2 Kánáníkɔ̀ 11 - Ɓǎsɔ́ɔ̀ Báɓòɔ̀

Kpáá-ɖɛ̀ ɓɛ́ Sɛ̀mádyà cɛ̃ ma kɛ

¹ Ti ɓɛ́ Wíɖíhɔ̀bóàùn nyini ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú nyɛ̀nɛ̀ɛ̀ kɛɛ, ɔ poìn ma sójà kpa ɖɛ ɓě nì ma ɖé Júɖà nììn xwéɖé-dùɔ̀ kè Bɛ̃́címà nììn xwéɖé-dùɔ̀ múɛɛ dyí. Wa mɔ̀ ma sójà táázĩ̀ìn hɔ̃dɛ̀ɖɛ̀ ɖò kè táázĩ̀ìn kpáɖá-nyɔ hĩinyɛ. Ɔ hwòɖǒ poɛ ma gbɔ, ɓɛ́ ɔ ké ma Éézùɖùɛ̀-nyɔ̀ tɔ̀ɔ̀ ɓěɔ̀ to kɔ̃ kpa, nìí ɓɛ́ ɔ ké ma Éézùɖùɛ̀-ɓòɖòɔ̀ xwéɖé-dù ɓě nìà ɖé xwía kɛɛ mɔ̀ùn wuɖuí kɔ̃̀ ɖekè.

² Kɛɛ Bounɓoɔ̀ cɛ̃ɛ ma Sɛ̀mádyà mɔ̀ kpáá-ɖɛ̀-cɛ̃-nyɔ̀ kɛɛ gbo,

³ ɓɛ́ ɔ ké wuɖu nìà kɛ Wíɖíhɔ̀bóàùn mɔ̀à Sã́ɖómàà dyú-gàà, ɓɛ́ ɔ mɔ̀à Júɖà-ɓòɖòɔ̀ kã́áɔ̀ kɛ kè Éézùɖùɛ̀-dyù séín mɔ̀à Júɖà-nyɔ̀ ɓěɔ̀ kè Bɛ̃́címà-nyɔ̀ ɓěɔ̀ dyí nyìnììn. Wuɖuɔ̀ ɖá,

⁴ “Ɓěǐn ɖá ɓɛ́ ɓě ké ɓě ɖíí-gàà ɓě mɔ̀à Éézùɖùɛ̀-nyɔ̀ tɔ̀ɔ̀ ɓěɛɛ to kɔ̃ kpa. Ɓě séín kɔ́ìn ɖe, ɓɛ́ ɓě ké ɓě ɓíɖí-taún mu. Ɖɛ kpáà kɛɛ mɔ̀ ɖɛ ḿ ɖǎ dyí sɔ́ ɓɛ́ ɔ ké ná kpáa.” Ɔ jèɛɛ, nyɔ séín ɓěɔ̀ nyu ma Bounɓoɔ̀ wuɖuɔ̀, ké wa kɔ́ìn ma ɖe. Wa se ma Jɛ́ɖòbóàùn kè Éézùɖùɛ̀-nyɔ̀ tɔ̀ɔ̀ ɓěɔ̀ gbo vɔ̃.

Wíɖíhɔ̀bóàùn cɛ̃̀ìn ma hwɔɖɔ ɓě gmɔ ɖei

⁵ Ɓó tia ɓaɖaa, Wíɖíhɔ̀bóàùn cĩ́ ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ké ɔ cɛ̃̀ìn ma hwɔɖɔ ɓě gmɔ ɖei ɖé Júɖà-ɓòɖòɔ̀ kɔ̃.

⁶ Hwɔɖɔ ɓě ɓɛ́ ɔ cɛ̃̀ìn ma kà gmɔ ɖeiɛɛ mɔ̀ Bɛ́fèɖèhɛ̃́ɛ̀ kè Étàùn kè Tèkóà

⁷ kè Bɛ̀-Zúɔ̀ kè Sóókò kè Àdúɖàùn

⁸ kè Gátì kè Màwéɖésà kè Zífì

⁹ kè Áɖòwáɖáìn kè Ɖákì kè Àzékà

¹⁰ kè Záwàɖà kè Àjáɖɔ̀ùn ɔ kè Hɛ́bɔ̀nɔ̀. Wa mɔ̀ toún-pèɖèìn-hwɔ̀ɖɔ̀ ɓě ɓɛ́ wa nì ɖé Júɖà-nyɔ̀ ɓěɔ̀ kè Bɛ̃́címà-nyɔ̀ ɓěɔ̀ hwìɛ̀ kɛ.

¹¹ Ɔ nyu ma hwɔɖɔ ɓěa to-pèɖèìn-naín mú kóɖó-kóɖó, ké ɔ po ma sójà-wuɖuí-kɔ̃̀-nyɔ̀ ɓě ɖé wa mú, ké ɔ dèìn ma ɖii-ɖɛ̀ kè cáná ɔ kè wã́ìn ɖé dyi.

¹² Ké ɔ dèìn ma dyí-zĩ̀ìn-ɖɛ̀ ɓě kè ɖí ɓě ɖé hwɔɖɔ ɓěɔ̀ ɖò-ɖò séín mú dyi. Kǎà ɔ kùìn ma hwɔɖɔ ɓěa dyi, ké ɔ kɔ̃̀ ma Júɖà-nyɔ̀ ɓěɔ̀ kè Bɛ̃́címà-nyɔ̀ ɓěɔ̀ wuɖuí.

Sáa-zà-nyɔ̀ ɓě kè Ɖíìváà-nyɔ̀ ɓě dyi ɖé Júɖà-ɓòɖòɔ̀ kɔ̃

¹³ Ɓó tia ɓaɖaa, sáa-zà-nyɔ̀ ɓě kè Ɖíìváà-nyɔ̀ ɓě ɓɛ́ wa nì ma ɖé Éézùɖùɛ̀-ɓòɖòɔ̀ xwía kɛɛ zi ma Wíɖíhɔ̀bóàùn gbo. Wa jaɖa ma ɖé waà cĩ́-naín séín ɓěɔ̀, ké wa poìn ma ɖé ɔ nììn wákáɔ̀ kɔ̃ dyí.

¹⁴ Ɖíìváà-nyɔ̀ ɓěɔ̀ jaɖa ma ɖé wa nììn pá ɓěɔ̀ kɔ̃, ké wa wã ma waà kɔ̃̀ɔ̀-ɖɛ̀ ɓěɔ̀ kɔ̃. Ké wa dyi ma ɖé Júɖà-ɓòɖòɔ̀ kɔ̃, ké ɖíɛ́ ɓě mu ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, sepóɛɖé Jɛ́ɖòbóàùn kè ɔ dyú-gàà ɓěɔ̀ kúmú ma wa, ɓɛ́ wa ké se Bounɓoɔ̀ sáa-zà-nyɔ̀ jǔ ɖe.

¹⁵ Ké Jɛ́ɖòbóàùn gã ma ɔ mìɔùn nììn sáa-zà-nyɔ̀ ɓě ɓó kũùn-kpò ɓièìn-naín ɓě nìà ɖé toɖo ɓěɔ̀ dya kɛɛ bìì, ɔ kè ɓó kũùn-kpò ɓě mɔ̀ wiɖi kè ɓìɖǐ-dyùɛ̀ hwɔìn-ɖɛ̀ ɓě ɓɛ́ ɔ mɛ ma kɛɛ bìì.

¹⁶ Ké Éézùɖùɛ̀-nyɔ̀ ɓě nì ma ɖé xwía, kɔ̃̀ hwòɖǒ mɔ́ ma Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ ɓièɛ̀ dyi xwéé kɛɛ sɔ̀ ma ɖé, ké wa sí ma sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ ɖeín, ké wa dyi ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú, ɓɛ́ wa ké ma ɖé Bounɓo mɔ̀à wa ɓǎ nììn ɓǎ ɓěɛ̀ Gèɖèpɔ́ɔ̀ kɛɛ gbo sáa zà.

¹⁷ Ké wa nyuɛ ké Júɖà-ɓòɖòɔ̀ kã́á-ɓòɖòɔ̀ ku dúi. Wa nyuɛ ké Wíɖíhɔ̀bóàùn mɔ̀à Sã́ɖómàà dyú-gààɔ̀ kɛɛ wuɖuí-kɔ̃̀-kpèɔ̀ ku ma dúi ɓó zɔ̃ tã xwíníín, sepóɛɖé wa taɓa ma ɔ ɓá ɓo ɖeín kà wa taɓa ma kà Dèɓé kè Sã́ɖómà ɓá ɓo ɖeín nyɛ.

Wíɖíhɔ̀bóàùn gbǒ-xwíníínɔ̀

¹⁸ Ké Wíɖíhɔ̀bóàùn kpɔ̃ ma Màháɖà ɓɛ́ ɔ mɔ̀ ma Jɛ̀wíɖímɔ̀ mɔ̀ ma Dèɓéɛ̀ dyú-gàà kɛɛ dyú-màà kɛɛ dyi, ɓɛ́ ɔ ké ɔ gmàà jǔ. Màháɖà ɖeɛ̀ nyɛ́nɛ́ mɔ̀ ma Áɓìháì. Áɓìháì mɔ̀ ma Ɛ̀ɖíà ɓɛ́ ɔ mɔ̀à Jɛséɛ̀ dyú-gààɔ̀ kɛɛ dyú-màà.

¹⁹ Ké Màháɖà kè Wíɖíhɔ̀bóàùn wóɖóìn ma gàa-dyù ɓě. Waà nyɛ́nɛ́ mɔ̀ Jɛ́dyù kè Sɛ̀máwíɖídyà ɔ kè Záhã̀.

²⁰ Ké Wíɖíhɔ̀bóàùn kpɔ̃ ma nyɔ́nɔ́ɔ̀ sɔ̃́ nììn dyi. Ɔ nyɛ́nɛ́ mɔ̀ ma Máákà. Ɔ mɔ̀ ma Áséɖɔ̀ùnɛ̀ dyú-màà. Ké ɔ kè Wíɖíhɔ̀bóàùn wóɖóìn ma Àbíjà kè Átàì kè Zízà ɔ kè Sɛ̀ɖómìtì.

²¹ Wíɖíhɔ̀bóàùn ɖɛ̀ɓɛ̀ ma Máákà mɔ̀à Áséɖɔ̀ùnɛ̀ dyú-mààɔ̀ kɛɛ mú mìɔ ké ɔ zi ɔ gmàà tɔ̀ɔ̀ kè ɔ gmaɖe-nyɔ̀nɔ̀ ɓěɔ̀ dyí. Nyɔ́nɔ́ jĩ̀ kà ɓɛ́ Wíɖíhɔ̀bóàùn kpɔ̃ ma dyiɛɛ mɔ̀ nyɔ́nɔ́ ɓaɖa-bùè sè mɛ̀nɛ̌ìn-tã kè gmaɖe-nyɔ̀nɔ̀ kpáɖá-nyɔ tã. Ké ɔ wóɖóìn ma gàa-dyù kpáɖá-nyɔ sè mɛ̀nɛ̌ìn-tã kè màa-dyù kpáɖá-nyɔ tã.

²² Ké Wíɖíhɔ̀bóàùn gã ma Àbíjà mɔ̀à Máákàà dyú-gààɔ̀ kɛɛ ɖé ɔ ɖíí-gàà ɓěɔ̀ hwìɛ̀, ɓɛ́ ɔ ké ma ɔ sɔ̃-xwíɖíi-dè-nyɔ̀ jǔ, sepóɛɖé ɔ hwòɖǒ poɛ ma gbɔ, ɓɛ́ ɔ ké ɔ kã́á mú nyu.

²³ Ké Wíɖíhɔ̀bóàùn nyu ma hwòɖǒ-fɔ̀nɔ̀-ɖɛ̀ ɖò ɖekè. Ɔ nyí ma ɔ dyú-gàà ɓěɔ̀ kũ̀à ɓě, ké ɔ toìn ma wa Júɖà-ɓòɖò kè Bɛ̃́címà-ɓòɖòɔ̀ gbɛ̌ɛ̀ ɖò-ɖò séín múin ɖé toún-pèɖèìn-hwɔ̀ɖɔ̀ séín ɓěɔ̀ mú, ké ɔ nyí ma wa ɖɛ ɓáún-ɓáún, ké ɔ mɔ́ ma nyɔ́nɔ́ ɓě ɓó wa bìì.