2 Kánáníkɔ̀ 28 - Ɓǎsɔ́ɔ̀ Báɓòɔ̀

Áhàzì mɔ̀à Júɖà-kã̀ǎɔ̀ kɛɛ jè

¹ Áhàzì nyuá ma zɔ̃ kpáɖá-nyɔ ti ɓɛ́ ɔ dè ma kã́á-kũ̀àɔ̀ gbɔ kɛ. Ɔ kɔ̃̀ ma ɓóɖóɔ̀ wuɖuí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓó zɔ̃ ɓaɖa-bùè sè mɛ̀nɛ̌ìn-ɖò mú. Ɔ se ma nì kà ɔ ɓǎ nììn ɓǎ Dèɓé nìǒ zɔ̃̌ɔ̀ kà kɛ, sepóɛɖé ɔ se ma ɖɛ dè Bounɓoɔ̀ hwìɖǐiɛɛ nyu.

² Ɔ sí ma Éézùɖùɛ̀-kã̀ǎ ɓěɔ̀ nììn kpeɖe ɓěɔ̀ kíɖíí. Ké ɓó kɔ̃in ɖeɛɛ, ɔ mɛ ma kũùn-kpò ɓě mɔ̀ Béòɛ̀ hwɔìn-ɖɛ̀ kɛ,

³ ké ɔ fɔ̃̀ìn ma nyɔ́ún-nɔ̀mɔ̀-ɖɛ̀ ɖé Hĩ́nɔ̀ Bɔɔ-kpàɔ̀ kɔ̃, ké ɔ zàìn ma ɔ dyú-gàà ɓě sáa ɖé nyɛ-ɓɔ́ɔ́ mú. Ɖɛ ɓěɛ̀ mɔ̀ Bounɓoɔ̀ dyi-nyàìn-kpèɖè ɓě ɓɛ́ ɓóɖó-dù ɓě ɓɛ́ Bounɓoɔ̀ nyuɛ zɔ̃̌ɔ̀ ɓɛ́ Éézùɖùɛ̀-nyɔ̀ ɓěɔ̀ dyi zɔ̃̌ɔ̀ kà wa ɓóɖóɔ̀ kɔ̃ dyi kúmúɛɛ nyu zɔ̃̌ɔ̀ kà kɛ.

⁴ Ké Áhàzì zà ma sáa, ké ɔ fɔ̃̀ìn ma nyɔ́ún-nɔ̀mɔ̀-ɖɛ̀ ɖé kũùn-kpò ɓièìn-naín kò-kò ɓě nìà ɖé toɖo ɓěɔ̀ dya kè ɖé cu gùsùù séín ɓěɔ̀ xwíɖíiɛɛ kɔ̃.

Síwíɖíà-nyɔ̀ ɓěɔ̀ kè Éézùɖùɛ̀-nyɔ̀ ɓěɔ̀ kpa Áhàzì to kɔ̃

^5-6 Sepóɛɖé Kã́á Áhàzì nyu ma Bounɓo mɔ̀à ɔ Gèɖèpɔ́ɔ̀ kɛɛ nàmàǔn bũ̌ jèɛɛ, Bounɓoɔ̀ po ma ɔ Síwíɖíà-kã̀ǎɔ̀ xwaún dyi. Síwíɖíà-nyɔ̀ ɓěɔ̀ ɖu ma ɔ toún, ké wa nyu ma ɔ nyɔ ɓěɔ̀ ɓáún-ɓáún toɛ̀-kpɔ̃-nyɔ̀ mú, ké wa kpa wa ɖé Dìmásìkɔ̀-hwɔ̀ɖɔ̀ɔ̀ mú. Ké Bounɓoɔ̀ po ma ɔ Pɛ́kà ɓɛ́ ɔ mɔ̀ ma Wɛ̀ɖɛ̀máɖídyàà dyú-gàà, ɓɛ́ ɔ mɔ̀ ma Éézùɖùɛ̀-kã̀ǎɔ̀ kɛɛ xwaún dyi ɖekè. Éézùɖùɛ̀-kã̀ǎɔ̀ ɖu ma ɔ toún, ké ɔ ɖáɓá ma Áhàzìɛ̀ nyɔ ɓěɔ̀ ɓáún-ɓáún. Ɔ ɖáɓá ma Júɖà-nyɔ̀ ɓěɔ̀ gàa-zà-nyɔ̀ táázĩ̀ìn hɔ̃dɛ̀ɖɛ̀ ɖò kè táázĩ̀ìn kpáɖá-nyɔ ɓó wé dyúáɖò xwíníín, sepóɛɖé wa ɖǎ Bounɓo mɔ̀à wa ɓǎ nììn ɓǎ ɓěɛ̀ Gèɖèpɔ́ɔ̀ kɛɛ dyi táà jè.

⁷ Ɖé toɔ̀ gboɛɛ, Zíkìɖì ɓɛ́ ɔ mɔ̀ ma gàa-zà-nyɔ̀ ɖò sɔ̀ ɖé Éézùɖùɛ̀-ɓòɖòɔ̀ kɔ̃ɛɛ ɖáɓá ma Mààsédyà ɓɛ́ ɔ mɔ̀ ma kã́áɔ̀ dyú-gàà kɛ kè Àzíɖíkàùn ɓɛ́ ɔ kɔ̃̀ ma nyɔ ɓě nì ɖé kã́á-mú-cĩ́-gbòɔ̀ mú kũ̀à nyuɛń nyɛɛ wuɖuíɛ ɔ kè Ɛ̀kínà ɓɛ́ ɔ mɔ̀ ma nyɔ kɔ ɓó kã́áɔ̀ gbo dyíɛ.

⁸ Ké Éézùɖùɛ̀-gàà ɓěɔ̀ nyu ma Júɖà-nyɔ̀ ɓě mɔ̀à wa ɖíí ɓěɔ̀ kɛɛ màa ɓě kè gàa-dyù ɓě ɔ kè màa-dyù ɓě toɛ̀-kpɔ̃-nyɔ̀ ɓě mú. Wa mɔ̀ ma nyɔ-kpò táázĩ̀ìn hɔ̃dɛ̀ɖɛ̀ sɔ̃́. Ké wa zà ma wa ɖɛ ɓáún-ɓáún xwai, ké wa dyàà ma ɖéɛ Sɛ̀mɛ́ɖìà-hwɔ̀ɖɔ̀ɔ̀ mú.

Ódè mɔ̀ kpáá-ɖɛ̀-cɛ̃-nyɔ̀ kɛɛ jè

⁹ Ti ɓɛ́ Éézùɖùɛ̀-sòjà ɓěɔ̀ nì ma kà toɔ̀ gbo sɔ̀ǔn, ké wa nì ma kà Sɛ̀mɛ́ɖìà-hwɔ̀ɖɔ̀ɔ̀ mú ɖe dyiɛń nyɛɛ, Bounɓoɔ̀ kpáá-ɖɛ̀-cɛ̃-nyɔ̀ ɖò mu ma wa hwìǐ. Ɔ nyɛ́nɛ́ mɔ̀ ma Ódè. Ké ɔ cɛ̃ɛ ma wa gbo, ké ɔ ɖá, “Gmɔ̀ nɔ̄, Bounɓo mɔ̀à ɓě ɓǎ nììn ɓǎ ɓěɛ̀ Gèɖèpɔ́ɔ̀ kɛɛ kpáìn ma Júɖà-nyɔ̀ ɓěɔ̀ dyoɖoún jè, ké ɔ poà wa ɖé ɓě xwaún dyiɛ̀. Kɛɛ ɓě ɖáɓá waà nyɔ ɓáún-ɓáún ɖé ɓěɛ̀ dyoɖo-hwòɖòɔ̀ mú, ké ɖɛ nìà kɛ jè ɖǎ ɖé dyɔún nyini.

¹⁰ Dyéɛ, ɓó kàǔn wɛ̃ɛ, ɓě mɔ́ gàa kè màa ɓě sɔ̀à ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɔ kè ɖé Júɖà-ɓòɖòɔ̀ kɔ̃ɛɛ ɓěɛ̀ gǐì mú nyuɛ dyi. Ɓě mɔ̀ùn séè Bounɓo mɔ̀à ɓěɛ̀ Gèɖèpɔ́ɔ̀ kɛɛ nàmàǔn bũ̌ nyu ɖò ɖekèe?

¹¹ Ɓě wɔ̃́ ɖɛ ḿ cɛ̃à kɛɛ múin, ɓɛ́ ɓě ké ɓě ɖíí ɓě ɓɛ́ ɓě ɖǎà toɛ̀-kpɔ̃-nyɔ̀ mú nyuɛɛ ɖe ɖoɓo, sepóɛɖé ɓě seɛ náa nyuín, Bounɓoɔ̀ dyoɖo-hwòɖò ku wɔ̃ɔ̀ mu ɓě kɔ̃ dyiìn.”

¹² Ɓó tia ɓaɖaa, nyɔ vɛ̀nɛ̀ ɖíɛ́ ɓě nì ma ɖé Éézùɖùɛ̀-nyɔ̀ ɓěɔ̀ hwìɛ̀ kɛɛ ɓàɖàìn ma nyɔ ɓě nì ma kà toɔ̀ gbo sɔ̀ǔn wɛ̃ɛ dyí ɖekè. Wa mɔ̀ Ázàwíɖíà ɓɛ́ ɔ mɔ̀ ma Jɛ́hòhánàà dyú-gàà kɛ kè Bɛ̀wéɖékìà ɓɛ́ ɔ mɔ̀ ma Mɛ́sìɖémɔ̀ɛ̀ dyú-gàà kɛ kè Jɛ́hìkíà ɓɛ́ ɔ mɔ̀ ma Sáɖùùnɛ̀ dyú-gàà kɛ ɔ kè Àmásà ɓɛ́ ɔ mɔ̀ ma Háɖàìɛ̀ dyú-gàà kɛ.

¹³ Wa cɛ̃ɛ ma wa gbo, ké wa ɖá, “Ɓěǐn ɖá ɓɛ́ ɓě ké nɔ̄ toɛ̀-kpɔ̃-nyɔ̀ ɓěɔ̀ dyà, sepóɛɖé ɓě dyiɛ náa nyuín, nìí, ɓě mu zaa-dúún-wáɖá-wáɖá sɔ̀ìn ɖé Bounɓoɔ̀ gboɛɛ à kɔ̃ dyàùn ɓó à nàmàǔn ɓě kɔ̃̀ zaa-dúún-wáɖá-wáɖá nìà à ɖɔɛɛ kɔ̃in ɖe. Zɔ̃́ín-dúún-wáɖá-wáɖá nìà à ɖɔɛɛ ɖǎ kpéín ɓúáuń zi mìɔ, ké Bounɓoɔ̀ dyoɖo nì à mɔ̀ Éézùɖùɛ̀-nyɔ̀ ɓěɛ̀ kɔ̃ɛɛ ku wɔ̃ mìɔ.”

¹⁴ Ɔ jèɛɛ, sójà ɓěɔ̀ sè ma toɛ̀-kpɔ̃-nyɔ̀ ɓěɔ̀ kè to-gbo-zà-ɖɛ̀ ɓěɔ̀ ɓó nyɔ vɛ̀nɛ̀ ɓěɔ̀ kè nyɔ séín ɓěɔ̀ gbo.

¹⁵ Ké nyɔ vɛ̀nɛ̀ ɓěɔ̀ sɔ̀ ma dyí, ké wa ɖú ma toɛ̀-kpɔ̃-nyɔ̀ ɓěɔ̀ kè to-gbo-zà-ɖɛ̀ ɓěɔ̀ dyí, ké wa po ma nyɔ séín ɓě nì ma toɛ̀-kpɔ̃-nyɔ̀ ɓěɔ̀ hwìɛ̀ ké wa fɔ̀nɔ̀ ma múin nyɛɛ ɖɔún, ké wa po ma wa bǎ ɓoún, ké wa nyí ma wa ɖii-ɖɛ̀ kè náá-ɖɛ̀ ɔ kè kũùn. Ké wa ɓéɖéìn ma nyɔ séín ɓě hwɛ̀ kpéíɛɛ jǎkasì kɔ̃ún, ké wa kpa wa ɖé waà ɓíɖí-nyɔ̀ ɓěɔ̀ gbo ɖe ɖé Jɛ́ɖèkóò mɔ̀à Hwɛ̃-Gbǎ-hwɔ̀ɖɔ̀ɔ̀ kɛɛ mú. Hwɛ̀ ké wa kɔ́ìn ɖe, ké wa mu ma ɖé Sɛ̀mɛ́ɖìà-hwɔ̀ɖɔ̀ɔ̀ mú.

Áhàzì zɔ̀ìn Àsíwíɖíà-nyɔ̀ ɓěɔ̀ gbo-kpá-kpá

¹⁶ Ɓó tia ɓaɖaa, Kã́á Áhàzì ɖoɓo ma kíá ɖé Àsíwíɖíà-kã̀ǎɔ̀ gbo, ɓɛ́ ɔ ké ɔ gbo kpá.

¹⁷ Sepóɛɖé Íɖɔ̀ùn-nyɔ̀ ɓěɔ̀ dyà ma Júɖà-ɓòɖòɔ̀ to kɔ̃ ɖe, ké wa ɖuɛ ma toún, ké wa kpa ma toɛ̀-kpɔ̃-nyɔ̀ ɓě.

¹⁸ Ɓó kɔ̃in ɖeɛɛ, Féɖésìà-nyɔ̀ ɓěɔ̀ hwu ma Júɖà-hwɔ̀ɖɔ̀ ɓě nìà ɖé bɔɔ-kpà hwɔà ɖé Júɖà Toɖo-ɓòɖòɔ̀ dyóɖó-dyi-kpáìn-naínɔ̀ dyíɛɛ kɔ̃ kè ɖé Nɛ́gà-ɓòɖòɔ̀ kɔ̃ɛ, ké wa ɖú ma hwɔɖɔ ɓě mɔ̀ Bɛ̀-Sɛ́mɛ̀ kè Àjáɖɔ̀ùn kè Gèɖéwòɖò kè Sóókò kèɛ̀ hwɔɖɔ-kpàǎ ɓěɔ̀ kè Tímínà kèɛ̀ hwɔɖɔ-kpàǎ ɓěɔ̀ ɔ kè Gĩ́zò kèɛ̀ hwɔɖɔ-kpàǎ ɓěɔ̀ kɛɛ dyí, ké wa cĩ́ ma ɖé wa mú.

¹⁹ Bounɓoɔ̀ po ma Júɖà-ɓòɖòɔ̀ ɓíɖíi dyi, sepóɛɖé Áhàzì mɔ̀à Júɖà-kã̀ǎɔ̀ kɛɛ po ma ɖɛ-gbà-nyu-nyu kpéí ɖé Júɖà-ɓòɖòɔ̀ kɔ̃, ké ɔ táà ma Bounɓoɔ̀ kíɖíí sí jè dyi fɔɔ cá jè.

²⁰ Ɔ jèɛɛ, Tígàɖà-Pìɖɛ́sɛ̀ mɔ̀à Àsíwíɖíà-kã̀ǎɔ̀ kɛɛ dyà ma ɔ to kɔ̃. Ɔ se ɔ gbo kpáuń dyi.

²¹ Áhàzì zà ma ɖɛ ɓě ɖé Bounɓoɔ̀ gbǒɔ̀ mú kè ɖé kã́á-mú-cĩ́-gbòɔ̀ mú ɔ kè ɖé gɔ̌mànà-nyɔ̀ vɛ̀nɛ̀ ɓěɔ̀ gbǒ ɓěɔ̀ mú, ké ɔ nyí wa Àsíwíɖíà-kã̀ǎɔ̀ dyɛo, kɛɛ ɔ se ɔ gbo kpá.

Áhàzìɛ̀ nàmàǔn ɓěɔ̀ jè

²² Ɖé Áhàzìɛ̀ fũ̀à-fṹá-tìɔ̀ múɛɛ, púɛɛ, dyɛ̌ɛ̀ ɔ pòàǐn Bounɓoɔ̀ kɔ̃ín ɖe mìɔ.

²³ Ɔ zà ma sáa ɖé Síwíɖíà-nyɔ̀ ɓěɔ̀ gèɖèpɔ́ɔ̀ ɓě ɓɛ́ wa ɖu ma kà wa toún wɛ̃ɛ gbo. Ɔ ɖá, “Kà ɓɛ́ Síwíɖíà-kã̀ǎ ɓěɔ̀ gèɖèpɔ́ɔ̀ ɓěɔ̀ kpáà wa gboɛɛ, ní mu wa gbo sáa zàùn, ɓɛ́ wa ké mɔ́ún gbo kpá ɖekè.” Kɛɛ wa mɔ̀ nyɔ gbɔɔ̀ ma ɔ kè Júɖà-nyɔ̀ séín ɓěɔ̀ mú.

²⁴ Ɓó kɔ̃in ɖeɛɛ, Áhàzì poìn ma ɖɛ ɓě nì ma ɖé Gèɖèpɔ́ɔ̀ gbǒɔ̀ múɛɛ dyí, ké ɔ wàìn wa dyi, ké ɔ kã Gèɖèpɔ́ɔ̀ gbǒɔ̀, ké ɔ nyu ma sáa-kɔ̃-zàìn-gbàà ɓě ɓó ɔ mìɔùn bìì, ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ gã séín gbo.

²⁵ Ké ɔ nyu ma kũùn-kpò ɓièìn-naín ɓě ɖé toɖo ɓě dya, ɖé Júɖà-hwɔ̀ɖɔ̀ séín mú, ɓɛ́ ɖé ké sáa-zàìn-naín jǔ ɓó gèɖèpɔ́ɔ̀ kà kò ɖò ɓě bìì. Ɖɛ nìà kɛ po ma Bounɓo mɔ̀à ɔ ɓǎ nììn ɓǎ ɓěɛ̀ Gèɖèpɔ́ɔ̀ kɛɛ dyoɖoún.

²⁶ Ɖɛ tɔ̀ɔ̀ séín ɓɛ́ Áhàzì nyu ma kɛɛ, sɔ̀ìn ɖéɛ dè gbɔɔ̀ mú kéɛ mánáín-hwɛ̀ìn-naín dyɛ̀ìn nyɛɛ, wa jè céè ɖé Júɖà-kã̀ǎ ɓěɔ̀ kè Éézùɖùɛ̀-kã̀ǎ ɓěɔ̀ kpáá-ɖɛ̀-sùà-cèè-ɖɛ̀ɔ̀ mú.

²⁷ Ké Áhàzì mu ma ɔ ɓǎ ɓě gbo, ké wa zà ma ɔ dyóɖóún ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Wa se ma ɔ ɖé Júɖà-kã̀ǎ ɓěɔ̀ nììn kú-toɖoɔ̀ mú dyóɖóún zàìn. Ké ɔ dyú-gàà kɔ̃̀ nyɛ́nɛ́ mɔ̀ Hɛ́sèkádyà kɛɛ mɔ̀ ma kã́á ɓó ɔ bɛ̃̌ǐn.