2 Kánáníkɔ̀ 17 - Ɓǎsɔ́ɔ̀ Báɓòɔ̀

Jɛ̀hósáfà mɔ̀ kã́á

¹ Ti ɓɛ́ wa ɖǎ ma Ásà dyóɖóún zàa, ɔ dyú-gàà kɔ̃̀ nyɛ́nɛ́ mɔ̀ Jɛ̀hósáfà kɛɛ mɔ̀ ma kã́á ɓó ɔ bɛ̃̌ǐn, ké ɔ kùìn ma ɔ mìɔùn dyi kóɖó-kóɖó ɓó Éézùɖùɛ̀-ɓòɖòɔ̀ gbo vɔ̃ jè.

² Ɔ po ma sójà ɓě ɖé toún-pèɖèìn-hwɔ̀ɖɔ̀ séín ɓě nì ɖé Júɖà-ɓòɖòɔ̀ kɔ̃ɛɛ mú, ké ɔ dè ma sójà-kpòò ɓě dyi ɖé Júɖà-ɓòɖòɔ̀ kè ɖé hwɔɖɔ ɓě ɓɛ́ ɔ ɓǎ Ásà ɖú ma kà dyí ɖé Ífèɖèìn-ɓòɖòɔ̀ kɔ̃ɛɛ mú ɖekè.

³ Bounɓoɔ̀ nì ma ɓó Jɛ̀hósáfà gbo, sepóɛɖé ɔ sí ma Bounɓoɔ̀ kíɖíí kà ɔ ɓǎ nyuɛ zɔ̃̌ɔ̀ kà ɖé ɖɛ dè gbɔɔ̀ múɛ. Ɔ se ma Béò ɓiè,

⁴ kɛɛ ɔ sí ma ɔ ɓǎà Gèɖèpɔ́ɔ̀ kíɖíí, ké ɔ kpɔ̃ ma ɔ gma ɓěɔ̀ dyi kóɖó-kóɖó. Ɔ se ma Éézùɖùɛ̀-nyɔ̀ ɓěɔ̀ nììn kpeɖeɔ̀ kíɖíí sí.

⁵ Ɔ jèɛɛ, Bounɓoɔ̀ nyuɛ ké ɔ kã́á-ɓòɖòɔ̀ ku ma dúi. Ké Júɖà-nyɔ̀ séín ɓěɔ̀ pɛ́ɛ̀ìn ma ɔ tácì dyéɖéín, ké ɔ bã ma mìɔ, ké ɔ ɓéɖé ma dya-dè-dè vɛ̀nɛ̀.

⁶ Ɔ hwòɖǒ sí ma Bounɓoɔ̀ kíɖíí kóɖó-kóɖó. Ké ɓó kɔ̃in ɖeɛɛ, ɔ wáɖá ma kũùn-kpò ɓièìn-naín ɓě nìà ɖé toɖo ɓěɔ̀ dya ɖé Júɖà-ɓòɖòɔ̀ kɔ̃ɛ, ké ɔ ɖaɓa ma cu-kpóɖó ɓě mɔ̀à gèɖèpɔ́ɔ̀-màà kɔ̃̀ nyɛ́nɛ́ mɔ̀à Àséwàɖà kɛɛ hwɔìn-ɖɛ̀ ɓěɛ.

⁷ Ɖé Jɛ̀hósáfà nììn ɓóɖó-wuɖuí-kɔ̃̀-zɔ̃̀ɔ̀ tã nììnɔ̀ xwíníín nyɛɛ, ɔ ɖoɓo ma ɔ gɔ̌mànà-nyɔ̀ vɛ̀nɛ̀ ɓě kɔ̃̀ nyɛ́nɛ́ mɔ̀ Bɛ̃̀háì kè Òbòdádyà kè Zɛ́kɔ̀wáɖádyà kè Nɛ̀fánìò ɔ kè Mìkádyà kɛ, ɓɛ́ wa ké nyɔ ɓě nì ma ɖé Júɖà-hwɔ̀ɖɔ̀ ɓěɔ̀ múɛɛ ɖɛ tɛ̀mɛ̀ìn.

⁸ Ké wa kè Ɖíìváà-nyɔ̀ ɓě mɔ̀ Sɛ̀mádyà kè Nɛ́fàníà kè Zɛ́ɓàɖíà kè Àsáhèò kè Sɛ̀mìwáɖámɔ̀ kè Jɛ́hònétɔ̃̀ kè Àɖòníjà kè Tòbíjà ɔ kè Tóɓì-Àɖòníjà kɛ ɔ kè sáa-zà-nyɔ̀ ɓě mɔ̀ Ɛ̀ɖìsámà kè Jɛ̀hówàɖàùn kɛɛ mu ma.

⁹ Ké wa tɛ̀mɛ̀ìn ma nyɔ ɓě nì ma ɖé Júɖà-ɓòɖòɔ̀ kɔ̃ɛɛ ɖɛ. Wa ɓéɖé ma Bounɓoɔ̀ gma-cèè-ɖɛ̀ɔ̀ xwa, ké wa mùìn ma hwɔɖɔ séín ɓě nì ma ɖé Júɖà-ɓòɖòɔ̀ kɔ̃ɛɛ múin, ké wa tɛ̀mɛ̀ìn ma nyɔ ɓěɔ̀ ɖɛ.

Jɛ̀hósáfàà kpé vɛ̀nɛ̀ɔ̀

¹⁰ Ti ɓɛ́ Jɛ̀hósáfà mɔ̀ ma kã́á kɛɛ, Bounɓoɔ̀ díɖíɔ̀ kpɔ̃ ma kã́á-ɓòɖò séín ɓě nì ma ɓó Júɖà-ɓòɖòɔ̀ ɖeiɛɛ kɔ̃, ké wa ɖò se ma Jɛ̀hósáfà to kɔ̃ kpaa ɓɛ́ìn.

¹¹ Ké Féɖésìà-nyɔ̀ ɓěɔ̀ ɖíɛ́ ɓě dyà ma Jɛ̀hósáfà nyíí-ɖɛ̀ ɓě, ké wa pɛ́ɛ̀ìn waà tácìɔ̀ séɓàɖà mú. Ké ɓó kɔ̃in ɖeɛɛ, Àwéɖéɓìà-nyɔ̀ ɓěɔ̀ dyà ma ɔ ɓáɖáá ɓíɔ́ táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ mɛ̀nɛ̌ìn-sɔ̃́ ɔ kè vã́á táázĩ̀ìn mɛ̀nɛ̌ìn-sɔ̃́ kè hɔ̃dɛ̀ɖɛ̀ mɛ̀nɛ̌ìn-sɔ̃́.

¹² Ké Jɛ̀hósáfàà kpéɔ̀ nì ma kɔ̃ kpáuń kánáá pū. Ɔ po ma to-pèɖèìn-naín ɓě kè ɖɛ-mú-dyi-dèìn-hwɔ̀ɖɔ̀ ɓě ɖé Júɖà-ɓòɖòɔ̀ kɔ̃,

¹³ ké ɔ dèìn ma ɖɛ ɓáún-ɓáún ɖé Júɖà-hwɔ̀ɖɔ̀ ɓěɔ̀ múin. Ké ɔ ɓéɖé ma gàa-zà-nyɔ̀ ɓě ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú.

¹⁴ Kà gàa-zà-nyɔ̀ ɓěɔ̀ kè waà nàìn-nyɔ̀ ɓěɔ̀ nyu ma jĩ̀ɛ̀ dyììn ɖé waà xwéɖé-dù ɓěɔ̀ múɛɛ kɛà kɛ̀. Sɔ̀ìn ɖé Júɖà nììn xwéɖé-dùɔ̀ múɛɛ, Áɖánàà mɔ̀ ma waà nyɔ vɛ̀nɛ̀, ké ɔ ɓéɖé ma gàa-zà-nyɔ̀ táázĩ̀ìn hɔ̃dɛ̀ɖɛ̀ tã.

¹⁵ Ké nyɔ kɔ ɓó ɔ gbo dyíɛɛ mɔ̀ Jɛ́hòhánà, ké ɔ mɔ̀ùn ɓéɖé gàa-zà-nyɔ̀ táázĩ̀ìn hɔ̃dɛ̀ɖɛ̀ sɔ̃́ kè táázĩ̀ìn kpáɖá-nyɔ hĩinyɛ.

¹⁶ Ké nyɔ kɔ ɓó ɔ mɔ̀ùn gbo dyíɛɛ mɔ̀ Àmàsíà ɓɛ́ ɔ mɔ̀ Zíkìɖìɛ̀ dyú-gàà kɛ. Ɔ mɔ̀ ma hwòɖǒ-wɔ̃́-kũ̀à-nyu-nyɔ̀ ɓó Bounɓoɔ̀ bìì. Ɔ mɔ̀ùn ɓéɖé ma gàa-zà-nyɔ̀ táázĩ̀ìn hɔ̃dɛ̀ɖɛ̀ sɔ̃́.

¹⁷ Ké sɔ̀ìn ɖé Bɛ̃́címà nììn xwéɖé-dùɔ̀ múɛɛ, Ɛ̀dyáɖà mɔ̀ ma waà nyɔ vɛ̀nɛ̀, ké ɔ ɓéɖé ma gàa-zà-nyɔ̀ táázĩ̀ìn hɔ̃dɛ̀ɖɛ̀ sɔ̃́ ɓɛ́ wa ɓéɖé ma pɔnɔ ɓě kè dyí-zĩ̀ìn-ɖɛ̀ ɓě kɛ.

¹⁸ Ké nyɔ kɔ ma ɓó ɔ gbo dyíɛɛ mɔ̀ Jɛ̀hózáɓà, ké ɔ mɔ̀ùn ɓéɖé ma gàa-zà-nyɔ̀ táázĩ̀ìn hɔ̃dɛ̀ɖɛ̀ ɖò kè táázĩ̀ìn kpáɖá-nyɔ hĩinyɛ ɓɛ́ wa bɛ̃̀ìn ma to-gbo-mu-kà kɛ.

¹⁹ Nyɔ ɓěa mɔ̀ ma kã́áɔ̀ bìì kũ̀à-nyu-nyɔ̀ ɓě ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Hwɛ̀ ké ɓó kɔ̃in ɖeɛɛ, kã́áɔ̀ ɓéɖé ma kà sójà ɓě ɓɛ́ ɔ dèìn ma kà ɖé toún-pèɖèìn-hwɔ̀ɖɔ̀ ɓěɔ̀ múin ɖé Júɖà-ɓòɖòɔ̀ dà séín nyɛ̀.