2 Kánáníkɔ̀ 20 - Ɓǎsɔ́ɔ̀ Báɓòɔ̀

Júɖà-nyɔ̀ ɓěɔ̀ kè Íɖɔ̀ùn-nyɔ̀ ɓěɔ̀ vɔ̃ to

¹ Sɔ̀ìn ɓóɛ gboɛɛ, Móà-nyɔ̀ ɓěɔ̀ kè Ámànà-nyɔ̀ ɓěɔ̀ ɔ kè Mɛ̀dyúnì-nyɔ̀ ɓěɔ̀ ɖíɛ́ ɓě dyà ma Kã́á Jɛ̀hósáfà to kɔ̃.

² Ké nyɔ ɖíɛ́ ɓě dyi, ké wa cɛ̃ɛ ma Jɛ̀hósáfà gbo, ké wa ɖá, “Sójà kúɖúú ɓě sɔ̀ìn ɖé Íɖɔ̀ùn-ɓòɖò nìà ɖé Tɔ̃́ Dòùnɓìǎɔ̀ wáká tɔ̀ɔ̀ kɔ̃ɛɛ kɔ̃, ké wa nì m̀ to kɔ̃ dyàǔno. Gmɔ̀ nɔ̄, wa nì ɖé Házìzɔ̃̀-Támà-hwɔ̀ɖɔ̀ kɔ̃̀ nyɛ́nɛ́ tɔ̀ɔ̀ mɔ̀à Ègáɖì kɛɛ mú ɓó kàǔn.”

³ Púɛɛ, Jɛ̀hósáfà fɛ̃̀ìn ma ní mìɔ jèɛɛ, ɔ mu ma Bounɓoɔ̀ dyi dièìn. Ɔ po ma wuɖui ɖé Júɖà-ɓòɖòɔ̀ dà séín, ɓɛ́ nyɔ séín ké ma wɔ̃ kɔ̃ hwèɖè.

⁴ Ké Júɖà-nyɔ̀ séín ɓě sɔ̀ ma ɓóɖóɔ̀ hwɔɖɔ séín ɓěɔ̀ múin nyɛɛ poìn ma dyí, ɓɛ́ wa ké ma Bounɓoɔ̀ dyi diè kóɖó-kóɖó, ɓɛ́ ɔ ké ma wa gbo kpá.

⁵ Ké Jɛ̀hósáfà nyànà ma ɖé Júɖà-nyɔ̀ ɓě poìn ma kà dyí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ hwìɛ̀ dyi ɓó Bounɓoɔ̀ gbǒɔ̀ kɔ̃̀pã́ùn ɖìèɔ̀ dyúa,

⁶ ké ɔ ɖá, “Óó Bounɓo, mɔ̀ mɔ̀à à ɓǎ nììn ɓǎ ɓěɛ̀ Gèɖèpɔ́ɔ̀ kɛɛ, má, mɔ̀ mɔ̀ Gèɖèpɔ́ɔ̀ nì ɖé dyɔún wɛ̃e? Má, mɔ̀ mɔ̀ nyɔ kɔ̃̀ kã́á-ɓòɖò séín nì ɓóɖó-kpàà kɔ̃ɛɛ wuɖuíe? Kpé kè gana nì ɖé m̀ xwaún jèɛɛ, nyɔ ɖò se ɓó m̀ dyúa dyi nyànàà ɓɛ́ìn.

⁷ Má, mɔ̀ mɔ̀à à Gèɖèpɔ́ɔ̀ kɛɛ, mɔ̀ mɔ̀ nyɔ nyuɛ ké nì nyɔ ɓě mɔ̀à Éézùɖùɛ̀-nyɔ̀ ɓěɔ̀ kɛɛ kúmú zɔ̃̌ɔ̀ kà ɓóɖóɛ̀ nyɔ ɓěɔ̀ nɔ̄ dyi, ké m̀ nyí zɔ̃̌ɔ̀ ɓóɖóɛ̀ wa mɔ̀à nì ɓǎto Ééɓòɖòhɛ̃́ɛ̀ xwíníín-dyù ɓěɔ̀ kɛ, ɓɛ́ ɔ ké waà kɔ̃̀ɔ̀-ɖɛ̀ jǔ kánáá pūe?

⁸ Ké wa ɖǎ ɓóɖóɛ̀ kɔ̃ cĩ́, ké wa ɖǎ gbǒ ɖò po ɓó m̀ bìì, ké wa ɖá,

⁹ ‘Ɔ jǔ ké gǎ-ɖɛ̀ ɖò dyi à kɔ̃ dyi ní, nìí, à mu gbǒ nìà kɛ ɓɛ́ ɔ mùìn kà m̀ nyɛ́nɛ́ín nyɛɛ dyúa dyi nyànàùn ɓó m̀ dyúa, ɓɛ́ à ké m̀ kpéi pòìn ɖé à gǎ-dyé-tìɔ̀ mú, ké nì mu à kpé-po-wùɖùɔ̀ wɔ̃́ùn, ɓɛ́ m̀ ké à póìn. Gǎ-ɖɛ̀ ɓěɔ̀ hwɔìn kà zɔ̃́ín-dúún-wáɖá-wáɖá ɓɛ́ ɔ dyà gàsíà-tò kɛ mɔɔ wɛ́ nyìnììn dyíin mɔɔ mɔ́ vɛ̀nɛ̀.’

¹⁰ “Ɓó kàǔn wɛ̃ɛ, dyéɛ kà Ámànà-nyɔ̀ ɓěɔ̀ kè Móà-nyɔ̀ ɓěɔ̀ ɔ kè Íɖɔ̀ùn-nyɔ̀ ɓěɔ̀ nì à to kɔ̃ dyàǔn wɛ̃. Wa mɔ̀ nyɔ ɓě ɓɛ́ m̀ se zɔ̃̌ɔ̀ wɔ̃́ ɓɛ́ Éézùɖùɛ̀-nyɔ̀ ɓěɔ̀ ké ma to kɔ̃ po, ti ɓɛ́ wa sɔ̀ zɔ̃̌ɔ̀ kà ɖé Íjè-ɓòɖòɔ̀ kɔ̃ɛ. Éézùɖùɛ̀-nyɔ̀ ɓěɔ̀ ɓàɖàìn ma wa dyi, ké wa se ma wa mú gbɔɔ̀.

¹¹ Dyéɛ kà pɛ́ɛ̀-ɖɛ̀ wa mɔ́ à nyíɛ dyi ɓóɛ jèɛɛ mɔ̀, ɓɛ́ wa ké à ɓóɖó ɓɛ́ m̀ ɖǎ à nyí, ɓɛ́ ɔ ké à kɔ̃̀ɔ̀-ɖɛ̀ jǔ kánáá pūɛɛ kɔ̃ dyi kúmúɛ.

¹² À Gèɖèpɔ́ɔ̀, m̀ se wa gǎ kɔ̃ tòɛ̌ muù? À se kpé ɖò ɓéɖé ɓɛ́ à ké nyɔ kúɖúú ɓě ɓɛ́ wa dyàà à to kɔ̃ɛɛ gbo vɔ̃. À se dyuò ɖɛ à ké nyuɛ, kɛɛ à dyéɖé nì m̀ dya.”

¹³ Ɓó tia ɓaɖaa, Júɖà-gàà séín ɓěɔ̀ kè waà gmàà ɓě ɔ kè waà dyú ɓě nyànà ma ɓó Bounɓoɔ̀ dyúa dyi.

¹⁴ Hwɛ̀ ké Bounɓoɔ̀ Zùùɔ̀ dyi ma Jàházìè ɓɛ́ ɔ mɔ̀ ma Ɖíìváà-nyɔ̀ ɖò, ɓɛ́ ɔ mɔ̀ ma Ásàfìɛ̀ xwíníín-dyù ɓěɔ̀ ɖò kɛɛ kɔ̃ ɖé nyɔ ɓěɔ̀ hwìɛ̀. Jàházìè ɓǎ nììn ɓǎ ɓěɔ̀ kɛà kɛ̀. Màtánìà wóɖóìn ma Jɛ̀dyíò, ké Jɛ̀dyíò wóɖóìn ma Bɛ̀nádyà, ké Bɛ̀nádyà wóɖóìn ma Zɛ́kɔ̀wáɖádyà, hwɛ̀ ké Zɛ́kɔ̀wáɖádyà wóɖóìn ma kà Jàházìè kɛ̀.

¹⁵ Ké Jàházìè ɖá, “Kã́á Jɛ̀hósáfà, m̀ kè Jùɖúsɛ̀ɖɛ̀ìn-nyɔ̀ ɓěɔ̀ ɔ kè Júɖà-nyɔ̀ tɔ̀ɔ̀ ɓěɔ̀, ɓě tò ḿ gbo ɖùǔ. Ɖɛ Bounɓoɔ̀ cɛ̃ ɓě gboɛɛ kɛà kɛ̀. Ɔ ɖá, ‘Ɓěǐn ɖá ɓɛ́ ɓě ké fɛ̃̀ìn, ɓɛ́ ɓěɛ̀ hwòɖǒ ké ɖé ɖei kpá ɓá nyɔ kúɖúú ɓěa jè dyí, sepóɛɖé mɔ̄ Gèɖèpɔ́ɔ̀ mɔ̀ nyɔ ɓéɖé to-ɖu-ɖu kpé gbo. Ɓě mɔ̀ nyɔ se toɔ̀ kɔ̃̀.

¹⁶ Ɓě mɛ kpa wa to kɔ̃ ɓó gàɖàà. Gmɔ̀ nɔ̄, wa muɔ̀ Zízì-tòɖò ɓěɔ̀ pṹa zĩ̀ɛ̌n nììn, ké ɓě mu wa ɖé bɔɔ-kpà ɓɛ́ ɔ hwɔà ɖé Jɛ̀wúɖúè Gbǎùn-fúɖúáɔ̀ kɔ̃ dyíɛɛ mánáín dyi dyɛ̀ìn.

¹⁷ Ɓě mìɔùn se to nìà kɛ vɔ̃ɔ́ mu. Ɓě mu, ɓɛ́ ɓě ké ɓěɛ̀ páɔ̀ mú dyi nyànà gìɖìǐ, ɓɛ́ ɓě kéɛ dyé kà mɔ̄ Bounɓoɔ̀ mu ɓě mɔ̀ Jùɖúsɛ̀ɖɛ̀ìn-nyɔ̀ ɓěɔ̀ kè Júɖà-nyɔ̀ tɔ̀ɔ̀ ɓěɔ̀ toɔ̀ ɖuɛ nyuùn wɛ̃. Ɓěǐn ɖá ɓɛ́ ɓě ké fɛ̃̀ìn, ɓɛ́ ɓěɛ̀ hwòɖǒ ké ɖé ɖei kpá. Ɓě mɛ kpa wa to kɔ̃ ɓó gàɖàà, ké ní mu ɓó ɓě gbo nììn.’ ”

¹⁸ Ké Jɛ̀hósáfà taɓa ma dú hwuɖu, ké Jùɖúsɛ̀ɖɛ̀ìn-nyɔ̀ ɓěɔ̀ kè Júɖà-nyɔ̀ tɔ̀ɔ̀ ɓěɔ̀ jìɖǐ ma ɓó Bounɓoɔ̀ dyúa dyi, ké wa ɖú ma ɔ ɓiè kpàǐ.

¹⁹ Ké Ɖíìváà-nyɔ̀ ɓě mɔ̀à Kóhàà xwíníín-dyù ɓě kè Kówàɖàà xwíníín-dyù ɓěɛɛ nyànà ma dyi, ké wa ɓàìn ma Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ ɖé wuɖu zoo mú.

²⁰ Wéɔ̀ nyɔ kɔ ma ɓó dyíɛɛ gànà-kṹún mɛ̀nɛ̀ɛ̀ kɛɛ, Júɖà-nyɔ̀ ɓěɔ̀ sɔ̀ ma dyí, ké wa mu ma ɖé Jɛ̀wúɖúè Gbǎùn-fúɖúá ɓɛ́ ɔ nì ma ɖé Tèkóà-hwɔ̀ɖɔ̀ɔ̀ wĩín nyɛɛ kɔ̃. Ti ɓɛ́ wa nì ma hwìè kɔ̃ kpáuń wɛ̃ɛ, Jɛ̀hósáfà nyànà ma dyi, ké ɔ ɖá, “Jùɖúsɛ̀ɖɛ̀ìn-nyɔ̀ ɓě kè Júɖà-nyɔ̀ tɔ̀ɔ̀ ɓě, ɓě tò ḿ gbo ɖùǔ. Ɓě taɓa Bounɓo mɔ̀à ɓěɛ̀ Gèɖèpɔ́ɔ̀ kɛɛ hwìɖǐǐ, nìí, ɔ mu ɓě dyi kùìn. Ɓě po ɔ kpáá-ɖɛ̀-cɛ̃-nyɔ̀ ɓěɔ̀ wuɖu ɓěɔ̀ jǎà, nìí, ɓěɛ̀ nyuu-ɖɛ̀ ɓěɔ̀ mu kpáná mú nììn.”

²¹ Ké ɔ diè ma nyɔ ɓěɔ̀ fɔ̀nɔ̀-hwòɖǒ dyi, ké ɔ gã ma nyɔ ɓě ké ma sójà ɓěɔ̀ dyúa nì, ɓɛ́ wa ké ma Bounɓoɔ̀ dĩ́ín-dĩ̀ìn vɛ̀nɛ̀ɔ̀ ɓàìn ɖé wɛ́ɖɛ́ mú, ɓɛ́ wa ké níiń, “Ɓě po Bounɓoɔ̀ zùo, sepóɛɖé ɔ ɖɛ̀ɓɛ̀ǐn-ɖɛ̀ɓɛ̀ǐnɔ̀ se sèìn-naín ɖò kɔ̃̀” kɛ.

²² Ké ti wa ɖú ma ɓeɖe kpàǐ, ké wa ɖú ma Bounɓoɔ̀ ɓàìn kpàǐɛɛ, pūɛɛ, Bounɓoɔ̀ nyuɛ ké Ámànà-nyɔ̀ ɓěɔ̀ kè Móà-nyɔ̀ ɓěɔ̀ ɔ kè Íɖɔ̀ùn-nyɔ̀ ɓě ɓɛ́ wa dyà ma kà Júɖà-ɓòɖòɔ̀ to kɔ̃ɛɛ ɖu ma gbo vɔ̃ìn kpàǐ.

²³ Ámànà-nyɔ̀ ɓěɔ̀ kè Móà-nyɔ̀ ɓěɔ̀ vɔ̃ ma Íɖɔ̀ùn-nyɔ̀ ɓěɔ̀ gbo, ké wa ɖáɓá ma Íɖɔ̀ùn-nyɔ̀ ɓěɔ̀ séín nyɛ̀nɛ̀ɛ̀. Ti ɓɛ́ wa ɖǎ ma Íɖɔ̀ùn-nyɔ̀ ɓěɔ̀ ɖáɓáa hwɔɛɛ, púɛɛ, wa ɖáɓáìn ɖàɓàìn.

²⁴ Ti ɓɛ́ Júɖà-nyɔ̀ ɓěɔ̀ dyi ma ɖé gbǒ tɔ̀mɔ̀ dya ɖò nì ma ɖé gbǎùn-fúɖúáɔ̀ kɔ̃ɛɛ gbo, ké wa gmɔ̀ ma ɖé dɛ̀ sójà kúɖúú ɓěɔ̀ nì ma kà kɛɛ, wa dyé ma xwɛ́ saá-saá ɖé ɓíɖíi dyi wáɖáa. Waà nyɔ dyúáɖò dyɛ mɔ̀ùn seɛ ma xwaún pó.

²⁵ Ti ɓɛ́ Jɛ̀hósáfà kè ɔ nyɔ ɓěɔ̀ dyé ma xwɛ́ ɓěɔ̀ kɛɛ, wa mu ma xwɛ́ ɓěɔ̀ ɖɛ bũ̌in zàùn. Ké wa dyé ma nyúà-ɖɛ̀ kúɖúú kè mú-po-ɖɔ̀ ɓě kè ɖɛ kpa ɖɛ ɓě ɔ kè ɖɛ tɔ̀ɔ̀ ɓě, ké wa ɖú ma wa dyí. Wa gã̀ ma ɖɛ ɓěɔ̀ hwùɖǔɛń dyi tee ɓó wé tã xwíníín, ké wa sa.

²⁶ Ké ɓó wéɔ̀ hĩinyɛ nììnɔ̀ ɓaɖaa, wa poìn ma ɖé Bɛ̀wáɖákà Bɔɔ-kpàɔ̀ kɔ̃ dyí, ké ɖéɛ̀ wa po ma Bounɓoɔ̀ zùo. Ɔ jèɛɛ, wa jǔìn ma kà bɔɔ-kpàɔ̀ Bɛ̀wáɖákà-nyɛ̀nɛ̀ kɔ̃̀ xwíníín mɔ̀à zùo-po-po kɛ, ké nyɛ́nɛ́ɔ̀ sè ma ɔ dú.

²⁷ Sɔ̀ìn ɓóɛ gboɛɛ, Jùɖúsɛ̀ɖɛ̀ìn-nyɔ̀ ɓěɔ̀ kè Júɖà-nyɔ̀ tɔ̀ɔ̀ ɓěɔ̀ kɔ́ìn ma ɖe, ké Jɛ̀hósáfà mìɔùn sí ma wa dyúa. Ké wa kpa ma múà nyuɛ ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ gbo, sepóɛɖé Bounɓoɔ̀ nyuɛ ɓɛ́ wa ké waà mú-nyɛ́-nyɔ̀ ɓěɔ̀ toún ɖu.

²⁸ Wa dyá ma Jùɖúsɛ̀ɖɛ̀ìn-hwɔ̀ɖɔ̀ɔ̀, ké wa dyà ma gbǎɖí-dù kò-kò ɓě kè gã̀à ɓě ɓaɖaa, ké wa nyini ma ɖé Bounɓoɔ̀ gbǒɔ̀ gbo.

²⁹ Ti ɓɛ́ kã́á-ɓòɖò séín ɓě nì ma toɖo-kpàà kɔ̃ɛɛ wɔ̃́ɔ ma kà Bounɓoɔ̀ nyu ma Júɖà-nyɔ̀ ɓěɔ̀ mú-nyɛ́-nyɔ̀ ɓěɔ̀ gbo vɔ̃ɔ kɛ jèɛɛ, Gèɖèpɔ́ɔ̀ díɖíɔ̀ kpɔ̃ ma wa.

³⁰ Sɔ̀ìn ɓóɛ gboɛɛ, gìɖìǐ nì ma ɖé Jɛ̀hósáfà nììn kã́á-ɓòɖòɔ̀ mú, sepóɛɖé ɔ Gèɖèpɔ́ɔ̀ nyí ma ɔ fɔ̀-fɔ̀ ɓó ɔ ɖei dà séín.

Jɛ̀hósáfàà wuɖuí-kɔ̃̀-kpèɔ̀ dúí-jɛ̀ɖɛ̀ìn-naín

³¹ Ti ɓɛ́ Jɛ̀hósáfà dè ma Júɖà-ɓòɖòɔ̀ wuɖuí kɔ̃̀ɔ̀ gbɔɛɛ, ɔ nyuá ma zɔ̃ kpáɖá-nyɔ ɓaɖa-bùè sè hm̀m̌. Ɔ kɔ̃̀ ma ɓóɖóɔ̀ wuɖuí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓó zɔ̃ kpáɖá-nyɔ sè hm̀m̌ xwíníín. Ɔ ɖeɛ̀ nyɛ́nɛ́ mɔ̀ ma Àzúɓà ɓɛ́ ɔ mɔ̀ ma Síóhìɛ̀ dyú-màà kɛ.

³² Jɛ̀hósáfà nyu ma ɖɛ dè Bounɓoɔ̀ hwìɖǐiɛ kà ɔ ɓǎ Ásà nyuɛ ma kà kɛ.

³³ Kɛɛ ɔ se ma kũùn-kpò ɓièìn-naín ɓě nìà ɖé toɖo ɓěɔ̀ dyaa dyíin nyìnììn, ké nyɔ ɓěɔ̀ séè ma wa ɓǎ nììn ɓǎ ɓěɛ̀ Gèɖèpɔ́ɔ̀ hwìɖǐǐ taɓa ke gàná cá.

³⁴ Ɖɛ tɔ̀ɔ̀ séín ɓě ɓɛ́ Jɛ̀hósáfà nyu ma kɛɛ, sɔ̀ìn ɖéɛ dè gbɔɔ̀ mú kéɛ mánáín-hwɛ̀ìn-naín dyɛ̀ìn nyɛɛ, wa jè céè ɖé Jɛ́hù mɔ̀à Hànánìɛ̀ dyú-gààɔ̀ kɛɛ kpáá-ɖɛ̀-sùà-cèè-ɖɛ̀ céèà ɖé Éézùɖùɛ̀-kã̀ǎ ɓěɔ̀ nììn kpáá-ɖɛ̀-sùà-cèè-ɖɛ̀ɔ̀ múɛɛ mú.

³⁵ Ti ɓɛ́ Jɛ̀hósáfà mɔ̀ ma kà Júɖà-ɓòɖòɔ̀ kã́á kɛɛ, ɔ kè Áhàzíà mɔ̀à Éézùɖùɛ̀-kã̀ǎ, ɓɛ́ ɔ mɔ̀ ma hwòɖǒ-kɔ̃in-nyìnììn-nyɔ̀ kɛɛ po ma wuɖu ɓíín.

³⁶ Wa sɔ̃́ɔ̀ poìn ma dyí, ké wa kɔ ma méè ɓě ɖé Ɛ́zìɔ̀ùn-Géɓɛ̀-hwɔ̀ɖɔ̀ɔ̀ mú.

³⁷ Wé ɖòɛ̀ ɓaɖaa, kpáá-ɖɛ̀-cɛ̃-nyɔ̀ ɖò kɔ̃̀ nyɛ́nɛ́ mɔ̀ Ɛ̀ɖìɛ́zɛ̀ ɓɛ́ ɔ mɔ̀ Dóɖàváhùɛ̀ dyú-gàà, ɓɛ́ ɔ sɔ̀ ɖé Màwéɖésà-hwɔ̀ɖɔ̀ɔ̀ múɛɛ cɛ̃ɛ ma Jɛ̀hósáfà gbo, ké ɔ ɖá, “M̀ kè Áhàzíà ɖǎ wuɖu ɓíín po jèɛɛ, Bounɓoɔ̀ mu ɖɛ ɓɛ́ ɓě ɖǎà nyuɛɛ mú gbɔɔ̀ùn.” Ké méè ɓěɔ̀ wɛ̀ ma, ké wa se ma dà ɖò muɛ ɓɛ́ìn.