1 Kánáníkɔ̀ 28 - Ɓǎsɔ́ɔ̀ Báɓòɔ̀

Dèɓé tò wuɖu ɓá Gèɖèpɔ́ɔ̀ gbǒɔ̀ po jè dyí

¹ Ti ɓɛ́ Dèɓé ɖǎ ma naɓaà ɓó Gèɖèpɔ́ɔ̀ gbǒɔ̀ po jèɛɛ, ɔ poìn ma Éézùɖùɛ̀-nyɔ̀ ɓěɔ̀ gɔ̌mànà-nyɔ̀ séín ɓěɔ̀ dyí. Wa mɔ̀ ma xwéɖé-dù ɖò-ɖò ɓěɔ̀ nyɔ vɛ̀nɛ̀ ɓěɔ̀ kè kpoo-dù kò-kò ɓě mɔ̀à kã́áɔ̀ kũ̀à-dù kò-kò ɓě nyu-nyɔ̀ ɓěɛɛ nyɔ vɛ̀nɛ̀ ɓěɔ̀ kè sójà táázĩ̀ìn ɓě wuɖuí-kɔ̃̀-nyɔ̀ ɓěɔ̀ kè sójà hɔ̃dɛ̀ɖɛ̀ ɓě wuɖuí-kɔ̃̀-nyɔ̀ ɓěɔ̀ kè kã́áɔ̀ kè ɔ dyú-gàà ɓěɔ̀ kɔ̃̀ɔ̀-ɖɛ̀ ɓěɔ̀ jè gbo-gmɔ̀-nyɔ̀ ɓěɔ̀ kè waà nyúà-ɖɛ̀ ɓěɔ̀ jè gbo-gmɔ̀-nyɔ̀ ɓěɔ̀ kè gɔ̌mànà-nyɔ̀ ɓě nì ɖé kã́áɔ̀ gbǒɔ̀ dya kɛ kè gàa-zà-nyɔ̀ ɓěɔ̀ ɔ kè to-vɔ̃-nyɔ̀ vɛ̀nɛ̀ tɔ̀ɔ̀ ɓěɔ̀.

² Hwɛ̀ ké Kã́á Dèɓé nyànà ma dyi, ké ɔ ɖá, “Ḿ ɖíí ɓě kè ní nyɔ ɓě, ɓě tò ḿ gbo ɖùǔ. Ní hwòɖǒ poɛ ma gbɔ, ɓɛ́ ḿ ké ma gbǒ ɖò mɔ̀ fɔ̀ìn-naín nyɛɛ po ɓó Bounɓoɔ̀ gma-gbɔ̀ɖɔ̀ɔ̀ mɔ̀à à Gèɖèpɔ́ɔ̀ ɓo-síìn-naínɔ̀ kɛɛ jè. Ké ḿ naɓaà ma ɓó gbǒɔ̀ po jè.

³ Kɛɛ Gèɖèpɔ́ɔ̀ cɛ̃ɛ ma ḿ gbo, ké ɔ ɖá, ‘M̀ mɛ ɓɔ́ gbǒ ɖò poɛ ɓó ḿ bìì, sepóɛɖé m̀ ɖǎ to pàɖǎ vɔ̃, ké m̀ ɖǎ nyɔmɔɔ dyi wáɖáìn.’

⁴ Kɛɛ wɛ̃́ɛ́ kɛɛ, Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ gã ma ḿ ɖé ḿ ɓǎà gbǒ-xwíníín-nyɔ̀ séín ɓěɔ̀ hwìɛ̀, ɓɛ́ ní gbǒ-xwíníínɔ̀ ké Éézùɖùɛ̀-ɓòɖòɛ̀ kã́á jǔ kánáá pū. Kĩ́ín nyɛɛ, ɔ gã ma Júɖà nììn xwéɖé-dùɔ̀, ɓɛ́ ɔ ké ma wuɖuí-kɔ̃̀-nyɔ̀ɔ̀ jǔ. Ké ɖé Júɖà nììn xwéɖé-dùɔ̀ múɛɛ, ɔ gãà ɖé ḿ ɓǎà gbǒ-xwíníínɔ̀ kɛ̀, ké ɔ hwòɖǒ dèìn ḿ múin ɖé ḿ ɓǎà dyú-gàà ɓěɔ̀ hwìɛ̀, ɓɛ́ ɔ ké ḿ Éézùɖùɛ̀-ɓòɖò gànáà kã́á mú nyu.

⁵ Ké ɖé gàa-dyù kúɖúú ɓě ɓɛ́ Bounɓoɔ̀ ɖǎà ḿ nyíɛɛ hwìɛ̀ kɛɛ, ɔ ɖǎ ɖé ní dyú-gàà Sã́ɖómà gã, ɓɛ́ ɔ ké ɓó Bounɓoɔ̀ kã́á-ɓòɖò mɔ̀à Éézùɖùɛ̀-ɓòɖòɛ̀ kɛɛ zèèɔ̀ kɔ̃ kò.

⁶ “Ké Bounɓoɔ̀ cɛ̃ɛ ma ḿ gbo, ké ɔ ɖá, ‘Nì dyú-gàà Sã́ɖómà mɔ̀ nyɔ mu ní gbǒɔ̀ poùn, ɓɛ́ gbǒɔ ké kɔ̃̀pã́ùn ɓéɖé, sepóɛɖé ḿ ɖǎ ɔ gã, ɓɛ́ ɔ ké ní dyú jǔ, ké ní mu ɔ ɓǎ jǔùn.

⁷ Ɔ jǔ ké ɔ dyi ní gma-dù kò-kò séín ɓěɔ̀ dyi kpɔ̃ kóɖó-kóɖó kà ɔ nyuà nìɛ̀ ɓó kàǔn wɛ̃ɛ ní, nìí, ní muɛ nyuùn ɓɛ́ ɔ kã́á-ɓòɖòɔ̀ ké dúi ku kánáá pū.’

⁸ “Ɔ ná nì jèɛɛ, ɓě mɔ̀à Éézùɖùɛ̀-nyɔ̀ séín, ɓɛ́ ɓě mɔ̀à Bounɓoɔ̀ nyɔ ɓě poàìn dà dyíɛɛ, ḿ nì ɓě náún poɛń ɓó à Gèɖèpɔ́ɔ̀ dyúa, ɓɛ́ ɓě ké Bounɓo mɔ̀à ɓěà Gèɖèpɔ́ɔ̀ kɛɛ gma séín ɓěɔ̀ dyi kpɔ̃ kóɖó-kóɖó, nìí ɓɛ́ ɓóɖó nɔ̀mɔ̀ dyíin nìà kɛ ké ɓěɛ̀ kɔ̃̀ɔ̀-ɖɛ̀ jǔ kánáá pū, ɓɛ́ ɔ ké ɓěɛ̀ xwíníín-dyù ɓěɔ̀ dúí-sè-ɖɛ̀ jǔ.”

Dèɓé po Sã́ɖómà náún

⁹ Ké Dèɓé cɛ̃ɛ ma Sã́ɖómà gbo, ké ɔ ɖá, “Ní dyú Sã́ɖómà, m̀ mɛ dyuò nì ɓǎà Gèɖèpɔ́ɔ̀ dyí, ɓɛ́ m̀ ké ɔ kíɖíí sí hwòɖǒɛ̀-ɖé-hwɛ̀-kà ɔ kè ɖé hwòɖǒ-wɔ̃́-wɔ̃́ mú, sepóɛɖé Bounɓoɔ̀ dyé ɖé hwòɖǒ-dyùà séín bũ̌ dyi, ké ɔ dyuò nyɔǔn-dyùɛ̀ hwòɖǒɛ̀-gbɔ-po-ɖɛ̀ kè hwìɖǐi-poìn-ɖɛ̀ séín dyí. Nì hwòɖǒ dyi ɔ jè dyi kpɔ̃ ní, ɔ mu m̀ jè dyi kpɔ̃ùn. Kɛɛ m̀ dyi ɔ jè dyi táà ní, ɔ mu m̀ xwáɖáún poùn ɓó sè-ná-sèɛ̀ tiín.

¹⁰ Ɓó kàǔn wɛ̃ɛ, m̀ mɛ ma mú, sepóɛɖé Bounɓoɔ̀ ɖǎ m̀ gã, ɓɛ́ m̀ ké ɔ bìì gbǒ ɖò po, ɓɛ́ ɖé ké ɔ pá hwɛ̀ǐn-hwɛ̀ǐn jǔ. Ɔ jèɛɛ, m̀ mɛ ku dyi, ɓɛ́ m̀ kéɛ nyu.”

¹¹ Ké Dèɓé nyí ma ɔ dyú Sã́ɖómà céè-ɖɛ̀ ɓá kà Gèɖèpɔ́ɔ̀ gbǒɔ̀ kèɛ̀ ɓí-dyù ɓěɔ̀ ké poɛ nyuɛɛ jè dyíɛɛ xwa. Ɓí-dyù ɓěɔ̀ mɔ̀ ɖɛín-dyi-dèìn-naín ɓěɔ̀ kè dyií-ɓì-dyù ɓěɔ̀ kè ɓí-dyù ɓě nì ɖé ɓíɖíiɛ ɔ kè ɓí-dyù kɔ̃̀ mú nyɔ-wìì-kɔ̃-ɓéɖéìn-naínɔ̀ nìà kɛ.

¹² Ké Dèɓé nyí ma Sã́ɖómà céè-ɖɛ̀ ɓá kà Bounɓoɔ̀ gbǒɔ̀ kɔ̃̀pã́ùnɔ̀ ké poɛ nyuɛɛ jè dyíɛɛ xwa ɖekè. Kɔ̃̀pã́ùnɔ̀ mú ɖéɛ̀ ɓí-dyù ɓě nì gbǒɔ̀ ɖeiɛ kè dɛ̀ wa dèìn ma kà ɖɛ ɓě ɓɛ́ wa nyùìn kũ̀à mú ɖé Gèɖèpɔ́ɔ̀ gbǒɔ̀ múɛ ɔ kè dɛ̀ wa dèìn ma kà ɖɛ ɓě ɓɛ́ wa kpá wáká ɓó Gèɖèpɔ́ɔ̀ bììɛ dyiɛɛ nì ma.

¹³ Ké ɔ nyí ma ɔ céè-ɖɛ̀ ɓá sáa-zà-nyɔ̀ ɓěɔ̀ kè Ɖíìváà-nyɔ̀ ɓěɔ̀ jè dyí ɖekè. Céè-ɖɛ̀ɔ̀ zaìn kà sáa-zà-nyɔ̀ ɓěɔ̀ ké kpoo ɓě mú kpáa nyuɛ kè kà Ɖíìváà-nyɔ̀ ɓěɔ̀ ké kpoo ɓě mú kpáa nyuɛɛ jè kɔ̃in. Ké ɔ zaìn waà kũ̀à séín nì ɖé Bounɓoɔ̀ gbǒɔ̀ múɛ kè ɖɛ séín ɓě ɓɛ́ wa ké kũ̀à mú nyùìn ɖé Bounɓoɔ̀ gbǒɔ̀ múɛɛ jè kɔ̃in ɖekè.

¹⁴ Ɖɛ ɖíɛ́ ɓě ɓɛ́ céè-ɖɛ̀ɔ̀ zaìn kɔ̃in ɖeɛɛ mɔ̀ pṹá-dyèɖè jĩ̀ kà ɓɛ́ góò-ɖɛ̀-fùù ɓěɔ̀ ké jǔ ɓó kũ̀à ɖò-ɖò bììɛ, ɔ kè pṹá-dyèɖè jĩ̀ kà ɓɛ́ séɓàɖà-ɖɛ̀-fùù ɓěɔ̀ ké jǔ ɓó kũ̀à ɖò-ɖò bììɛ.

¹⁵ Ké ɖíɛ́ ɓě mɔ̀ góò jĩ̀ kà nì ɖáùnpò-kɔ̃-dè-ɖɛ̀ ɖò-ɖò kè ɔ nììn ɖáùnpò ɓěɔ̀ múɛɛ nììn pṹá-dyèɖè, kè séɓàɖà jĩ̀ kà nì ɖáùnpò-kɔ̃-dè-ɖɛ̀ ɖò-ɖò kè ɔ nììn ɖáùnpò ɓěɔ̀ múɛɛ nììn pṹá-dyèɖè, dyììn ɖé kà wa nyu ɖáùnpò-kɔ̃-dè-ɖɛ̀ ɖò-ɖò kũ̀à mú nyùɛ̀n nyɛɛ mú.

¹⁶ Ké ɖíɛ́ ɓě mɔ̀ góò jĩ̀ kà nì téɓèɖè kɔ̃̀ kɔ̃ ɓɛ́ bɛɖɛɛ̀ɔ̀ kéà nì teeɛ múɛɛ nììn pṹá-dyèɖè, kè séɓàɖà jĩ̀ kà nì séɓàɖà-tèɓèɖè ɓěɔ̀ múɛɛ nììn pṹá-dyèɖè.

¹⁷ Ké ɖíɛ́ ɓě mɔ̀ góò hwɛ̀ zɛ̀nɛ̌ǐn ɓɛ́ wa ké tó-tàɓàìn-ɖɛ̀ ɓěɔ̀ kè gbòɖòò ɓěɔ̀ kè kɛ̀ɓɛ̀ɛ̀ ɓěɔ̀ kè péɖétè ɓěɔ̀ mú nyuɛ kè pṹá-dyèɖè jĩ̀ kà wa ɖò-ɖò ké jǔɛ, ɔ kè séɓàɖà-pèɖètè ɓěɔ̀ kè pṹá-dyèɖè jĩ̀ kà wa ɖò-ɖò ké jǔɛ.

¹⁸ Ké ɖíɛ́ ɓě mɔ̀ nyɔ́ún-nɔ̀mɔ̀-ɖɛ̀-kɔ̃-fɔ̃̀ìn-gbàà mɔ̀ góò hwɛ̀ zɛ̀nɛ̌ǐn nyɛ kè pṹá-dyèɖè jĩ̀ kà ɔ ké jǔɛ, kè hwíì-sǒ mɔ̀ góò ɓɛ́ ɔ ké nyu ɓó cɛ́ɖɔ̀ ɓě kɔ̃̀ pìɔ̌-kpà pɛ́ɛ̀ kà kɔ̃in, ɓɛ́ wa dyià Bounɓoɔ̀ gma-gbɔ̀ɖɔ̀ɔ̀ kɔ̃in ɓáìn nyɛɛ jè.

¹⁹ Ké Dèɓé cɛ̃ɛ ma Sã́ɖómà gbo, ké ɔ ɖá, “Bounɓoɔ̀ mɔ̀ nyɔ cɛ̃ɛ ḿ gbo, ké ɔ nyí ḿ kpé, ɓɛ́ ḿ ké ɖɛ ɓěɛ̀ céè nɛ̀ɛ̀-nɛ́ɛ́-kà ɓá kũ̀à séín ɓěɛ̀ jè dyí.”

²⁰ Ké Dèɓé cɛ̃ɛ ma ɔ dyú Sã́ɖómà gbo ɖe, ké ɔ ɖá, “Ku dyi, ɓɛ́ m̀ ké hwòɖǒ ku, ɓɛ́ m̀ ké kũ̀àɔ̀ nyu. Mɔ̀ǔn ɖá ɓɛ́ m̀ ké fɛ̃̀ìn, ké mɔ̀ǔn ɖá ɓɛ́ nì hwòɖǒ ké ɖé ɖei kpá, sepóɛɖé Bounɓo Gèɖèpɔ́ɔ̀ mɔ̀à ní Gèɖèpɔ́ɔ̀ kɛɛ nì ɓó m̀ gbo. Ɔ se m̀ dyi táǎ mu, mɔɔ ké nì jè se ɔ hwìɖǐi sɔ̀ɔ̌ mu. Ɔ mu m̀ gbo kpáùn, ɓɛ́ m̀ ké kũ̀à séín ɓá ɔ gbǒɔ̀ jè dyíɛɛ dyí hwɔ.

²¹ Gmɔ̀ nɔ̄, sáa-zà-nyɔ̀ ɓěɔ̀ kpoo ɓěɔ̀ kè Ɖíìváà-nyɔ̀ ɓěɔ̀ kpoo ɓěɔ̀ ɖǎ ti dyé ɓó kũ̀à séín ɓá Gèɖèpɔ́ɔ̀ gbǒɔ̀ dyíɛɛ jè. Ké nyɔ ɓě ɓɛ́ wa dyuò sɛ́ɖɛ́ ɓó kũ̀à-dù kò-kò séín nyu jèɛɛ hwòɖǒ wɔ̃́ ɓɛ́ wa ké ɓó m̀ gbo kpɔ̃̀ìn ɓá kũ̀à séín ɓěɔ̀ nyu jè dyí. Ké ɓó kɔ̃in nyɛɛ, gɔ̌mànà-nyɔ̀ ɓěɔ̀ kè nyɔ tɔ̀ɔ̀ séín ɓěɔ̀ mu ɓó m̀ gbo kpɔ̃̀ìn ɖé ɖɛ séín nì mu wa gbo cɛ̃ìn nyɛɛ nyu-nyu mú.”