2 Kánáníkɔ̀ 13 - Ɓǎsɔ́ɔ̀ Báɓòɔ̀

To nì Àbíjà kè Jɛ́ɖòbóàùn pṹa

¹ Ɖé Jɛ́ɖòbóàùn ɓɛ́ ɔ mɔ̀à Éézùɖùɛ̀-kã̀ǎɔ̀ kɛɛ nììn ɓóɖó-wuɖuí-kɔ̃̀-zɔ̃̀ɔ̀ ɓaɖa-bùè sè mɛ̀nɛ̌ìn-tã nììnɔ̀ múɛɛ mɔ̀ ti Àbíjà dè ma Júɖà-ɓòɖòɔ̀ wuɖuí kɔ̃̀ɔ̀ gbɔ.

² Ɔ kɔ̃̀ ma ɓóɖóɔ̀ wuɖuí ɓó zɔ̃ tã xwíníín, ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Ɔ ɖeɛ̀ nyɛ́nɛ́ mɔ̀ ma Máákà. Ɔ mɔ̀ ma Dyúwìɖìè ɓɛ́ ɔ sɔ̀ ɖé Gíɓìà-hwɔ̀ɖɔ̀ɔ̀ múɛɛ dyú-màà. Wé ɖòɛ̀ ɓaɖaa, to kpá ma ɓó Àbíjà kè Jɛ́ɖòbóàùn pṹa.

³ Ké Àbíjà ɖú ma gàa-zà-nyɔ̀ táázĩ̀ìn hɔ̃dɛ̀ɖɛ̀ hĩinyɛ dyí, ké wa mu ma toɔ̀ gbo. Ké Jɛ́ɖòbóàùn mɔ̀ùn ɖú ma gàa-zà-nyɔ̀ táázĩ̀ìn hɔ̃dɛ̀ɖɛ̀ mɛ̀nɛ̌ìn-tã dyí, ké wa mu ma toɔ̀ gbo.

⁴ Ké Àbíjà nyànà ma ɖé Zɛ̀mánáì-tòɖò ɓɛ́ ɔ nì ma ɖé Ífèɖèìn Toɖo-ɓòɖòɔ̀ kɔ̃ɛɛ dya dyi, ké ɔ ɖá, “Jɛ́ɖòbóàùn, m̀ kè Éézùɖùɛ̀-nyɔ̀ séín ɓěɔ̀ mɛ tò ḿ gbo ɖùǔ.

⁵ Má, ɓě dyuòɛ̀ dyí wáɖáá kà Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ nyí ma Éézùɖùɛ̀-ɓòɖòɔ̀ kã́á-kũ̀àɔ̀ Dèɓé kè ɔ dyú-gàà ɓěɔ̀ kánáá pū dyììn ɖé dèè-wùɖù ɓá tɔ̃́ jè dyíɛɛ múɛe?

⁶ Kɛɛ dyéɛ, Jɛ́ɖòbóàùn mɔ̀à Nɛ́ɓàà dyú-gàà ɓɛ́ ɔ mɔ̀à Dèɓéɛ̀ dyú-gàà Sã́ɖómà nììn gbo-nì-nyɔ̀ɔ̀ kɛɛ sɔ̀ ma dyí, ké ɔ po ɔ wuɖuí-kɔ̃̀-nyɔ̀ɔ̀ kɛ́ɛ́ dyí.

⁷ Ké fùɖù-fùɖù-nyɔ̀ ɖíɛ́ ɓě kpá ma ɔ gbo, ké wa po ma Wíɖíhɔ̀bóàùn mɔ̀à Sã́ɖómàà dyú-gààɔ̀ kɛɛ sóɖó, ti ɓɛ́ Wíɖíhɔ̀bóàùn mɔ̀ ma dyú-gbɔ́ɔ́, ké ɔ séè ma ɓóɖó nàìn ɖò, ké ɔ se ma wa gbo vɔ̃ɔ ɓɛ́ìn nyɛ.

⁸ Ké ɓó kàǔn wɛ̃ɛ, ɓě mɔ́ Bounɓoɔ̀ kã́á-ɓòɖò ɓɛ́ ɔ nìà ɖé Dèɓéɛ̀ xwíníín-dyù ɓěɔ̀ xwaún wɛ̃ɛ gbo vɔ̃ɔ dyi, sepóɛɖé ɓěɛ̀ hwòɖǒ ɖá ɓě vò dyí mìɔ, ké ɓě ɓéɖé góò-ɓìɖǐ-dyù ɓě ɓɛ́ Jɛ́ɖòbóàùn nyuà ɓě bìì, ɓɛ́ wa kéà ɓěɛ̀ gèɖèpɔ́ɔ̀ jǔɛɛ ní jè.

⁹ Má, ɓě ɖǎ Bounɓoɔ̀ sáa-zà-nyɔ̀ ɓě mɔ̀à Eɖóúnɛ̀ xwíníín-dyù ɓěɔ̀ kɛ kè Ɖíìváà-nyɔ̀ ɓěɔ̀ kúmú, ké ɓě ɖǎ ɓě mìɔùn nììn sáa-zà-nyɔ̀ ɓě gã kà ɓóɖó-dù kà kò ɖò ɓěɛ̀ nyɔ ɓěɔ̀ nìà kɛe? Nyɔ mɔ̀ nyɔ ɓɛ́ ɔ dyà ɓìɖǐ ɓíɔ́ gmɔ̀ ɖò kè ɓáɖáá ɓíɔ́ mɛ̀nɛ̌ìn-sɔ̃́ ɓó ɔ mìɔùn kũ̀à kɔ̃ún po jèɛɛ, ɓě nyu ɔ ɖɛ ɓě se gèɖèpɔ́ɔ̀ ɓě kɛɛ nììn sáa-zà-nyɔ̀ mú.

¹⁰ “Kɛɛ ɓá à mɔ̀ùn jè dyíɛɛ, Bounɓoɔ̀ mɔ̀ à Gèɖèpɔ́ɔ̀, ké à séè ɔ dyi táà. À nììn sáa-zà-nyɔ̀ ɓě ɓɛ́ wa nìà Bounɓoɔ̀ kũ̀àɔ̀ nyuɛń nyɛɛ mɔ̀ Eɖóúnɛ̀ xwíníín-dyù ɓě, ké Ɖíìváà-nyɔ̀ ɓěɔ̀ nì wa gbo kpáuń.

¹¹ Wa nyu fɔ̃ɔ-sàǎ-zàìn-ɖɛ̀, ké wa fɔ̃ nyɔ́ún-nɔ̀mɔ̀-ɖɛ̀ ɓó Bounɓoɔ̀ bìì, ɓó gànà-kṹún kè hwìo ti séín. Ké wa po bɛɖɛɛ̀ ɓó téɓèɖè hwɛ̀ǐn-hwɛ̀ǐnɔ̀ kɔ̃. Ké wa nɔ̀mɔ̀ìn ɖáùnpò-kɔ̃-dè-ɖɛ̀ mɔ̀à góò saá-saá kɛɛ xwa, nìí ɓɛ́ ɔ ɖáùnpò ɓěɔ̀ ké wã ɓó hwìo ti séín. Sepóɛɖé à mɔ̀ùn kpɔ̃ ɖɛ ɓě ɓɛ́ Bounɓo mɔ̀à à Gèɖèpɔ́ɔ̀ kɛɛ cɛ̃ à gboɛɛ dyi kóɖó-kóɖó, kɛɛ ɓě mɔ̀ùn ɖǎ ɔ jè dyi táà.

¹² Gmɔ̀ nɔ̄, Gèɖèpɔ́ɔ̀ nì ɓó à gbo. Ɔ mɔ̀ à nàìn-nyɔ̀, ké ɔ sáa-zà-nyɔ̀ ɓěɔ̀ ɓéɖé waà ɖɔ-kpa ɓěɔ̀, ɓɛ́ wa kéɛ ɓaɖa, ɓɛ́ nyɔ ɓěɔ̀ ké dyí poìn ɓó ɓě mɔ̀ Éézùɖùɛ̀-nyɔ̀ ɓěɛɛ to kɔ̃ kpa jè. Ɓě ɓɔ́ Bounɓo mɔ̀à ɓě ɓǎ nììn ɓǎ ɓěɛ̀ Gèɖèpɔ́ɔ̀ kɛɛ gbo vɔ̃ɔ, sepóɛɖé ɓě se ɔ ɖuɛ ɓɛ́ìn.”

¹³ Ɓó tia ɓaɖaa, Jɛ́ɖòbóàùn ɖoɓo ma ɔ sójà ɓěɔ̀ ɖíɛ́ ɓě ɖé Júɖà-nyɔ̀ ɓěɔ̀ ɖeín, ɓɛ́ wa ké pìǐn kò. Ɔ jèɛɛ, ɔ sójà ɓěɔ̀ ɖíɛ́ ɓě nì ma wa dyúa, ké ɖíɛ́ ɓě kò ma pìǐn ɖé wa ɖeín.

¹⁴ Júɖà-nyɔ̀ ɓěɔ̀ mu ma ɖé gmɔ̀ùn wɛ̃ɛ, púɛɛ, toɔ̀ nì ma wa dyúa kè ɖé wa ɖeín. Ké wa páná ma mú ɖé Bounɓoɔ̀ gbo, ké sáa-zà-nyɔ̀ ɓěɔ̀ ɓaɖa ma waà ɖɔ-kpa ɓěɔ̀.

¹⁵ Hwɛ̀ ké Júɖà-nyɔ̀ ɓěɔ̀ páná ma mú to-gbo-mu-kà. Ké ti ɓɛ́ Júɖà-nyɔ̀ ɓěɔ̀ páná ma múɛɛ, púɛɛ, Gèɖèpɔ́ɔ̀ nyuɛ ké Àbíjà kè Júɖà-nyɔ̀ ɓěɔ̀ sɔ̃ nì ma Jɛ́ɖòbóàùn kè Éézùɖùɛ̀-nyɔ̀ séín ɓěɔ̀ kɔ̃in.

¹⁶ Ké Éézùɖùɛ̀-nyɔ̀ ɓěɔ̀ gbǔ ma Júɖà-nyɔ̀ ɓěɔ̀ dyúa, ké Gèɖèpɔ́ɔ̀ po ma wa Júɖà-nyɔ̀ ɓěɔ̀ xwaún dyi.

¹⁷ Ké Àbíjà kè ɔ sójà ɓěɔ̀ ɖáɓá ma waà nyɔ ɓáún-ɓáún. Éézùɖùɛ̀-nyɔ̀ ɓěɔ̀ gàa-zà-nyɔ̀ jĩ̀ kà kpá ma dyiɛɛ mɔ̀ ma nyɔ-kpò táázĩ̀ìn hɔ̃dɛ̀ɖɛ̀ hm̀m̌.

¹⁸ Kǎà Àbíjà kè Júɖà-nyɔ̀ ɓěɔ̀ nyu ma Éézùɖùɛ̀-nyɔ̀ ɓěɔ̀ toún ɖuɛ ɓó wéa ɓaɖa. Wa ɖu ma toɔ̀, sepóɛɖé wa dè ma Bounɓo mɔ̀à wa ɓǎ nììn ɓǎ ɓěɛ̀ Gèɖèpɔ́ɔ̀ kɛɛ hwòɖǒ kɔ̃.

¹⁹ Ti ɓɛ́ Àbíjà kpá ma Jɛ́ɖòbóàùn kíɖííɛɛ, ɔ zà ma ɔ hwɔɖɔ ɓě xwa. Hwɔɖɔ ɓěɔ̀ mɔ̀ Bɛ́fèò kè Jɛ̀sánà kè Ɛ́fɔ̀nɔ̀ ɔ kè wa nììn hwɔɖɔ-kpàǎ ɓěɔ̀.

²⁰ Ké Jɛ́ɖòbóàùn se ma gana ɖò ɓéɖé ɖe ɖé Àbíjà nììn ɓóɖó-wuɖuí-kɔ̃̀-tìɔ̀ mú. Ké Bounɓoɔ̀ po ma Jɛ́ɖòbóàùn ɓíɖíi dyi, ké ɔ mɛ́ ma.

²¹ Kɛɛ Àbíjà nììn kpéɔ̀ kpá ma kɔ̃. Ɔ kpɔ̃ ma nyɔ́nɔ́ ɓaɖa-bùè sè hĩinyɛ dyi, ké ɔ wóɖóìn ma gàa-dyù kpáɖá-nyɔ sè sɔ̃́ kè màa-dyù ɓaɖa-bùè sè mɛ̀nɛ̌ìn-ɖò.

²² Ɖɛ tɔ̀ɔ̀ ɓě ɓɛ́ Àbíjà nyu ma kɛ ɔ kè ɖɛ ɓě ɓɛ́ ɔ cɛ̃ kɛɛ, wa jè céè ɖé Íɖò mɔ̀à kpáá-ɖɛ̀-cɛ̃-nyɔ̀ɔ̀ kɛɛ kpáá-ɖɛ̀-sùà-cèè-ɖɛ̀ɔ̀ mú.