2 Kánáníkɔ̀ 12 - Ɓǎsɔ́ɔ̀ Báɓòɔ̀

Íjè-nyɔ̀ ɓěɔ̀ dyà Júɖà-ɓòɖòɔ̀ to kɔ̃

¹ Ti ɓɛ́ Wíɖíhɔ̀bóàùnɛ̀ wuɖuí-kɔ̃̀-kpèɔ̀ ɖǎ ma dúi ku kóɖó-kóɖóɛɛ, púɛɛ, ɔ kè Júɖà-nyɔ̀ séín ɓěɔ̀ táà ma Bounɓoɔ̀ gmaɔ̀ dyi.

² Wíɖíhɔ̀bóàùn kè nyɔ ɓěɔ̀ táà ma Bounɓoɔ̀ dyi jèɛɛ, ɖé ɔ nììn ɓóɖó-wuɖuí-kɔ̃̀-zɔ̃̀ɔ̀ hm̀m̌ nììnɔ̀ xwíníín nyɛɛ, Íjè-ɓòɖòɔ̀ kã́á kɔ̃̀ nyɛ́nɛ́ mɔ̀à Sísàkì kɛɛ dyà ma Jùɖúsɛ̀ɖɛ̀ìn-hwɔ̀ɖɔ̀ɔ̀ to kɔ̃.

³ Ɔ dyà ma hwíì-sǒ táázĩ̀ìn ɖò kè hɔ̃dɛ̀ɖɛ̀ sɔ̃́ kè sǒ-nàìn-nyɔ̀ táázĩ̀ìn kpáɖá-nyɔ tã. Ké sójà ɓě ɓɛ́ ɔ dyà ma kɛɛ se ma zɛɖɛɛ ɓɛ́ìn. Wa mɔ̀ ma Íjè-nyɔ̀ ɓě kè Ɖéɓìà-nyɔ̀ ɓě kè Súkì-nyɔ̀ ɓě ɔ kè Kúsì-nyɔ̀ ɓě.

⁴ Ké Sísàkì kpɔ̃ ma Júɖà-ɓòɖòɔ̀ toún-pèɖèìn-hwɔ̀ɖɔ̀ ɓěɔ̀, ké ɔ dyi tee ké ɔ dyɛ̀ìn ma Jùɖúsɛ̀ɖɛ̀ìn-hwɔ̀ɖɔ̀ɔ̀.

⁵ Hwɛ̀ ké Sɛ̀mádyà mɔ̀à kpáá-ɖɛ̀-cɛ̃-nyɔ̀ɔ̀ kɛɛ dyi ma ɖé Wíɖíhɔ̀bóàùn kè Júɖà-ɓòɖòɔ̀ gɔ̌mànà-nyɔ̀ vɛ̀nɛ̀ ɓě ɓɛ́ wa poìn ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú dyí ɓó Sísàkì peɖe jèɛɛ gbo, ké ɔ ɖá, “Ɖɛ Bounɓoɔ̀ cɛ̃ɛ kɛà kɛ̀. Ɔ ɖá, ‘Ɓě táà ma ḿ dyi. Ɔ jèɛɛ, mɔ́ún ɖǎ ɓě mɔ̀ùn ɖé Sísàkì xwaún dyi táà.’ ”

⁶ Hwɛ̀ ké Júɖà-ɓòɖòɔ̀ gɔ̌mànà-nyɔ̀ vɛ̀nɛ̀ ɓěɔ̀ kè kã́áɔ̀ dyà ma wa mìɔùn ɓíɖíi, ké wa ɖá, “Bounɓoɔ̀ ɓíɖí ɓɛ̀ɖɛ̀ìn dyí.”

⁷ Ti ɓɛ́ Bounɓoɔ̀ dyéɛ ma kà wa dyà ma wa mìɔùn ɓíɖíiɛɛ, púɛɛ, ɔ wùɖù ma Sɛ̀mádyà gbo ɖe, ké ɔ ɖá, “Wa ɖǎ wa mìɔùn ɓíɖíi dyà. Ɔ jèɛɛ, ḿ se wa mú gbɔɔ̌ mu ɖe, kɛɛ ní mu wa póìn ɖɛ wè, ké ḿ se ní dyoɖoɔ̀ Jùɖúsɛ̀ɖɛ̀ìn-hwɔ̀ɖɔ̀ɔ̀ kɔ̃ púèɛ̌ mu dyììn ɖé Sísàkì mú.

⁸ Kɛɛ wɛ̃́ɛ́ kɛɛ, wa mu ɔ gbo-nì-nyɔ̀ jǔùn, nìí ɓɛ́ wa ké zaìn gbo nì ɓó ní gbo-nì-kũ̀à kè ɓóɖó-dù ɓěɔ̀ nììn gbo-nì-kũ̀à nyu-nyu pṹa kɛɛ dyé.”

⁹ Ké Sísàkì mɔ̀à Íjè-kã̀ǎɔ̀ kɛɛ po ma Jùɖúsɛ̀ɖɛ̀ìn-hwɔ̀ɖɔ̀ɔ̀ to kɔ̃, ké ɔ kpa ma dyi-dè-ɖɛ̀ kpa ɖɛ séín nì ma ɖé Bounɓoɔ̀ gbǒɔ̀ kè kã́á-mú-cĩ́-gbòɔ̀ múɛ, hwɛ̀ ḿ po níiń, dyí-zĩ̀ìn-ɖɛ̀ ɓě ɓɛ́ Sã́ɖómà po ma kà góò bũ̌in nyɛ.

¹⁰ Sɔ̀ìn ɓóɛ gboɛɛ, Kã́á Wíɖíhɔ̀bóàùn nyu ma bàɖàsǐ-dyì-zĩ̀ìn-ɖɛ̀ ɓě, ɓɛ́ wa ké ma góò-dyì-zĩ̀ìn-ɖɛ̀ ɓěɔ̀ bɛ̃̌ǐn kpá. Ké ɔ ɖú ma bàɖàsǐ-dyì-zĩ̀ìn-ɖɛ̀ ɓěɔ̀ dyí, ké ɔ po ma wa sójà ɓě ɓɛ́ wa mɔ̀ ma kã́áɔ̀ gmɔ-wɔ̃̀ɔ̀ dyí-gmɔ̀-nyɔ̀ kɛɛ nyɔ vɛ̀nɛ̀ ɓě xwaún dyi, ɓɛ́ wa kéɛ dyí gmɔ̀.

¹¹ Ti séín ɓɛ́ kã́áɔ̀ mu ma ɖé Bounɓoɔ̀ gbǒɔ̀ mú muùn wɛ̃ɛ, nìí, sójà ɓěɔ̀ ɓéɖé ma dyí-zĩ̀ìn-ɖɛ̀ ɓěɔ̀. Ké wa ɖǎ ma hwɛ̀ ní, wa kpa ma wa ɖé dɛ̀ mɔ̀ kã́áɔ̀ gmɔ-wɔ̃̀ɔ̀ dyí-gmɔ̀-nyɔ̀ ɓěɔ̀ nì-naín nyɛɛ mú ɖe.

¹² Ti ɓɛ́ kã́áɔ̀ dyà ma ɔ mìɔùn ɓíɖíiɛɛ, Bounɓoɔ̀ dyoɖo-hwòɖòɔ̀ wáɖá ma ní, ké ɔ se ma ɔ mú gbɔɔ̀ gàná cá, ké ɖɛ ɖíɛ́ ɓě nɔ̀mɔ̀ ma dyíin ke ɖé Júɖà-ɓòɖòɔ̀ kɔ̃.

Ɖɛ tɔ̀ɔ̀ ɓě ɓá Wíɖíhɔ̀bóàùn nììn wuɖuí-kɔ̃̀-kpèɔ̀ jè dyíɛ

¹³ Kã́á Wíɖíhɔ̀bóàùn dè ma ɔ kã́á-ɓòɖòɔ̀ dyi ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú. Ɔ nyuá ma zɔ̃ kpáɖá-nyɔ sɔ̃́ sè dyúáɖò ti ɓɛ́ ɔ dè ma Júɖà-ɓòɖòɔ̀ wuɖuí kɔ̃̀ɔ̀ gbɔɛ. Ɔ kɔ̃̀ ma ɓóɖóɔ̀ wuɖuí ɓó zɔ̃ ɓaɖa-bùè sè mɛ̀nɛ̌ìn-sɔ̃́ xwíníín, ké ɔ cĩ́ ma ɖé Jùɖúsɛ̀ɖɛ̀ìn-hwɔ̀ɖɔ̀ ɓɛ́ Bounɓoɔ̀ ɖǎ ma gã ɖé Éézùɖùɛ̀-ɓòɖò gànáɔ̀ kɔ̃ ɓɛ́ wa ké ma ɖé ɔ ɓièìn nyɛɛ mú. Wíɖíhɔ̀bóàùn ɖeɛ̀ nyɛ́nɛ́ mɔ̀ ma Náámà. Ɔ mɔ̀ Ámànà-nyɔ̀.

¹⁴ Wíɖíhɔ̀bóàùn nyu ma ɖɛ gbà, sepóɛɖé ɔ hwòɖǒ seɛ ma gbɔ po, ɓɛ́ ɔ ké ma Bounɓoɔ̀ kíɖíí sí.

¹⁵ Wíɖíhɔ̀bóàùnɛ̀ gbǒ-xwíníínɔ̀ jè kè ɖɛ tɔ̀ɔ̀ séín ɓě ɓɛ ɔ nyu ma kɛɛ, sɔ̀ìn ɖéɛ dè gbɔɔ̀ mú kéɛ mánáín-hwɛ̀ìn-naín dyɛ̀ìn nyɛɛ, wa jè céè ɖé Sɛ̀mádyà mɔ̀à kpáá-ɖɛ̀-cɛ̃-nyɔ̀ɔ̀ kɛɛ nììn kpáá-ɖɛ̀-sùà-cèè-ɖɛ̀ɔ̀ mú kè ɖé Íɖò mɔ̀à kpáá-ɖɛ̀-dyé-nyɔ̀ɔ̀ kɛɛ nììn kpáá-ɖɛ̀-sùà-cèè-ɖɛ̀ɔ̀ mú. Ɓó ti séín ɓěa ɓaɖaa, to nì ma ɓó Wíɖíhɔ̀bóàùn kè Jɛ́ɖòbóàùn pṹa kánáá pū.

¹⁶ Ké Wíɖíhɔ̀bóàùn mu ma ɔ ɓǎ ɓě gbo, ké wa zà ma ɔ dyóɖóún ɖé Dèɓé ɓíɖí-hwɔ̀ɖɔ̀ɔ̀ mú. Ké ɔ dyú-gàà Àbíjà mɔ̀ ma kã́á ɓó ɔ bɛ̃̌ǐn.