2 Kánáníkɔ̀ 23 - Ɓǎsɔ́ɔ̀ Báɓòɔ̀

Nyɔ ɓěɔ̀ sɔ̀ Áfàɖíà xwíɖíi

¹ Ɖé zɔ̃ɔ̀ mɛ̀nɛ̌ìn-sɔ̃́ nììnɔ̀ xwíníín nyɛɛ, Jɛ̀hódyáɖà nyu ma hwòɖǒ-ku-ɖɛ̀ ɖò. Ɔ kè sójà hɔ̃dɛ̀ɖɛ̀ ɓě wuɖuí-kɔ̃̀-nyɔ̀ ɓěɔ̀ hm̀m̌ po ma wuɖu ɓíín. Wa mɔ̀ Ázàwíɖíà ɓɛ́ ɔ mɔ̀ Jɛ̀ɖóhã̀à dyú-gàà kɛ kè Ésìméò ɓɛ́ ɔ mɔ̀ Jɛ́hòhánàà dyú-gàà kɛ kè Ázàwíɖíà ɓɛ́ ɔ mɔ̀ Óɓèɛ̀ dyú-gàà kɛ kè Mààsédyà ɓɛ́ ɔ mɔ̀ Àɖádyàà dyú-gàà kɛ ɔ kè Ɛ̀ɖìsáfà ɓɛ́ ɔ mɔ̀ Zíkìɖìɛ̀ dyú-gàà kɛ.

² Ké gàa ɓěa té ma Júɖà-ɓòɖòɔ̀ gboi dà séín, ké wa poìn ma Ɖíìváà-nyɔ̀ ɓě ɓɛ́ wa sɔ̀ ma ɖé Júɖà-hwɔ̀ɖɔ̀ ɓěɔ̀ múin nyɛ kè gbǒ-xwíníín ɓěɔ̀ nyɔ vɛ̀nɛ̀ ɓě nì ɖé Júɖà-ɓòɖòɔ̀ kɔ̃ɛɛ dyí, ké wa séín dyi ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú.

³ Ké nyɔ séín ɓěɔ̀ kè Jóàsì mɔ̀à Kã́á Áhàzíà dyú-gààɔ̀ kɛɛ po ma wuɖu ɓíín ɖé Gèɖèpɔ́ɔ̀ gbǒɔ̀ mú. Ké Jɛ̀hódyáɖà cɛ̃ɛ ma nyɔ ɓěɔ̀ gbo, ké ɔ ɖá, “Ɓě gmɔ̀ nɔ̄, kã́áɔ̀ dyú-gàà nìà kɛ mɔ̀ nyɔ mɛ kɔ̃̀ ɓóɖóɛ̀ wuɖuí kà Bounɓoɔ̀ nyuɛ zɔ̃̌ɔ̀ kà cɛ̃ɛ ɓá Dèɓéɛ̀ dyú-gàà ɓěɔ̀ jè dyíɛ.

⁴ Ɖɛ ɓě mɛ nyuɛɛ kɛà kɛ̀. Ɓě mɔ̀ sáa-zà-nyɔ̀ ɓě kè Ɖíìváà-nyɔ̀ ɓě ɓɛ́ ɓě nì kũ̀à kɔ̃ún ɓó Gèɖèpɔ́ɔ̀ fɔ̀-wèɔ̀ ɓaɖaa, dú dyúáɖò mɛ gmɔ̀ Bounɓoɔ̀ gbǒɔ̀ dyí,

⁵ ké dú dyúáɖò mɛ gmɔ̀ kã́áɔ̀ gbǒɔ̀ dyí, ké dú tɔ̀ɔ̀ mɛ gmɔ̀ gmɔ-wɔ̃̀ kɔ̃̀ nyɛ́nɛ́ mɔ̀à Hìɖì-kpà kɛɛ dyí. Ké nyɔ séín ɓěɔ̀ mɛ nì ɖé Bounɓoɔ̀ gbǒɔ̀ kɔ̃̀pã́ùnɔ̀ mú.

⁶ Nyɔ ɖò ní ɖá ɔ ké ɖé Bounɓoɔ̀ gbǒɔ̀ mú dyá, ɔ sèìn sáa-zà-nyɔ̀ ɓěɔ̀ kè Ɖíìváà-nyɔ̀ ɓě ɓɛ́ wa nì kũ̀à kɔ̃ún ɓó tia ɓaɖaa. Wa mɔ̀ nyɔ mɛ dyá ɖé, sepóɛɖé wa hwɛ̀ mú. Kɛɛ nyɔ séín ɓěɔ̀ mɛ nì ɖé kɔ̃̀pã́ùnɔ̀ mú kà Bounɓoɔ̀ nyuà cɛ̃ɛ kɛ.

⁷ Ɖíìváà-nyɔ̀ ɓěɔ̀ toún-vɔ̃̀ìn-ɖɛ̀ ɓěɔ̀ mɛ nì wa xwa, ɓɛ́ wa ké kã́áɔ̀ dyú-gààɔ̀ wɔ̃ gbǎìn, ɓɛ́ wa ké ɓɛ́ɖɛ́ kɔ̃ nì kánáá pū. Ké nyɔ mɔ̀ nyɔ ɓɛ́ ɔ mu ɖé Bounɓoɔ̀ gbǒɔ̀ mú dyáùn wɛ̃ɛ, wa mɛ ɖáɓá nyɔɔ̀. Wa mɛ xwɛ̃́ìn kã́áɔ̀ dyú-gààɔ̀ bũ̌in kóɖó-kóɖó dɛ̀ séín ɔ mu muùn wɛ̃.”

⁸ Ké Ɖíìváà-nyɔ̀ ɓěɔ̀ kè Júɖà-nyɔ̀ séín ɓěɔ̀ nyu ma ɖɛ séín ɓɛ́ Jɛ̀hódyáɖà mɔ̀à sáa-zà-nyɔ̀ vɛ̀nɛ̀ɔ̀ kɛɛ cɛ̃ ma kà wa gboɛ. Waà nàìn-nyɔ̀ ɓěɔ̀ ɖò-ɖò séín dyà ma waà gàa ɓěɔ̀. Wa dyà ma nyɔ ɓě nì ma kũ̀à kɔ̃ún ɓó Gèɖèpɔ́ɔ̀ fɔ̀-wèɔ̀ ɓaɖaa kè nyɔ se kũ̀à kɔ̃ún nìɛ, sepóɛɖé Jɛ̀hódyáɖà mɔ́ ɓɛ́ kpoo séín ké ma ɓó dyi gã̀.

⁹ Ké Jɛ̀hódyáɖà nyí ma sójà-nàìn-nyɔ̀ ɓěɔ̀ Dèɓéɛ̀ ɖí ɓě kè ɔ dyí-zĩ̀ìn-ɖɛ̀ mɛ́nɛ́-mɛ́nɛ́ kè vɛ̀nɛ̀-vɛ̀nɛ̀ ɓě ɓɛ́ wa dèìn ma ɖé Gèɖèpɔ́ɔ̀ gbǒɔ̀ mú dyiɛ.

¹⁰ Ké ɔ nyuɛ ké kã́áɔ̀ dyí-gmɔ̀-nyɔ̀ ɓěɔ̀ ɖò-ɖòɛ̀ toún-vɔ̃̀ìn-ɖɛ̀ nì ɔ xwa, ké wa gbǎìn sáa-kɔ̃-zàìn-gbààɔ̀ kè Gèɖèpɔ́ɔ̀ gbǒɔ̀ wɔ̃, ɓɛ́ wa ké kã́áɔ̀ dyú-gààɔ̀ dyí gmɔ̀. Waà dɔ̃̀ǐnɔ̀ sɔ̀ìn ma ɖé Gèɖèpɔ́ɔ̀ gbǒɔ̀ wáká hwɔà ɖé hwɔɖɔɔ̀ ɓíɖíi dyíɛɛ kɔ̃, ké ɔ nyini wáká hwɔà ɖé xwía dyíɛɛ kɔ̃.

¹¹ Hwɛ̀ ké Jɛ̀hódyáɖà síìn ma Jóàsì mɔ̀à kã́áɔ̀ dyú-gààɔ̀ kɛɛ ɓó píé, ké ɔ dèìn ma ɔ kã́á-gbàǎɔ̀ dú, ké ɔ nyí ma ɔ céè-ɖɛ̀ kɔ̃̀ mú ɓɛ́ Gèɖèpɔ́ɔ̀ dèè-wùɖùɔ̀ nìà kɛɛ ɖò xwa. Ké Jɛ̀hódyáɖà kè ɔ dyú-gàà ɓěɔ̀ po ma ɔ cáná dúún, ké wa po ma wuɖui kà ɔ mɔ̀ kã́á kɛ, ké nyɔ séín ɓěɔ̀ páná ma mú, ké wa ɖá, “Kã́áɔ̀ mɛ kɔ̃̀ à wuɖuí kánáá pū.”

¹² Ti ɓɛ́ nyɔ ɓěɔ̀ nì ma peɖeɛ kpauń, ké wa nì ma kã́áɔ̀ nyɛ́nɛ́ kɔ̃ wáɖáuń wɛ̃ɛ, púɛɛ, kã́á-màà mɔ̀à Áfàɖíà kɛɛ wɔ̃́ ma waà kuɖu-kuɖuɔ̀, ké ɔ mu ma ɖé nyɔ ɓěɔ̀ gbo, ɖé Bounɓoɔ̀ gbǒɔ̀ mú.

¹³ Ké ɔ gmɔ̀ ɖé, ké kã́áɔ̀ nyànà ma ɓó cúè-ɓò ɓě nìà ɓó Bounɓoɔ̀ gbǒɔ̀ wɔ̃ɔ̀ gboɛɛ ɖò wáún dyi. Ɖɛ nìà kɛ mɔ̀ ma waà kpeɖe. Ké kã́áɔ̀ dyí-gmɔ̀-nyɔ̀ ɓěɔ̀ nàìn-nyɔ̀ ɓěɔ̀ kè gã̀à-ɓaɖa-nyɔ̀ ɓěɔ̀ nì ma ɓó ɔ ɖei. Ké ɓóɖó-nyɔ̀ séín ɓěɔ̀ nì ma múà nyuɛń, ké wa nì ma gã̀à ɓaɖauń, ké ɓeɖe-nyɔ̀ ɓěɔ̀ ɓaɖaa-ɖɛ̀ ɓěɔ̀ nì ma wa xwa, ké wa nì ma wɛ́ɖɛ́ɔ̀ nàǐn. Púɛɛ, Áfàɖíà fáìn ma ɔ mìɔùn ɖɔún dyi, ké ɔ páná ma mú, ké ɔ ɖá, “Ɓě sɔ́ ḿ ní! Ɓě sɔ́ ḿ ní!”

¹⁴ Ké Jɛ̀hódyáɖà mɔ̀à sáa-zà-nyɔ̀ vɛ̀nɛ̀ɔ̀ kɛɛ cɛ̃ɛ sójà-nàìn-nyɔ̀ ɓěɔ̀ gbo, ké ɔ ɖá, “Ɓě kpɔ̃ ɔ, ɓɛ́ ɓě ké ɔ Bounɓoɔ̀ gbǒɔ̀ bũ̌ zà. Ɓě mɛ ɓɔ́ ɔ Bounɓoɔ̀ gbǒɔ̀ gbo ɖáɓáìn. Ɔ jǔ ké nyɔ ɖò dyi ɔ kíɖíí sí ní, ɓě ɖáɓá nyɔɔ̀ gàsíà dyí.”

¹⁵ Ké wa kpɔ̃ ma ɔ, ké wa kpa ma ɔ ɓó gmɔ-wɔ̃̀ kɔ̃̀ mú sǒ ɓěɔ̀ dyáìn ɖé kã́á-gbòɔ̀ kɔ̃̀pã́ùnɔ̀ kɔ̃ɛɛ wĩín, ké wa ɖáɓáìn ma ɔ ɓó páɔ̀ mú.

Jɛ̀hódyáɖà sɛ́ɖɛ́ìn ɖɛ dyí

¹⁶ Sɔ̀ìn ɓóɛ gboɛɛ, Jɛ̀hódyáɖà nyuɛ ké ɔ kè kã́áɔ̀ kè nyɔ ɓěɔ̀ ɖi ma wuɖu ɓó Bounɓoɔ̀ dyúa kà wa mu Bounɓoɔ̀ nììn nyɔ ɓě jǔùn kánáá pū kɛ.

¹⁷ Ké nyɔ séín ɓěɔ̀ mu ma ɖé Béòɛ̀ gbǒɔ̀ gbo, ké wa wáɖáa. Wa wàìn ma sáa-kɔ̃-zàìn-gbàà ɓěɔ̀ kè kũùn-kpò ɓěɔ̀ dyi. Ké wa ɖáɓáìn ma Mátàùn ɓɛ́ ɔ mɔ̀ ma Béò nììn sáa-zà-nyɔ̀ kɛɛ ɓó sáa-kɔ̃-zàìn-gbàà ɓěɔ̀ dyúa.

¹⁸ Ké Jɛ̀hódyáɖà sè ma ɖɛ-dyí-gmɔ̀-nyɔ̀ ɓě ɖé Bounɓoɔ̀ gbǒɔ̀ gbo. Wa mɔ̀ sáa-zà-nyɔ̀ ɓě kè Ɖíìváà-nyɔ̀ ɓě ɓɛ́ Dèɓé ɖǎ ma páún po, ɓɛ́ wa ké ma Bounɓoɔ̀ gbǒɔ̀ jè gbo-gmɔ̀-nyɔ̀ ɓě jǔ, ɓɛ́ wa ké ma fɔ̃ɔ-sàǎ-zàìn-ɖɛ̀ nyu ɓó Bounɓoɔ̀ bìì, kà ɔ nyuà céèɛ̀ ɖé Mózèɛ̀ gmaɔ̀ múɛ. Wa ɓéɖé wa kéɛ nyu ɖé múà kè wɛ́ɖɛ́-wùɖù mú dyììn ɖé kà Dèɓé nyuɛ ma páún poɛ kɛɛ mú.

¹⁹ Ké ɔ po ma gmɔ-wɔ̃̀-dyí-gmɔ̀-nyɔ̀ ɓě ɓó Bounɓoɔ̀ gbǒɔ̀ gmɔ-wɔ̃̀ ɓěɔ̀ gbo, nìí ɓɛ́ nyɔ ɖò ɓɛ́ ɖɛ ɖò nyuɛ ké ɔ se mú hwɛ̀ kɛɛ ní kɔ̃̀ ɖà ɖé dyá.

²⁰ Ké Jɛ̀hódyáɖà poìn ma sójà-wuɖuí-kɔ̃̀-nyɔ̀ ɓěɔ̀ kè ɓóɖóɔ̀ cu-kpà ɓěɔ̀ kè gɔ̌mànà-nyɔ̀ vɛ̀nɛ̀ ɓěɔ̀ ɔ kè ɓóɖó-dyù tɔ̀ɔ̀ ɓěɔ̀ dyí, ké wa zà ma kã́áɔ̀ ɖé Bounɓoɔ̀ gbǒɔ̀ mú, ké wa kpa ɔ ɖé kã́á-gbòɔ̀ mú. Wa dyáìn ma ɖé kã́á-gbòɔ̀ gmɔ-wɔ̃̀ hwɔà ɖé xwía dyíɛɛ mú. Ké wa nyuɛ ké kã́áɔ̀ kò ma ɓó zèèɔ̀ kɔ̃ dyi.

²¹ Ké ɓóɖó-nyɔ̀ séín ɓěɔ̀ kpá ma múàǔn. Ti ɓɛ́ wa ɖǎ ma Áfàɖíà gàsíà dyí ɖáɓáa, púɛɛ, hwɔɖɔɔ̀ ɓéɖé ma gìɖìǐ.