2 Kánáníkɔ̀ 25 - Ɓǎsɔ́ɔ̀ Báɓòɔ̀

Àmàzíà mɔ̀à Júɖà-kã̀ǎɔ̀ kɛɛ jè

¹ Àmàzíà nyuá ma zɔ̃ kpáɖá-nyɔ sè hm̀m̌ ti ɓɛ́ ɔ dè ma kã́á-kũ̀àɔ̀ gbɔɛ. Ɔ kɔ̃̀ ma Júɖà-ɓòɖòɔ̀ wuɖuí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓó zɔ̃ kpáɖá-nyɔ sè mɛ̀nɛ̌ìn-hĩinyɛ xwíníín. Ɔ ɖeɛ̀ nyɛ́nɛ́ mɔ̀ ma Jɛ́hòádyàùn. Ɔ mɔ̀ ma Jùɖúsɛ̀ɖɛ̀ìn-màà.

² Àmàzíà nyu ma ɖɛ dè Bounɓoɔ̀ hwìɖǐiɛ, kɛɛ ɔ seɛ ma nyu hwòɖǒɛ̀-ɖé-hwɛ̀-kà.

³ Ti ɓɛ́ kã́á-kpèɔ̀ ɖǎ ma Àmàzíà xwaún dyi kpá nɔ̀mɔ̀ dyíin nyɛɛ, ɔ ɖáɓá ma gɔ̌mànà-nyɔ̀ ɓě ɓɛ́ wa ɖáɓá ma kà ɔ ɓǎ kɛɛ ní.

⁴ Kɛɛ ɔ se ma wa nììn dyú ɓě ɖáɓá, sepóɛɖé Bounɓoɔ̀ dè ma ɖɛ nì náa gma dyí dyììn ɖé Mózè mú. Gma-cèè-ɖɛ̀ɔ̀ ɖá, “Ɓǎ ɓě mɛ ɓɔ́ mɛ́ɛ ɓó waà dyú ɓěɛ̀ nàmàǔn jè, ké dyú ɓě mɛ ɓɔ́ mɛ́ɛ ɓó waà ɓǎ ɓěɛ̀ nàmàǔn jè. Nyɔ ɖò-ɖò mɛ mɛ́ ɓó ɔ mìɔùn nììn nàmàǔn jè.”

Wa kpa Íɖɔ̀ùn-nyɔ̀ ɓěɔ̀ to kɔ̃

⁵ Wé ɖòɛ̀ ɓaɖaa, Àmàzíà poìn ma Júɖà-gàà ɓěɔ̀ kè Bɛ̃́címà-gàà ɓěɔ̀ dyí, ké ɔ ɓéɖé ma wa kpoo ɓě mú poɛń dyììn ɖé kà waà gbǒ-xwíníín ɓěɔ̀ nyu nìɛ̀ kɛɛ mú. Ké ɔ gã ma sójà táázĩ̀ìn ɓě wuɖuí-kɔ̃̀-nyɔ̀ ɓě kè sójà hɔ̃dɛ̀ɖɛ̀ ɓě wuɖuí-kɔ̃̀-nyɔ̀ ɓě, ɓɛ́ wa ké wa séín kɔ̃in nì. Ɔ poìn ma gàa séín ɓɛ́ wa nyuá zɔ̃ kpáɖá-nyɔ mɔɔ zi kɔ̃ɛɛ dyí. Wa mɔ̀ ma gàa-zà-nyɔ̀ táázĩ̀ìn hɔ̃dɛ̀ɖɛ̀ tã ɓɛ́ wa dyuò ma ɖí kè dyí-zĩ̀ìn-ɖɛ̀ ɓě toún vɔ̃̀ìn nyɛ.

⁶ Ké ɓó kɔ̃in ɖeɛɛ, ɔ kpɔ̃ ma Éézùɖùɛ̀-sòjà táázĩ̀ìn hɔ̃dɛ̀ɖɛ̀ ɖò dyi, ké ɔ pɛ́ɛ̀ ma wa séɓàɖà kɔ̃̀ xwa-ku-ku mɔ̀ ma pṹá-dyèɖè táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ hm̀m̌ wɛ̃. Wa mɔ̀ ma gàa-zà-nyɔ̀ ɓě.

⁷ Kɛɛ kpáá-ɖɛ̀-cɛ̃-nyɔ̀ ɖò dyi ma ɔ gbo, ké ɔ ɖá, “Kã́á wè, mɔ̀ǔn ɖá ɓɛ́ m̀ kè Éézùɖùɛ̀-sòjà ɓěɛ̀ ké toɔ̀ gbo mu, sepóɛɖé Bounɓoɔ̀ se ɓó Éézùɖùɛ̀-nyɔ̀ ɓě sɔ̀à ɖé Ífèɖèìn-ɓòɖòɔ̀ kɔ̃ɛɛ gbo nì.

⁸ Kɛbì m̀ kè wa mɛ vɔ̃ gana-kà kɛɛ, Gèɖèpɔ́ɔ̀ mu m̀ ɓíɖíi dyi poùn ɓó nì mú-nyɛ́-nyɔ̀ ɓěɔ̀ dyúa, sepóɛɖé Gèɖèpɔ́ɔ̀ ɓéɖé kpé ɓɛ́ ɔ ké nyɔ gbo kpá, mɔɔ ɓɛ́ ɔ ké nyɔ ɓíɖíi dyi po.”

⁹ Ké Àmàzíà diè ma kpáá-ɖɛ̀-cɛ̃-nyɔ̀ɔ̀ dyi, ké ɔ ɖá, “Ké ɖɛ́ ɓá séɓàɖà kɔ̃̀ xwa-ku-ku mɔ̀à pṹá-dyèɖè táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ hm̀m̌, ɓɛ́ ḿ ɖǎà Éézùɖùɛ̀-sòjà ɓěɔ̀ nyíɛɛ jè dyíɛ́?” Ké kpáá-ɖɛ̀-cɛ̃-nyɔ̀ɔ̀ jǔ ma ɔ gɔ̃̌, ké ɔ ɖá, “Bounɓoɔ̀ ɓɛ́ìn m̀ pàɖǎ nyíɛ ɖe, ɓɛ́ ɔ ké nyɔa dyí zi.”

¹⁰ Hwɛ̀ ké Àmàzíà po ma sójà ɓě sɔ̀ ma kà ɖé Ífèɖèìn-ɓòɖòɔ̀ kɔ̃, ɓɛ́ wa dyi ma kà ɔ gbo dyiɛɛ wáká, ké ɔ tò ma wa wa ɓíɖí ɖe. Púɛɛ, sójà ɓěɔ̀ kpáìn ma Júɖà-nyɔ̀ ɓěɔ̀ dyoɖoún mìɔ, ké wa kɔ́ìn ma ɖe ɖé dyoɖo mú.

¹¹ Kɛɛ Àmàzíà ku ma hwòɖǒ, ké ɔ kpa ma ɔ nyɔ ɓěɔ̀ to gbo, ké wa mu ma ɖé Tɔ̃́ Bɔɔ-kpàɔ̀ kɔ̃, ké wa ɖáɓá ma Íɖɔ̀ùn-nyɔ̀ ɓěɔ̀ sójà táázĩ̀ìn ɓaɖa-bùè.

¹² Ké wa kpɔ̃ ma nyɔ-kpò táázĩ̀ìn ɓaɖa-bùè ɖò, ké wa kpa ma wa ɖéé ɖé toɖo vɛ̀nɛ̀ ɖò dú-hwìɛ̀, ké wa po wa ɖéé ɖé ɓíɖíi, ké wa séín wɛ̀ìn ma dyi nyɛ̀nɛ̀ɛ̀.

¹³ Ɓó ti dyúáɖòɔ̀ ɓaɖaa, Éézùɖùɛ̀-sòjà ɓě ɓɛ́ Àmàzíà ɖoɓo ma kà wa ɓíɖí ɖe, ké ɔ se ma kà wa toɔ̀ gbo kpaa po ma Júɖà-hwɔ̀ɖɔ̀ ɓěɔ̀ to kɔ̃ sɔ̀ìn ɖé Sɛ̀mɛ́ɖìà-hwɔ̀ɖɔ̀ɔ̀ wĩín, nyinià ɖé Bɛ̀-Hówɔ̀nɔ̀-hwɔ̀ɖɔ̀ɔ̀ wĩín nyɛ. Wa ɖáɓá ma ɖé nyɔ-kpò táázĩ̀ìn tã, ké wa kpa hwu-ɖɛ̀ ɓáún-ɓáún.

¹⁴ Ti ɓɛ́ Àmàzíà sɔ̀ ma Íɖɔ̀ùn-nyɔ̀ ɓěɔ̀ ɖáɓáùn wɛ̃ɛ, ɔ dyà ma Íɖɔ̀ùn-nyɔ̀ ɓěɔ̀ nììn kũùn-kpò-gèɖèpɔ́ɔ̀ ɓěɔ̀ ní, ké ɔ nyànàìn ma wa dyi, ɓɛ́ wa ké ɔ gèɖèpɔ́ɔ̀ ɓě jǔ. Ké ɔ ɖú wa ɓiè kpàǐ, ké ɔ zà ma sáa ɓó wa gbo.

¹⁵ Ɔ jèɛɛ, Bounɓoɔ̀ kpáìn ma Àmàzíà dyoɖoún, ké ɔ ɖoɓo ma ɔ kpáá-ɖɛ̀-cɛ̃-nyɔ̀ ɖò gbo. Ké kpáá-ɖɛ̀-cɛ̃-nyɔ̀ɔ̀ diè ma ɔ dyi, ké ɔ ɖá, “Ɖɛ́ kɔ̃̀ jè m̀ gmɔ̀ìn kà ɖé gèɖèpɔ́ɔ̀ ɓě seà wa mìɔùn nììn nyɔ ɓěɔ̀ m̀ xwaún póɛ̀n ɓɛ́ìn nyɛɛ gbo kɛ́?”

¹⁶ Kɛɛ ti wuɖuɔ̀ gã̀ ma ɔ wĩín dyiɛɛ, kã́áɔ̀ ɖá, “À ɖǎ m̀ gã, ɓɛ́ m̀ ké kã́á-náún-po-nyɔ̀ jǔe? Ɓɔ́ wùɖùɛ̀. Nì mɔ́ ɓɛ́ ḿ ké m̀ ɖáɓáe?” Ɔ jèɛɛ, kpáá-ɖɛ̀-cɛ̃-nyɔ̀ɔ̀ ɓɔ́ ma wùɖùɛ̀, kɛɛ ɔ ɖá, “Ḿ dyuòɛ̀ dyí kà Gèɖèpɔ́ɔ̀ hwòɖǒ ɖǎa gbɔ po ɓɛ́ ɔ ké m̀ mú gbɔɔ̀ kɛ, sepóɛɖé m̀ ɖǎ ɖɛ nìà kɛ nyu, ké m̀ se mɔ́ ɓɛ́ m̀ ké ní ná-wùɖùɔ̀ ɖùǔ gbo tò.”

Wa po Éézùɖùɛ̀-nyɔ̀ ɓěɔ̀ to kɔ̃

¹⁷ Sɔ̀ìn ɓóɛ gboɛɛ, Àmàzíà mɔ̀à Júɖà-kã̀ǎɔ̀ kɛɛ diè ma ɔ gɔ̌mànà-nyɔ̀ vɛ̀nɛ̀ ɓěɔ̀ fɔ̀nɔ̀-hwòɖǒ dyi, ké ɔ tò ma nyɔ-sóɖó-po-wùɖù ɖé Éézùɖùɛ̀-kã̀ǎ mɔ̀à Jɛ̀hóà ɓɛ́ ɔ mɔ̀à Jɛ́hùɛ̀ nyúà-dyú, kɔ̃̀ ɓǎ mɔ̀à Jɛ̀hóàhà kɛɛ gbo, ké ɔ ɖá, “Dyi, ɓɛ́ à ké ɖé dyéɖéín gmɔìn.”

¹⁸ Kɛɛ Jɛ̀hóà mɔ̀à Éézùɖùɛ̀-kã̀ǎɔ̀ kɛɛ jǔ ma Àmàzíà mɔ̀à Júɖà-kã̀ǎɔ̀ kɛɛ gɔ̃̌, ké ɔ ɖá, “Wí-cù tííwè ɖò nì ɖé Ɖɛ́ɓèɖɔ́ùn-ɓòɖòɔ̀ kɔ̃ɛɛ wùɖù zɔ̃̌ɔ̀ síɖà-cù vɛ̀nɛ̀ ɖò nì ɖé Ɖɛ́ɓèɖɔ́ùn-ɓòɖòɔ̀ kɔ̃ɛɛ gbo, ké ɔ ɖá, ‘Tò nì dyú-mààɔ̀, ɓɛ́ ɔ ké ní dyú-gààɔ̀ gmàà jǔ.’ Púɛɛ, xwáɖá-xwíɖíi-nìmìì ɖò nì ɖé ɓóɖóɔ̀ kɔ̃ɛɛ dyi, ké ɔ síìn ma wí-cù tííwèɔ̀ kɔ̃in, ké ɔ wàìn ma ɔ dyi.

¹⁹ M̀ cɛ̃ɛ, ké m̀ ɖá, ‘Dyéɛ kà ḿ ɖǎ Íɖɔ̀ùn-ɓòɖòɔ̀ toún ɖuɛ.’ Ké m̀ nìǎ m̀ mìɔùn dyí ɓúáǐn. Kɛɛ ɓó kàǔn wɛ̃ɛ, kò ɖé m̀ ɓíɖí-taún dyi. Ɖɛ́ kɔ̃̀ jè m̀ nìà fũ̀à-fṹá zɔ̀ǔn, ɓɛ́ m̀ kéà m̀ mìɔùn nììn ɓíɖíi-dyi-kpá-kpá kè Júɖà-ɓòɖòɔ̀ ɓíɖíi-dyi-kpá-kpá dyà kɛ́?”

²⁰ Kɛɛ Àmàzíà se ma wɔ̃́, sepóɛɖé ɔ mɔ̀ ma Gèɖèpɔ́ɔ̀ hwòɖǒɛ̀-gbɔ-po-ɖɛ̀, ɓɛ́ ɔ ké Àmàzíà kè Júɖà-nyɔ̀ ɓěɔ̀ ɖé waà mú-nyɛ́-nyɔ̀ ɓěɔ̀ xwaún dyi po. Ɔ mɔ́ɔ náa nyuɛ dyi, sepóɛɖé waà hwòɖǒ ɖǎ ma ɖé Íɖɔ̀ùn-nyɔ̀ ɓěɔ̀ nììn gèɖèpɔ́ɔ̀ ɓěɔ̀ gbo gmɔ̀ìn.

²¹ Ɔ jèɛɛ, Jɛ̀hóà mɔ̀à Éézùɖùɛ̀-kã̀ǎɔ̀ kɛɛ dyà ma Àmàzíà to kɔ̃. Ɔ kè Àmàzíà kpáìn ma toɔ̀ mú ɖé Bɛ̀-Sɛ́mɛ̀-hwɔ̀ɖɔ̀ nìà ɖé Júɖà-ɓòɖòɔ̀ kɔ̃ɛɛ mú.

²² Ké Éézùɖùɛ̀-nyɔ̀ ɓěɔ̀ ɖu ma Júɖà-nyɔ̀ ɓěɔ̀ toún. Ké waà gàa ɖò-ɖò séín kpá ma xwáɖáún, ké wa mu wa ɓíɖí-taún ɖe.

²³ Ké Jɛ̀hóà kpɔ̃̀ìn ma Àmàzíà ɖé Bɛ̀-Sɛ́mɛ̀-hwɔ̀ɖɔ̀ɔ̀ mú. Sɔ̀ìn ɓóɛ gboɛɛ, Jɛ̀hóà kpa ma Àmàzíà ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ké ɔ wáɖá ma gmɔɔ̀ wáká ɓɛ́ ɔ sɔ̀ìn ma ɓó Ífèɖèìn-gmɔ̀-wɔ̃̀ gbo ké ɔ nyini ma ɖé gmɔ-wɔ̃̀ ɓɛ́ wa ɖáìn Gã-Kɔ̃-gmɔ̀-wɔ̃̀ kɛɛ gboɛ. Wáká ɔ wáɖáà ɓóɛɛ ɓɛ́ìn ma ɓáɖáa hɔ̃dɛ̀ɖɛ̀ ɖò jǔɛ.

²⁴ Ké ɔ ɖú ma góò-ɖɛ̀ ɓě kè séɓàɖà-ɖɛ̀ ɓě ɔ kè ɖɛ tɔ̀ɔ̀ séín ɓě nì ma ɖé Gèɖèpɔ́ɔ̀ gbǒɔ̀ mú, ɓɛ́ Óɓè-Íɖɔ̀ùnɛ̀ xwíníín-dyù ɓě gmɔ̀ ma dyíɛɛ dyí. Ké ɔ ɖú ma dyi-dè-ɖɛ̀ ɓě nì ma ɖé kã́áɔ̀ gbǒɔ̀ múɛɛ dyí ɖekè. Ké ɔ kpɔ̃ ma nyɔ kúɖúú ɖé toɔ̀ gbo, ké ɔ kɔ́ìn ma ɖe, ké ɔ mu ɖé Sɛ̀mɛ́ɖìà-hwɔ̀ɖɔ̀ɔ̀ mú.

²⁵ Sɔ̀ìn ɓó ti ɓɛ́ Jɛ̀hóà mɔ̀à Jɛ̀hóàhàà dyú-gàà, ɓɛ́ ɔ mɔ̀à Éézùɖùɛ̀-kã̀ǎɔ̀ kɛɛ ɖǎ ma mɛ́ɛ, Àmàzíà mɔ̀à Jóàsìɛ̀ dyú-gàà, ɓɛ́ ɔ mɔ̀à Júɖà-kã̀ǎɔ̀ kɛɛ cĩ́ ma zɔ̃ ɓaɖa-bùè sè hm̀m̌ ɓó kɔ̃in ɖe.

²⁶ Ɖɛ tɔ̀ɔ̀ séín ɓě ɓɛ́ Àmàzíà nyu ma kɛɛ, sɔ̀ìn ɖéɛ dè gbɔɔ̀ mú kéɛ mánáín-hwɛ̀ìn-naín dyɛ̀ìn nyɛɛ, wa jè céè ɖé Júɖà-kã̀ǎ ɓěɔ̀ kè Éézùɖùɛ̀-kã̀ǎ ɓěɔ̀ kpáá-ɖɛ̀-sùà-cèè-ɖɛ̀ɔ̀ mú.

²⁷ Sɔ̀ìn ɓó ti ɓɛ́ Àmàzíà ɖǎ ma Bounɓoɔ̀ kɔ̃ín pòìn nyɛɛ, wa sɔ́ ma ɔ ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Ké ɔ kpá xwáɖáún, ké ɔ mu ma ɖé Ɖákì-hwɔ̀ɖɔ̀ɔ̀ mú. Kɛɛ wa ɖoɓo ma gàa ɖíɛ́ ɓě ɖé Ɖákì-hwɔ̀ɖɔ̀ɔ̀ mú, ké wa ɖáɓáìn ɖé ɔ.

²⁸ Ké wa ɓéɖéìn ma ɔ xwɛ́ɔ̀ sǒ kɔ̃ún, ké wa dyàà ma ɖe, ké wa zà ma ɔ dyóɖóún ɖé kã́á ɓěɔ̀ nììn kú-toɖoɔ̀ mú, ɖé Dèɓé ɓíɖí-hwɔ̀ɖɔ̀ɔ̀ mú.