1 Kánáníkɔ̀ 22 - Ɓǎsɔ́ɔ̀ Báɓòɔ̀

¹ Ti ɓɛ́ Dèɓé ɖǎ ma sáa ɓěɔ̀ zàà hwɔɛɛ, ɔ cɛ̃ɛ ma, ké ɔ ɖá, “Dɛ̀ nìà kɛ ɓóɛ̀ Bounɓo Gèɖèpɔ́ɔ̀ gbǒɔ̀ mu nììn, ké dɛ̀ nìà kɛ ɓóɛ̀ sáa-kɔ̃-zàìn-gbàà kɔ̃̀ kɔ̃ ɓɛ́ Éézùɖùɛ̀-nyɔ̀ ɓěɔ̀ kéà waà fɔ̃ɔ-sàǎ-zàìn-ɖɛ̀ ɓěɔ̀ nyùìn nyɛɛ mu nììn.”

Dèɓé naɓaà ɓó Gèɖèpɔ́ɔ̀ gbǒɔ̀ po jè

² Ké Dèɓé tò ma wuɖu, ɓɛ́ wa ké ɖíà ɓě nì Éézùɖùɛ̀-ɓòɖòɔ̀ kɔ̃ɛɛ dyí poìn. Ké ɔ po ma wa ɖíɛ́ ɓě wáká, ɓɛ́ wa ké ma sɔ́ɔ́-kpò ɓě bũ̌in wa ɓó Gèɖèpɔ́ɔ̀ gbǒɔ̀ po jè.

³ Ké Dèɓé po ma nɛɛ̀-kpà kúɖúú wáká, ɓɛ́ wa kéɛ túu kè hĩ́íjè ɓě mú nyu ɓó gmɔ-wɔ̃̀ ɓěɔ̀ kĩ̀ǐn ɓě jè. Ké ɔ po ma bàɖàsǐ ɓáún-ɓáún wáká, ké nyɔ ɖò seɛ ma xwa dɔ̃̌ɔ ɓɛ́ìn ɓóɛ dyí vò jè.

⁴ Ké ɔ po ma síɖà-cù-kpóɖó ɓě se zɛɖɛɛ ɓɛ́ìn nyɛɛ wáká, sepóɛɖé Zíɖɔ̀ùn-nyɔ̀ ɓěɔ̀ kè Táà-nyɔ̀ ɓěɔ̀ dyà ma síɖà-cù-kpóɖó ɓáún-ɓáún Dèɓé gbo.

⁵ Dèɓé po ma ɖɛ ɓěɛ̀ wáká, sepóɛɖé ɔ ɖá, “Ní dyú-gàà Sã́ɖómà mɔ̀ dyú-gbɔ́ɔ́, ké ɔ séè ɖɛ ɓěɛ̀ nyu ɖò. Ké gbǒ ɓɛ́ ɔ kéà po ɓó Bounɓoɔ̀ bììɛɛ ɓéɖé ɓɛ́ ɔ ké dya-dè-dè ɓéɖé mìɔ ɖéɛ nyɛ́nɛ́-mu-mu kè dĩ́ín-dĩ̀ìn mú ɖé ɓóɖó-dù séín kɔ̃. Ɔ ná nì jèɛɛ, ní mu ɖɛ séín naɓaàùn ɓóɛ jè.” Ké Dèɓé naɓaà ma gbǒɔ̀ pòìn-ɖɛ̀ ɓáún-ɓáún, hwɛ̀ ké ɔ mɛ́ ma.

⁶ Ti ɓɛ́ Dèɓé ɖǎ ma ɖɛ ɓěɔ̀ naɓaà hwɔɛɛ, ɔ ɖá ma ɔ dyú-gàà Sã́ɖómà, ké ɔ po ma ɔ náún kà ɔ mɔ̀ nyɔ ké gbǒ ɖò po ɓó Bounɓo mɔ̀à Éézùɖùɛ̀ Gèɖèpɔ́ɔ̀ kɛɛ bììɛ.

⁷ Dèɓé cɛ̃ɛ ma Sã́ɖómà gbo, ké ɔ ɖá, “Ní dyú, ní hwòɖǒ mɔ́ ɓɛ́ ḿ ké ma gbǒ ɖò po ɓó Bounɓo mɔ̀à ní Gèɖèpɔ́ɔ̀ kɛɛ bìì.

⁸ Kɛɛ Bounɓoɔ̀ cɛ̃ɛ ma ḿ gbo, ké ɔ ɖá, ‘M̀ ɖǎ nyɔmɔɔ dyi wáɖáìn mìɔ, ké m̀ ɖǎ to vɛ̀nɛ̀-vɛ̀nɛ̀ vɔ̃. Mɔ̀ se nyɔ ké gbǒ ɖò po ɓó ḿ bìì, sepóɛɖé m̀ ɖǎ nyɔmɔɔ dyi wáɖáìn mìɔ ɓó ḿ dyúa, nɔ̄ toɖo-kpàà kɔ̃.

⁹ Gmɔ̀ nɔ̄, nì mu dyú-gàà ɖò ɓéɖéìn. Ɔ mu gàa ɓɛ́ ɔ cĩ́ ɖé gìɖìǐ múɛɛ jǔùn. Ní muɛ nyuùn ɓɛ́ gìɖìǐ ké ɓó ɔ kè ɔ mú-nyɛ́-nyɔ̀ séín ɓěɔ̀ pṹa nì. Ɔ nyɛ́nɛ́ mu Sã́ɖómà jǔùn, sepóɛɖé ní muɛ nyuùn ɓɛ́ gìɖìǐ ké Éézùɖùɛ̀-ɓòɖòɔ̀ kɔ̃ nì ɖé ɔ nììn tiɔ̀ mú.

¹⁰ Ɔ mɔ̀ nyɔ mu gbǒ ɖò poùn ɓó ḿ bìì. Ɔ mu ní dyú-gàà jǔùn, ké ní mu ɔ ɓǎ jǔùn. Ké ní muɛ nyuùn ɓɛ́ ɔ kã́á-kpèɔ̀ ké dyúa mu kánáá pū ɖé Éézùɖùɛ̀-ɓòɖòɔ̀ kɔ̃.’

¹¹ “Ɔ ná nì jèɛɛ, ní dyú, Bounɓo mɔ̀à nì Gèɖèpɔ́ɔ̀ kɛɛ mɛ nì ɓó m̀ gbo, ɓɛ́ m̀ ké gbǒɔ̀ po nɔ̀mɔ̀ dyíin kà ɔ nyuà cɛ̃ɛ ɓá m̀ jè dyíɛ.

¹² Bounɓoɔ̀ mɛ nyí m̀ fɔ̀nɔ̀-hwòɖǒ kè ɖɛ-múin-wɔ̃́-wɔ̃́, nìí, ti ɓɛ́ ɔ mu m̀ Éézùɖùɛ̀-ɓòɖòɔ̀ wuɖuí-kɔ̃̀-nyɔ̀ mú nyuùn wɛ̃ɛ, ɓɛ́ m̀ ké ɔ gmaɔ̀ dyi kpɔ̃.

¹³ Ɔ jǔ ké m̀ dyi gma-dù kò-kò séín ɓě ɓɛ́ Bounɓoɔ̀ tòìn zɔ̃̌ɔ̀ kà Mózè mú ɓó Éézùɖùɛ̀-nyɔ̀ ɓěɔ̀ bììɛɛ dyi kpɔ̃ nɔ̀mɔ̀ dyíin ní, nìí, nì sɔ̃ún-kpa-ɖɛ̀ mu mú wóɖóùn. M̀ mɛ ku dyi, ɓɛ́ m̀ ké hwòɖǒ ku. M̀ mɛ ɓɔ́ fɛ̃̀ìn, ké nì hwòɖǒ mɛ ɓɔ́ ɖé ɖei kpáa.

¹⁴ Ḿ ɖǎ gana-kũ̀à nyu, ɓɛ́ ḿ ké ɖɛ séín ɓěɛ̀ naɓaà ɓó Bounɓoɔ̀ gbǒɔ̀ jè. Ɖɛ ɓěɔ̀ mɔ̀ góò kɔ̃̀ xwa-ku-ku mɔ̀ pṹá-dyèɖè méɔ̀ùn mɛ̀nɛ̌ìn-sɔ̃́ kè táázĩ̀ìn hɔ̃dɛ̀ɖɛ̀ hm̀m̌ wɛ̃ kè séɓàɖà kɔ̃̀ xwa-ku-ku mɔ̀ pṹá-dyèɖè méɔ̀ùn kpáɖá-nyɔ tã ɓaɖa-bùè kɛ kè bàɖàsǐ kè nɛɛ̀-kpà ɓɛ́ nyɔ ɖò se wa xwa dɔ̃̌ɔ ɓɛ́ìn ɓó wa dyí vò jèɛ, ɔ kè cu-kpóɖó ɓě kè sɔ́ɔ́ ɓě. M̀ mɛ po ɖɛ ɓěa kɔ̃ ɓó kũ̀àɔ̀ jè.

^15-16 M̀ ɓéɖé kũ̀àɔ̀ nyu-nyɔ̀ ɓáún-ɓáún se zɛɖɛ ɓɛ́ìn nyɛ. Wa mɔ̀ sɔ́ɔ́-bũ̌in-wa-nyɔ̀ ɓě kè sɔ́ɔ́-dè-nyɔ̀ ɓě kè ɖɛ-kɔ-nyɔ̀ ɓě ɔ kè sɛ́ɖɛ́-dyuò-nyɔ̀ ɓě ɓɛ́ wa dyuò góò kè séɓàɖà kè bàɖàsǐ ɔ kè nɛɛ̀-kpà ɓě ɖɛ kò-kò ɓě mú ɓaɖaa kɛ. Sɔ̀ dyí, ɓɛ́ m̀ ké kũ̀àɔ̀ gbɔ dè. Bounɓoɔ̀ mɛ nì ɓó m̀ gbo.”

¹⁷ Ké Dèɓé cɛ̃ɛ ma Éézùɖùɛ̀-nyɔ̀ ɓěɔ̀ nyɔ vɛ̀nɛ̀ séín ɓěɔ̀ gbo, ɓɛ́ wa ké ɔ dyú-gàà Sã́ɖómà gbo kpá.

¹⁸ Ɔ ɖá, “Má, Bounɓo mɔ̀à ɓěɛ̀ Gèɖèpɔ́ɔ̀ kɛɛ nì ɓó ɓě gboe? Má, ɔ nyuɛ ké ɓě cĩ́ gìɖìǐ mú nɔ̄ ɓóɖó gànáà múe? Sepóɛɖé ɔ ɖǎ nyɔ ɓě ɓɛ́ wa cĩ́ ma nɔ̄ ɓóɖóɛ̀ kɔ̃ɛɛ ḿ xwaún dyi po, ké ɓóɖóɛ̀ nyɔ ɓěɔ̀ nì Bounɓoɔ̀ kè ɓě mɔ̀à ɔ nyɔ ɓěɔ̀ kɛɛ xwíɖíi.

¹⁹ Ɔ ná nì jèɛɛ, ɓěɛ̀ hwòɖǒ-dyùà kè ɓěɛ̀ fɔ̀nɔ̀-hwòɖǒɔ̀ mɛ nì Bounɓo mɔ̀à ɓěɛ̀ Gèɖèpɔ́ɔ̀ kɛɛ kíɖíí sí jè kɔ̃ kóɖó-kóɖó. Ɓě sɔ̀ dyí, ɓɛ́ ɓě ké Bounɓo Gèɖèpɔ́ɔ̀ gbǒ hwɛ̀ǐn-hwɛ̀ǐnɔ̀ po, nìí ɓɛ́ ɓě ké Bounɓoɔ̀ gma-gbɔ̀ɖɔ̀ɔ̀ kè ɔ ɖɛ hwɛ̀ǐn-hwɛ̀ǐn tɔ̀ɔ̀ ɓěɔ̀ ɖé gbǒ ɓɛ́ ɓě poà ɓó ɔ bììɛɛ mú dyà.”