2 Kánáníkɔ̀ 16 - Ɓǎsɔ́ɔ̀ Báɓòɔ̀

Fũ̀à-fṹá ɓě kpá ɓó Júɖà-ɓòɖòɔ̀ kè Éézùɖùɛ̀-ɓòɖòɔ̀ pṹa kɛ

¹ Ɖé Ásà nììn ɓóɖó-wuɖuí-kɔ̃̀-zɔ̃̀ɔ̀ kpáɖá-nyɔ ɓaɖa-bùè sè mɛ̀nɛ̌ìn-ɖò nììnɔ̀ xwíníín nyɛɛ, Báásà ɓɛ́ ɔ mɔ̀ Éézùɖùɛ̀-ɓòɖòɔ̀ nììn kã́á kɛɛ kpa ma Júɖà-ɓòɖòɔ̀ to kɔ̃, ké ɔ ɖú ma Wáɖámà-hwɔ̀ɖɔ̀ɔ̀ dyí. Ké ɔ cɛ̃̀ìn ma hwɔɖɔɔ̀ gmɔ ɖei, ɓɛ́ ɔ ké hwìè muà ɖé Júɖà-ɓòɖòɔ̀ kɔ̃ɛɛ kã, ɓɛ́ nyɔ ɖò ní kɔ̃̀ ɖà ɖé Júɖà-ɓòɖòɔ̀ kɔ̃ mu, mɔɔ nyɔ ɖò ní kɔ̃̀ ɖà ɖé sɔ̀.

² Hwɛ̀ ké Ásà ɖú ma séɓàɖà kè góò nì ɖé Bounɓoɔ̀ gbǒɔ̀ ɖɛ-dyi-dèìn-naínɔ̀ kè kã́á-mú-cĩ́-gbòɔ̀ ɖɛ-dyi-dèìn-naínɔ̀ múɛɛ dyí, ké ɔ ɖoɓo wa Bɛ̃̀háɖà ɓɛ́ ɔ mɔ̀ ma Síwíɖíà-ɓòɖòɔ̀ kã́á kɛɛ gbo ɖé Dìmásìkɔ̀-hwɔ̀ɖɔ̀ɔ̀ mú, ké ɔ ɖá,

³ “Ḿ kè mɔ̀ mɛ po wuɖu ɓíín kà à ɓǎ ɓě nyuɛ ma kà kɛ. Séɓàɖà kè góò ɓěɛ̀ mɔ̀ nì nyíí-ɖɛ̀. M̀ mɛ zà wuɖu ɓɛ́ ɔ nì ɓó m̀ kè Báásà mɔ̀à Éézùɖùɛ̀-ɓòɖòɔ̀ kã́áɔ̀ kɛɛ pṹa kɛɛ ɓíín, nìí ɓɛ́ ɔ ké ɔ sójà ɓěɔ̀ nɔ̄ ní ɓóɖóɛ̀ kɔ̃ zà.”

⁴ Ké Kã́á Bɛ̃̀háɖà wɔ̃́ìn ma ɖɛ ɓɛ́ Ásà cɛ̃ ma kà kɛɛ gbo. Ɔ jèɛɛ, ɔ ɖoɓo ma ɔ sójà-nàìn-nyɔ̀ ɓěɔ̀ kè waà sójà ɓěɔ̀, ɓɛ́ wa ké Éézùɖùɛ̀-hwɔ̀ɖɔ̀ ɓěɔ̀ to kpa. Ké wa mu, ké wa ɖú ma Íjɔ̀ùn-hwɔ̀ɖɔ̀ɔ̀ kè Dɛ̃́ìn-hwɔ̀ɖɔ̀ɔ̀ kè Éɓò-Bɛ̀máákà-hwɔ̀ɖɔ̀ɔ̀ ɔ kè ɖɛ-mú-dyi-dèìn-hwɔ̀ɖɔ̀ séín ɓě nì ma ɖé Náfátàɖì nììn gbɛ̌ɛ̀ɔ̀ múɛɛ dyí.

⁵ Ti ɓɛ́ Kã́á Báásà wɔ̃́ɔ ma kɛɛ, ɔ táà ma Wáɖámà-hwɔ̀ɖɔ̀ɔ̀ gmɔɔ̀ po jèɔ̀ dyi, ké kũ̀àɔ̀ kpá ma ɓɔ́í.

⁶ Hwɛ̀ ké Kã́á Ásà poìn ma Júɖà-nyɔ̀ séín ɓěɔ̀ dyí, ké wa zà ma sɔ́ɔ́-kpò kè cu-pĩ̀à ɓě ɓɛ́ Báásà nì ma kà gmɔɔ̀ cɛ̃̀ǐn nyɛɛ ɖé Wáɖámà-hwɔ̀ɖɔ̀ɔ̀ mú dyi. Ké Ásà nyùìn ma ɖɛ ɓěɔ̀ kũ̀à mú, ké ɔ cɛ̃̀ìn ma Géɓà-hwɔ̀ɖɔ̀ɔ̀ kè Mípà-hwɔ̀ɖɔ̀ɔ̀ gmɔ ɖei.

Ɖɛ ɓá kpáá-ɖɛ̀-dyé-nyɔ̀ Hànánì jè dyíɛ

⁷ Ɓó tia ɓaɖaa, Hànánì ɓɛ́ ɔ mɔ̀ ma kpáá-ɖɛ̀-dyé-nyɔ̀ ɖò kɛɛ dyi ma Ásà mɔ̀à Júɖà-kã̀ǎɔ̀ kɛɛ gbo, ké ɔ ɖá, “Kà ɓɛ́ m̀ tèà Síwíɖíà-kã̀ǎɔ̀ mú, ké m̀ seà Bounɓo mɔ̀à nì Gèɖèpɔ́ɔ̀ kɛɛ mú tèɛ jèɛɛ, Síwíɖíà-kã̀ǎɔ̀ sójà ɓěɔ̀ ɖǎ m̀ xwaún wã.

⁸ Má, Kúsì-sòjà ɓěɔ̀ kè Ɖéɓìà-sòjà ɓěɔ̀ se ma zɛɖɛɛ ɓɛ́ìn, ké wa ɓéɖé ma hwíì-sǒ kè sǒ-nàìn-nyɔ̀ kúɖúú ɓěe? Kɛɛ wɛ̃́ɛ́ kɛɛ, m̀ dè ma Bounɓoɔ̀ hwòɖǒ kɔ̃ jèɛɛ, ɔ po ma wa ɖé m̀ xwaún dyi.

⁹ Sepóɛɖé Bounɓoɔ̀ dyéɖéɔ̀ dyé ɓóɖó-kpà gànáà dà séín dyi, ɓɛ́ ɔ ké nyɔ ɓě ɓɛ́ wa sí ɔ kíɖíí hwòɖǒɛ̀-ɖé-hwɛ̀-kà kɛɛ kpéí po. M̀ ɖǎ zuɖuu-ɖɛ̀ nyu ɖé ɖɛ nìà kɛ mú jèɛɛ, sɔ̀ìn ɓó kàǔn gbo ké dyúa muɛɛ, nì muá to ɓě ɓéɖéìn.”

¹⁰ Ti ɓɛ́ Ásà wɔ̃́ɔ ma kɛɛ, ɔ kpáìn ma kpáá-ɖɛ̀-dyé-nyɔ̀ɔ̀ dyoɖoún mìɔ, ké ɔ po ma ɔ kpɔɖɔ ɖeín. Ké Ásà nyu ma nyɔ ɓěɔ̀ ɖíɛ́ ɓě kànàǎ-ɖɛ̀ ɓě bũ̌ ɖekè.

Ásàà wuɖuí-kɔ̃̀-kpèɔ̀ dúí-jɛ̀ɖɛ̀ìn-naín

¹¹ Ɖɛ tɔ̀ɔ̀ séín ɓě ɓɛ́ Ásà nyu ma kɛɛ, sɔ̀ìn ɖéɛ dè gbɔɔ̀ mú kéɛ mánáín-hwɛ̀ìn-naín dyɛ̀ìn nyɛɛ, wa jè céè ɖé Júɖà-kã̀ǎ ɓěɔ̀ kè Éézùɖùɛ̀-kã̀ǎ ɓěɔ̀ kpáá-ɖɛ̀-sùà-cèè-ɖɛ̀ɔ̀ mú.

¹² Ɖé Ásà nììn ɓóɖó-wuɖuí-kɔ̃̀-zɔ̃̀ɔ̀ kpáɖá-nyɔ ɓaɖa-bùè sè mɛ̀nɛ̌ìn-hĩinyɛ nììnɔ̀ múɛɛ, ɓo-wɛ̀ ɖò kpɔ̃ ma ɔ ní, ké wɛ́ɔ̀ ku ma wɔ̃ mìɔ. Ké ɖé ɔ wɛ́-tìɔ̀ múɛɛ, ɔ se ma ɖé Bounɓoɔ̀ gbo gmɔ̀ìn dyɛ mɔ̀ùn ɓó gbo-kpá-kpá jè, kɛɛ ɔ mu ma nyɔ-hwǒò-nyɔ̀ ɓě gbo.

¹³ Ké Ásà mu ma ɔ ɓǎ ɓě gbo. Ɔ mɛ́ ma ɖé ɔ ɓóɖó-wuɖuí-kɔ̃̀-zɔ̃̀ɔ̀ kpáɖá-nyɔ sɔ̃́ sè dyúáɖò nììnɔ̀ xwíníín.

¹⁴ Ké wa zà ma ɔ dyóɖóún ɖé ɓí ɖò ɓɛ́ ɔ ɖǎ ma naɓaà ɓó ɔ mìɔùn bììɛɛ mú, ɖé Dèɓé ɓíɖí-hwɔ̀ɖɔ̀ɔ̀ mú. Wa pɛ̃́ìn ma ɔ xwɛ́ɔ̀ kɔ̃-pɛ̃́-ɖɛ̀ ɖò kɔ̃ dyi, dɛ̀ ɓɛ́ wa dyíìn ma nyɔ́ún-nɔ̀mɔ̀-ɖɛ̀ɛ̀ dú kò-kò ɓě ɓɛ́ nyɔ́ún-nɔ̀mɔ̀-ɖɛ̀ nyu-nyɔ̀ ɓě nyu ma kɛ. Ké wa po ma nyɛ-ɓɔ́ɔ́ vɛ̀nɛ̀ ɖò dyí ɖé ɔ kpéín-dyé-dyé mú.