2 Kánáníkɔ̀ 21 - Ɓǎsɔ́ɔ̀ Báɓòɔ̀

Jɛ̀hówàɖàùn mɔ̀à Júɖà-ɓòɖòɔ̀ kã́áɔ̀ kɛɛ jè

¹ Sɔ̀ìn ɓóɛ gboɛɛ, Jɛ̀hósáfà mu ma ɔ ɓǎ ɓě gbo, ké wa zà ma ɔ dyóɖóún ɖé kã́á ɓěɔ̀ nììn kú-toɖoɔ̀ mú, ɖé Dèɓé ɓíɖí-hwɔ̀ɖɔ̀ɔ̀ mú. Ké ɔ dyú-gàà kɔ̃̀ nyɛ́nɛ́ mɔ̀ Jɛ̀hówàɖàùn kɛɛ mɔ̀ ma kã́á ɓó ɔ bɛ̃̌ǐn.

² Jɛ̀hówàɖàùn ɓéɖé ma ɖíí-gàà ɓě kɔ̃̀ nyɛ́nɛ́ mɔ̀ Ázàwíɖíà kè Jɛ̀híò kè Zɛ́kɔ̀wáɖádyà kè Ázàwíɖíà ɖò ɖe kè Makɔ́ ɔ kè Sɛ̀fátìà kɛ. Wa séín mɔ̀ ma Jɛ̀hósáfà ɓɛ́ ɔ mɔ̀ ma kà Júɖà-kã̀ǎɔ̀ kɛɛ dyú-gàà ɓě.

³ Wa ɓǎ nyí ma wa nyíí-ɖɛ̀ vɛ̀nɛ̀-vɛ̀nɛ̀ ɓě mɔ̀ séɓàɖà kè góò ɔ kè ɖɛ kpa ɖɛ tɔ̀ɔ̀ ɓěɛ kè toún-pèɖèìn-hwɔ̀ɖɔ̀ ɓě ɖé Júɖà-ɓòɖòɔ̀ kɔ̃, kɛɛ ɔ nyí ma kã́á-ɓòɖòɔ̀ Jɛ̀hówàɖàùn, sepóɛɖé ɔ mɔ̀ ma nyíɔ́-dyùɔ̀.

⁴ Ti ɓɛ́ Jɛ̀hówàɖàùn ɖǎ ma ɔ ɓǎà zèèɔ̀ kɔ̃ kò, ké ɔ kã́á-ɓòɖòɔ̀ ɖǎ ma dúi kuɛɛ, ɔ ɖáɓá ma ɔ ɖíí-gàà séín ɓěɔ̀ gàsíà dyí, dè Júɖà-ɓòɖòɔ̀ gɔ̌mànà-nyɔ̀ vɛ̀nɛ̀ ɖíɛ́ ɓě kɔ̃.

⁵ Jɛ̀hówàɖàùn nyuá ma zɔ̃ kpáɖá-nyɔ ɓaɖa-bùè sè sɔ̃́ ti ɓɛ́ ɔ dè ma kã́á-kũ̀àɔ̀ gbɔ kɛ. Ɔ kɔ̃̀ ma Júɖà-ɓòɖòɔ̀ wuɖuí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓó zɔ̃ mɛ̀nɛ̌ìn-tã xwíníín.

⁶ Ɔ nyu ma Bounɓoɔ̀ nàmàǔn bũ̌ kà dyúáɖò kà Éhà kè Éézùɖùɛ̀-kã̀ǎ tɔ̀ɔ̀ ɓěɔ̀ nyuɛ ma kà kɛ, sepóɛɖé ɔ kpɔ̃ ma Éhàà dyú-màà ɖò dyi jè.

⁷ Kɛɛ wɛ̃́ɛ́ kɛɛ, Bounɓoɔ̀ se ma Dèɓéɛ̀ gbǒ-xwíníínɔ̀ mú gbɔɔ̀ mɔ́ ɓó dèè-wùɖù nì ma kà ɓó ɔ kè Dèɓé pṹa kɛɛ jè. Ɔ ɖǎa ma Dèɓé nyɛ́nɛ́ín ɖáìn kà ɔ xwíníín-dyù ɓěɔ̀ ɖò mu kã́á jǔùn kánáá pūɛ.

⁸ Ɖé Jɛ̀hówàɖàùn nììn ɓóɖó-wuɖuí-kɔ̃̀-tìɔ̀ múɛɛ, Íɖɔ̀ùn-nyɔ̀ ɓěɔ̀ po ma Júɖà-nyɔ̀ ɓěɔ̀ kɛ́ɛ́ dyí, ké wa gã ma wa mìɔùn nììn kã́á.

⁹ Ɔ jèɛɛ, Jɛ̀hówàɖàùn kè ɔ sójà-wuɖuí-kɔ̃̀-nyɔ̀ ɓěɔ̀ ɖú ma waà hwíì-sǒ séín ɓěɔ̀ dyí, ké wa kpa ma Íɖɔ̀ùn-nyɔ̀ ɓěɔ̀ to kɔ̃. Ké Íɖɔ̀ùn-nyɔ̀ ɓěɔ̀ gbǎìn ma wa wɔ̃, kɛɛ Jɛ̀hówàɖàùn kè ɔ hwíì-sǒ-nàìn-nyɔ̀ ɓěɔ̀ sɔ̀ ma dyí ɓó máaún, ké wa gèìn ma Íɖɔ̀ùn-nyɔ̀ ɓěɔ̀ mú.

¹⁰ Sɔ̀ìn ɓóɛ gboɛɛ, Íɖɔ̀ùn-ɓòɖòɔ̀ séè Júɖà-ɓòɖòɔ̀ xwíɖíi nì ɖò ɖe. Ɓó ti dyúáɖòɔ̀ múɛɛ, Ɖínà-hwɔ̀ɖɔ̀ɔ̀ mɔ̀ùn po ma kɛ́ɛ́, ké wa sɔ̀ ma Júɖà-ɓòɖòɔ̀ xwíɖíi ɖekè, sepóɛɖé Jɛ̀hówàɖàùn táà ma Bounɓo mɔ̀à ɔ ɓǎ nììn ɓǎ ɓěɛ̀ Gèɖèpɔ́ɔ̀ kɛɛ kíɖíí sí jè dyi.

¹¹ Ɓó kɔ̃in ɖeɛɛ, ɔ nyu ma kũùn-kpò ɓièìn-naín ɓě ɖé Júɖà Toɖo-ɓòɖòɔ̀ kɔ̃, ké ɔ nyuɛ ké Jùɖúsɛ̀ɖɛ̀ìn-nyɔ̀ ɓěɔ̀ kè Júɖà-nyɔ̀ tɔ̀ɔ̀ ɓěɔ̀ se ma Gèɖèpɔ́ɔ̀ kíɖíí sí ɖe kóɖó-kóɖó, ké wa sɔ̀ìn ma hwìǐ.

¹² Wé ɖòɛ̀ ɓaɖaa, Jɛ̀hówàɖàùn dyé ma céè-ɖɛ̀ ɖò sɔ̀ìn ɖé Ìɖáájɔ̀ mɔ̀à kpáá-ɖɛ̀-cɛ̃-nyɔ̀ɔ̀ kɛɛ gbo. Céè-ɖɛ̀ɔ̀ wuɖu ɖá, “Ɖɛ ɓɛ́ Bounɓo mɔ̀à m̀ ɓǎ nììn ɓǎ Dèɓéɛ̀ Gèɖèpɔ́ɔ̀ kɛɛ cɛ̃ɛ kɛà kɛ̀. Ɔ ɖá, ‘M̀ se m̀ ɓǎ Jɛ̀hósáfà kè m̀ ɓǎ nììn ɓǎ Ásà mɔ̀à Júɖà-kã̀ǎ ɓěɔ̀ kɛɛ kpeɖe kíɖíí sí.

¹³ Kɛɛ m̀ sí Éézùɖùɛ̀-kã̀ǎ ɓěɔ̀ nììn kpeɖe kíɖíí, ké m̀ ɖǎa nyu ké Jùɖúsɛ̀ɖɛ̀ìn-nyɔ̀ ɓěɔ̀ kè Júɖà-nyɔ̀ tɔ̀ɔ̀ ɓěɔ̀ se mɔ̄ Bounɓoɔ̀ kíɖíí síɛń nì ɖe kà dyúáɖò kà Éhà nììn gbǒ-xwíníín-nyɔ̀ ɓěɔ̀ nyuà ɓɛ́ Éézùɖùɛ̀-dyù ɓěɔ̀ seà mɔ̄ Bounɓoɔ̀ kíɖíí síɛń nì ɖeɛ. Ké ɓó kɔ̃in ɖeɛɛ, m̀ ɖǎ nì ɖíí-gàà ɓě mɔ̀ m̀ ɓǎà xwíníín-zà-dyù ɓě, ɓɛ́ wa kpa ma ɖɛ ké wa zi mɔ̀ùn dyíɛɛ ɖáɓá.

¹⁴ Ɔ jèɛɛ, gmɔ̀ nɔ̄, mɔ̄ Bounɓoɔ̀ mu nì nyɔ ɓěɔ̀ kè nì dyú ɓěɔ̀ kè nì gmàà ɓěɔ̀ gǎ kɔ̃ tòùn, ké ní mu nì kɔ̃̀ɔ̀-ɖɛ̀ séín ɓěɔ̀ mú gbɔɔ̀ùn.

¹⁵ Ké wɛ́ nyìnììn dyíin ɖò mu m̀ mìɔùn kpɔ̃ùn, ké wɛ́ɔ̀ muɛ nyuùn ɓɛ́ boɖo ké m̀ wóɖó ɓó wé kè wé xwíníín.’ ”

¹⁶ Sɔ̀ìn ɓóɛ gboɛɛ, Bounɓoɔ̀ nyuɛ ké Féɖésìà-nyɔ̀ ɓěɔ̀ kè Àwéɖéɓìà-nyɔ̀ ɓě mɔ̀ nyɔ ɓě ɓɛ́ wa xwɛ̃́ìn ma Kúsì-nyɔ̀ ɓěɔ̀ bũ̌in nyɛɛ kpáìn ma Jɛ̀hówàɖàùn dyoɖoún.

¹⁷ Ké wa dyà ma Júɖà-ɓòɖòɔ̀ to kɔ̃, ké wa kpa ma kã́áɔ̀ kɔ̃̀ɔ̀-ɖɛ̀ séín ɓě ɓɛ́ wa dyé ma ɖé kã́á-mú-cĩ́-gbòɔ̀ múɛ, ké wa kpa ma kã́áɔ̀ dyú-gàà ɓěɔ̀ kè ɔ gmàà ɓěɔ̀ ɖekè. Ké ɔ dyú-gàà ɓěɔ̀ ɖò se ma ɓíɖíi sè, ɔ sèìn Áhàzíà ɓɛ́ ɔ mɔ̀ ma kpàǔn-hwɛ̀ǐn nyɛ.

¹⁸ Sɔ̀ìn ɓó ɖɛ ɓěɛ̀ gboɛɛ, Bounɓoɔ̀ nyuɛ ké xwíníín-wɛ̀ se kũùn kɔ̃̀ ɖò kpɔ̃ ma Jɛ̀hówàɖàùn.

¹⁹ Ti ɓɛ́ zɔ̃ sɔ̃́ ɖǎ ma ziɛɛ, wɛ́ɔ̀ ku ma wɔ̃ mìɔ jèɛɛ, ɔ xwíníín-ɖɛ̀ ɓěɔ̀ wóɖó ma píé, ké wɛ́ɔ̀ gã̀ ma ɔ puàǔn dyi ké ɔ mɛ́ ma. Ɔ nyɔ ɓěɔ̀ se ma nyɛ-ɓɔ́ɔ́ vɛ̀nɛ̀ ɖò dyí po ɖé ɔ kpéín-dyé-dyé mú kà wa nyuɛ ma kà ɓó ɔ ɓǎ nììn ɓǎ ɓě bììɛ.

²⁰ Jɛ̀hówàɖàùn nyuá ma zɔ̃ kpáɖá-nyɔ ɓaɖa-bùè sè sɔ̃́ ti ɓɛ́ ɔ dè ma Júɖà-ɓòɖòɔ̀ wuɖuí kɔ̃̀ɔ̀ gbɔɛ. Ɔ kɔ̃̀ ma ɓóɖóɔ̀ wuɖuí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓó zɔ̃ mɛ̀nɛ̌ìn-tã xwíníín. Ɔ mɛ́ jè se ma nyɔ ɖòɛ̀ hwòɖǒ ɖé ɖei po fɔɔ cá. Wa zàìn ma ɔ ɖé Dèɓé ɓíɖí-hwɔ̀ɖɔ̀ɔ̀ mú dyóɖóún, kɛɛ ɔ se ma ɖé kã́á ɓěɔ̀ nììn kú-toɖoɔ̀ mú.