2 Kánáníkɔ̀ 26 - Ɓǎsɔ́ɔ̀ Báɓòɔ̀

Dyùzíà mɔ̀à Júɖà-kã̀ǎɔ̀ kɛɛ jè

¹ Sɔ̀ìn ɓóɛ gboɛɛ, Júɖà-nyɔ̀ séín ɓěɔ̀ ɖú ma Dyùzíà ɓɛ́ ɔ nyuá ma zɔ̃ ɓaɖa-bùè sè mɛ̀nɛ̌ìn-ɖòɛɛ dyí, ké wa nyu ɔ kã́á mú ɓó ɔ ɓǎ Àmàzíà bɛ̃̌ǐn.

² Ɔ mɔ̀ nyɔ po ma Éɖàà-hwɔ̀ɖɔ̀ɔ̀ ɖe sɔ̀ìn ɓó ti ɓɛ́ Àmàzíà ɖǎ ma mɛ́ɛ, ké ɔ nyíɛ ma Júɖà-nyɔ̀ ɓěɔ̀ ɖe.

³ Dyùzíà nyuá ma zɔ̃ ɓaɖa-bùè sè mɛ̀nɛ̌ìn-ɖò ti ɓɛ́ ɔ dè ma kã́á-kũ̀àɔ̀ gbɔ kɛ. Ɔ kɔ̃̀ ma Júɖà-ɓòɖòɔ̀ wuɖuí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓó zɔ̃ kpáɖá-nyɔ sɔ̃́ ɓaɖa-bùè sè sɔ̃́ xwíníín. Ɔ ɖeɛ̀ nyɛ́nɛ́ mɔ̀ ma Jɛ̀kóɖídyà. Ɔ mɔ̀ ma Jùɖúsɛ̀ɖɛ̀ìn-màà.

⁴ Dyùzíà nyu ma ɖɛ dè Bounɓoɔ̀ hwìɖǐiɛ kà ɔ ɓǎ Àmàzíà nyuɛ ma kà kɛ.

⁵ Ɔ sí ma Gèɖèpɔ́ɔ̀ kíɖíí kóɖó-kóɖó ti ɓɛ́ Zɛ́kɔ̀wáɖádyà nì ma toɖo kɔ̃ɛ, sepóɛɖé Zɛ́kɔ̀wáɖádyà tɛ̀mɛ̀ìn ma ɔ kà nyɔ ké Gèɖèpɔ́ɔ̀ dyi fɛ̃̀ìn nyuɛ. Ké ti ɔ sí ma Gèɖèpɔ́ɔ̀ kíɖííɛɛ, Gèɖèpɔ́ɔ̀ nyuɛ ké ɔ nyuu-ɖɛ̀ séín wóɖó ma gbɔ̀ɖɔ̀.

⁶ Wé ɖòɛ̀ ɓaɖaa, Dyùzíà kpa ma Féɖésìà-nyɔ̀ ɓěɔ̀ to kɔ̃, ké ɔ wáɖá ma gmɔ ɓě nì ma Gátì-hwɔ̀ɖɔ̀ɔ̀ kè Jánè-hwɔ̀ɖɔ̀ɔ̀ ɔ kè Áɖò-hwɔ̀ɖɔ̀ɔ̀ ɖeiɛ. Ké ɔ dè ma hwɔɖɔ ɓě ɖé Áɖò-hwɔ̀ɖɔ̀ɔ̀ wáún kè ɖé Féɖésìà-ɓòɖò gànáɔ̀ kɔ̃.

⁷ Gèɖèpɔ́ɔ̀ kpá ma ɔ gbo, ké ɔ ɖu ma Féɖésìà-nyɔ̀ ɓěɔ̀ kè Àwéɖéɓìà-nyɔ̀ ɓě ɓɛ́ wa cĩ́ ma ɖé Gúɔ̀-Béò-hwɔ̀ɖɔ̀ɔ̀ múɛ ɔ kè Mɛ̀dyúnì-nyɔ̀ ɓěɔ̀ toún.

⁸ Ké Ámànà-nyɔ̀ ɓěɔ̀ pɛ́ɛ̀ìn ma Dyùzíà tácì dyéɖéín. Ké ɔ nyɛ́nɛ́ mu ma ké ɔ dyɛ̀ìn Íjè-ɓòɖòɔ̀, sepóɛɖé ɔ kpé ɓúá ma dyí mìɔ.

⁹ Ké ɓó kɔ̃in ɖeɛɛ, Dyùzíà po ma hwɔɖɔ-dyí-gmɔ̀ìn-gbò ɓě ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Ɔ po ma ɖò ɓó Gã-Kɔ̃-gmɔ̀-wɔ̃̀ɔ̀ wáún, ké ɔ po ma ɖò ɓó Bɔɔ-Kpà-gmɔ̀-wɔ̃̀ɔ̀ wáún, ké ɔ po ma ɖò ɓó dɛ̀ ɓɛ́ gmɔɔ̀ kíɖí ma múɛ, ké ɔ kùìn ma wa dyi.

¹⁰ Ké ɔ po gbǒ tɔ̀mɔ̀ dya ɓě ɖé Júɖà Gbǎùn-fúɖúáɔ̀ kɔ̃. Ké ɔ ɓúɖú ma ní-ɓì ɓáún-ɓáún, sepóɛɖé ɔ ɓéɖé ma nyúà-ɖɛ̀ kúɖúú ɖé bɔɔ-kpà hwɔà ɖé Júɖà Toɖo-ɓòɖòɔ̀ dyóɖó-dyi-kpáìn-naínɔ̀ dyíɛ kè Júɖà Bɔɔ-kpàɔ̀ kɔ̃. Ké ɔ ɓéɖé ma geɖe-nyu-nyɔ̀ ɓě kè géɖéè-gbǎ xwa-nɔ̀mɔ̀ìn-nyɔ̀ ɓě ɖé toɖo ɓěɔ̀ dyai kè ɖé ɓóɖóɔ̀ bã dà ɓěɔ̀, sepóɛɖé ɔ ɖɛ̀ɓɛ̀ ɖɛ-ɓá-ɓá mú.

¹¹ Ɓó kɔ̃in ɖeɛɛ, Dyùzíà ɓéɖé ma sójà ɓě ɓɛ́ wa ɓɛ́ìn to vɔ̃ɔ kɛ. Ké Jɛ̀dyíò ɓɛ́ ɔ mɔ̀ sójà ɓěɔ̀ céè-ɖɛ̀ céè-nyɔ̀ɛ kè Mààsédyà ɓɛ́ ɔ mɔ̀ Jɛ̀dyíòɛ̀ sɔ̃-xwíɖíi-dè-nyɔ̀ kɛɛ zɛɖɛ ma sójà ɓěɔ̀, ké wa po wa kpoo ɓě mú. Hánàníà ɓɛ́ ɔ mɔ̀ kã́áɔ̀ gɔ̌mànà-nyɔ̀ vɛ̀nɛ̀ ɓěɔ̀ ɖòɛɛ mɔ̀ ma sójà séín ɓěɔ̀ nyɔ vɛ̀nɛ̀.

¹² Ké gàa táázĩ̀ìn sɔ̃́ kè hɔ̃dɛ̀ɖɛ̀ mɛ̀nɛ̌ìn-ɖò ɓɛ́ wa mɔ̀ gbǒ-xwíníín ɓěɔ̀ nyɔ vɛ̀nɛ̀ ɓěɛɛ kɔ̃̀ ma sójà ɓěɔ̀ wuɖuí.

¹³ Wa kɔ̃̀ ma sójà táázĩ̀ìn hɔ̃dɛ̀ɖɛ̀ tã kè táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ hm̀m̌ wuɖuí. Wa mɔ̀ gàa-zà-nyɔ̀ ɓě ɓɛ́ìn kã́áɔ̀ gbo kpáa ɓó ɔ mú-nyɛ́-nyɔ̀ ɓěɔ̀ gbo vɔ̃ jèɛ.

¹⁴ Ké Dyùzíà nyu ma dyí-zĩ̀ìn-ɖɛ̀ ɓě kè ɖí ɓě kè dú-dèìn-gbàǎ ɓě kè nɛɛ̀-kpà-wàɖǎ-ɖɔ̀ ɓě kè pɔnɔ ɓě ɔ kè sɔ́ɔ́-kpò ɓě wa ké bǒ mú poɛɛ ɓó sójà ɓěɔ̀ bìì.

¹⁵ Ké ɔ po ma màzĩ́ìn ɓě ɓɛ́ nyɔ ɓě ɓɛ́ wa cɛ̃̀ xwíníín dyiɛɛ nyu ma kɛɛ ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓɛ́ wa ké ɖé hwɔɖɔ-dyí-gmɔ̀ìn-gbò ɓěɔ̀ dya nì, ɔ kè ɖé gmɔɔ̀ gã ɓěɔ̀ kɔ̃, ɓɛ́ wa ké sé-kpìì ɓě kè sɔ́ɔ́-kpò vɛ̀nɛ̀-vɛ̀nɛ̀ ɓě po-nyɔ̀ jǔ. Dyùzíà nyɛ́nɛ́ mu ma ní mìɔ ɖé dà séín, sepóɛɖé Gèɖèpɔ́ɔ̀ gã̀ ma ɔ gbo kpáuń dyi tee cá ké ɔ ɓéɖé ma kpé.

Gèɖèpɔ́ɔ̀ tò Dyùzíà gǎ kɔ̃ ɓó ɔ mìɔùn dyií ɖú jè

¹⁶ Ti ɓɛ́ Kã́á Dyùzíà ɖǎ ma kpé ɓéɖéɛɛ, púɛɛ, ɔ ɖú ma ɔ mìɔùn dyií ɖú kpàǐ. Ɖɛ nìà kɛ dyà ma ɔ mú-gbɔɔ̀-gbɔɔ̀. Ɔ táà ma Bounɓo mɔ̀à ɔ Gèɖèpɔ́ɔ̀ kɛɛ dyi jèɛɛ, wé ɖòɛ̀ ɓaɖaa, ɔ wáɖáìn ma ɖé Bounɓoɔ̀ gbǒɔ̀ mú, ɓɛ́ ɔ ké nyɔ́ún-nɔ̀mɔ̀-ɖɛ̀ ɓó gbàà kɔ̃̀ kɔ̃ mɔ̀à nyɔ́ún-nɔ̀mɔ̀-ɖɛ̀ fɔ̃̀ìn-naínɔ̀ kɛɛ kɔ̃ fɔ̃̀ìn.

¹⁷ Kɛɛ Ázàwíɖíà mɔ̀à sáa-zà-nyɔ̀ vɛ̀nɛ̀ɔ̀ kɛ kè sáa-zà-nyɔ̀ kpáɖá-nyɔ hĩinyɛ ɓɛ́ wa mɔ̀ ma hwòɖǒ-ku-nyɔ̀ ɓěɛɛ sí ma ɔ kíɖíí,

¹⁸ ké wa wáɖá ma kã́áɔ̀ ɔ ɖɛ gbàɔ̀ dyí. Wa cɛ̃ɛ ma ɔ gbo, ké wa ɖá, “Dyùzíà, Bounɓoɔ̀ bìì nyɔ́ún-nɔ̀mɔ̀-ɖɛ̀ fɔ̃-fɔ̃ɔ̀ se nì kũ̀à. Ɔ mɔ̀ sáa-zà-nyɔ̀ ɓě mɔ̀à Eɖóúnɛ̀ xwíníín-dyù ɓěɔ̀ kɛɛ kũ̀à. Wa mɔ̀ nyɔ ɓě ɓɛ́ Gèɖèpɔ́ɔ̀ ɖǎ wáká po ɓó nyɔ́ún-nɔ̀mɔ̀-ɖɛ̀ fɔ̃ jèɛ. Sɔ̀ pá hwɛ̀ǐn-hwɛ̀ǐn nìà kɛ mú, sepóɛɖé m̀ ɖǎ ɖɛ gbà nyu. Ɖɛ nìà kɛ seɛ nyuɛ ɓɛ́ìn ɓɛ́ Bounɓo Gèɖèpɔ́ɔ̀ ké m̀ dya dè.”

¹⁹ Ɓó tia ɓaɖaa, nyɔ́ún-nɔ̀mɔ̀-ɖɛ̀ mú-fɔ̃̀ìn-ɖɛ̀ ɖò nì ma ɔ xwaún, ɓɛ́ ɔ ké ma nyɔ́ún-nɔ̀mɔ̀-ɖɛ̀ fɔ̃ ɓó gbààɔ̀ kɔ̃, ké ɔ kpá ma dyoɖoún. Ké ti ɓɛ́ ɔ kpáìn ma sáa-zà-nyɔ̀ ɓěɔ̀ dyoɖoún wɛ̃ɛ, púɛɛ, caà wáɖá ma ɔ dyúa-kpàɔ̀ kɔ̃ ɓó sáa-zà-nyɔ̀ ɓěɔ̀ dyéɖé waí, ɖé Bounɓoɔ̀ gbǒɔ̀ mú, ɓó gbàà kɔ̃̀ kɔ̃ mɔ̀à nyɔ́ún-nɔ̀mɔ̀-ɖɛ̀ fɔ̃̀ìn-naínɔ̀ kɛɛ wáún.

²⁰ Ké Ázàwíɖíà mɔ̀à sáa-zà-nyɔ̀ vɛ̀nɛ̀ɔ̀ kɛ kè sáa-zà-nyɔ̀ tɔ̀ɔ̀ ɓěɔ̀ gmɔ̀ ma ɔ dya, ké wa dyéɛ kà caà wáɖá ma ɔ dyúa-kpàɔ̀ kɔ̃ kɛ. Púɛɛ, wa po ma ɔ píé wàɖà. Ɔ mìɔùn fṹà ma, ɓɛ́ ɔ ké sí wàɖà, sepóɛɖé Bounɓoɔ̀ ɖǎ ɔ gǎ kɔ̃ tò.

²¹ Ké Kã́á Dyùzíà mɔ̀ ma caà-nyɔ̀ ké ɔ dyɛ̀ìn ɔ gĩɔ-tì. Ɔ mɔ̀ ma caà-nyɔ̀ jèɛɛ, ɔ ɖòùn cĩ́ ma gbǒ ɖò mú. Ɔ se ma ɖé Bounɓoɔ̀ gbǒɔ̀ mú muɛ ɓɛ́ìn ɖe. Ké ɔ dyú-gàà kɔ̃̀ nyɛ́nɛ́ mɔ̀ Jótàùn kɛɛ kɔ̃̀ ma kã́á-gbòɔ̀ wuɖuí, ké ɔ kɔ̃̀ ma Júɖà-ɓòɖòɔ̀ wuɖuí ɖekè.

²² Ɖɛ tɔ̀ɔ̀ séín ɓɛ́ Dyùzíà nyu ma kɛɛ, sɔ̀ìn dè gbɔɔ̀ mú kéɛ mánáín-hwɛ̀ìn-naín dyɛ̀ìn nyɛɛ, Àzédyà ɓɛ́ ɔ mɔ̀ ma Ámɔ̀zìɛ̀ dyú-gàà, ɓɛ́ ɔ mɔ̀ ma kpáá-ɖɛ̀-cɛ̃-nyɔ̀ kɛɛ céè wa céè-ɖɛ̀ ɖò mú.

²³ Ké Dyùzíà mu ma ɔ ɓǎ ɓě gbo, kɛɛ wa se ma ɔ ɖé kã́á ɓěɔ̀ nììn kú-toɖoɔ̀ mú dyóɖóún zàìn, sepóɛɖé wa ɖá, “Ɔ mɔ̀ caà-nyɔ̀.” Ɔ jèɛɛ, wa zàìn ma ɔ dyóɖóún ɖé pá ɓɛ́ kã́á ɓěɔ̀ kɔ̃̀ ma kɛɛ mú. Ké ɔ dyú-gàà Jótàùn mɔ̀ ma kã́á ɓó ɔ bɛ̃̌ǐn.