2 Kánáníkɔ̀ 22 - Ɓǎsɔ́ɔ̀ Báɓòɔ̀

Áhàzíà mɔ̀à Júɖà-ɓòɖòɔ̀ kã́áɔ̀ kɛɛ jè

¹ Sɔ̀ìn ɓóɛ gboɛɛ, Jùɖúsɛ̀ɖɛ̀ìn-nyɔ̀ ɓěɔ̀ nyu ma Áhàzíà ɓɛ́ ɔ mɔ̀à Jɛ̀hówàɖàùnɛ̀ dyú-gàà ɓěɔ̀ kpàǔn-hwɛ̀ǐnɔ̀ kɛɛ kã́á mú ɓó ɔ ɓǎ bɛ̃̌ǐn, sepóɛɖé gàa ɓě ɓɛ́ wa sɔ̀ ma kà ɖé Àwéɖéɓìà-nyɔ̀ ɓěɔ̀ jàɖàìn-hwɔ̀ɖɔ̀ɔ̀ múɛɛ ɖáɓá ma Jɛ̀hówàɖàùnɛ̀ dyú-gàà vɛ̀nɛ̀ séín ɓěɔ̀ ní. Ɔ jèɛɛ, Áhàzíà mɔ̀à Jɛ̀hówàɖàùnɛ̀ dyú-gààɔ̀ kɛɛ kɔ̃̀ ma Júɖà-ɓòɖòɔ̀ wuɖuí.

² Áhàzíà nyuá ma zɔ̃ kpáɖá-nyɔ sè sɔ̃́ ti ɓɛ́ ɔ dè ma kã́á-kũ̀àɔ̀ gbɔ kɛ. Ɔ kɔ̃̀ ma Júɖà-ɓòɖòɔ̀ wuɖuí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mu, ɓó zɔ̃ ɖò xwíníín. Ɔ ɖeɛ nyɛ́nɛ́ mɔ̀ ma Áfàɖíà. Áfàɖíà mɔ̀ ma Ɔ̃́wìɖìɛ̀ nyúà-dyú.

³ Áhàzíà nyu ma Bounɓoɔ̀ nàmàǔn bũ̌ kà dyúáɖò kà Éhà nììn gbǒ-xwíníín-nyɔ̀ ɓěɔ̀ nyuɛ ma kà kɛ, sepóɛɖé ɔ ɖe mɔ̀ ma ɔ náún-po-nyɔ̀ ɖé ɖɛ-gbà-nyu-nyu mú.

⁴ Ɔ nyu ma ɖɛ mɔ̀ ɖɛ gbà ɖé Bounɓoɔ̀ dyéɖéín nyɛ kà Éhà nììn gbǒ-xwíníínɔ̀ nyuɛ ma kà kɛ, sepóɛɖé ti ɓɛ́ ɔ ɓǎ ɖǎ ma mɛ́ɛ, wa mɔ̀ǎ ma ɔ náún-po-nyɔ̀, ké ɖɛ nìà kɛ dyà ma ɔ mú-gbɔɔ̀-gbɔɔ̀.

⁵ Ɔ sí ma waà náún-po-wùɖùɔ̀ kíɖíí, ké ɔ kè Jówàɖàùn ɓɛ́ ɔ mɔ̀ Éhàà dyú-gàà, ɓɛ́ ɔ mɔ̀ Éézùɖùɛ̀-ɓòɖòɔ̀ kã́á kɛɛ kpa ma Hàzáè ɓɛ́ ɔ mɔ̀ Síwíɖíà-ɓòɖòɔ̀ kã́á kɛɛ to kɔ̃ ɖé Wáɖámɔ̀-hwɔ̀ɖɔ̀ nìà ɖé Gíɖèà-ɓòɖòɔ̀ kɔ̃ɛɛ mú. Ké Síwíɖíà-nyɔ̀ ɓěɔ̀ puà ma Jówàɖàùn,

⁶ ké Jówàɖàùn kɔ́ìn ma ɖe, ké ɔ mu ma ɖé Jìzéɖéò-hwɔ̀ɖɔ̀ɔ̀ mú ɖe, ɓɛ́ ɔ ké dyi káná hwɛ̀. Ké Áhàzíà mu ma ɖé Jìzéɖéò-hwɔ̀ɖɔ̀ɔ̀ mú, ɓɛ́ ɔ ké ma Jówàɖàùn nyíɔún zà ɓó ɔ puà jè.

⁷ Kɛɛ Gèɖèpɔ́ɔ̀ ɖǎa ma dyí sɔ́, ɓɛ́ Áhàzíà ké ma ɓíɖíi dyi kpá dyììn ɖé ɔ Jówàɖàùn gboi té-téɔ̀ mú. Ti ɓɛ́ ɔ nyini ma ɖéɛɛ, ɔ kè Jówàɖàùn mu ma Jɛ́hù mɔ̀à Nísìɛ̀ dyú-gàà, ɓɛ́ Bounɓoɔ̀ ɖǎ ma gã, ɓɛ́ ɔ ké ma Éhàà gbǒ-xwíníínɔ̀ mú gbɔɔ̀ kɛɛ hwìǐ.

⁸ Ti ɓɛ́ Jɛ́hù nì ma Éhàà gbǒ-xwíníínɔ̀ gǎ kɔ̃ dyàǔn wɛ̃ɛ, ɔ kè Júɖà-ɓòɖòɔ̀ gɔ̌mànà-nyɔ̀ vɛ̀nɛ̀ ɓěɔ̀ ɖíɛ́ ɓě kè Áhàzíàà ɖíí-gàà ɓěɔ̀ dyú-gàà ɓě ɓɛ́ wa mɔ̀ ma Áhàzíàà gbo-gmɔ̀-nyɔ̀ ɓěɛɛ gmɔ̌ìn ma ní, ké ɔ ɖáɓá wa.

⁹ Ké Jɛ́hùɛ̀ gbo-nì-nyɔ̀ ɓěɔ̀ mɔ́ ma Áhàzíà dyi, ké wa kpɔ̃̀ìn ma ɔ ɖé Sɛ̀mɛ́ɖìà-hwɔ̀ɖɔ̀ɔ̀ mú, dɛ̀ ɓɛ́ ɔ vǐè ma kɛ, ké wa dyà ma ɔ Jɛ́hù gbo, ké Jɛ́hù ɖáɓá ɔ. Ké wa zà ma ɔ dyóɖóún, sepóɛɖé wa ɖá, “Ɔ mɔ̀ Jɛ̀hósáfà ɓɛ́ ɔ sí ma Bounɓoɔ̀ kíɖíí hwòɖǒɛ̀-ɖé-hwɛ̀-kà kɛɛ nyúà-dyú.” Ké nyɔ ɖò se ma ɖé Áhàzíà nììn gbǒɔ̀ xwíníín sè, ɓɛ́ ɔ ké ma Júɖà-ɓòɖòɔ̀ wuɖuí kɔ̃̀ɔ̀ ɓɛ́ìn.

Áfàɖíà mɔ̀à Júɖà-ɓòɖòɔ̀ kã́á-mààɔ̀ kɛɛ jè

¹⁰ Ti ɓɛ́ Áfàɖíà dyéɛ ma kà ɔ dyú-gàà Áhàzíà mɔ̀ ma kà Júɖà-kã̀ǎɔ̀ kɛɛ ɖǎ ma mɛ́ɛ, púɛɛ, ɔ ɖú ma kã́áɔ̀ gbǒ-xwíníín-nyɔ̀ tɔ̀ɔ̀ séín ɓěɔ̀ ɖáɓá kpàǐ.

¹¹ Kɛɛ Jɛ̀hósɛ́ɓà ɓɛ́ ɔ mɔ̀ ma Kã́á Jówàɖàùnɛ̀ dyú-màà ɖò, ké ɔ mɔ̀ ma Jɛ̀hódyáɖà ɓɛ́ ɔ mɔ̀ ma sáa-zà-nyɔ̀ vɛ̀nɛ̀ kɛɛ gmàà, ké ɔ mɔ̀ ma Áhàzíàà ɖíí-màà kɛɛ ɖú ma Jóàsì ɓɛ́ ɔ mɔ̀ Áhàzíàà dyú-gàà kɛɛ dyí sɔ̀ìn kã́áɔ̀ dyú-gàà ɓě ɓɛ́ Áfàɖíà mɔ́ ma kà ɖáɓáa dyiɛɛ hwìɛ̀, ké ɔ vǐè ɔ. Ɔ po ma dyú-gbɔ́ɔ̀ kè ɔ gmɛ̀ìn-ɖè ɖé ɓí-dyù ɖò nì ɖé Gèɖèpɔ́ɔ̀ gbǒɔ̀ múɛɛ mú, ɓɛ́ Áfàɖíà ní kɔ̃̀ ɖà ɔ ɖáɓá. Ké Áfàɖíà se ma ɔ ɖáɓá.

¹² Ké dyú-gbɔ́ɔ̀ gã̀ ma vǐè-xwàɖàɔ̀ mú dyi ɖé Gèɖèpɔ́ɔ̀ gbǒɔ̀ mú ɓó zɔ̃ mɛ̀nɛ̌ìn-ɖò xwíníín, ti ɓɛ́ Áfàɖíà kɔ̃̀ ma ɓóɖóɔ̀ wuɖuíɛ.