2 Kánáníkɔ̀ 24 - Ɓǎsɔ́ɔ̀ Báɓòɔ̀

Jóàsì mɔ̀à Júɖà-kã̀ǎɔ̀ kɛɛ jè

¹ Jóàsì nyuá ma zɔ̃ mɛ̀nɛ̌ìn-sɔ̃́ ti ɓɛ́ ɔ dè ma kã́á-kũ̀àɔ̀ gbɔɛ. Ɔ kɔ̃̀ ma ɓóɖóɔ̀ wuɖuí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓó zɔ̃ kpáɖá-nyɔ sɔ̃́ xwíníín. Ɔ ɖeɛ̀ nyɛ́nɛ́ mɔ̀ ma Zìɓíà. Ɔ sɔ̀ ma ɖé Bèsíɓà-hwɔ̀ɖɔ̀ɔ̀ mú.

² Jóàsì nyu ma ɖɛ dè Bounɓoɔ̀ hwìɖǐiɛɛ ɖé Jɛ̀hódyáɖà mɔ̀à sáa-zà-nyɔ̀ vɛ̀nɛ̀ɔ̀ kɛɛ nììn toɖo-kɔ̃-nì-tìǐn.

³ Jɛ̀hódyáɖà mɔ́ ma ɔ bìì nyɔ́nɔ́ sɔ̃́, ké wa wóɖóìn ma gàa-dyù kè màa-dyù ɓě.

⁴ Wé ɖòɛ̀ ɓaɖaa, Jóàsìɛ̀ hwòɖǒ poɛ ma gbɔ, ɓɛ́ ɔ ké ma Bounɓoɔ̀ gbǒɔ̀ xwa nɔ̀mɔ̀ìn ɖe.

⁵ Ké ɔ poìn ma sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ dyí, ké ɔ cɛ̃ɛ ma wa gbo, ké ɔ ɖá, “Ɓě mu ɖé Júɖà-hwɔ̀ɖɔ̀ ɓěɔ̀ mú, ɓɛ́ ɓě ké Júɖà-nyɔ̀ séín ɓěɔ̀ wíɖí xwaún kpɔ̃ ɓó Gèɖèpɔ́ɔ̀ gbǒɔ̀ xwa nɔ̀mɔ̀ìn jè, ɓó zɔ̃ kè zɔ̃ xwíníín. Ɓěǐn ɖá ɓɛ́ ɓě ké ti zĩ̀ìn.” Kɛɛ Ɖíìváà-nyɔ̀ ɓěɔ̀ mɛɛ̀ ma kũ̀àɔ̀ jè gboi.

⁶ Ɔ jèɛɛ, kã́áɔ̀ ɖá ma Jɛ̀hódyáɖà mɔ̀à waà nyɔ vɛ̀nɛ̀ɔ̀ kɛ, ké ɔ diè ma ɔ dyi, ké ɔ ɖá, “Ɖɛ́ kɔ̃̀ jè m̀ seɛ nyu ɓɛ́ Ɖíìváà-nyɔ̀ ɓěɔ̀ ké tácì-wìɖì kɔ̃̀ jè ɓɛ́ Mózè mɔ̀à Bounɓoɔ̀ gbo-nì-nyɔ̀ɔ̀ kɛɛ po zɔ̃̌ɔ̀ gma mú ɓɛ́ Éézùɖùɛ̀-nyɔ̀ ɓěɔ̀ ké pɛ́ɛ̀ ɓó Bounɓoɔ̀ jàɖàìn-gbòɔ̀ jèɛɛ Jùɖúsɛ̀ɖɛ̀ìn-nyɔ̀ ɓěɔ̀ kè Júɖà-nyɔ̀ tɔ̀ɔ̀ ɓěɔ̀ xwaún kpɔ̃ kɛ́?”

⁷ Ɔ nì ná kɛɛ, hwòɖǒ-kɔ̃in-nyìnììn-màà mɔ̀à Áfàɖíà kɛɛ dyú-gàà ɓěɔ̀ ɖǎ ma Gèɖèpɔ́ɔ̀ gbǒɔ̀ wa, ké wa ɖǎ ma ɖɛ ɓě kpá wáká ɓó Gèɖèpɔ́ɔ̀ bììɛɛ ɖé dyi zà, ké wa ɖǎa Béò ɓièìn-ɖɛ̀ ɓě mú nyùìn.

⁸ Ké kã́áɔ̀ tò ma wuɖu, ké wa nyu ma gbɔ̀ɖɔ̀ɔ̀ vɛ̀nɛ̀ ɖò, ké wa dèɛ̀ ɓóɛ Bounɓoɔ̀ gbǒɔ̀ gmɔ-wɔ̃̀ɔ̀ píé dyi.

⁹ Ké wa ɓeìn ma wuɖu dyi ɖé Júɖà-ɓòɖòɔ̀ kè Jùɖúsɛ̀ɖɛ̀ìn-hwɔ̀ɖɔ̀ɔ̀ dà séín, ɓɛ́ nyɔ ɓěɔ̀ ké tácì-wìɖì ɓɛ́ Mózè mɔ̀à Gèɖèpɔ́ɔ̀ gbo-nì-nyɔ̀ɔ̀ kɛɛ po zɔ̃̌ɔ̀ Éézùɖùɛ̀-nyɔ̀ ɓěɔ̀ dya ɖé gbǎùn-fúɖúáɔ̀ kɔ̃ɛɛ dyà ɓó Bounɓoɔ̀ bìì.

¹⁰ Ké gɔ̌mànà-nyɔ̀ séín ɓěɔ̀ kè nyɔ séín ɓěɔ̀ kpá ma múàǔn, ké wa dyà ma waà tácì-wìɖìɔ̀, ké wa gã̀à ɖéɛ gbɔ̀ɖɔ̀ɔ̀ mú poɛń dyi tee ké gbɔ̀ɖɔ̀ɔ̀ dyí ma.

¹¹ Ké ti séín ɓɛ́ Ɖíìváà-nyɔ̀ ɓěɔ̀ mu gbɔ̀ɖɔ̀ɔ̀ kã́áɔ̀ gɔ̌mànà-nyɔ̀ ɓěɔ̀ gbo dyàùn wɛ̃ɛ, wa dyiɛ dyé ké wíɖí ɓáún-ɓáún dyi ɖéɛ mú nìǐn, nìí, kã́áɔ̀ céè-ɖɛ̀ céè-nyɔ̀ɔ̀ kè sáa-zà-nyɔ̀ vɛ̀nɛ̀ɔ̀ nììn dyúa-nyɔ̀ɔ̀ dyi, ké wa púè gbɔ̀ɖɔ̀ɔ̀, ké wa kpaa, ké wa dèɛ̀ ɓóɛ páɔ̀ mú dyi ɖe. Kǎà wa nyuɛ ma ɓó wé kè wé xwíníín, ké wa poìn ma wíɖí ɓáún-ɓáún dyí.

¹² Ké kã́áɔ̀ kè Jɛ̀hódyáɖà nyí ma wíɖíɔ̀ Bounɓoɔ̀ gbǒɔ̀ kũ̀àɔ̀ kɔ̃in-nyɔ̀ ɓěɔ̀, ké wa kpɔ̃ ma sɔ́ɔ́-dè-nyɔ̀ ɓě kè ɖɛ-kɔ-nyɔ̀ ɓě dyi, ɓɛ́ wa ké ma Bounɓoɔ̀ gbǒɔ̀ xwa nɔ̀mɔ̀ìn, ké wa kpɔ̃ ma nɛɛ̀-kpà-kũ̀à-mú-nyùìn-nyɔ̀ ɓě kè bàɖàsǐ-kũ̀à-mú-nyùìn-nyɔ̀ ɓě dyi ɖekè, ɓɛ́ wa ké Bounɓoɔ̀ gbǒɔ̀ xwa nɔ̀mɔ̀ìn.

¹³ Ɔ jèɛɛ, nyɔ ɓě ɓɛ́ wa kpɔ̃ ma kà kũ̀àɔ̀ dyiɛɛ nyu ma kũ̀àɔ̀, ké gbǒ-xwa-nɔ̀mɔ̀ìn-kũ̀àɔ̀ mu ma dyúa ɖé wa xwaún. Ké wa nyuɛ ké Gèɖèpɔ́ɔ̀ gbǒɔ̀ nɔ̀mɔ̀ ma dyíin ɖe kà ɔ nyu zɔ̃̌ɔ̀ nìɛ̀ kĩ́ín nyɛ, ké ɔ ku ma dyi ɖe.

¹⁴ Ké ti wa ɖǎ ma kũ̀àɔ̀ gbo hwɛ̀ɛ, wa dyà ma wíɖíɔ̀ nyɔ sè ɓóɛɛ kã́áɔ̀ kè Jɛ̀hódyáɖà gbo ɖe, ké wa nyuɛ ma kũ̀à-mú-nyùìn-ɖɛ̀ ɓě mú ɓó Bounɓoɔ̀ gbǒɔ̀ bìì. Wa mɔ̀ ɖɛ ɓě wa nyùìn kũ̀à mú ɓó fɔ̃ɔ-sàǎ-zàìn-ɖɛ̀ nyu jèɛ kè ɖɛ-fùù ɓě kè góò-ɖɛ̀ ɓě ɔ kè séɓàɖà-ɖɛ̀ ɓě. Ké wa nyu ma fɔ̃ɔ-sàǎ-zàìn-ɖɛ̀ ɓě ɖé Bounɓoɔ̀ gbǒɔ̀ mú kánáá pū, ti ɓɛ́ Jɛ̀hódyáɖà nì ma toɖo kɔ̃ kɛ.

Wa zàìn Jɛ̀hódyáɖàà xwai-nyu-ɖɛ̀ ɓěɔ̀ dyí

¹⁵ Jɛ̀hódyáɖà nyɛ ma mìɔ, ké ɔ mɛ́ ma. Ɔ nyu ma zɔ̃ hɔ̃dɛ̀ɖɛ̀ ɖò kè kpáɖá-nyɔ ɓaɖa-bùè hwɛ̀ ké ɔ mɛ́ ma.

¹⁶ Ké wa zà ma ɔ dyóɖóún ɖé Dèɓé ɓíɖí-hwɔ̀ɖɔ̀ɔ̀ mú, ɖé kã́á ɓěɔ̀ kú-toɖoɔ̀ mú, sepóɛɖé ɔ nyu ma ɖɛ nɔ̀mɔ̀ dyíin ɖé Júɖà-ɓòɖòɔ̀ kɔ̃, ɓá Gèɖèpɔ́ɔ̀ kè ɔ gbǒɔ̀ jè dyí.

¹⁷ Ti ɓɛ́ Jɛ̀hódyáɖà ɖǎ ma mɛ́ɛ, gɔ̌mànà-nyɔ̀ vɛ̀nɛ̀ ɓě nì ma ɖé Júɖà-ɓòɖòɔ̀ kɔ̃ɛɛ dyi, ké wa po ma kã́áɔ̀ pɛ́í, ké kã́áɔ̀ wɔ̃́ìn ma waà hwòɖǒɛ̀-mɔ́ɔ́-ɖɛ̀ɔ̀ gbo.

¹⁸ Ké wa táà ma Bounɓo mɔ̀à wa ɓǎ nììn ɓǎ ɓěɛ̀ Gèɖèpɔ́ɔ̀ kɛɛ gbǒɔ̀ dyi, ké wa ɖú ma Àséwàɖàà hwɔìn-ɖɛ̀ ɓěɔ̀ kè kũùn-kpò tɔ̀ɔ̀ ɓě ɓiè kpàǐ. Ké Bounɓoɔ̀ dyoɖoɔ̀ dyi ma Júɖà-ɓòɖòɔ̀ kè Jùɖúsɛ̀ɖɛ̀ìn-hwɔ̀ɖɔ̀ɔ̀ kɔ̃ ɓó ɖɛ gbà wa nyuà kɛɛ jè.

¹⁹ Kɛɛ wɛ̃́ɛ́ kɛɛ, Bounɓoɔ̀ ɖoɓo ma kpáá-ɖɛ̀-cɛ̃-nyɔ̀ ɓě ɖé wa hwìɛ̀, ɓɛ́ ɔ ké wa ɔ mìɔùn gbo ɖe dyà. Ké kpáá-ɖɛ̀-cɛ̃-nyɔ̀ ɓěɔ̀ cɛ̃ ma ɖɛ gbà ɓě wa ɖǎ nyuɛɛ jè wa gbo, kɛɛ wa se wa ɖùǔ gbo tò.

²⁰ Wé ɖòɛ̀ ɓaɖaa, Gèɖèpɔ́ɔ̀ Zùùɔ̀ dyi ma Zɛ́kɔ̀wáɖádyà ɓɛ́ ɔ mɔ̀ Jɛ̀hódyáɖà ɓɛ́ ɔ mɔ̀ ma kà sáa-zà-nyɔ̀ vɛ̀nɛ̀ɔ̀ kɛɛ dyú-gàà kɛɛ kɔ̃, ké ɔ nyànà ma dyi ɖé nyɔ ɓěɔ̀ hwìɛ̀, ké ɔ ɖá, “Ɖɛ Gèɖèpɔ́ɔ̀ cɛ̃ɛ kɛà kɛ̀. Ɔ ɖá, ‘Ɖɛ́ kɔ̃̀ jè ɓě jaɖaà mɔ̄ Bounɓoɔ̀ gma ɓěɔ̀ múɛ́? Ɓěɛ̀ nyuu-ɖɛ̀ ɖò se mú wóɖóɛ mu. Ɓě ɖǎ mɔ̄ Bounɓoɔ̀ jè dyi táà jèɛɛ, ḿ ɖǎ ɓě mɔ̀ùn jè dyi táà ɖekè.’ ”

²¹ Kɛɛ nyɔ ɓěɔ̀ sɔ́ ma Zɛ́kɔ̀wáɖádyà, ké kã́áɔ̀ zà ma wa wuɖu kɔ̃, ké wa taɓaìn ma ɔ sɔ́ɔ́-kpò dyi ɖé Bounɓoɔ̀ gbǒɔ̀ kɔ̃̀pã́ùnɔ̀ kɔ̃.

²² Kpeɖeɛ̀-dyíin-nɔ̀mɔ̀-ɖɛ̀ ɓɛ́ Jɛ̀hódyáɖà mɔ̀à Zɛ́kɔ̀wáɖádyà ɓǎ kɛɛ nyu ma kà Kã́á Jóàsì bũ̌ɛɛ jè se ɔ hwìɖǐi nì ɖe, ké ɔ ɖáɓáà ɔ dyú-gààɔ̀ kɛ̀. Ti ɓɛ́ Zɛ́kɔ̀wáɖádyà nìǎ ma mɛ́iń muɛń nyɛɛ, ɔ ɖá, “Bounɓoɔ̀ mɛ dyé ɖɛ nìà kɛ, ɓɛ́ ɔ kéɛ kpa zào.”

Jóàsìɛ̀ wuɖuí-kɔ̃̀-kpèɔ̀ dúí-jɛ̀ɖɛ̀ìn-naín

²³ Ɖé zɔ̃ɔ̀ mánáín nyɛɛ, Síwíɖíà-sòjà ɓěɔ̀ dyà ma Jóàsì to kɔ̃. Wa dyi ma ɖé Júɖà-ɓòɖòɔ̀ kɔ̃ kè ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ké wa ɖáɓá ma gɔ̌mànà-nyɔ̀ vɛ̀nɛ̀ séín ɓě nì ma ɖé nyɔ ɓěɔ̀ hwìɛ̀ kɛɛ nyɛ̀nɛ̀ɛ̀. Ké wa ɖú ma waà to-gbo-zà-ɖɛ̀ séín ɓěɔ̀ dyí, ké wa tòɛ̀ ma ɖé waà kã́á nìà ɖé Dìmásìkɔ̀-hwɔ̀ɖɔ̀ɔ̀ múɛɛ gbo.

²⁴ Síwíɖíà-sòjà ɓěɔ̀ se ma dyí vò dyɛo, kɛɛ Bounɓoɔ̀ po ma Júɖà-sòjà kúɖúú ɓěɔ̀ wa xwaún dyi, sepóɛɖé Júɖà-nyɔ̀ ɓěɔ̀ ɖǎ ma Bounɓo mɔ̀à wa ɓǎ nììn ɓǎ ɓěɛ̀ Gèɖèpɔ́ɔ̀ kɛɛ jè dyi táà. Bounɓoɔ̀ tò ma Jóàsì gǎ kɔ̃ dyììn ɖé Síwíɖíà-sòjà ɓěɔ̀ mú.

²⁵ Ɓó tia ɓaɖaa, Síwíɖíà-sòjà ɓěɔ̀ ɖǎ ma Jóàsì puà mìɔ, ké wa sè ma ɓó ɔ. Ké ɔ gbo-nì-nyɔ̀ ɓěɔ̀ sɔ́ ma ɔ ɓó Jɛ̀hódyáɖà mɔ̀à sáa-zà-nyɔ̀ vɛ̀nɛ̀ɔ̀ kɛɛ dyú-gààɔ̀ nyɔmɔɔ ɓɛ́ ɔ wáɖáìn ma kà dyiɛɛ jè, ké wa ɖáɓáìn ma ɔ ɓó ɔ mìɔùn nììn kɔ̃-pɛ̃́-ɖɛ̀ɔ̀ kɔ̃. Ké wa zà ma ɔ dyóɖóún ɖé Dèɓé ɓíɖí-hwɔ̀ɖɔ̀ɔ̀ mú, kɛɛ ɔ se ma ɖé kã́á ɓěɔ̀ nììn kú-toɖoɔ̀ mú.

²⁶ Nyɔ ɓě ɓɛ́ wa sɔ́ ma kà ɔ kɛɛ mɔ̀ Jòzáɓà ɓɛ́ ɔ mɔ̀ Sìmɛ́à mɔ̀ Ámànà-màà ɖò kɛɛ dyú-gàà kɛ, kè Jɛ̀hózáɓà ɓɛ́ ɔ mɔ̀ Sómɔ̀ ɓɛ́ ɔ mɔ̀ Móà-màà ɖò kɛɛ dyú-gàà kɛ.

²⁷ Ɖɛ ɓě ɓɛ́ Jóàsìɛ̀ dyú-gàà ɓě nyu ma kɛ kè kpáá-ɖɛ̀ kúɖúú ɓě wa cɛ̃ ɓá ɔ dyíɛ ɔ kè ɖɛ ɓě ɓá Gèɖèpɔ́ɔ̀ gbǒɔ̀ xwa nɔ̀mɔ̀ìn jè dyíɛɛ, wa jè céè ɖé ɖɛ-kɔ̃in-zaìn-cèè-ɖɛ̀ ɓá kã́á ɓěɔ̀ kpáá-ɖɛ̀-sùà-cèè-ɖɛ̀ɔ̀ jè dyíɛɛ mú. Ké ɔ dyú-gàà kɔ̃̀ nyɛ́nɛ́ mɔ̀ Àmàzíà kɛɛ mɔ̀ ma kã́á ɓó ɔ bɛ̃̌ǐn.