2 Kánáníkɔ̀ 10 - Ɓǎsɔ́ɔ̀ Báɓòɔ̀

Xwéɖé-dù ɓě nì ɖé xwía kɛɛ po kɛ́ɛ́

¹ Sɔ̀ìn ɓóɛ gboɛɛ, Wíɖíhɔ̀bóàùn mu ma ɖé Sɛ́kɛ̃̀ìn-hwɔ̀ɖɔ̀ɔ̀ mú dɛ̀ ɓɛ́ Éézùɖùɛ̀-nyɔ̀ séín ɓěɔ̀ poìn ma dyí, ɓɛ́ wa ké ma ɔ kã́á mú nyuɛ.

² Ti ɓɛ́ Jɛ́ɖòbóàùn mɔ̀à Nɛ́ɓàà dyú-gàà, ɓɛ́ ɔ kpá ma kà Sã́ɖómà xwaún xwáɖáún, ɓɛ́ ɔ dyi ma kà ɖé Íjè-ɓòɖòɔ̀ kɔ̃ pèɖèìn nyɛɛ wɔ̃́ ma bɔ̃̌ɔ̀ kɛɛ, ɔ kɔ́ìn ma ɖé Éézùɖùɛ̀-ɓòɖòɔ̀ kɔ̃ ɖe.

³ Ké xwéɖé-dù ɓě nìà ɖé Éézùɖùɛ̀-ɓòɖòɔ̀ xwía kɛɛ ɖá ma Jɛ́ɖòbóàùn, ké wa kè ɔ wáɖáìn kɔ̃in, ké wa mu ɖé Wíɖíhɔ̀bóàùn gbo, ké wa cɛ̃ɛ ɔ gbo, ké wa ɖá,

⁴ “M̀ ɓǎ Sã́ɖómà nyìnììn ma à bũ̌in, ké ɔ dè ma à gbɛ̌ ɓě à se xwa ɓɛ́ìn nyɛɛ dú. Ɔ jǔ ké m̀ dyi gbɛ̌ ɓěɛ̀ xwa fɛ̃́ìn ɓó à bìì ní, nìí, à mu m̀ xwíɖíi nììn, ɓɛ́ à ké nì kũ̀à nyu kánáá pū.”

⁵ Ké Wíɖíhɔ̀bóàùn cɛ̃ɛ ma wa gbo, ké ɔ ɖá, “Ɓě mu. Wé tã dyi ziín ɓě ké ḿ gbo ɖe dyi, nìí, ní mu ɓě gɔ̃̌ jǔùn.” Ké nyɔ ɓěɔ̀ mu wa ɓíɖí ɖe.

⁶ Ké Kã́á Wíɖíhɔ̀bóàùn diè ma nyɔ vɛ̀nɛ̀ ɓě ɓɛ́ wa kè ɔ ɓǎ Sã́ɖómà nyu ma kà kũ̀à ti ɓɛ́ Sã́ɖómà nì ma toɖo kɔ̃ keɛɛ dyi, ké ɔ ɖá, “Ɖɛ́ ḿ mɛ jǔìn nyɔ ɓěɛ̀ gɔ̃̌ kɛ́?”

⁷ Ké nyɔ vɛ̀nɛ̀ ɓěɔ̀ jǔ ma ɔ gɔ̃̌, ké wa ɖá, “Ɔ jǔ ké m̀ dyi kpeɖeɛ̀-dyíin-nɔ̀mɔ̀-ɖɛ̀ nyɔ ɓěɛ̀ bũ̌ nyu, ké m̀ dyi wa wuɖuún-wùɖù gbo cɛ̃, ké m̀ dyi waà hwòɖǒ dyi dè ní, wa mu wɔ̃́ùn ɓɛ́ wa ké nì gbo-nì-nyɔ̀ jǔ kánáá pū.”

⁸ Kɛɛ Wíɖíhɔ̀bóàùn pɛ̃́ìn nyɔ vɛ̀nɛ̀ ɓěɔ̀ nììn náún-po-wùɖùɔ̀ dyi, ké ɔ diè gàa-dyù gmɔ̀ ɓě ɓɛ́ ɔ kè wa wóɖó ma dà dyúáɖò ɓíɖíi, ɓɛ́ wa mɔ̀ ma ɔ náún-po-nyɔ̀ ɓěɛɛ dyi.

⁹ Ɔ diè ma wa dyi, ké ɔ ɖá, “Ɖɛ́ ɓě mɔ́ ḿ ké nyuɛ́? Ɖɛ́ ḿ mɛ jǔìn nyɔ ɓě mɔ́ ɓɛ́ ḿ kéà waà gbɛ̌ ɓěɔ̀ xwa fɛ̃́ìn nyɛɛ gɔ̃̌ kɛ́?”

¹⁰ Ké gàa-dyù ɓěɔ̀ jǔ ma ɔ gɔ̃̌, ké wa ɖá, “M̀ mɛ cɛ̃ɛ nyɔ ɓě mɔ́ ɓɛ́ m̀ kéà gbɛ̌ ku xwa ɓě ɓɛ́ m̀ ɓǎ dè ma kà wa dúɛɛ xwa fɛ̃́ìn nyɛɛ gbo, ɓɛ́ m̀ ké níiń, ‘Ní ɖe-gbǎ-jììɔ̀ ɓúá dyí ké ɔ zi ḿ ɓǎà gbe-zèɖèɔ̀ dyí.

¹¹ Ḿ ɓǎ dè ma ɓě gbɛ̌ ku xwa ɓě dú, kɛɛ mɔ́ún mu ɓěɛ̀ gbɛ̌ ɓěɔ̀ xwa kùìn ɖe mìɔ. Ḿ ɓǎ ɓàɖàìn ma ɓě ɓà-cù, kɛɛ mɔ́ún mu ɓě gĩ́á ɓàɖàìn.’ ”

¹² Ti ɓɛ́ wé tã ɖǎ ma ziɛɛ, Jɛ́ɖòbóàùn kè nyɔ séín ɓěɔ̀ dyi ma Kã́á Wíɖíhɔ̀bóàùn gbo ɖe kà ɔ nyuɛ ma kà wa gbo cɛ̃ɛ kɛ.

¹³ Ti wa ɖǎ ma dyiɛɛ, kã́áɔ̀ jǔ ma nyɔ ɓěɔ̀ gɔ̃̌ ɖé gana mú. Ɔ pɛ̃́ìn ma nyɔ vɛ̀nɛ̀ ɓěɔ̀ nììn náún-po-wùɖùɔ̀ dyi,

¹⁴ ké ɔ nyu ma ɖɛ ɓɛ́ gàa-dyù gmɔ̀ ɓěɔ̀ cɛ̃ ma kà ɔ gboɛ. Ɔ cɛ̃ɛ ma nyɔ ɓěɔ̀ gbo, ké ɔ ɖá, “Ḿ ɓǎ dè ma ɓě gbɛ̌ vɛ̀nɛ̀ ɓě dú, kɛɛ mɔ́ún mu ɓěɛ̀ gbɛ̌ ɓěɔ̀ xwa kùìn ɖe mìɔ. Ḿ ɓǎ ɓàɖàìn ma ɓě ɓà-cù, kɛɛ mɔ́ún mu ɓě gĩ́á ɓàɖàìn.”

¹⁵ Ɔ mɔ̀ ma Bounɓoɔ̀ hwòɖǒɛ̀-gbɔ-po-ɖɛ̀, ɓɛ́ ɔ ké ɖɛ ɔ cɛ̃ ma kà Jɛ́ɖòbóàùn mɔ̀à Nɛ́ɓàà dyú-gààɔ̀ kɛɛ gbo dyììn ɖé kpáá-ɖɛ̀-cɛ̃-nyɔ̀ mɔ̀à Àhíjà sɔ̀à ɖé Síɖò-hwɔ̀ɖɔ̀ɔ̀ múɛɛ mú kɛɛ nyu. Ɖɛ nìà kɛ kɔ̃̀ jè kã́áɔ̀ se ma kà nyɔ ɓěɔ̀ wuɖuɔ̀ ɖùǔ gbo tò kɛ̀.

¹⁶ Ti ɓɛ́ nyɔ ɓěɔ̀ dyéɛ ma kà kã́áɔ̀ se ma waà wuɖuɔ̀ ɖùǔ gbo tòɛɛ, púɛɛ, wa páná ma mú, ké wa ɖá, “Ɓěà se pá ɖò ɖé Dèɓé mɔ̀à Jɛséɛ̀ dyú-gààɔ̀ kɛɛ mú ɓéɖé. Éézùɖùɛ̀-nyɔ̀ ɓě, ɓěà mu ɓěà ɓíɖí-taún ɖe. Wíɖíhɔ̀bóàùn mɛ kɔ̃̀ ɔ mìɔùn nììn gbǒ-xwíníínɔ̀ wuɖuí.” Ké Éézùɖùɛ̀-nyɔ̀ séín ɓěɔ̀ mu ma wa ɓíɖí ɖe.

¹⁷ Wa sè ma ɓó Wíɖíhɔ̀bóàùn, ɓɛ́ ɔ ké ma kã́á jǔ ɓó nyɔ ɓě cĩ́ ma ɖé Júɖà-ɓòɖòɔ̀ kɔ̃ɛɛ ɖòùn bìì.

¹⁸ Sɔ̀ìn ɓóɛ gboɛɛ, Wíɖíhɔ̀bóàùn ɖoɓo ma Áɖòníwàɖàùn ɓɛ́ ɔ mɔ̀ ma nyɔ ɓě mɔ̀ pɔ́ɖɔ́sɔ́-kũ̀à-nyu-nyɔ̀ ɓěɛɛ nyɔ vɛ̀nɛ̀ kɛɛ ɖé Éézùɖùɛ̀-nyɔ̀ ɓěɔ̀ gbo. Kɛɛ wa taɓaìn ma ɔ sɔ́ɔ́-kpò dyi, ké ɔ mɛ́ ma. Ti ɓɛ́ ɔ ɖǎ ma ná kpáa, púɛɛ, Wíɖíhɔ̀bóàùn kpá ma ɔ hwíì-sǒɔ̀ mú, ké ɔ kpá ma xwáɖáún, ké ɔ mu ma ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú ɖe.

¹⁹ Sɔ̀ìn ɓó wéa ɓaɖaa, Éézùɖùɛ̀-ɓòɖòɔ̀ wáká hwɔà ɖé xwía dyíɛɛ se ma Dèɓéɛ̀ gbǒ-xwíníínɔ̀ xwíɖíi nìɛ̀ mɔ́ ɖe fɔɔ cá, ké kǎà ɔ nì ke ɓó zɛ̃̌ɛ̀.