1 Kánáníkɔ̀ 5 - Ɓǎsɔ́ɔ̀ Báɓòɔ̀

Wuɖuɓíín nììn xwíníín-dyù ɓě

¹ Wuɖuɓíín ɓɛ́ ɔ mɔ̀à Jékɔ̀ɛ̀ nyíɔ́-dyùɔ̀ kɛɛ ɓéɖé ma dyú-gàà ɓě. Wuɖuɓíín mɔ̀ ma nyíɔ́-dyùɔ̀ dyɛo, kɛɛ Jékɔ̀ zà ma dúí-sè-ɖɛ̀ Wuɖuɓíín kɔ̃̀ ɔ kéɔ́ má dyé ɓó ɔ nyíɔ́-dyùɔ̀ jǔ jèɛɛ ɔ xwa, ké ɔ nyíɛ ma Jòsé mɔ̀à ɔ dyú-gàà ɓěɔ̀ ɖòɛɛ nììn xwíníín-dyù ɓě, sepóɛɖé Wuɖuɓíín dyá ma ɔ ɓǎà gmàà gbo gbǒǔn. Ké wa se ma ɔ nyɛ́nɛ́ ɓíɖíi céè kà nyíɔ́-dyù nìà kɛ.

² Júɖà nììn xwéɖé-dùɔ̀ ku ma dyi ké ɔ zi ma xwéɖé-dù tɔ̀ɔ̀ ɓěɔ̀ dyí, ké ɓóɖó-nàìn-nyɔ̀ sɔ̀ ma ɔ mú dyɛo, kɛɛ ɔ mɔ̀ nyɔ se ma dúí-sè-ɖɛ̀ ɓɛ́ nyíɔ́-dyù kéɔ́ má dyéɛɛ kpa. Nyɔ mɔ̀ nyɔ kpa ma dúí-sè-ɖɛ̀ɔ̀ kɛɛ mɔ̀ ma Jòsé.

³ Wuɖuɓíín nììn dyú-gàà ɓěɔ̀ mɔ̀ Hánɔ̀ kè Páɖù kè Hɛ́wɔ̀ɖɔ̀ùn ɔ kè Kámì.

⁴ Wuɖuɓíín nììn xwíníín-dyù mɔ̀ ma Jóɛ̀ kɛɛ wóɖóìn ma Sɛ̀mádyà, ké Sɛ̀mádyà wóɖóìn ma Gógì, ké Gógì wóɖóìn ma Símì,

⁵ ké Símì wóɖóìn ma Mákà, ké Mákà wóɖóìn ma Wɛ̀ɖɛ̀ɖádyà, ké Wɛ̀ɖɛ̀ɖádyà wóɖóìn ma Béò,

⁶ ké Béò wóɖóìn ma Bééwàɖàà. Bééwàɖàà mɔ̀ ma Tígàɖà-Pìɖɛ́sɛ̀ ɓɛ́ ɔ mɔ̀à Àsíwíɖíà-kã̀ǎɔ̀ kɛɛ toɛ̀-kpɔ̃-nyɔ̀. Ɔ mɔ̀ ma Wuɖuɓíín nììn xwéɖé-dùɔ̀ nyɔ vɛ̀nɛ̀.

⁷ Jóɛ̀ɛ̀ gbǒ-xwíníín-nyɔ̀ ɖíɛ́ ɓě kɔ̃̀ nyɛ́nɛ́ céè ma ɖé céè-ɖɛ̀ ɖò múɛɛ mɔ̀ Jɛ̀dyíò ɓɛ́ ɔ mɔ̀ ma Jóɛ̀ɛ̀ gbǒ-xwíníínɔ̀ nyɔ vɛ̀nɛ̀ kɛ kè Zɛ́kɔ̀wáɖádyà

⁸ ɔ kè Bɛ́ɖà. Bɛ́ɖà ɓǎ nììn ɓǎ ɓěɔ̀ kɛà kɛ̀. Jóɛ̀ wóɖóìn ma Sɛ́mà, ké Sɛ́mà wóɖóìn ma Ázà, hwɛ̀ ké Ázà wóɖóìn ma kà Bɛ́ɖà kɛ̀. Wa cĩ́ ma ɖé Àwóɖóè-hwɔ̀ɖɔ̀ɔ̀ kè Néɓò-hwɔ̀ɖɔ̀ɔ̀ kè Béò-Mɛ́ɔ̀ùn-hwɔ̀ɖɔ̀ɔ̀ ɔ kè hwɔɖɔ ɓě nì ma wa pṹa wɛ̃ɛ mú.

⁹ Ké wa ɖíɛ́ ɓě cĩ́ ma ɖé Gíɖèà-ɓòɖòɔ̀ dyóɖó-xwáɖáún-wóɖóìn-naínɔ̀, hwɔ ɖé gbǎùn-fúɖúá nìà ɖé Dyùféɖétì-nìɔ̀ wĩín nyɛɛ gbo dyí, sepóɛɖé waà nyúà-ɖɛ̀ ɓěɔ̀ vò dyí mìɔ ɖé Gíɖèà-ɓòɖòɔ̀ kɔ̃ jè.

¹⁰ Ti ɓɛ́ Sɔ́ɔ̀ mɔ̀ ma kã́á kɛɛ, Wuɖuɓíín nììn xwéɖé-dùɔ̀ kpa ma Hégà-nyɔ̀ ɓěɔ̀ to kɔ̃, ké Hégà-nyɔ̀ ɓěɔ̀ kpá ma wa xwaún dyi, ké wa ɖú ma waà ɓóɖó gàná nì ma ɖé Gíɖèà-ɓòɖòɔ̀ dyóɖó-xwáɖáún-wóɖóìn-naínɔ̀ kɛɛ dyí.

Gáà nììn xwíníín-dyù ɓě

¹¹ Gáà nììn xwéɖé-dùɔ̀ nyɔ ɓěɔ̀ cĩ́ ma hwɔ ɖé dɛ̀ ɓɛ́ Wuɖuɓíín nììn xwéɖé-dùɔ̀ cĩ́à kɛɛ xwía dyí, ɖé Básàùn-ɓòɖòɔ̀ kɔ̃, ké waà ɓóɖóɔ̀ mu tee ké ɔ dyɛ̀ìn ma Sàɖékà-hwɔ̀ɖɔ̀ɔ̀.

¹² Gáà nììn xwéɖé-dùɔ̀ nyɔ vɛ̀nɛ̀ ɖíɛ́ ɓě nì ma ɖé Básàùn-ɓòɖòɔ̀ kɔ̃ɛɛ mɔ̀ ma Jóɛ̀ kè Sáfɔ̀ùn kè Jáánàì ɔ kè Sáfà.

¹³ Waà gbǒ-xwíníín-nyɔ̀ ɓěɔ̀ mɛ̀nɛ̌ìn-sɔ̃́ mɔ̀ ma Makɔ́ kè Mɛ̀súɖàùn kè Síɓà kè Jówàɖàì kè Jákàìn kè Zíà ɔ kè Éɓɛ̀.

¹⁴ Wa mɔ̀ ma Áɓìháìɛ̀ xwíníín-dyù ɓě. Áɓìháì ɓǎ nììn ɓǎ ɓěɔ̀ kɛà kɛ̀. Búzè wóɖóìn ma Jáɖò, ké Jáɖò wóɖóìn ma Jɛ̀sísàì, ké Jɛ̀sísàì wóɖóìn ma Makɔ́, ké Makɔ́ wóɖóìn ma Gíɖèà, ké Gíɖèà wóɖóìn ma Jàwóɖóà, ké Jàwóɖóà wóɖóìn ma Húwìɖì, hwɛ̀ ké Húwìɖì wóɖóìn ma kà Áɓìháì kɛ̀.

¹⁵ Áhì ɓɛ́ ɔ mɔ̀ ma Gúnìɛ̀ nyúà-dyú kɔ̃̀ ɓǎ mɔ̀ ma Áɖìè kɛɛ mɔ̀ ma waà gbǒ-xwíníín ɓěɔ̀ nyɔ vɛ̀nɛ̀.

¹⁶ Ké wa cĩ́ ma ɖé hwɔɖɔ ɓě nì ma ɖé Gíɖèà-ɓòɖòɔ̀ kè Básàùn-ɓòɖòɔ̀ kɔ̃ɛɛ mú, ɔ kè ɖé nyúà-ɖɛ̀ dyi-ɖi-naín séín ɓě nì ma ɖé Sáwɔ̀ɖɔ̀ùn-ɓòɖòɔ̀ kɔ̃ɛɛ mú.

¹⁷ Nyɔ séín ɓěɛ̀ po ma nyɛ́nɛ́ ɓíɖíi dyììn ɖé kà waà gbǒ-xwíníín ɓěɔ̀ nyu ɖeín dyi deɛ̀n nyɛɛ mú, ɓó ti kɔ̃̀ ɓaɖa ɓɛ́ Jótàùn mɔ̀ ma Júɖà-ɓòɖòɔ̀ kã́á, ké Jɛ́ɖòbóàùn mɔ̀ ma Éézùɖùɛ̀-ɓòɖòɔ̀ kã́á kɛ.

Xwéɖé-dù ɓě nì ɖé dyóɖó-xwáɖáún-wóɖóìn-naínɔ̀ kɛɛ nììn sójà ɓě

¹⁸ Wuɖuɓíín nììn xwéɖé-dùɔ̀ kè Gáà nììn xwéɖé-dùɔ̀ ɔ kè Mànásì nììn xwéɖé-dù fáún-fáúnɔ̀ ɓéɖé ma gàa-zà-nyɔ̀ ɓě ɓɛ́ wa dyuò ma dyí-zĩ̀ìn-ɖɛ̀ ɓě kè gàsíà ɓě ɔ kè pɔnɔ ɓě toún vɔ̃̀ìn nyɛ. Wa mɔ̀ ma nyɔ-kpò táázĩ̀ìn kpáɖá-nyɔ sɔ̃́ sè hĩinyɛ kè hɔ̃dɛ̀ɖɛ̀ mɛ̀nɛ̌ìn-sɔ̃́ kè kpáɖá-nyɔ tã.

¹⁹ Ké wa kpa ma Hégà-nyɔ̀ ɓěɔ̀ kè Jɛ́tù-nyɔ̀ ɓěɔ̀ kè Náfì-nyɔ̀ ɓěɔ̀ ɔ kè Nóɖà-nyɔ̀ ɓěɔ̀ to kɔ̃.

²⁰ Ké wa taɓa ma Gèɖèpɔ́ɔ̀ hwìɖǐǐ jèɛɛ, wa ɓaà ma ɔ, ɓɛ́ ɔ ké ma wa gbo kpá. Ké Gèɖèpɔ́ɔ̀ jǔ ma waà ɓaà-wùɖùɔ̀ gɔ̃̌, ké ɔ nyuɛ ké waà sɔ̃ nì ma ɖé Hégà-nyɔ̀ ɓěɔ̀ kè nyɔ ɓě nì ma wa gbo kpáuń wɛ̃ɛ kɔ̃in.

²¹ Ké wa kpa ma waà mú-nyɛ́-nyɔ̀ ɓěɔ̀ nyúà-ɖɛ̀ kúɖúú. Wa kpa ma waà sǒ-nì-gbu-kɔ̃ún táázĩ̀ìn kpáɖá-nyɔ sɔ̃́ ɓaɖa-bùè kè ɓáɖáá táázĩ̀ìn hɔ̃dɛ̀ɖɛ̀ sɔ̃́ kè táázĩ̀ìn kpáɖá-nyɔ sɔ̃́ ɓaɖa-bùè kè jǎkasì táázĩ̀ìn sɔ̃́ ɔ kè mú-nyɛ́-nyɔ̀ ɓěɔ̀ nyɔ-kpò táázĩ̀ìn hɔ̃dɛ̀ɖɛ̀ ɖò ɓɛ́ wa se ɖáɓá kɛ.

²² Wa ɖáɓá ma waà mú-nyɛ́-nyɔ̀ ɓěɔ̀ ɓáún-ɓáún, sepóɛɖé Gèɖèpɔ́ɔ̀ mɔ̀ nyɔ ɓéɖé ma toɔ̀ ɖu-ɖu kpé gbo jè. Ké wa gã̀ ma ɖé ɓóɖóɔ̀ kɔ̃ cĩ́ɛń dyi tee ké ɔ dyɛ̀ìn ma wa nììn toɛ̀-kpɔ̃-nyɔ̀ mú-nyu-tìɔ̀.

Mànásì nììn xwéɖé-dùɔ̀ fáún-fáún hwɔà ɖé dyóɖó-xwáɖáún-wóɖóìn-naínɔ̀ dyíɛ

²³ Mànásì nììn xwéɖé-dùɔ̀ fáún-fáún cĩ́ ma ɖé ɓóɖó ɓɛ́ ɔ sɔ̀ìn ma ɖé Básàùn-ɓòɖòɔ̀ kɔ̃, ɓɛ́ ɔ nyini ma ɖé Béò-Hɛ́mɔ̀-tòɖòɔ̀ kè Sɛ́nì-tòɖòɔ̀ ɔ kè Hɛ́mɔ̀-tòɖòɔ̀ gboɛɛ kɔ̃, sepóɛɖé wa zi ma dyí vòɛ̌n mìɔ.

²⁴ Waà gbǒ-xwíníín ɓěɔ̀ nyɔ vɛ̀nɛ̀ ɓě mɔ̀ ma Éfɛ̀ kè Ísì kè Ɛ́ɖìè kè Àzíɖíè kè Jɛ̀ɖèmádyà kè Hòɖàvíà ɔ kè Jáɖìè. Wa mɔ̀ ma gàa-zà-nyɔ̀ ɓě kɔ̃̀ nyɛ́nɛ́ muɛ, ké wa kɔ̃̀ ma waà gbǒ-xwíníín ɓěɔ̀ wuɖuí.

Wa zà xwéɖé-dù ɓě nìà ɖé dyóɖó-xwáɖáún-wóɖóìn-naínɔ̀ kɛɛ ɖé ɓóɖóɔ̀ kɔ̃

²⁵ Wuɖuɓíín nììn xwéɖé-dùɔ̀ kè Gáà nììn xwéɖé-dùɔ̀ ɔ kè Mànásì nììn xwéɖé-dù fáún-fáúnɔ̀ táà ma wa ɓǎ ɓěɛ̀ Gèɖèpɔ́ɔ̀ dyi, ké wa ɖú ma ɓóɖóɔ̀ nyɔ ɓě ɓɛ́ Gèɖèpɔ́ɔ̀ nyuɛ zɔ̃̌ɔ̀ kà ɓɛ́ wa dyi zɔ̃̌ɔ̀ kà wa mú gbɔɔ̀ kɛɛ nììn kũùn-kpò-gèɖèpɔ́ɔ̀ ɓěɔ̀ ɓiè kpàǐ.

²⁶ Ɔ jèɛɛ, Gèɖèpɔ́ɔ̀ nyuɛ ké Púò kɔ̃̀ nyɛ́nɛ́ tɔ̀ɔ̀ mɔ̀à Tígàɖà-Pìɖɛ́sɛ̀ ɓɛ́ ɔ mɔ̀à Àsíwíɖíà-ɓòɖòɔ̀ kã́áɔ̀ kɛɛ dyà ma wa to kɔ̃, ké ɔ kpɔ̃̀ìn ma wa ganaún, ké ɔ kpa ma wa ɖé Hááɖà-hwɔ̀ɖɔ̀ɔ̀ kè Háɓɔ̀-hwɔ̀ɖɔ̀ɔ̀ kè Háwàɖà-hwɔ̀ɖɔ̀ɔ̀ mú ɔ kè ɖé Gózàùn-nìɔ̀ wĩín, ké ɖéɛ̀ wa nì ke.