2 Kánáníkɔ̀ 14 - Ɓǎsɔ́ɔ̀ Báɓòɔ̀

Ásà mɔ̀à Júɖà-kã̀ǎɔ̀ kɛɛ jè

¹ Sɔ̀ìn ɓó ɖɛ ɓěɛ̀ gboɛɛ, Àbíjà mu ma ɔ ɓǎ ɓě gbo, ké wa zà ma ɔ dyóɖóún ɖé Dèɓé ɓíɖí-hwɔ̀ɖɔ̀ɔ̀ mú. Ké ɔ dyú-gàà kɔ̃̀ nyɛ́nɛ́ mɔ̀ Ásà kɛɛ mɔ̀ ma kã́á ɓó ɔ bɛ̃̌ǐn. Ké ɖé Ásà nììn ɓóɖó-wuɖuí-kɔ̃̀-tìɔ̀ gbɔ-dè-tìǐn nyɛɛ, ɓóɖóɔ̀ ɓéɖé ma gìɖìǐ ɓó zɔ̃ ɓaɖa-bùè xwíníín.

² Ké Ásà nyu ma ɖɛ nɔ̀mɔ̀ dyíin ɓɛ́ ɔ dè Bounɓo mɔ̀à ɔ Gèɖèpɔ́ɔ̀ kɛɛ hwòɖǒ dyiɛ.

³ Ɔ wáɖá ma gbàà ɓě kɔ̃̀ kɔ̃ mɔ̀ ma gèɖèpɔ́ɔ̀ kà kò ɖò ɓě bìì sáa-zàìn-naín nyɛ kè kũùn-kpò ɓièìn-naín kò-kò ɓě nìà ɖé toɖo ɓěɔ̀ dya kɛ. Ké ɔ wàìn ma sɔ́ɔ́-kpò ɓě mɔ̀à kũùn-kpò-gèɖèpɔ́ɔ̀ ɓěɔ̀ hwɔìn-ɖɛ̀ kɛɛ dyi, ké ɔ ɖaɓa ma cu-kpóɖó ɓě mɔ̀à waà gèɖèpɔ́ɔ̀-màà kɔ̃̀ nyɛ́nɛ́ mɔ̀à Àséwàɖà kɛɛ hwɔìn-ɖɛ̀ ɓěɛ.

⁴ Ké ɔ po ma Júɖà-nyɔ̀ ɓěɔ̀ náún, ɓɛ́ wa ké Bounɓo mɔ̀à wa ɓǎ nììn ɓǎ ɓěɛ̀ Gèɖèpɔ́ɔ̀ kɛɛ kíɖíí sí, ɓɛ́ wa ké ɔ gma séín ɓěɔ̀ dyi kpɔ̃.

⁵ Ɔ wáɖá ma kũùn-kpò ɓièìn-naín ɓě nìà ma ɖé toɖo ɓěɔ̀ dya kɛ kè gbàà ɓě kɔ̃̀ kɔ̃ mɔ̀ nyɔ́ún-nɔ̀mɔ̀-ɖɛ̀ fɔ̃̀ìn-naín nyɛɛ ɖé Júɖà-hwɔ̀ɖɔ̀ séín ɓěɔ̀ mú. Ké Júɖà-ɓòɖòɔ̀ ɓéɖé ma gìɖìǐ ɖé ɔ nììn ɓóɖó-wuɖuí-kɔ̃̀-tìɔ̀ xwíníín.

⁶ Ké ɔ po ma toún-pèɖèìn-hwɔ̀ɖɔ̀ ɓě ɖé Júɖà-ɓòɖòɔ̀ kɔ̃, sepóɛɖé ɓóɖóɔ̀ ɓéɖé ma gìɖìǐ ɓó tia ɓaɖa. To ɖò se ma nì ɓó zɔ̃ ɓěa xwíníín, sepóɛɖé Bounɓoɔ̀ nyí ma ɔ gìɖìǐ.

⁷ Ɔ cɛ̃ɛ ma Júɖà-nyɔ̀ ɓěɔ̀ gbo, ké ɔ ɖá, “Ɓěà po hwɔɖɔ ɓěɛ̀, ɓɛ́ ɓěà ké wa gmɔ ɖei cɛ̃̀ìn, ɓɛ́ ɓěà ké hwɔɖɔ-dyí-gmɔ̀ìn-gbò ɓě ɖé gmɔ ɓěɔ̀ kɔ̃in po, ɓɛ́ ɓěà ké gmɔ-wɔ̃̀ ɓě kèɛ̀ gbǎìn-ɖɛ̀ ɓě ɓó gmɔ ɓěɔ̀ bũ̌ po. Ɓóɖóɔ̀ mɔ̀ à kɔ̃̀ɔ̀-ɖɛ̀ ke, sepóɛɖé à sí Bounɓo mɔ̀à à Gèɖèpɔ́ɔ̀ kɛɛ ɖeín. À sí ɔ kíɖíí, ké ɔ ɖǎ à gìɖìǐ nyí ɓó à ɖei dà séín.” Ɔ jèɛɛ, wa po ma ɖɛ, ké waà sɔ̃ún-kpa-ɖɛ̀ séín wóɖó ma gbɔ̀ɖɔ̀.

⁸ Ké Ásà ɓéɖé ma Júɖà-sòjà táázĩ̀ìn hɔ̃dɛ̀ɖɛ̀ tã ɓɛ́ wa ɓéɖé ma dyí-zĩ̀ìn-ɖɛ̀ táázĩ̀ìn ɓě kè ɖí ɓě kɛ kè Bɛ̃́címà-sòjà táázĩ̀ìn hɔ̃dɛ̀ɖɛ̀ sɔ̃́ kè táázĩ̀ìn kpáɖá-nyɔ hĩinyɛ ɓɛ́ wa ɓéɖé dyí-zĩ̀ìn-ɖɛ̀ vɛ̀nɛ̀-vɛ̀nɛ̀ ɓě, ké wa mɔ̀ sé-po-nyɔ̀ kɛ. Wa séín mɔ̀ ma gàa-zà-nyɔ̀ nyɛ̀nɛ̀ɛ̀.

Ásà ɖu Kúsì-nyɔ̀ ɓěɔ̀ toún

⁹ Wé ɖòɛ̀ ɓaɖaa, Kúsì-gàà ɖò kɔ̃̀ nyɛ́nɛ́ mɔ̀ Zɛ́wàɖà kɛɛ dyà ma Kã́á Ásà to kɔ̃. Ɔ dyà ma sójà méɔ̀ùn dyúáɖò kè hwíì-sǒ hɔ̃dɛ̀ɖɛ̀ tã, ké wa dyi ma ɖé Màwéɖésà-hwɔ̀ɖɔ̀ɔ̀ wĩín.

¹⁰ Ké Ásà mu ma ɔ wɔ̃, ké wa ɓá ma ɓó to jè ɖé Zɛ̀fáfà Bɔɔ-kpà nì ma ɖé Màwéɖésà-hwɔ̀ɖɔ̀ɔ̀ wĩín nyɛɛ kɔ̃.

¹¹ Ké Ásà páná ma mú ɖé Bounɓo mɔ̀à ɔ Gèɖèpɔ́ɔ̀ kɛɛ gbo, ké ɔ ɖá, “Óó Bounɓo, nyɔ ɖò se nì ɓɛ́ ɔ ké nyɔ gbo kpá kà nì nyuà nyuɛ ɓó nyɔ ɓɛ́ ɔ ɓéɖé gana kɛ kè nyɔ ɓɛ́ kpé se dyí nìɛɛ pṹa kɛ. Bounɓo, mɔ̀ mɔ̀à à Gèɖèpɔ́ɔ̀ kɛɛ, kpá à gbo, sepóɛɖé mɔ̀ ɖòùn à dè hwòɖǒ kɔ̃, ké à dyi nyɔ kúɖúú ɓěɛ̀ gbo vɔ̃ùn ɖé nì nyɛ́nɛ́ɔ̀ mú. Óó Bounɓo, mɔ̀ mɔ̀ à Gèɖèpɔ́ɔ̀. Mɔ̀ǔn wɔ̃́ ké nyɔǔn-dyù ní ɖu m̀ toún.”

¹² Ké Bounɓoɔ̀ nyuɛ ké Ásà kè Júɖà-nyɔ̀ ɓěɔ̀ sɔ̃ nì ma Kúsì-nyɔ̀ ɓěɔ̀ kɔ̃in, ké Kúsì-nyɔ̀ ɓěɔ̀ kpá ma xwáɖáún.

¹³ Ké Ásà kè ɔ sójà ɓěɔ̀ kpá ma wa kíɖíí tee ké wa nyini ma ɖé Géwɔ̀ɖɔ̀-hwɔ̀ɖɔ̀ɔ̀ wĩín. Ké wa gã̀ ma Kúsì-nyɔ̀ ɓěɔ̀ ɖáɓáuń dyi tee ké waà nyɔ dyúáɖò dyɛ mɔ̀ùn se ma ɓíɖíi sè, sepóɛɖé Bounɓoɔ̀ kè Júɖà-sòjà ɓěɔ̀ wàìn ma wa dyi. Ké Júɖà-sòjà ɓěɔ̀ kpa ma to-gbo-zà-ɖɛ̀ ɓáún-ɓáún.

¹⁴ Ké wa wáɖá ma hwɔɖɔ séín ɓě nì Géwɔ̀ɖɔ̀-hwɔ̀ɖɔ̀ɔ̀ ɖeiɛɛ nyɛ̀nɛ̀ɛ̀, sepóɛɖé Bounɓoɔ̀ díɖí kpɔ̃ ma wa kɔ̃. Ké wa hwu ma hwɔɖɔ séín ɓěɔ̀ ní, sepóɛɖé ɖɛ ɓáún-ɓáún nì ma ɖé wa mú.

¹⁵ Ɓó kɔ̃in ɖeɛɛ, wa po ma nyúà-ɖɛ̀-ɓéɖé-nyɔ̀ ɓě to kɔ̃, ké wa kpa ma waà ɓáɖáá kè wiɖi ɔ kè sǒ-nì-gbu-kɔ̃ún kúɖúú ɓě. Hwɛ̀ ké wa kɔ́ìn ma ɖe, ké wa mu ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖe.