2 Kánáníkɔ̀ 18 - Ɓǎsɔ́ɔ̀ Báɓòɔ̀

Kpáá-ɖɛ̀-cɛ̃-nyɔ̀ Mìkádyà po Éhà náún

¹ Ti ɓɛ́ Jɛ̀hósáfà ɖǎ ma bã, ké ɔ ɖǎ ma dya-dè-dè vɛ̀nɛ̀ ɓéɖéɛɛ, ɔ kè Éhà mɔ̀à Éézùɖùɛ̀-kã̀ǎɔ̀ kɛɛ po ma wuɖu ɓíín dyììn ɖé Jɛ̀hósáfàà dyú-gàà kè Éhàà dyú-màà dyi-kpɔ̃ìn-kpɔ̃ìn mú.

² Ti ɓɛ́ zɔ̃ gbɛ̀ǐ-gbɛ̀ǐ ɖǎ ma ziɛɛ, ɔ mu ma Éhà gboi téìn ɖé Sɛ̀mɛ́ɖìà-hwɔ̀ɖɔ̀ɔ̀ mú. Ké Éhà ɖáɓá ma ɓáɖáá kè ɓìɖǐ ɓáún-ɓáún ɓó ɔ kè ɔ nyɔ ɓě nì ɓó ɔ gboɛɛ bìì, ké ɔ po ma ɔ kpéí, ɓɛ́ wa ké ma Wáɖámɔ̀-hwɔ̀ɖɔ̀ nìà ɖé Gíɖèà-ɓòɖòɔ̀ kɔ̃ɛɛ to kɔ̃ kpa.

³ Ké Éhà diè ma Jɛ̀hósáfà dyi, ké ɔ ɖá, “Nì mu wɔ̃́ùn ɓɛ́ ḿ kè mɔ̀ ké Wáɖámɔ̀-hwɔ̀ɖɔ̀ɔ̀ to kɔ̃ kpaà?” Ké Jɛ̀hósáfà ɖá, “Mɔ̀ùn dyi ti dyé ní, mɔ́ún dyé tio, ké ní sójà ɓěɔ̀ dyé ti ɖekèo. À mu ɓó m̀ gbo kpɔ̃̀ìn ɖé toɔ̀ gbo.

⁴ Kɛɛ m̀ mɛ diè Bounɓoɔ̀ dyi ke kĩ́ín.”

⁵ Ɔ jèɛɛ, Éhà ɖá ma kpáá-ɖɛ̀-cɛ̃-nyɔ̀ ɓěɔ̀. Wa mɔ̀ ma nyɔ-kpò hɔ̃dɛ̀ɖɛ̀ hĩinyɛ. Ɔ diè ma wa dyi, ké ɔ ɖá, “Ḿ mɛ kpa Wáɖámɔ̀-hwɔ̀ɖɔ̀ɔ̀ to kɔ̃ɔ̀, mɔɔ ḿ mɛ ɓɔ́ɔ náa nyuɛɛ̀?” Ké wa ɖá, “Kpa hwɔɖɔɔ̀ to kɔ̃, ké Gèɖèpɔ́ɔ̀ muɛ nyuùn ɓɛ́ m̀ kéɛ toún ɖu.”

⁶ Kɛɛ Jɛ̀hósáfà diè ma ɖɛi, ké ɔ ɖá, “Kpáá-ɖɛ̀-cɛ̃-nyɔ̀ kà kò ɖò se nì ɖe, ɓɛ́ à ké Bounɓoɔ̀ dyi diè dyììn ɖé ɔ múù?”

⁷ Ké Éhà ɖá, “Nyɔ dyúáɖò nì ɓó ɖe. Ɔ nyɛ́nɛ́ mɔ̀ Mìkádyà. Ɔ mɔ̀ Íɖàà dyú-gàà. Kɛɛ ḿ nyɛ́ ɔ mú, sepóɛɖé ɔ ní dyà wuɖuún-wùɖù ɖò sɔ̀ìn ɖé Bounɓoɔ̀ gbo ɓá ḿ jè dyí. Ɔ cɛ̃ ɖɛ gbà kánáá pū.” Ké Jɛ̀hósáfà ɖá, “M̀ mɛ ɓɔ́ ɖɛ nì náa cɛ̃ɛ.”

⁸ Hwɛ̀ ké Éhà ɖá ma ɔ gɔ̌mànà-nyɔ̀ ɓěɔ̀ ɖò, ké ɔ cɛ̃ɛ ma ɔ gbo, ɓɛ́ ɔ ké Mìkádyà ɖáa mu wàɖà.

⁹ Ɓó tia ɓaɖaa, kã́á sɔ̃́ ɓěɔ̀ kò ma ɓó waà zèè ɓěɔ̀ kɔ̃ ɓó mɔɔ́-dyí-síìn-naínɔ̀, ɓó Sɛ̀mɛ́ɖìà-hwɔ̀ɖɔ̀ɔ̀ gmɔ-wɔ̃̀ɔ̀ gbo. Wa po ma waà kã́á-ɖɔ̀ ɓěɔ̀ mú. Ké kpáá-ɖɛ̀-cɛ̃-nyɔ̀ séín ɓěɔ̀ nì ma kpáá-ɖɛ̀ cɛ̃iń ɓó wa dyúa.

¹⁰ Kpáá-ɖɛ̀-cɛ̃-nyɔ̀ ɓěɔ̀ ɖò kɔ̃̀ nyɛ́nɛ́ mɔ̀ Zɛ̀ɖɛ̀kíà ɓɛ́ ɔ mɔ̀ Kènáánàà dyú-gàà kɛɛ ɖú ma nɛɛ̀-kpà-jũ̀ìn-gmɔ̀ ɓě ɓɛ́ ɔ nyu ma kɛɛ dyí, ké ɔ cɛ̃ɛ ma Éhà gbo, ké ɔ ɖá, “Bounɓoɔ̀ ɖá ɖɛ nìà kɛ nì mu Síwíɖíà-sòjà ɓěɔ̀ ɖe cṹìn, ké nì mu wa toún ɖuùn gàná cá.”

¹¹ Ké kpáá-ɖɛ̀-cɛ̃-nyɔ̀ tɔ̀ɔ̀ ɓěɔ̀ mɔ̀ùn cɛ̃ ma ɖɛ dyúáɖòɔ̀ ɖekè, ké wa ɖá, “Kpa Wáɖámɔ̀-hwɔ̀ɖɔ̀ɔ̀ to kɔ̃. Nì muɛ toún ɖuùn. Bounɓoɔ̀ muɛ nyuùn ɓɛ́ m̀ ké toɔ̀ ɖu.”

¹² Ɓó tia ɓaɖaa, gɔ̌mànà-nyɔ̀ ɓɛ́ ɔ mu ma kà Mìkádyà ɖáùn wɛ̃ɛ cɛ̃ɛ ma Mìkádyà gbo, ké ɔ ɖá, “Gmɔ̀ nɔ̄, kpáá-ɖɛ̀-cɛ̃-nyɔ̀ séín ɓěɔ̀ cɛ̃ɛ kà kã́áɔ̀ mu toɔ̀ ɖuùn wɛ̃. Mɔ̀ùn mɛ cɛ̃ ɖɛ dyúáɖòɔ̀ ɖekè.”

¹³ Kɛɛ Mìkádyà ɖá, “Ḿ gboò ní Gèɖèpɔ́ɔ̀ dyí kà ní mu ɔ ɖɛ Gèɖèpɔ́ɔ̀ cɛ̃ ḿ gboɛɛ gbo cɛ̃ìn nyɛ.”

¹⁴ Ti ɓɛ́ Mìkádyà dyi ma ɓó Kã́á Éhà dyúa kɛɛ, kã́áɔ̀ diè ma ɔ dyi, ké ɔ ɖá, “Mìkádyà, ḿ kè Kã́á Jɛ̀hósáfà mɛ kpa Wáɖámɔ̀-hwɔ̀ɖɔ̀ɔ̀ to kɔ̃ɔ̀, mɔɔ à mɛ ɓɔ́ɔ náa nyuɛɛ̀?” Ké Mìkádyà ɖá, “Ɓě kpa hwɔɖɔɔ̀ to kɔ̃e. Wa mu ɓě xwaún dyi kpáùn we.”

¹⁵ Kɛɛ Éhà jǔ ma ɔ gɔ̃̌, ké ɔ ɖá, “M̀ dyi ḿ gbo wùɖù ɖé Bounɓoɔ̀ nyɛ́nɛ́ɔ̀ mú ní, cɛ̃ jǎàɔ̀. Kpa jĩ̀ xwɛ̌ ḿ mɛ cɛ̃ìn m̀ gbo, hwɛ̀ ɓɛ́ m̀ ké ḿ jǎà gbo cɛ̃ɛ́?”

¹⁶ Hwɛ̀ ké Mìkádyà ɖá, “Ḿ dyéɛ ké Éézùɖùɛ̀-sòjà ɓěɔ̀ gbɛ̀ìn dyi ɖé toɖo ɓěɔ̀ dya kà ɓáɖáá ɓě ɓɛ́ wa se dyí-gmɔ̀-nyɔ̀ ɖò ɓéɖéɛɛ nìà kɛ. Ké Bounɓoɔ̀ ɖá, ‘Gàa ɓěa se nàìn-nyɔ̀ ɖò ɓéɖé. Wa mɛ mu taún ɖe ɖé gìɖìǐ mú.’ ”

¹⁷ Ké Éhà cɛ̃ɛ ma Jɛ̀hósáfà gbo, ké ɔ ɖá, “Má, ḿ cɛ̃ɔ́ máa m̀ gbo kà ɔ ní dyà wuɖuún-wùɖù ɖò sɔ̀ìn ɖé Bounɓoɔ̀ gbo ɓá ḿ dyíɛe? Ɔ cɛ̃ ɖɛ gbà kánáá pū.”

¹⁸ Ké Mìkádyà kpa ma wuɖu dyúa, ké ɔ ɖá, “Tò ɖɛ Bounɓoɔ̀ nì cɛ̃iń nyɛɛ gbo ɖùǔ. Ḿ dyéɛ, ké Bounɓoɔ̀ kò ɓó ɔ zèèɔ̀ kɔ̃ dyi ɖé dyɔún, ké ɔ ínjà ɓěɔ̀ nyanaìn ɔ ɖiaún kè ɔ kunuaún dyi.

¹⁹ Ké Bounɓoɔ̀ diè ɖɛi, ké ɔ ɖá, ‘Nyɛ́ mu Éhà mɔ̀à Éézùɖùɛ̀-kã̀ǎɔ̀ kɛɛ cáùn, ɓɛ́ ɔ ké mu, ɓɛ́ ɔ ké to sè ɖé Wáɖámɔ̀-hwɔ̀ɖɔ̀ɔ̀ múɛ́?’ Ké ínjà ɓěɔ̀ ɖíɛ́ ɓě cɛ̃ ɖɛ ɖò, ké ɖíɛ́ ɓě cɛ̃ ɖɛ kà kò ɖò.

²⁰ Wa gã̀ ma náa nyuɛń dyi tee ké ínjà ɖò nyànà ma ɓó Bounɓoɔ̀ dyúa dyi, ké ɔ ɖá, ‘Mɔ̄ mu ɔ cáùn.’ Ké Bounɓoɔ̀ diè ɔ dyi, ké ɔ ɖá, ‘Xwɛ̌ nì muɛ nyuɛ nyuùn wɛ̃́?’

²¹ Ké ínjàɔ̀ ɖá, ‘Ní mu muùn, ɓɛ́ ḿ kéɛ nyu ɓɛ́ Éhà nììn kpáá-ɖɛ̀-cɛ̃-nyɔ̀ séín ɓěɔ̀ ké se tɔ́mɔ́.’ Ké Bounɓoɔ̀ ɖá, ‘Mu, ɓɛ́ m̀ ké ɔ cá, ké m̀ ɓɛ́ìn nyuɛ.’ ”

²² Ké Mìkádyàà wuɖuɔ̀ dúí-jàɖàìn-naínɔ̀ ɖá, “Ɖɛ kpáà kɛɛ nìàǒ wɛ̀. Bounɓoɔ̀ ɖǎa nyu ké nì kpáá-ɖɛ̀-cɛ̃-nyɔ̀ ɓěɛ̀ ɖǎ m̀ se wĩin tɔ́mɔ́ìn, sepóɛɖé Bounɓoɔ̀ ɖǎa dyí sɔ́, ɓɛ́ m̀ ké mú-gbɔɔ̀-gbɔɔ̀ wɔ̃ mu.”

²³ Púɛɛ, kpáá-ɖɛ̀-cɛ̃-nyɔ̀ mɔ̀à Zɛ̀ɖɛ̀kíà ɓɛ́ ɔ mɔ̀à Kènáánàà dyú-gààɔ̀ kɛɛ mu ma ɓó Mìkádyà gbo, ké ɔ taɓa ɔ kpá dyúa, ké ɔ ɖá, “Dɛ̌ Bounɓoɔ̀ Zùùɔ̀ zĩ̀ìn, ɓɛ́ ɔ dyià ɖé mɔ́ún gbo sɔ̀, ɓɛ́ ɔ dyià mɔ̀ùn gbo wùɖù kɛ́?”

²⁴ Ké Mìkádyà ɖá, “Gmɔ̀ nɔ̄, nì muɛ dyuòùn ti ɓɛ́ nì mu ɓí-dyù ɖò nì ɖé gbǒ ɖò gbɔɛɛ mú vǐèɛ̌ muùn wɛ̃.”

²⁵ Ké Kã́á Éhà cɛ̃ɛ ma ɔ sójà ɓěɔ̀ ɖò gbo, ké ɔ ɖá, “Kpɔ̃ Mìkádyà, ɓɛ́ m̀ ké ɔ Ámɔ̀ùn mɔ̀à hwɔɖɔɛ̀ wuɖuí-kɔ̃̀-nyɔ̀ɔ̀ kɛ kè ní dyú-gàà Jóàsì gbo kpa.

²⁶ Cɛ̃ɛ wa gbo, ɓɛ́ wa ké ɔ kpɔɖɔ ɖeín po, ɓɛ́ wa ké ɔ bɛɖɛɛ̀ kè ní ɖòùn nyíɛń dyi gã̀ tee, ɓɛ́ ḿ ké ɖe dyi ɖé gìɖìǐ mú hwɛ̀.”

²⁷ Ké Mìkádyà ɖá, “Ɔ jǔ ké mɔ̀ùn dyi ɖe dyi ɖé gìɖìǐ mú ní, Bounɓoɔ̀ se dyɛ ḿ mú wùɖùìn hwɛ̀o.” Ké Mìkádyà cɛ̃ɛ ma nyɔ séín ɓě nì ma ɓóɛɛ gbo, ké ɔ ɖá, “Ní mɔ́ ɓě ké ɖɛ ḿ cɛ̃à kɛɛ wɔ̃́o.”

Éhàà mɛ́ jè

²⁸ Sɔ̀ìn ɓóɛ gboɛɛ, Éhà mɔ̀à Éézùɖùɛ̀-ɓòɖòɔ̀ kã́áɔ̀ kɛ kè Jɛ̀hósáfà mɔ̀à Júɖà-ɓòɖòɔ̀ kã́áɔ̀ kɛɛ kpa ma Wáɖámɔ̀-hwɔ̀ɖɔ̀ nìà ɖé Gíɖèà-ɓòɖòɔ̀ kɔ̃ɛɛ to kɔ̃.

²⁹ Ké Éhà cɛ̃ɛ ma Jɛ̀hósáfà gbo, ké ɔ ɖá, “Kà à nìà toɔ̀ gbo muɛń nyɛɛ, ní mu ḿ mìɔùn nyuùn ɓɛ́ ḿ ké se kã́á hwɔìn ɖé toɔ̀ gbo, kɛɛ mɔ̀ùn mɛ po nì kã́á nììn mú-po-ɖɔ̀ ɓěɔ̀ mú.” Ké Éhà zàìn ma ɔ mìɔ-kpo dyí, ké wa mu ma toɔ̀ gbo.

³⁰ Ɔ nì ná kɛɛ, Síwíɖíà-kã̀ǎɔ̀ po ma ɔ hwíì-sǒ-nàìn-nyɔ̀ ɓěɔ̀ náún kóɖó-kóɖó, ké ɔ ɖá, “Ɓěǐn ɖá ɓɛ́ ɓě ké nyɔ kà kò ɖò gbo vɔ̃ fɔɔ cá, ɔ sèìn Éézùɖùɛ̀-kã̀ǎɔ̀ ɖòùno.”

³¹ Ɔ jèɛɛ, ti wa dyé ma Jɛ̀hósáfà kɛɛ, wa séín ɖáìn ma ɔ Éézùɖùɛ̀-kã̀ǎɔ̀. Ké wa cɛ́ɛ̀ ma xwa, ɓɛ́ wa ké ma ɔ gbo vɔ̃. Kɛɛ Jɛ̀hósáfà ɖú ma mú páná kpàǐ, ké Bounɓoɔ̀ kpá ma ɔ gbo. Gèɖèpɔ́ɔ̀ nyuɛ ké wa gbɛ̀ ma ɔ ɖei,

³² sepóɛɖé ti ɓɛ́ wa dyuòɛ̀ ma dyí kà ɔ se ma Éézùɖùɛ̀-kã̀ǎɔ̀ kɛɛ, wa sɔ̀ ma ɔ kíɖíí.

³³ Hwɛ̀ ké Síwíɖíà-sòjà ɓěɔ̀ ɖò pòìn ma ɔ séɔ̀ dyií dyi pū, kɛɛ séɔ̀ kpɔ̃ ma Éhà. Séɔ̀ pàìn ma ɓó ɔ toún-vɔ̃̀ìn-ɖɔ̀ ɔ po ma kà múɛɛ dyí-deìn-naín, ké séɔ̀ pa ma Éhà mú. Ké ɔ páná ma mú ɖé ɔ hwíì-sǒ-nàìn-nyɔ̀ɔ̀ gbo, ké ɔ ɖá, “Ḿ puà ní. Cáɖá hwíì-sǒɔ̀, ɓɛ́ m̀ ké ḿ toɔ̀ hwìɛ̀ zà.”

³⁴ Toɔ̀ gã̀ ma dyúa muɛń dyi tee ké dyóɖó zi. Ké Kã́á Éhà tè ma ɖé ɔ hwíì-sǒɔ̀ mú dyi, ké ɔ gmɔ̀ìn ma ɖé Síwíɖíà-nyɔ̀ ɓěɔ̀ gbo. Ké ɓó hwìo pɛ̀ɛ kɛɛ, púɛɛ, ɔ mɛ́ ma cá.