2 Kánáníkɔ̀ 15 - Ɓǎsɔ́ɔ̀ Báɓòɔ̀

Ásà sɛ́ɖɛ́ìn ɖɛ dyí

¹ Wé ɖòɛ̀ ɓaɖaa, Gèɖèpɔ́ɔ̀ Zùùɔ̀ dyi ma Ázàwíɖíà ɓɛ́ ɔ mɔ̀ ma Ódèɛ̀ dyú-gàà kɛɛ kɔ̃.

² Ké ɔ mu ma Kã́á Ásà hwìǐ, ké ɔ cɛ̃ɛ ma Ásà gbo, ké ɔ ɖá, “Ásà, m̀ kè Júɖà-nyɔ̀ ɓěɔ̀ kè Bɛ̃́címà-nyɔ̀ séín ɓěɔ̀ mɛ tò ḿ gbo ɖùǔ. Bounɓoɔ̀ nì ɓó ɓě gbo ti ɓɛ́ ɓě nì ɓó ɔ mɔ̀ùn gboɛ. Ɓěɛ̀ hwòɖǒ dyi ɔ gbo dyiɛ mɔ́ ní, ɓě mu ɔ dyéìn, kɛɛ ɓě dyi ɔ dyi táà ní, ɔ mu ɓě mɔ̀ùn dyi táàùn ɖekè.

³ Ɓó ti zɛin xwíníín nyɛɛ, Éézùɖùɛ̀-nyɔ̀ ɓěɔ̀ se ma jǎà Gèɖèpɔ́ɔ̀ ɓéɖé, ké wa se ma Gèɖèpɔ́ɔ̀ gma ɓěɔ̀ kè sáa-zà-nyɔ̀ ké wa gma ɓěɔ̀ tɛ̀mɛ̀ìn nyɛɛ ɓéɖé.

⁴ Kɛɛ ti ɓɛ́ wa gmɔ̀ìn ma ɖé Bounɓo mɔ̀à waà Gèɖèpɔ́ɔ̀ kɛɛ gbo, ɖé waà fũ̀à-fṹá-tìɔ̀ mú, ké waà hwòɖǒ mɔ́ ma ɔ gbo dyiɛ dyi kɛɛ, púɛɛ, wa dyé ma ɔ da.

⁵ Ɓó tia ɓaɖaa, gìɖìǐ ɖò se ma nì ɓó nyɔ ɓɛ́ ɔ mu ma píé kɛ mɔɔ nyɔ ɓɛ́ ɔ dyi ma taún wɛ̃ɛ bìì, sepóɛɖé fũ̀à-fṹá vɛ̀nɛ̀ nì ma nyɔ séín ɓě cĩ́ ma ɖé ɓóɖó ɓěɔ̀ kɔ̃ɛɛ nyuɛń mìɔ.

⁶ Wa hwɔìn ɖɛ wɛ̀ìn dyiɛ. Ɓóɖó-dù nì ma ɓóɖó-dù gbo vɔ̃uń, ké hwɔɖɔ nì ma ɔ mǔè-hwɔ̀ɖɔ̀ gbo vɔ̃uń, sepóɛɖé Gèɖèpɔ́ɔ̀ nyùìn ma wa fũ̀à-fṹá dyììn ɖé nyɔ-fũ̀à-fṹá-nyùìn-ɖɛ̀ kã̀ìn séín mú.

⁷ Ɔ jèɛɛ, ɓě ku hwòɖǒ. Ɓěǐn ɖá ɓɛ́ ɓěɛ̀ sɔ̃ ɖeín ké kpéí hwɛ̀, sepóɛɖé ɓě mu ɓěɛ̀ kũ̀àɔ̀ pɛ́ɛ̀-ɖɛ̀ dyéìn.”

⁸ Ti ɓɛ́ Ásà wɔ̃́ ma kpáá-ɖɛ̀ ɓě ɓɛ́ Ázàwíɖíà mɔ̀à Ódèɛ̀ dyú-gààɔ̀ kɛɛ cɛ̃ ma kà kɛɛ, púɛɛ, ɔ hwòɖǒɔ̀ kpá ma kpéí. Ké ɔ zà ma kũùn-kpò ɓě ɓɛ́ wa nyàìn Gèɖèpɔ́ɔ̀ dyiɛɛ ɖé Júɖà-ɓòɖòɔ̀ kè Bɛ̃́címà-ɓòɖòɔ̀ dà séín dyi, ké ɔ zà ma wa ɖé hwɔɖɔ ɓě ɓɛ́ ɔ ɖú ma dyí ɖé Ífèɖèìn Toɖo-ɓòɖòɔ̀ múɛɛ mú dyi ɖekè. Ké ɔ nɔ̀mɔ̀ìn ma Bounɓoɔ̀ sáa-kɔ̃-zàìn-gbàà ɓɛ́ ɔ nìà ɓó Bounɓoɔ̀ gbǒɔ̀ dyúa kɛɛ xwa.

⁹ Ké ɔ poìn ma Júɖà-nyɔ̀ ɓěɔ̀ kè Bɛ̃́címà-nyɔ̀ séín ɓěɔ̀ ɔ kè nyɔ ɓě sɔ̀ ɖé Ífèɖèìn kè Mànásì ɔ kè Símìɔ̀ nììn xwéɖé-dù ɓěɔ̀ mú, ɓɛ́ wa cĩ́ ma ɖé wa hwìɛ̀ kɛɛ dyí. Nyɔ ɓáún-ɓáún sɔ̀ ma ɖé Éézùɖùɛ̀-ɓòɖòɔ̀ kɔ̃, ké wa po ma ɖé ɔ gbo gbɔ ti wa dyéɛ ma kà Bounɓo mɔ̀à ɔ Gèɖèpɔ́ɔ̀ kɛɛ nì ɓó ɔ gboɛ.

¹⁰ Wa poìn ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú dyí ɖé Ásà nììn ɓóɖó-wuɖuí-kɔ̃̀-zɔ̃̀ɔ̀ ɓaɖa-bùè sè hm̀m̌ nììnɔ̀ dɛ̀nɛ̀ tã nììnɔ̀ xwíníín.

¹¹ Ké wa nyu ma sáa-zàìn-ɖɛ̀ ɓó Bounɓoɔ̀ bìì, sɔ̀ìn ɖé to-gbo-zà-ɖɛ̀ ɓěɔ̀ hwìɛ̀. Wa zàìn ma ɓìɖǐ hɔ̃dɛ̀ɖɛ̀ mɛ̀nɛ̌ìn-sɔ̃́ ɔ kè ɓáɖáá kè wiɖi táázĩ̀ìn mɛ̀nɛ̌ìn-sɔ̃́ sáa.

¹² Ké wa ɖi ma wuɖu kà wa mu Bounɓo mɔ̀à wa ɓǎ nììn ɓǎ ɓěɛ̀ Gèɖèpɔ́ɔ̀ kɛɛ kíɖíí síìn hwòɖǒɛ̀-ɖé-hwɛ̀-kà kɛ.

¹³ Ké wa ɖi ma wuɖu kà nyɔ mɔ̀ nyɔ ɓɛ́ ɔ se Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ kíɖíí síɛɛ, wa ɓéɖé wa ké ɔ ɖáɓá kɛ. Kɛbì ɔ mɛ mɔ̀ nyɔ gmɔ̀ mɔɔ nyɔ sùà mɔɔ gàa mɔɔ màa kɛɛ, ɔ ɓéɖé ɔ ké mɛ́.

¹⁴ Ti ɓɛ́ wa ɖììn ma kà Bounɓoɔ̀ wuɖu dyéɖéín nyɛɛ, wa páná ma mú, ké wa ɓaɖa ma gã̀à, ké wa ɖú ma kuɖu-kuɖu nyu kpàǐ.

¹⁵ Ké Júɖà-nyɔ̀ séín ɓěɔ̀ kpá ma múàǔn ɓó wuɖu ɓɛ́ wa ɖià kɛɛ jè, sepóɛɖé wa ɖi wuɖuɔ̀ hwòɖǒɛ̀-ɖé-hwɛ̀-kà. Waà hwòɖǒ mɔ́ Bounɓoɔ̀ gbo dyiɛ dyi jèɛɛ, wa dyé ɔ da, ké Bounɓoɔ̀ nyí ma wa gìɖìǐ ɓó wa ɖei dà séín.

¹⁶ Ké ɓó kɔ̃in ɖeɛɛ, Kã́á Ásà zà ma ɔ dàɓò mɔ̀à Máákà kɛɛ kã́á-màà-kũ̀àɔ̀ kɔ̃ún, sepóɛɖé ɔ nyànàìn ma cu-kpóɖó mɔ̀ gèɖèpɔ́ɔ̀-màà kɔ̃̀ nyɛ́nɛ́ mɔ̀à Àséwàɖà kɛɛ hwɔìn-ɖɛ̀, ɓɛ́ ɔ mɔ̀ nyɔ-dyi-nyàìn-ɖɛ̀ kɛɛ dyi. Ké Ásà ɖaɓa ma cu-kpóɖóɔ̀, ké ɔ wàìn ma ɔ dyi, ké ɔ fɔ̃̀ìn ma ɖéɛ Kídɔ̀nɔ̀ Bɔɔ-kpàɔ̀ kɔ̃.

¹⁷ Ásà se ma kũùn-kpò ɓièìn-naín ɓě nìà ɖé toɖo ɓěɔ̀ dyaa dyíin nyìnììn ɖé Júɖà-ɓòɖòɔ̀ kɔ̃ dyɛo, kɛɛ ɔ sí ma Bounɓoɔ̀ kíɖíí hwòɖǒɛ̀-ɖé-hwɛ̀-kà ɖé ɔ fɛ̀ɛ̀-wè séín mú.

¹⁸ Ké ɔ po ma séɓàɖà kè góò ɔ kè ɖɛ tɔ̀ɔ̀ ɓě ɓɛ́ ɔ kè ɔ ɓǎ ɖǎ ma wáká po ɓó Gèɖèpɔ́ɔ̀ gbǒɔ̀ bììɛɛ ɖé Gèɖèpɔ́ɔ̀ gbǒɔ̀ mú.

¹⁹ Sɔ̀ìn ɓóɛ gboɛɛ, to ɖò se ma ɖé ɓóɖóɔ̀ kɔ̃ nì ɖe fɔɔ ké ɔ dyɛ̀ìn ma Ásà nììn ɓóɖó-wuɖuí-kɔ̃̀-zɔ̃̀ɔ̀ kpáɖá-nyɔ ɓaɖa-bùè sè hm̀m̌ nììnɔ̀.