2 Kánáníkɔ̀ 2 - Ɓǎsɔ́ɔ̀ Báɓòɔ̀

Sã́ɖómà naɓaà ɓó Gèɖèpɔ́ɔ̀ gbǒɔ̀ po jè

¹ Wé ɖòɛ̀ ɓaɖaa, Kã́á Sã́ɖómàà hwòɖǒ poɛ ma gbɔ, ɓɛ́ ɔ ké ma gbǒ ɖò po ɓó Bounɓoɔ̀ bìì, ɔ kè ɓɛ́ ɔ ké ma kã́á-gbò ɖò po ɓó ɔ mìɔùn bìì.

² Ké Sã́ɖómà po ma gàa táázĩ̀ìn kpáɖá-nyɔ tã ɓaɖa-bùè wáká, ɓɛ́ wa ké ma ɖɛ ɓě hwùɖǔ-nyɔ̀ ɓě jǔ. Ké ɔ po ma gàa táázĩ̀ìn kpáɖá-nyɔ hĩinyɛ wáká, ɓɛ́ wa ké sɔ́ɔ́ bũ̌in wa ɖé toɖo-ɓòɖòɔ̀ kɔ̃. Ké ɔ po ma gàa táázĩ̀ìn tã kè hɔ̃dɛ̀ɖɛ̀ mɛ̀nɛ̌ìn-ɖò wáká, ɓɛ́ wa ké ma nyɔ ɓěɛ̀ kɔ̃in-nyɔ̀ ɓě jǔ.

³ Ké Sã́ɖómà ɖoɓo ma wuɖu ɖé Híwàɖàùn mɔ̀à Táà-kã̀ǎɔ̀ kɛɛ gbo, ké ɔ ɖá, “Kà dyúáɖò kà m̀ nyu ma kà ḿ ɓǎ Dèɓé síɖà-cù nyíɛ, ɓɛ́ ɔ dyi ma kà ɔ mìɔùn nììn mú-cĩ́-gbò poɛɛ, kǎà m̀ mɛ nyuɛ ɓó mɔ́ún bìì ɖekè.

⁴ Gmɔ̀ nɔ̄, ḿ nì gbǒ ɖò poɛń dyiɛń ɓó Bounɓo mɔ̀à ní Gèɖèpɔ́ɔ̀ kɛɛ bìì, ɓɛ́ ḿ kéɛ ɔ xwáɖáún zàìn, ɓɛ́ ɖé ké nyɔ́ún-nɔ̀mɔ̀-ɖɛ̀ fɔ̃̀ìn-naín jǔ ɓó ɔ bìì. Ké ɖé mu bɛɖɛɛ̀ kéà ɓó téɓèɖèɔ̀ kɔ̃ nì teeɛɛ nì-naín jǔùn. Ké ɖé mu gànà-kṹún kè hwìo nììn fɔ̃ɔ-sàǎ-zàìn-ɖɛ̀ nyùìn-naín jǔùn. Ké ɖé mu Gèɖèpɔ́ɔ̀ fɔ̀-wèɔ̀ kè Dɛ̀nɛ̀-Ɖìè-Hwèɖè-hwɔ̀ɔ̀ ɔ kè hwɔ tɔ̀ɔ̀ ɓě ɓɛ́ Bounɓo mɔ̀à à Gèɖèpɔ́ɔ̀ kɛɛ ɖǎ dyi dèɛɛ nììn fɔ̃ɔ-sàǎ-zàìn-ɖɛ̀ nyùìn-naín jǔùn. Ɖɛ ɓě nìà kɛ mɔ̀ gma kánáá pū ɓó Éézùɖùɛ̀-nyɔ̀ ɓěɔ̀ bìì.

⁵ Gbǒ ɓɛ́ ḿ nìà poɛń dyiɛń nyɛɛ mu gbǒ kpa ɖɛ jǔùn, sepóɛɖé à Gèɖèpɔ́ɔ̀ kpé ɓúá dyí mìɔ ké ɔ zi gèɖèpɔ́ɔ̀ séín dyí.

⁶ Kɛɛ nyɛ́ ɓɛ́ìn ɔ mú-cĩ́-gbò poɛ kɛ́? Dyéɛ, ɖé dyɔún ɓúá dyí mìɔ cá, kɛɛ ɖé ɓíè dyí ɓó ɔ bìì. Nyɛ́ ḿ jǔ, ɓɛ́ ḿ kéà ɔ bìì gbǒ po kɛ́? Gbǒ ɓɛ́ ḿ nìà poɛń dyiɛń nyɛɛ mɔ̀ nyɔ́ún-nɔ̀mɔ̀-ɖɛ̀ fɔ̃̀ìn-naín ɓó ɔ bìì pū.

⁷ Ɔ ná nì jèɛɛ, ɓó kàǔn wɛ̃ɛ, nyí ḿ gàa ɖò ɓɛ́ ɔ dyuò sɛ́ɖɛ́ ɓá góò-ɖɛ̀ kè séɓàɖà-ɖɛ̀ kè bàɖàsǐ-ɖɛ̀ kè nɛɛ̀-kpà-ɖɛ̀ ɓě ɓaɖa jè dyíɛ, kè ɓɛ́ ɔ dyuò ɖɔ ɓéɖé dyéɖé ɖàɓàìn kpèɛ̀ kɛɛ dú kò-kò ɓě kè ɖɔ zĩ-zã nyuɛ kɛ, ɔ kè ɓɛ́ ɔ dyuò ɖɛ kò-kò ɓě hwɔìn-ɖɛ̀ ɓó ɖɛ ɖò dyéɖéín mɛɛ kɛ, nìí ɓɛ́ ɔ ké níǐn sɛ́ɖɛ́-dyuò-nyɔ̀ ɓě ɓɛ́ ḿ ɓǎ Dèɓé ɖǎ ma wáká po, ɓɛ́ wa nìà nɔ̄ Jùɖúsɛ̀ɖɛ̀ìn-hwɔ̀ɖɔ̀ɛ̀ kè nɔ̄ Júɖà-ɓòɖòɛ̀ kɔ̃ɛɛ gbo kpá.

⁸ Ké ɓó kɔ̃in ɖeɛɛ, ɖoɓo síɖà-cù kè pã́ìn-cù ɔ kè ámù-cù kpóɖó ɓě sɔ̀ ɖé Ɖɛ́ɓèɖɔ́ùn-ɓòɖòɔ̀ kɔ̃ɛɛ ḿ gbo, sepóɛɖé ḿ dyuòɛ̀ dyí kà nì gàa ɓěɔ̀ dyuò cu cɛ̃ɛ nɔ̀mɔ̀ dyíin ɖé Ɖɛ́ɓèɖɔ́ùn-ɓòɖòɔ̀ kɔ̃ɛ. Ké níǐn gàa ɓěɔ̀ mu nììn gàa ɓěɔ̀ gbo kpáùn,

⁹ ɓɛ́ wa ké ḿ bìì cu-kpóɖó ɓáún-ɓáún ti dyéìn, sepóɛɖé gbǒ ɓɛ́ ní muà poùn wɛ̃ɛ mu gbǒ kpa ɖɛ nɔ̀mɔ̀ dyíin ɖò jǔùn.

¹⁰ Ké ɖɛ ní mu tòùn ɓó nì gàa ɓě mɔ̀à cu-cɛ̃-nyɔ̀ ɓěɔ̀ kɛ bììɛɛ mɔ̀ hwítì gbǎ-wĩín-wè táázĩ̀ìn hɔ̃dɛ̀ɖɛ̀ hĩinyɛ kè báɖè gbǎ-wĩín-wè táázĩ̀ìn hɔ̃dɛ̀ɖɛ̀ hĩinyɛ kè wã́ìn gbǎ-wĩín-wè hɔ̃dɛ̀ɖɛ̀ hĩinyɛ ɔ kè ɔ́ɖè-cànà gbǎ-wĩín-wè hɔ̃dɛ̀ɖɛ̀ hĩinyɛ.”

¹¹ Hwɛ̀ ké Híwàɖàùn mɔ̀à Táà-kã̀ǎɔ̀ kɛɛ jǔ ma Sã́ɖómà gɔ̃̌ ɖé céè-ɖɛ̀ ɖò kɔ̃, ké ɔ ɖá, “Bounɓoɔ̀ ɖɛ̀ɓɛ̀ ɔ nyɔ ɓěɔ̀ mú jèɛɛ, ɔ nyuà m̀ kã́á mú ɓó wa kɔ̃in nyɛ̀.”

¹² Ké Híwàɖàùn kpa wuɖu dyúa, ké ɔ ɖá, “Ḿ po Bounɓo mɔ̀à Éézùɖùɛ̀ Gèɖèpɔ́ɔ̀ mɔ̀ nyɔ mɛà dyɔɔ̀ kè ɓóɖó-kpàà kɛɛ zùo. Ɔ ɖǎ Kã́á Dèɓé hwòɖǒ-fɔ̀nɔ̀-dyù-gàà ɖò ɓɛ́ ɔ dyuò ɖɛ múin ɖeɛ, ké ɔ wɔ̃́ ɖɛ múin nyɛɛ nyí. Ɔ mɔ̀ nyɔ mu gbǒ ɖò poùn ɓó Bounɓoɔ̀ bìì, ɔ kè kã́á-mú-cĩ́-gbò ɖò ɓó ɔ mìɔùn bììɛ.

¹³ Ɓó kàǔn wɛ̃ɛ, ḿ nì Húwàɖàùn-Áɓì ɓɛ́ ɔ mɔ̀ sɛ́ɖɛ́-dyuò-nyɔ̀ ɖò, ké ɔ ɓéɖé ɖɛ-múin-wɔ̃́-wɔ̃́ kɛɛ m̀ gbo tòɛ̌n.

¹⁴ Ɔ mɔ̀ Dɛ̃́ìn-màà ɖòɛ̀ dyú-gàà, ké ɔ ɓǎ mɔ̀ Táà-nyɔ̀. Ɔ ɖǎa cɛ̃́ kà nyɔ ké góò kè séɓàɖà kè bàɖàsǐ kè nɛɛ̀-kpà kè sɔ́ɔ́-kpò ɔ kè cu kũ̀à mú nyùìn nyɛ, ké ɔ dyuò ɖɔ ɓéɖé dyéɖé ɖàɓàìn kpèɛ̀ kɛɛ dú kò-kò ɓě kè ɖɔ zĩ-zã ɔ kè ɖénì-ɖɔ̀ nɔ̀mɔ̀ kɔ̃in nyuɛ, ké ɔ dyuò ɖɛ kò-kò ɓě hwɔìn-ɖɛ̀ ɓó ɖɛ ɖò dyéɖéín mɛɛ. Ɔ ɓɛ́ìn kũ̀à séín nì mu ɔ nyíìn nyɛɛ nyuɛ. Ɔ kè nììn sɛ́ɖɛ́-dyuò-nyɔ̀ ɓěɔ̀ ɔ kè ní gbo-nì-ɓǎ Dèɓé mɔ̀à m̀ ɓǎ kɛɛ nììn sɛ́ɖɛ́-dyuò-nyɔ̀ ɓěɔ̀ ɓɛ́ìn kũ̀àɔ̀ nyuɛ.

¹⁵ Ɓó kàǔn wɛ̃ɛ, ɓɔ̌ɔ̀, hwítì kè báɖè kè cáná ɔ kè wã́ìn kɔ̃̀ jè ɓɛ́ m̀ cɛ̃à kɛɛ, m̀ mɛ tò wa nɔ̄ nì gbo-nì-nyɔ̀ ɓěɔ̀ gbo.

¹⁶ Ké à mu cu séín nì mɔ́ sɔ̀ìn nɔ̄ Ɖɛ́ɓèɖɔ́ùn-ɓòɖòɛ̀ kɔ̃ɛɛ cɛ̃ìn ɓó m̀ bìì, ɓɛ́ à ké wa bũ̌in sãìn, ɓɛ́ à ké wa dǒ mú nyu, ɓɛ́ à kéɛ níɔ wáɖá, ɓɛ́ wa ké níɔ̀ dyi dèɖěìn, ɓɛ́ wa ké ɖé Jɔ́pà-hwɔ̀ɖɔ̀ɔ̀ mú nyini, nìí ɓɛ́ m̀ kéɛ ɓóɛ zàìn, ɓɛ́ m̀ kéɛ ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú kpa.”

Wa dè Gèɖèpɔ́ɔ̀ gbǒɔ̀ poɛ gbɔ

¹⁷ Ɓó tia ɓaɖaa, Sã́ɖómà zɛɖɛ ma ɖíà-nyɔ̀ ɓě nì ma ɖé Éézùɖùɛ̀-ɓòɖòɔ̀ kɔ̃ɛ kà ɔ ɓǎ Dèɓé nyuɛ zɔ̃̌ɔ̀ kà kɛ. Ké wa mɔ̀ ma nyɔ-kpò táázĩ̀ìn hɔ̃dɛ̀ɖɛ̀ kpáɖá-nyɔ sɔ̃́ ɓaɖa-bùè sè tã kè hɔ̃dɛ̀ɖɛ̀ mɛ̀nɛ̌ìn-ɖò.

¹⁸ Ɔ po ma waà nyɔ-kpò táázĩ̀ìn kpáɖá-nyɔ tã ɓaɖa-bùè wáká, ɓɛ́ wa ké ma ɖɛ ɓě hwùɖǔ-nyɔ̀ jǔ. Ké ɔ po ma waà nyɔ-kpò táázĩ̀ìn kpáɖá-nyɔ hĩinyɛ wáká, ɓɛ́ wa ké sɔ́ɔ́ bũ̌in wa ɖé toɖo-ɓòɖòɔ̀ kɔ̃. Ké ɔ po ma waà nyɔ-kpò táázĩ̀ìn tã kè hɔ̃dɛ̀ɖɛ̀ mɛ̀nɛ̌ìn-ɖò wáká, ɓɛ́ wa ké nyɔ ɓěɛ̀ kũ̀à ɓěɔ̀ kɔ̃in-nyɔ̀ ɓě jǔ.