2 Kánáníkɔ̀ 27 - Ɓǎsɔ́ɔ̀ Báɓòɔ̀

Jótàùn mɔ̀à Júɖà-kã̀ǎɔ̀ kɛɛ jè

¹ Jótàùn nyuá ma zɔ̃ kpáɖá-nyɔ sè hm̀m̌ ti ɓɛ́ ɔ dè ma kã́á-kũ̀àɔ̀ gbɔ kɛ. Ɔ kɔ̃̀ ma ɓóɖóɔ̀ wuɖuí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓó zɔ̃ ɓaɖa-bùè sè mɛ̀nɛ̌ìn-ɖò xwíníín. Ɔ ɖeɛ̀ nyɛ́nɛ́ mɔ̀ ma Jɛ̀wúɖúsà. Ɔ mɔ̀ ma Záɖòɛ̀ dyú-màà.

² Jótàùn nyu ma ɖɛ dè Bounɓoɔ̀ hwìɖǐiɛ kà ɔ ɓǎ Dyùzíà nyuɛ ma kà kɛ, kɛɛ ɔ se ma ɖé Bounɓoɔ̀ gbǒɔ̀ mú wáɖáìn, ɓɛ́ ɔ ké nyɔ́ún-nɔ̀mɔ̀-ɖɛ̀ fɔ̃ kà ɔ ɓǎ nyuɛ ma kà kɛ. Kɛɛ nyɔ ɓěɔ̀ nì ma hwòɖǒ-kɔ̃in-nyìnììn-ɖɛ̀ ɓě xwai nyuɛń ke.

³ Ti ɓɛ́ Jótàùn mɔ̀ ma kã́á kɛɛ, ɔ po ma Bounɓoɔ̀ gbǒɔ̀ gmɔ-wɔ̃̀ hwɔà ɖé xwía dyíɛɛ ɖe, ké ɔ po ma Ófɛ̀-tòɖòɔ̀ gmɔɔ̀ dà ɓáún-ɓáún ɖe.

⁴ Ké ɓó kɔ̃in ɖeɛɛ, ɔ dè ma hwɔɖɔ ɓě ɖé Júɖà Toɖo-ɓòɖòɔ̀ kɔ̃, ké ɔ po ma to-pèɖèìn-naín ɓě kè gbǒ tɔ̀mɔ̀ dya ɓě ɖé xwáɖá-kpòò ɓě mú.

⁵ Ké ɔ vɔ̃ ma Ámànà-kã̀ǎɔ̀ kè ɔ nyɔ ɓěɔ̀ gbo, ké ɔ ɖu ma wa toún, ké wa pɛ́ɛ̀ìn ma ɔ tácì dyéɖéín ɓó zɔ̃ɔ̀ xwíníín. Tácìɔ̀ mɔ̀ ma séɓàɖà kɔ̃̀ xwa-ku-ku mɔ̀ pṹá-dyèɖè táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ hm̀m̌ wɛ̃ kè hwítì gbǎ-wĩín-wè táázĩ̀ìn hɔ̃dɛ̀ɖɛ̀ sɔ̃́ ɔ kè báɖè gbǎ-wĩín-wè táázĩ̀ìn hɔ̃dɛ̀ɖɛ̀ sɔ̃́. Ké wa pɛ́ɛ̀ ma jĩ̀ náa ɖò ɖe ɓó zɔ̃ɔ̀ nyɔ kɔ ɓó dyíɛɛ xwíníín, ké kà dyúáɖòɔ̀ kǎà wa nyuɛ ma ɓó zɔ̃ɔ̀ tã nììnɔ̀ xwíníín ɖekè.

⁶ Ké Jótàùn nìǎ ma kpé ɓéɖéɛń mìɔ, sepóɛɖé ɔ sí ma Bounɓo mɔ̀à ɔ Gèɖèpɔ́ɔ̀ kɛɛ kíɖíí kóɖó-kóɖó.

⁷ Ɖɛ tɔ̀ɔ̀ séín ɓɛ́ Jótàùn nyu ma kɛ kè to séín ɓɛ́ ɔ vɔ̃ɛɛ, wa jè céè ɖé Éézùɖùɛ̀-kã̀ǎ ɓěɔ̀ kè Júɖà-kã̀ǎ ɓěɔ̀ kpáá-ɖɛ̀-sùà-cèè-ɖɛ̀ɔ̀ mú.

⁸ Ɔ nyuá ma zɔ̃ kpáɖá-nyɔ sè hm̀m̌ ti ɓɛ́ ɔ dè ma kã́á-kũ̀àɔ̀ gbɔɛ, ké ɔ kɔ̃̀ ma ɓóɖóɔ̀ wuɖuí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓó zɔ̃ ɓaɖa-bùè sè mɛ̀nɛ̌ìn-ɖò mú.

⁹ Ké Jótàùn mu ma ɔ ɓǎ ɓě gbo, ké wa zà ma ɔ dyóɖóún ɖé Dèɓé ɓíɖí-hwɔ̀ɖɔ̀ɔ̀ mú. Ké ɔ dyú-gàà kɔ̃̀ nyɛ́nɛ́ mɔ̀ Áhàzì kɛɛ mɔ̀ ma kã́á ɓó ɔ bɛ̃̌ǐn.