1 Kɔ̀ɖéíntĩ̀ɔ̀ 4 - Ɓǎsɔ́ɔ̀ Báɓòɔ̀

Kɛ́ɖɛ́ì nììn àpɔ́sò ɓěɔ̀

¹ Nyɔǔn mɛ ɖáìn à Kɛ́ɖɛ́ì gbo-nì-nyɔ̀ ɓě kè nyɔ ɓě ɓɛ́ Gèɖèpɔ́ɔ̀ ɖǎ ɖɛ ɓě vǐè ma kà kĩ́ín nyɛɛ gbo sèɛ.

² Ɓá ɖɛa kɛɛ dyí ɖeɛɛ, nyɔ ɓě ɓɛ́ wa sè ɖɛ gboɛɛ, wa ɓéɖé wa kéɛ nyɔǔn dyí tɛ̀mɛ̀ìn kà nyɔǔn ɓɛ́ìn wa hwòɖǒ kɔ̃ dèɛ̀ kɛ.

³ Kɛɛ ɔ dyi mɔ́ún jè jǔǐn, ɓě dyi ḿ níǐn zaa wɔ̃ po, mɔɔ tɔ̀ɔ̀-ɓìɔ̀ ɖò dyi ḿ níǐn zaa wɔ̃ po ní, nìí, ɔ se ɖɛ ɖò. Mɔ́ún po ḿ mìɔùn nììn zaa wɔ̃ dyɛ mɔ̀ùn fóɖóún.

⁴ Ní hwòɖǒ se gbà ɓó ɖɛ ɖò jè. Kɛɛ ɔ jè seɛ nyu ɓɛ́ ḿ ké zaaɔ̀ xwaún pó. Bounɓoɔ̀ mɔ̀ ní zaa-wɔ̃-po-nyɔ̀.

⁵ Ɔ jèɛɛ, ɓěǐn ɖá ɓɛ́ ɓě ké zaa ɖò wɔ̃ poɛń fṹà. Ɓě fòìn ɓɛ́ Bounɓoɔ̀ ké dyi, sepóɛɖé ɔ mu ɖɛ ɓě vǐèà ɖé tíe-kpòɔ̀ mú kàǔn wɛ̃ɛ ce dyí dyàùn. Ké ɔ mu ɖɛ ɓě ɓɛ́ nyɔǔn hwòɖǒɔ̀ po gbɔɛɛ píé dyàùn. Nìí, nyɔǔn séín mu wa ɓàìn-ɓàìn ɓɛ́ wa ɓéɖé wa kéɔ́ ɖé Gèɖèpɔ́ɔ̀ gbo dyéɛɛ dyéìn.

⁶ Ní ɖíí ɓě, ɖɛ ɓě ɓɛ́ ḿ ɖǎà cɛ̃ɛ, wa dyi ḿ kè Àpɔ́ɖè gbo ɓó ɓě jè, ɓɛ́ à ké dyí-tɛ̀mɛ̀ìn-ɖɛ̀ jǔ ɓó ɓě gbo, ɓɛ́ ɓě ké wuɖu ɓěa dyi kpɔ̃. Wuɖu ɓěɔ̀ kɛà kɛ̀. Ɓě nyu ɖɛ ɖǎà céèɛɛ ɖòùn pū. Ɔ nì ná, ɓɛ́ ɓě ké se ɓě mìɔùn dyí ɓúáìn ɖé ɓěɛ̀ nyuu-ɖɛ̀ mú, ɓɛ́ ɓě ké se nyɔ ɖò mú ɖɛ̀ɓɛ̀ mìɔ, ɓɛ́ ɔ ké nyɔ ɖò mɔ̀ùn dyí zi.

⁷ Ɖɛ́ nyuɛ ɓɛ́ mɔ̀ùn dyià m̀ mìɔùn dyí ɓúáìn ɖé nyɔ tɔ̀ɔ̀ ɓě mɔ̀ùn hwìɛ̀ kɛ́? Ɖɛ́ m̀ ɓéɖé ɓɛ́ Gèɖèpɔ́ɔ̀ se ma m̀ nyíɛ́? Kɛɛ ɔ jǔ ké m̀ dyiɛ ma dyéín, ɖɛ́ kɔ̃̀ jè m̀ ɓɔ́ɖɔ́à kà ɖɛɔ̀ seɔ́ kà nyíí-ɖɛ̀ kɛ́?

⁸ Ɓě ɖǎ ɖɛ séín ɓě mɔ́ɛɛ dyéɛ hwɔ wà! Ɓě ɖǎ bãa hwɔ. Ɓě ɖǎ nyɔ-wuɖuí-kɔ̃̀-nyɔ̀ ɓě jǔ, ké à mɔ̀ùn se ɖé kpá. Ɖɛ́ kɔ̃̀ jè ɓě seɔ́ wɛ́ɛ nyɔ-wuɖuí-kɔ̃̀-nyɔ̀ ɓě jǔ jɛ́ɛ́ cá, ɓɛ́ à kè ɓě kéɔ́ nyɔ wuɖuí kɔ̃̀ kɛ́?

⁹ Ḿ poɛ̀n hwìɖǐiɛɛ, Gèɖèpɔ́ɔ̀ ɖǎa nyu ké à mɔ̀ àpɔ́sò ɓěɛ̀ kɛɛ se ɖɛ kpa ɖé nyɔǔn séín dyéɖéín. À nì kà nyɔ ɓě ɓɛ́ zaa kpɔ̃à ɓɛ́ wa kéà ɖáɓáa nìà kɛ. Sepóɛɖé à mɔ̀ dyi-dyé-ɖɛ̀ ɓó ɓóɖó-kpà mɔ̀à ínjà ɓěɔ̀ ɔ kè nyɔǔn-dyù ɓěɛɛ bìì.

¹⁰ À mɔ̀ǎ zuɖuu-nyɔ̀ ɓě ɓó Kɛ́ɖɛ́ì jè, kɛɛ ɓě mɔ̀ùn fɔ̀nɔ̀ hwòɖǒ ɖé Kɛ́ɖɛ́ì mú. Kpé hwɛ̀ à dyí, kɛɛ kpé nì ɓě mɔ̀ùn dyí. Wa dyé ɓě mɔ̀ùn kpéín mìɔ, kɛɛ wa zàìn à mɔ̀ùn zùǔn.

¹¹ Mɔ́ kè ní-ná-tò nyu à. À se mú-po-ɖɔ̀ ɖò ɓéɖé. Ké nyɔ ɓě nì à ɓaɖauń. À se kò-naín ɖò ɓéɖé.

¹² À sàìn à mìɔùn ɖé kũ̀à-nyu-nyu mú. Wa ɖaɓa à wuɖu, kɛɛ à mɔ̀ùn po wa mana kɔ̃. Wa dyéìn à gǎ, kɛɛ à mɔ̀ùn ku hwòɖǒ.

¹³ Wa cɛ̃ à ɖɛ gbà kɔ̃ún, kɛɛ à mɔ̀ùn cɛ̃ wa wuɖu ɓɛ̀ɖɛ̀ɛ̀-ɓɛ̀ɖɛ̀ɛ̀ gbo. Wa nyu à kà wa nyuà ɓóɖó-kpàà sĩ̀ɔ̌ ɓě kɛ. À nì kà kúò ɓɛ́ wa wáɖáà sĩ̀ɔ̌ séín kɔ̃ɛɛ nìà kɛ. Kà ɖɛ ɓěa nì ma kĩ́ín, ké kǎà wa nìǎ ke kàǔn wɛ̃̀.

¹⁴ Ḿ se ɖɛ ɓěɛ̀ céè, ɓɛ́ ḿ ké ɓě dɛ̃ nyùìn, kɛɛ ɔ mɔ̀ ɓɛ́ ḿ ké ɓě náún po, sepóɛɖé ɓě mɔ̀ ní ɖɛ̀ɓɛ̀-dyù ɓě.

¹⁵ Ɓě ɓɛ́ìn dyí-gmɔ̀-nyɔ̀ pàɖǎ ɓéɖéɛ ɖé Kɛ́ɖɛ́ì mú, ɓɛ́ wa ké se dyí gbɛ̌ìn ɓɛ́ìn, kɛɛ ɓě ɓéɖé ɓǎ dyúáɖò. Ḿ wóɖóìn ma ɓě ɖé Kɛ́ɖɛ́ì Jízɛ̀ mú, dyììn ɖé bɔ̃̌ nɔ̀mɔ̀ dyíinɔ̀ cɛ̃-cɛ̃ mú.

¹⁶ Ɔ jèɛɛ, ní ɓaà ɓě ní, ɓě mɛ dyéìn ḿ ɖé ɖɛ séín ɓě ɓɛ́ ḿ ɖǎà nyuɛɛ mú.

¹⁷ Ɖɛa kɔ̃̀ jè, ḿ nìà Tímétè mɔ̀à ní ɖɛ̀ɓɛ̀-dyù ɖé Bounɓoɔ̀ múɛɛ ɖé ɓě gbo tòɛ̌n nyɛ̀. Ɔ mɔ̀ hwòɖǒ-kɔ̃-dè-nyɔ̀. Ɔ mu ɖɛ ɓě ɓɛ́ ḿ nyu ɖé Kɛ́ɖɛ́ì múɛɛ jè ɓě hwìɖǐi dyàùn. Ɖɛ ɓě nìà kɛɛ, ɖéɛ̀ ní tɛ̀mɛ̀ìn cɔ́cì-nyɔ̀ ɓě nì dà séín ɓěɛ.

¹⁸ Ɓě ɖíɛ́ ɓě ɓúáìn ɓě mìɔùn dyí, sepóɛɖé ɓě poìn hwìɖǐi kà ḿ se ɖé ɓě gbo dyiɛń nìɛ.

¹⁹ Kɛɛ Bounɓoɔ̀ dyi wɔ̃́ín, ní mu ɖé ɓě gbo dyiɛń fṹàùn. Ḿ dyié dyiín, nìí, ní mu kpé ɓɛ́ nyɔ ɓě ɓúáìn wa mìɔùn dyíɛɛ ɓéɖéà kɛɛ dyéìn. Ḿ se wa wuɖu dyi mɔ́ɔ mu ɖòùn pū.

²⁰ Sepóɛɖé Gèɖèpɔ́ɔ̀ kã́á-ɓòɖòɔ̀ se wĩín-wùɖù, kɛɛ ɔ mɔ̀ kpé.

²¹ Ɖɛ́ ɓě mɔ́ɛ́? Ḿ mɛ dyié kà nyɔ kéà nyɔ ɓaɖa kɛɛ̀, mɔɔ ḿ mɛ dyié pɛ̀ɛ̀-pɛ̀ɛ̀-kà kè ɖé nyɔ-mú-ɖɛ̀ɓɛ̀-ɖɛ̀ɓɛ̀ múù?