ wuɖuɔ̀ múɛ, ɓɛ́ wa ké ma gbǒɔ̀ xwa nɔ̀mɔ̀ìn.

¹⁶ Ké sáa-zà-nyɔ̀ ɓěɔ̀ mu ma ɖé gbǒɔ̀ mú, ɓɛ́ wa ké ɖé dyi nɔ̀mɔ̀ìn. Ké wa síìn ma zɛ̀nɛ̌-ɖɛ̀ séín ɓě ɓɛ́ wa dyé ma ɖé Bounɓoɔ̀ gbǒɔ̀ múɛɛ píé. Ké Ɖíìváà-nyɔ̀ ɓěɔ̀ ɖú ma wa dyí, ké wa kpa wa ɖé Kídɔ̀nɔ̀-nìɔ̀ wĩín.

¹⁷ Ɓó dɛ̀nɛ̀ kĩ́ín-kĩ́ínɔ̀ wé kĩ́ín-kĩ́ínɔ̀ ɓaɖaa, wa dè ma gbǒɔ̀ xwa nɔ̀mɔ̀ìn gbɔ, ké ɓó dɛ̀nɛ̀ɔ̀ wé mɛ̀nɛ̌ìn-tã nììnɔ̀ ɓaɖaa, wa dyɛ̀ìn ma gbǒɔ̀ sí-xwíníínɔ̀. Ké ɓó wé mɛ̀nɛ̌ìn-tã ɖò xwíníín ɖeɛɛ, wa nɔ̀mɔ̀ìn ma Bounɓoɔ̀ gbǒɔ̀ múin. Ké wa hwɔ ma kũ̀àɔ̀ dyí ɓó dɛ̀nɛ̀ kĩ́ín-kĩ́ínɔ̀ wé ɓaɖa-bùè sè mɛ̀nɛ̌ìn-ɖò nììnɔ̀ ɓaɖa.

Wa zà Bounɓoɔ̀ gbǒɔ̀ xwáɖáún ɖe

¹⁸ Ti ɓɛ́ Ɖíìváà-nyɔ̀ ɓěɔ̀ kè sáa-zà-nyɔ̀ ɓěɔ̀ ɖǎ ma kũ̀àɔ̀ dyí hwɔɛɛ, wa mu ma ɖé Kã́á Hɛ́sèkádyà gbo ɖe, ké wa ɖá, “À ɖǎ Bounɓoɔ̀ gbǒɔ̀ múin nɔ̀mɔ̀ìn hwɔ dà séín, dè sáa-kɔ̃-zàìn-gbààɔ̀ kè kũ̀à-mú-nyùìn-ɖɛ̀ séín ɓáa dyíɛ kè téɓèɖè kɔ̃̀ kɔ̃ ɓɛ́ bɛɖɛɛ̀ kéà nì teeɛ ɔ kè kũ̀à-mú-nyùìn-ɖɛ̀ séín ɓáa dyíɛɛ kɔ̃.

¹⁹ Ké kũ̀à-mú-nyùìn-ɖɛ̀ séín ɓě ɓɛ́ Kã́á Áhàzì zà ma kà ɖé gbǒɔ̀ múin, ké ɔ po ma kà xwáɖáún ɖé ɔ ɓóɖó-wuɖuí-kɔ̃̀-tìɔ̀ mú, ti ɓɛ́ ɔ táà ma kà Bounɓoɔ̀ dyiɛɛ, à ɖǎ wa xwa nɔ̀mɔ̀ìn, ké wa ɖǎ mú hwɛ̀. Gmɔ̀ nɔ̄, wa nì ɓó Bounɓoɔ̀ sáa-kɔ̃-zàìn-gbààɔ̀ dyúa.”

²⁰ Wéɔ̀ nyɔ kɔ ɓó dyíɛɛ gànà-kṹún mɛ̀nɛ̀ɛ̀ kɛɛ, Kã́á Hɛ́sèkádyà sɔ̀ ma dyí, ké ɔ poìn ma nyɔ vɛ̀nɛ̀ ɓě nì ɖé hwɔɖɔɔ̀ múɛɛ dyí, ké wa mu ma ɖé Bounɓoɔ̀ gbǒɔ̀ mú.

²¹ Wa dyà ma ɓìɖǐ ɓíɔ́ mɛ̀nɛ̌ìn-sɔ̃́ kè ɓáɖáá ɓíɔ́ mɛ̀nɛ̌ìn-sɔ̃́ kè ɓáɖáá-dyù mɛ̀nɛ̌ìn-sɔ̃́ ɔ kè vã́á mɛ̀nɛ̌ìn-sɔ̃́, ɓɛ́ wa ké nàmàǔn-sàǎ-zàìn-ɖɛ̀ jǔ ɓó Gèɖèpɔ́ɔ̀ gbǒɔ̀ kè kã́áɔ̀ gbǒ-xwíníín-nyɔ̀ ɓěɔ̀ ɔ kè Júɖà-nyɔ̀ tɔ̀ɔ̀ ɓěɔ̀ bìì. Ké ɔ zà ma sáa-zà-nyɔ̀ ɓě mɔ̀à Eɖóúnɛ̀ xwíníín-dyù ɓěɔ̀ kɛɛ wuɖu kɔ̃, ɓɛ́ wa ké nyúà-ɖɛ̀ ɓěɔ̀ sáa zàìn ɓó Bounɓoɔ̀ sáa-kɔ̃-zàìn-gbààɔ̀ kɔ̃.

²² Ké sáa-zà-nyɔ̀ ɓěɔ̀ ɖáɓá ma ɓìɖǐ ɓíɔ́ ɓěɔ̀, ké wa ɖúɛ ma nyɔmɔɔ̀ dyí, ké wa mɛ́nɛ́ìn ma gbààɔ̀ bũ̌in. Ké wa ɖáɓá ma ɓáɖáá ɓíɔ́ ɓěɔ̀, ké wa mɛ́nɛ́ìn ma nyɔmɔɔ̀ gbààɔ̀ bũ̌in. Ké wa ɖáɓá ma ɓáɖáá-dyù ɓěɔ̀, ké wa mɛ́nɛ́ìn ma nyɔmɔɔ̀ gbààɔ̀ bũ̌in.

²³ Hwɛ̀ ké wa dyà ma vã́á ɓě mɔ̀à nàmàǔn-sàǎ-zàìn-ɖɛ̀ɔ̀ kɛɛ ɖé kã́áɔ̀ kè nyɔ ɓěɔ̀ gbo, ké wa dè ma wa sɔ̃ dúún.

²⁴ Ké sáa-zà-nyɔ̀ ɓěɔ̀ ɖáɓá ma wa, ké wa nyu ma waà nyɔmɔɔ̀ nàmàǔn-sàǎ-zàìn-ɖɛ̀ mú ɓó gbààɔ̀ kɔ̃, ɓɛ́ ɔ ké Júɖà-nyɔ̀ séín ɓěɔ̀ nàmàǔn ɓěɔ̀ kɔ̃in-ɓáìn-ɖɛ̀ jǔ, sepóɛɖé kã́áɔ̀ tò ma wuɖu, ɓɛ́ wa ké fɔ̃ɔ-sàǎ-zàìn-ɖɛ̀ɔ̀ kè nàmàǔn-sàǎ-zàìn-ɖɛ̀ɔ̀ nyu ɓó Júɖà-nyɔ̀ séín ɓěɔ̀ bìì.

²⁵ Sɔ̀ìn ɓóɛ gboɛɛ, kã́áɔ̀ po ma Ɖíìváà-nyɔ̀ ɓěɔ̀ páún ɖé Bounɓoɔ̀ gbǒɔ̀ mú, ké bàɖàsǐ-pĩ̀à ɓě kè gbǎɖí-dù kò-kò ɓě nì wa xwa dyììn ɖé kà Kã́á Dèɓé kè Gáà mɔ̀à ɔ kpáá-ɖɛ̀-dyé-nyɔ̀ɔ̀ kɛ ɔ kè Nétɔ̃̀ mɔ̀à kpáá-ɖɛ̀-cɛ̃-nyɔ̀ɔ̀ kɛɛ nyuɛ zɔ̃̌ɔ̀ kà cɛ̃ɛ kɛ. Bounɓoɔ̀ mɔ̀ nyɔ wùɖùìn zɔ̃̌ɔ̀ ɖé ɔ kpáá-ɖɛ̀-cɛ̃-nyɔ̀ ɓěɛ̀ mú ɓá ɖɛ nìà kɛ jè dyí.

²⁶ Ké Ɖíìváà-nyɔ̀ ɓěɔ̀ kè sáa-zà-nyɔ̀ ɓěɔ̀ nyànà ma waà pá ɓěɔ̀ mú dyi, ké Dèɓéɛ̀ ɓaɖaa-ɖɛ̀ ɓěɔ̀ nì ma Ɖíìváà-nyɔ̀ ɓěɔ̀ xwa, ké sáa-zà-nyɔ̀ ɓěɔ̀ ɓéɖé ma gã̀à ɓě.

²⁷ Hwɛ̀ ké Hɛ́sèkádyà tò ma wuɖu, ɓɛ́ wa ké ma fɔ̃ɔ-sàǎ-zàìn-ɖɛ̀ɔ̀ nyu ɓó gbààɔ̀ kɔ̃. Ké ti ɓɛ́ wa dè ma fɔ̃ɔ-sàǎ-zàìn-ɖɛ̀ɔ̀ nyuɛ gbɔɛɛ, wa ɖú ma Bounɓoɔ̀ wɛ́ɖɛ́ɔ̀ ɓeɖe kpàǐ ɖekè, ké wa ɖú ma gã̀à ɓěɔ̀ kè Dèɓé mɔ̀à Éézùɖùɛ̀-kã̀ǎɔ̀ kɛɛ nììn ɓaɖaa-ɖɛ̀ ɓěɔ̀ ɓaɖa kpàǐ ɖekè.

²⁸ Nyɔ séín ɓěɔ̀ ɓiè ma Bounɓoɔ̀, ké ɓeɖe-nyɔ̀ ɓěɔ̀ ɓeɖe ma, ké wa ɓaɖa ma gã̀à ɓěɔ̀. Wa gã̀ ma ɖɛ ɓěa nyuɛń dyi tee ké wa hwɔ ma fɔ̃ɔ-sàǎ-zàìn-ɖɛ̀ɔ̀ nyuɛ hwɛ̀.

²⁹ Ti ɓɛ́ wa ɖǎ ma sáa zàà hwɔɛɛ, kã́áɔ̀ kè nyɔ séín ɓě nì ma ɓó ɔ gboɛɛ taɓa ma dú hwuɖu, ké wa ɓiè ma Bounɓoɔ̀.

³⁰ Ké Kã́á Hɛ́sèkádyà kè gɔ̌mànà-nyɔ̀ vɛ̀nɛ̀ ɓěɔ̀ cɛ̃ɛ ma Ɖíìváà-nyɔ̀ ɓěɔ̀ gbo, ɓɛ́ wa ké Bounɓoɔ̀ ɓàìn ɖé wɛ́ɖɛ́ ɓɛ́ Kã́á Dèɓé kè Ásàfì mɔ̀à kpáá-ɖɛ̀-dyé-nyɔ̀ɔ̀ kɛɛ céè zɔ̃̌ɔ̀ kà kɛɛ mú. Ké wa ɓàìn ma Bounɓoɔ̀ ɖé wɛ́ɖɛ́-wùɖù mú, ɖé múà mú. Ké wa taɓa ma dú hwuɖu, ké wa ɓiè ma Bounɓoɔ̀.

³¹ Sɔ̀ìn ɓóɛ gboɛɛ, Hɛ́sèkádyà cɛ̃ɛ ma nyɔ ɓěɔ̀ gbo, ké ɔ ɖá, “Ɓě ɖǎ ɓě mìɔùn wáká po ɓó Bounɓoɔ̀ bìì. Ɔ jèɛɛ, ɓě dyi, ɓɛ́ ɓě ké sáa-zàìn-ɖɛ̀ ɓě kè zùo-po-nyìǐ-ɖɛ̀ ɓě ɖé Bounɓoɔ̀ gbǒɔ̀ mú dyà.” Ké nyɔ ɓěɔ̀ dyà ma sáa-zàìn-ɖɛ̀ ɓě kè zùo-po-nyìǐ-ɖɛ̀ ɓě. Ké nyɔ séín kɔ̃̀ hwòɖǒ wɔ̃́ɛɛ dyà ma nyúà-ɖɛ̀ ɓě, ɓɛ́ wa ké fɔ̃ɔ-sàǎ-zàìn-ɖɛ̀ ɓě jǔ.

³² Nyúà-ɖɛ̀ jĩ̀ kà ɓɛ́ nyɔ ɓěɔ̀ dyà ma kɛɛ mɔ̀ ɓìɖǐ ɓíɔ́ kpáɖá-nyɔ tã ɓaɖa-bùè kè ɓáɖáá ɓíɔ́ hɔ̃dɛ̀ɖɛ̀ ɖò ɔ kè ɓáɖáá-dyù hɔ̃dɛ̀ɖɛ̀ sɔ̃́. Ɖɛ séín ɓěa mɔ̀ fɔ̃ɔ-sàǎ-zàìn-ɖɛ̀, ké wa dyàà ma Bounɓoɔ̀.

³³ Wa dyà ma ɓìɖǐ ɓíɔ́ hɔ̃dɛ̀ɖɛ̀ mɛ̀nɛ̌ìn-ɖò kè ɓáɖáá táázĩ̀ìn tã, ɓɛ́ wa ké sáa-zàìn-ɖɛ̀ ɓě jǔ ɖekè.

³⁴ Kɛɛ sáa-zà-nyɔ̀ ɓěɔ̀ se ma dyí vò, ké wa ɖòùn se ma fɔ̃ɔ-sàǎ-zàìn-ɖɛ̀ séín ɓěɔ̀ kúɖúù zàà ɓɛ́ìn, sepóɛɖé sáa-zà-nyɔ̀ ɓěɔ̀ ɖíɛ́ ɓě se ma wa mìɔùn mú hwɔ ɓó kũ̀àɔ̀ jè. Ɔ jèɛɛ, wa ɖíí ɓě mɔ̀à Ɖíìváà-nyɔ̀ ɓěɔ̀ kɛɛ gã̀ ma wa gbo kpáuń dyi tee ké kũ̀àɔ̀ hwɛ̀ ma. Sepóɛɖé Ɖíìváà-nyɔ̀ ɓěɔ̀ kɔ̃̀ hwòɖǒ-dyùà sɛ́ɖɛ́ìn ma dyí ké ɔ zi sáa-zà-nyɔ̀ ɓěɔ̀ dyí ɖé wa mìɔùn wáká po-po mú.

³⁵ Fɔ̃ɔ-sàǎ-zàìn-ɖɛ̀ ɓěɔ̀ zi ma dyí vòɛ̌n mìɔ, dè gbo-kpɔ̃ìn-sàǎ-zàìn-ɖɛ̀ ɓěɔ̀ cánáɔ̀ kè náá-ɖɛ̀-sàǎ-zàìn-ɖɛ̀ ɓě ɓá fɔ̃ɔ-sàǎ-zàìn-ɖɛ̀ ɓěɔ̀ dyíɛɛ kɔ̃. Kǎà wa nyu ma kà ɓó kũ̀à nì ɖé Bounɓoɔ̀ gbǒɔ̀ múɛɛ jè dyí ɖúɛ ɖe.

³⁶ Ké Hɛ́sèkádyà kè nyɔ séín ɓěɔ̀ kpá ma múàǔn, sepóɛɖé Gèɖèpɔ́ɔ̀ kpá ma wa gbo, ké kũ̀àɔ̀ hwɛ̀ ma wàɖà.