2 Kánáníkɔ̀ 19 - Ɓǎsɔ́ɔ̀ Báɓòɔ̀

Kpáá-ɖɛ̀-cɛ̃-nyɔ̀ ɖò wùɖù Jɛ̀hósáfà gbo

¹ Sɔ̀ìn ɓóɛ gboɛɛ, Jɛ̀hósáfà mɔ̀à Júɖà-kã̀ǎɔ̀ kɛɛ mu ma ɔ ɓíɖí ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɖé gìɖìǐ mú.

² Kɛɛ Jɛ́hù ɓɛ́ ɔ mɔ̀ kpáá-ɖɛ̀-dyé-nyɔ̀, ké ɔ mɔ̀ Hànánìɛ̀ dyú-gàà kɛɛ mu ma Kã́á Jɛ̀hósáfà hwìǐ, ké ɔ wùɖù ma ɔ gbo, ké ɔ ɖá, “Ɔ mɔ̀ ɖɛ sɛ́ɖɛ́ìn dyí, ɓɛ́ m̀ ké hwòɖǒ-kɔ̃in-nyìnììn-nyɔ̀ ɓě gbo kpáe? Ɔ mɔ̀ ɖɛ sɛ́ɖɛ́ìn dyí, ɓɛ́ m̀ ké nyɔ ɓě ɓɛ́ wa nyɛ́ Bounɓoɔ̀ múɛɛ mú ɖɛ̀ɓɛ̀e? M̀ ɖǎ ɖɛ nìà kɛ nyu jèɛɛ, Bounɓoɔ̀ dyoɖoɔ̀ nì m̀ kɔ̃.

³ Kɛɛ wɛ̃́ɛ́ kɛɛ, ɖɛín-ɖɛ̀ ɖò nì ɖé m̀ mú, sepóɛɖé m̀ zà ma Àséwàɖàà hwɔìn-ɖɛ̀ ɓěɔ̀ nɔ̄ ɓóɖóɛ̀ kɔ̃ dyi, ké m̀ sí Gèɖèpɔ́ɔ̀ kíɖíí hwòɖǒɛ̀-ɖé-hwɛ̀-kà.”

Jɛ̀hósáfà sɛ́ɖɛ́ìn ɖɛ dyí

⁴ Ti ɓɛ́ Jɛ̀hósáfà mɔ̀ ma kà kã́á ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ múɛɛ, ɔ té ma nyɔ ɓěɔ̀ hwìɛ̀ dyi kpɛ́-kpɛ́, sɔ̀ìn ɖé Bèsíɓà-hwɔ̀ɖɔ̀ɔ̀ mú, muà ɖé Ífèɖèìn Toɖo-ɓòɖòɔ̀ gbo kɛ, ké ɔ dyà ma nyɔ ɓěɔ̀ Bounɓo mɔ̀à wa ɓǎ nììn ɓǎ ɓěɛ̀ Gèɖèpɔ́ɔ̀ kɛɛ gbo ɖe.

⁵ Ké ɔ gã ma tɔ̀ɔ̀-ɓìɔ̀ ɓě ɖé Júɖà-ɓòɖòɔ̀ gboi, ɖé toún-pèɖèìn-hwɔ̀ɖɔ̀ séín ɓě nì ma ɖé ɓóɖóɔ̀ kɔ̃ɛɛ mú. Ɔ nyuɛ ma náa ɖé hwɔɖɔ ɓěɔ̀ ɖò-ɖò mú.

⁶ Ké ɔ cɛ̃ɛ ma tɔ̀ɔ̀-ɓìɔ̀ ɓěɔ̀ gbo, ké ɔ ɖá, “Ɓě mɛ ma mú kà ɓě nyu ɖɛ wɔ̃ poɛ kɛ, sepóɛɖé ɓě seɛ nyɔǔn-dyù bìì nyu, kɛɛ ɓě nyuɛ Bounɓoɔ̀ bìì. Ɔ mɔ̀ nyɔ nì ɓó ɓě gbo ɖé ɓěɛ̀ ɖɛ-wɔ̃-po-poɔ̀ mú.

⁷ Ɔ ná nì jèɛɛ, Bounɓoɔ̀ fã̀àɔ̀ mɛ nì ɓě kɔ̃. Ɓě mɛ ma mú ɓó ɖɛ ɓě mu nyuùn wɛ̃ɛ jè, sepóɛɖé Bounɓo mɔ̀à à Gèɖèpɔ́ɔ̀ kɛɛ ní zàìn dyí-sɛ́ɖɛ́ìn-ɖɛ̀ wɔ̃-po-po hwìǐ. Ɔ ní zĩ̀ìn ɖɛ-gbà-nyu-nyɔ̀ ɖò hwòɖǒǔn gbo, mɔɔ ké ɔ ní kpɔ̃ nyɔ-gbo-pa-wìɖì dyi.”

⁸ Ké ɓó kɔ̃in ɖeɛɛ, Jɛ̀hósáfà gã ma Ɖíìváà-nyɔ̀ ɖíɛ́ ɓě kè sáa-zà-nyɔ̀ ɖíɛ́ ɓě ɔ kè Júɖà-nyɔ̀ ɓěɔ̀ gbǒ-xwíníín ɓěɔ̀ wuɖuí-kɔ̃̀-nyɔ̀ ɖíɛ́ ɓě, ɓɛ́ wa kéɛ jè gbo dyé, ɓɛ́ nyɔ ɓěɔ̀ ké Bounɓoɔ̀ gmaɔ̀ dyi kpɔ̃, ɔ kè ɓɛ́ wa ké nyɔ ɓěɔ̀ zɔ̃́ín ɓě wɔ̃-po-nyɔ̀ jǔ. Wa nyu ma kũ̀à ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú.

⁹ Ké ɔ po ma wa náún kóɖó-kóɖó, ké ɔ ɖá, “Ɖɛ ɓě ké nyu ɖé Bounɓoɔ̀ dyi-fɛ̃̀ìn-fɛ̃̀ìn mú ɔ kè hwòɖǒɛ̀-ɖé-hwɛ̀-kà kánáá pūɛɛ kɛà kɛ̀.

¹⁰ Ɔ jǔ ké nyɔ ɖò sɔ̀ ɖé ɓěɛ̀ hwɔɖɔ ɓěɔ̀ ɖò múɛɛ dyi zɔ̃́ín ɖò ɓá nyɔmɔɔ dyi wáɖáìn jè dyí, mɔɔ ɓá gma-dù kò-kò ɓěɔ̀ jè dyíɛɛ ɓě gbo dyà ní, nìí, ɓě mɛ po ɔ náún, ɔ ní kɔ̃̀ ɖà Bounɓoɔ̀ nàmàǔn bũ̌ nyu ɖe, ɔ ní kɔ̃̀ ɖà Bounɓoɔ̀ dyoɖoɔ̀ ɔ mìɔùn kɔ̃ dyà, dè ɓě mɔ̀ùn kɔ̃. Kǎà ɓě mɛ nyuɛ ɓɛ́ zaa ké se ɓě dúún wáɖá.

¹¹ Gmɔ̀ nɔ̄, Ámàwíɖíà mɔ̀à sáa-zà-nyɔ̀ vɛ̀nɛ̀ɔ̀ kɛɛ nì ɓě kɔ̃in ɓá Bounɓoɔ̀ kũ̀à séín ɓěɔ̀ dyí, ké Zɛ́ɓàɖíà mɔ̀à Ésìméòɛ̀ dyú-gàà, ɓɛ́ ɔ mɔ̀à gɔ̌mànàɔ̀ ɖé Júɖà nììn xwéɖé-dùɔ̀ múɛɛ nì ɓě kɔ̃in ɓá kã́áɔ̀ nììn kũ̀à séín ɓěɔ̀ dyí, ké Ɖíìváà-nyɔ̀ ɓěɔ̀ mu ɓěɛ̀ sɔ̃-xwíɖíi-dè-nyɔ̀ ɓě jǔùn. Ɓě mɛ ku hwòɖǒ, ɓɛ́ ɓě ké ɓěɛ̀ kũ̀à ɓěɔ̀ nyu. Ké Bounɓoɔ̀ mɛ nì ɓó dyí-sɛ́ɖɛ́ìn-nyɔ̀ ɓěɔ̀ gbo.”