1 Kánáníkɔ̀ 7 - Ɓǎsɔ́ɔ̀ Báɓòɔ̀

Ɛ́sàkà nììn xwíníín-dyù ɓě

¹ Ɛ́sàkà wóɖóìn ma gàa-dyù hĩinyɛ. Wa mɔ̀ Tóɖà kè Púà kè Jásù ɔ kè Sĩ́wɔ̀nɔ̀.

² Ké Tóɖà wóɖóìn ma Dyúzì kè Wɛ̀ɖɛ̀fádyà kè Jɛ́wìɖìò kè Jámàì kè Ísàùn ɔ kè Sámíò. Wa mɔ̀ ma waà gbǒ-xwíníín ɓěɔ̀ nyɔ vɛ̀nɛ̀, ké wa mɔ̀ ma gàa-zà-nyɔ̀ ɓě. Ti ɓɛ́ Dèɓé mɔ̀ ma kã́á kɛɛ, waà xwíníín-dyù ɓěɔ̀ mɔ̀ ma nyɔ-kpò táázĩ̀ìn kpáɖá-nyɔ sè sɔ̃́ kè hɔ̃dɛ̀ɖɛ̀ mɛ̀nɛ̌ìn-ɖò.

³ Ké Dyúzì wóɖóìn ma Ízàɖàhíà. Ké Ízàɖàhíà wóɖóìn ma Makɔ́ kè Òbòdádyà kè Jóɛ̀ ɔ kè Ìsíà. Dyúzìɛ̀ xwíníín-dyù hm̀m̌ ɓěɔ̀ mɔ̀ ma waà gbǒ-xwíníín ɓěɔ̀ nyɔ vɛ̀nɛ̀.

⁴ Gàa táázĩ̀ìn kpáɖá-nyɔ ɓaɖa-bùè sè mɛ̀nɛ̌ìn-ɖò ɓɛ́ìn to vɔ̃ɔ kɛɛ sɔ̀ ma waà gbǒ-xwíníín ɓěɔ̀ mú, sepóɛɖé wa ɓéɖé ma nyɔ́nɔ́ kúɖúú, ké wa wóɖóìn ma gàa-dyù kúɖúú.

⁵ Gàa-zà-nyɔ̀ jĩ̀ kà ɓɛ́ wa sɔ̀ ma ɖé Ɛ́sàkà nììn xwéɖé-dùɔ̀ mú, ɓɛ́ wa ɓɛ́ìn to vɔ̃ɔ, ké waà nyɛ́nɛ́ céè ma céè-ɖɛ̀ ɖò múɛɛ mɔ̀ ma nyɔ-kpò táázĩ̀ìn kpáɖá-nyɔ hĩinyɛ sè mɛ̀nɛ̌ìn-sɔ̃́.

Bɛ̃́címà kè Dɛ̃́ìn nììn xwíníín-dyù ɓě

⁶ Bɛ̃́címà wóɖóìn ma gàa-dyù tã. Wa mɔ̀ Bɛ́ɖà kè Bɛ́kɛ̀ ɔ kè Jɛ̀ɖíàè.

⁷ Ké Bɛ́ɖà wóɖóìn ma Ɛ́ɓɔ̀ùn kè Dyúzì kè Dyùzíè kè Jɛ̀wíɖímɔ̀ ɔ kè Íwìɖì. Wa mɔ̀ ma gàa-zà-nyɔ̀ hm̀m̌ ɓɛ́ wa mɔ̀ waà gbǒ-xwíníín ɓěɔ̀ nyɔ vɛ̀nɛ̀ kɛ. Waà nyɔ jĩ̀ kà kɔ̃̀ nyɛ́nɛ́ céè ma céè-ɖɛ̀ɔ̀ múɛɛ mɔ̀ ma gàa táázĩ̀ìn kpáɖá-nyɔ sè sɔ̃́ kè kpáɖá-nyɔ ɓaɖa-bùè sè hĩinyɛ.

⁸ Ké Bɛ́kɛ̀ wóɖóìn ma Zɛ̀míwàɖà kè Jóàsì kè Ɛ̀ɖìɛ́zɛ̀ kè Ɛ́dyòénàì kè Ɔ̃́wìɖì kè Jɛ̀wéɖémɔ̀ kè Àbíjà kè Ànáfò ɔ kè Àɖɛ́mɛ̀. Nyɔ séín ɓěɛ̀ mɔ̀ ma Bɛ́kɛ̀ɛ̀ dyú-gàà ɓěɔ̀.

⁹ Nyɔ jĩ̀ kà sɔ̀ ma ɖé Bɛ́kɛ̀ɛ̀ gbǒ-xwíníín ɓěɔ̀ mú, kɔ̃̀ nyɛ́nɛ́ céè ma céè-ɖɛ̀ɔ̀ múɛɛ mɔ̀ ma gàa-zà-nyɔ̀ táázĩ̀ìn kpáɖá-nyɔ kè hɔ̃dɛ̀ɖɛ̀ sɔ̃́ kè waà gbǒ-xwíníín ɓěɔ̀ nyɔ vɛ̀nɛ̀ ɓě.

¹⁰ Ké Jɛ̀ɖíàè wóɖóìn ma Bíóhã̀. Ké Bíóhã̀ wóɖóìn ma Jɛ́dyù kè Bɛ̃́címà kè Éhù kè Kènáánà kè Zéfàùn kè Tásìà ɔ kè Àhìsáhà.

¹¹ Nyɔ séín ɓěɛ̀ mɔ̀ ma Jɛ̀ɖíàèɛ̀ xwíníín-dyù ɓěɔ̀. Wa mɔ̀ ma waà gbǒ-xwíníín ɓěɔ̀ nyɔ vɛ̀nɛ̀, ké wa mɔ̀ ma gàa-zà-nyɔ̀ ɓě. Waà xwíníín-dyù ɓěɔ̀ mɔ̀ ma nyɔ-kpò táázĩ̀ìn ɓaɖa-bùè sè mɛ̀nɛ̌ìn-sɔ̃́ kè hɔ̃dɛ̀ɖɛ̀ sɔ̃́, ɓɛ́ wa ɓɛ́ìn ma to vɔ̃ɔ kɛ.

¹² Ííwìɖì ɓɛ́ ɔ mɔ̀ ma Jɛ̀ɖíàèɛ̀ xwíníín-dyù ɓěɔ̀ ɖòɛɛ wóɖóìn ma Súpììn kè Húpììn. Dɛ̃́ìn wóɖóìn ma gàa-dyù dyúáɖò. Ɔ nyɛ́nɛ́ mɔ̀ ma Húsììn.

Náfátàɖì nììn xwíníín-dyù ɓě

¹³ Náfátàɖì kɔ̃̀ ɖe mɔ̀à Bíóhà kɛɛ wóɖóìn ma Jàzíè kè Gúnì kè Jézɛ̀ ɔ kè Sáɖùùn.

Mànásì nììn xwíníín-dyù ɓě

¹⁴ Mànásì kè ɔ gmaɖe-nyɔ̀nɔ̀ mɔ̀ Áwàɖàùn-màà ɖò kɛɛ wóɖóìn ma Àsíɖíè kè Mákì. Mákì mɔ̀ ma Gíɖèà ɓǎ.

¹⁵ Ké Mákì mɔ́ ma nyɔ́nɔ́ ɓó Húpììn kè Súpììn bìì. Mákìɛ̀ ɖíí-màà nyɛ́nɛ́ mɔ̀ ma Máákà. Ké Mákìɛ̀ xwíníín-dyù ɓěɔ̀ ɖò mɔ̀ ma Zɛ̀ɖàfɛ́hà. Zɛ̀ɖàfɛ́hà mɔ̀ùn se ma gàa-dyù ɖò wóɖóìn, kɛɛ ɔ wóɖóìn ma màa-dyù saá-saá.

¹⁶ Mákìɛ̀ gmàà kɔ̃̀ nyɛ́nɛ́ mɔ̀ Máákà kɛɛ wóɖóìn ma gàa-dyù sɔ̃́. Ɖòɛ̀ nyɛ́nɛ́ mɔ̀ Pɛ́wɛ̀ɖɛ̀sì, ké nyɔ tɔ̀ɔ̀ nyɛ́nɛ́ mɔ̀ Sɛ́wɛ̀ɖɛ̀sì. Ké Pɛ́wɛ̀ɖɛ̀sì wóɖóìn ma Dyúɖàùn kè Wáɖákɛ̃̀ìn.

¹⁷ Ké Dyúɖàùn wóɖóìn ma Bɛ́ɖàùn. Nyɔ séín ɓěɛ̀ mɔ̀ ma Gíɖèà mɔ̀à Mànásìɛ̀ nyíɔ́-dyù kɔ̃̀ ɓǎ mɔ̀à Mákì kɛɛ gbǒ-xwíníín-nyɔ̀ ɓě.

¹⁸ Gíɖèàà ɖíí-màà kɔ̃̀ nyɛ́nɛ́ mɔ̀ Hàmóɖɛ̀kɛ̀ kɛɛ wóɖóìn ma Íhò kè Áɓìɛ́zɛ̀ ɔ kè Máhàɖà.

¹⁹ Sɛ̀míɖà ɓɛ́ ɔ mɔ̀ ma Mànásìɛ̀ gbǒ-xwíníín-nyɔ̀ ɓěɔ̀ ɖòɛɛ wóɖóìn ma Àhíɔ̀ùn kè Sɛ́kɛ̃̀ìn kè Díhì ɔ kè Àníàùn.

Ífèɖèìn nììn xwíníín-dyù ɓě

²⁰ Ífèɖèìn nììn xwíníín-dyù deìn dúún ɓěɔ̀ kɛà kɛ̀. Ífèɖèìn wóɖóìn ma Sùfɛ́ɖà, ké Sùfɛ́ɖà wóɖóìn ma Báwɛ̀ɖɛ̀, ké Báwɛ̀ɖɛ̀ wóɖóìn ma Táhàfì, ké Táhàfì wóɖóìn ma Ɛ̀ɖɛ̀áɖà, ké Ɛ̀ɖɛ̀áɖà wóɖóìn ma Táhàfì ɖò ɖe,

²¹ ké Táhàfì wóɖóìn ma Záɓà, ké Záɓà wóɖóìn ma Sùfɛ́ɖà ɖò ɖe. Ífèɖèìn wóɖóìn ma gàa-dyù sɔ̃́ ɖò ɖe. Waà nyɛ́nɛ́ mɔ̀ Ézɛ̀ kè Ɛ̀ɖɛ́à. Ézɛ̀ kè Ɛ̀ɖɛ́à mu ma Gáà-hwɔ̀ɖɔ̀ɔ̀ nyɔ ɓěɔ̀ nyúà-ɖɛ̀ dyíɖíìn, ké hwɔɖɔɔ̀ gàa ɓěɔ̀ ɖáɓá ma wa.

²² Ké Ífèɖèìn mɔ̀à wa ɓǎɔ̀ kɛɛ vĩ̌ ma ɓó wa jè, ɓó wé ɓáún-ɓáún xwíníín. Ké ɔ ɖíí-gàà ɓěɔ̀ dyi ma ɔ hwòɖǒ dyi dèìn.

²³ Ké sɔ̀ìn ɓóɛ gboɛɛ, Ífèɖèìn kè ɔ gmààɔ̀ nì ma ɓó da, ké ɔ gmààɔ̀ nì ma zùù kɔ̃, ké ɔ wóɖóìn ma gàa-dyù ɖò. Ké Ífèɖèìn jǔìn ma ɔ Bɛ̀wíɖíà-nyɛ̀nɛ̀ ɓó fũ̀à-fṹá ɖǎ ma kà ɔ taàɔ̀ mú dyiɛɛ jè.

²⁴ Ífèɖèìn ɓéɖé ma dyú-màà ɖò. Ɔ nyɛ́nɛ́ mɔ̀ ma Sɛ́ɛ́wàɖà. Ɔ mɔ̀ nyɔ po ma Bɛ̀-Hówɔ̀nɔ̀-hwɔ̀ɖɔ̀ɔ̀ wáká nì ɖé ɓíɖíiɛ kè wáká nì ɖé xwía kɛ. Ké ɔ mɔ̀ nyɔ po ma Dyúzɛ̀ìn-Sɛ́ɛ́wàɖà-hwɔ̀ɖɔ̀ɔ̀ ɖekè.

²⁵ Ké ɓó kɔ̃in ɖeɛɛ, Ífèɖèìn wóɖóìn ma Wéɖéfà, ké Wéɖéfà wóɖóìn ma Wɛ́ɖɛ́sɛ̀, ké Wɛ́ɖɛ́sɛ̀ wóɖóìn ma Téɖà, ké Téɖà wóɖóìn ma Táhàùn,

²⁶ ké Táhàùn wóɖóìn ma Ɖáɖàùn, ké Ɖáɖàùn wóɖóìn ma Àmíhù, ké Àmíhù wóɖóìn ma Ɛ̀ɖìsámà,

²⁷ ké Ɛ̀ɖìsámà wóɖóìn ma Núùn, ké Núùn wóɖóìn ma Jasúé.

²⁸ Hwɔɖɔ ɓě ɓɛ́ Ífèɖèìn nììn xwíníín-dyù ɓěɔ̀ ɖú ma dyí, ɓɛ́ wa dyi ma ɖé wa mú cĩ́ɛɛ kɛà kɛ̀. Wa mɔ̀ Bɛ́fèò-hwɔ̀ɖɔ̀ɔ̀ kè hwɔɖɔ-kpàǎ ɓě nìɛ̀ ɖeiɛ kè Nááwàɖàùn-hwɔ̀ɖɔ̀ nì ma ɖé Bɛ́fèò-hwɔ̀ɖɔ̀ɔ̀ dyóɖó-xwáɖáún-wóɖóìn-naín nyɛ kè Gézɛ̀-hwɔ̀ɖɔ̀ nì ma ɖé Bɛ́fèò-hwɔ̀ɖɔ̀ɔ̀ dyóɖó-dyi-kpáìn-naín nyɛ kè ɔ nììn hwɔɖɔ-kpàǎ ɓě nìɛ̀ ɖeiɛ kè Sɛ́kɛ̃̀ìn-hwɔ̀ɖɔ̀ɔ̀ kè ɔ nììn hwɔɖɔ-kpàǎ ɓě nìɛ̀ ɖeiɛ ɔ kè Ádyà-hwɔ̀ɖɔ̀ɔ̀ kè ɔ nììn hwɔɖɔ-kpàǎ ɓě nìɛ̀ ɖeiɛ.

²⁹ Ké Mànásì nììn xwíníín-dyù ɓěɔ̀ kɔ̃̀ ma Bɛ́sàùn-hwɔ̀ɖɔ̀ɔ̀ kè hwɔɖɔ-kpàǎ ɓě nìɛ̀ ɖeiɛ kè Táánà-hwɔ̀ɖɔ̀ɔ̀ kè hwɔɖɔ-kpàǎ ɓě nìɛ̀ ɖeiɛ kè Mɛ̀gíɖò-hwɔ̀ɖɔ̀ɔ̀ kè hwɔɖɔ-kpàǎ ɓě nìɛ̀ ɖeiɛ ɔ kè Dóɔ̀-hwɔ̀ɖɔ̀ɔ̀ kè hwɔɖɔ-kpàǎ ɓě nìɛ̀ ɖeiɛ. Jòsé mɔ̀à Jékɔ̀ɛ̀ dyú-gààɔ̀ kɛɛ nììn xwíníín-dyù ɓěɛ̀ cĩ́ ma ɖé hwɔɖɔ ɓěa mú.

Ásè nììn xwíníín-dyù ɓě

³⁰ Ásè wóɖóìn ma Ímànà kè Ívà kè Ívì kè Bɛ̀wíɖíà ɔ kè waà ɖíí-màà Sɛ́wàɖà.

³¹ Ké Bɛ̀wíɖíà wóɖóìn ma Hɛ́ɓɛ̀ kè Mààkíè. Mààkíè mɔ̀ nyɔ wóɖóìn ma Bízàì.

³² Ké Hɛ́ɓɛ̀ wóɖóìn ma Jáfèɖè kè Sómɔ̀ kè Hófàùn ɔ kè waà ɖíí-màà Súà.

³³ Ké Jáfèɖè wóɖóìn ma Pásà kè Bĩ́hàò ɔ kè Ásívà. Nyɔ ɓěɛ̀ mɔ̀ ma Jáfèɖèɛ̀ dyú-gàà ɓěɔ̀.

³⁴ Ké Sómɔ̀ mɔ̀à Jáfèɖèɛ̀ ɖíí-gààɔ̀ kɛɛ wóɖóìn ma Wóɖógà kè Jɛ̀húɓà ɔ kè Áwàɖàùn.

³⁵ Ké Hófàùn mɔ̀à Jáfèɖèɛ̀ ɖíí-gààɔ̀ ɖò ɖeɛɛ wóɖóìn ma Zófàà kè Ĩ́nà kè Séɖɛ̀sì ɔ kè Ámàò.

³⁶ Ké Zófàà wóɖóìn ma Súàhì kè Hánɛ̀fɛ̀ kè Súwàò kè Béwìɖì kè Ĩ́mànà

³⁷ kè Bɛ́zɔ̀ kè Hóɖì kè Sáámà kè Síósà kè Ífànà ɔ kè Bééwàɖà.

³⁸ Jɛ́tɛ̀ɖɛ̀ wóɖóìn ma Jɛ̀fúnɛ̀ kè Pípà ɔ kè Áwàɖà.

³⁹ Dyúɖà wóɖóìn ma Áwàɖàà kè Hánìè ɔ kè Wíɖízìà.

⁴⁰ Nyɔ séín ɓěɛ̀ mɔ̀ ma Ásèɛ̀ xwíníín-dyù ɓěɔ̀. Wa mɔ̀ ma waà gbǒ-xwíníín ɓěɔ̀ nyɔ vɛ̀nɛ̀, ké wa mɔ̀ ma gàa-zà-nyɔ̀ ɓě. Wa mɔ̀ ma nyɔ-wuɖuí-kɔ̃̀-nyɔ̀ kpa ɖɛ ɓě. Waà nyɔ jĩ̀ kà po ma nyɛ́nɛ́ ɓíɖíi ɓó to vɔ̃ jèɛɛ mɔ̀ ma gàa táázĩ̀ìn kpáɖá-nyɔ sè mɛ̀nɛ̌ìn-ɖò.