1 Kánáníkɔ̀ 18 - Ɓǎsɔ́ɔ̀ Báɓòɔ̀

Dèɓé ɖu ɔ mú-nyɛ́-nyɔ̀ ɓě toún

¹ Sɔ̀ìn ɓóɛ gboɛɛ, Dèɓé vɔ̃ ma Féɖésìà-nyɔ̀ ɓěɔ̀ gbo ɖe. Ké ɔ ɖu ma wa toún, ké ɔ zà ma Gáà-hwɔ̀ɖɔ̀ɔ̀ kèɛ̀ hwɔɖɔ-kpàǎ ɓěɔ̀ wa xwa.

² Ké Dèɓé vɔ̃ ma Móà-nyɔ̀ ɓěɔ̀ gbo ɖekè, ké ɔ ɖu ma wa toún. Ké Móà-nyɔ̀ ɓěɔ̀ nì ma ɔ xwíɖíi, ké wa pɛ́ɛ̀ìn ma ɔ tácì dyéɖéín.

³ Ké Dèɓé vɔ̃ ma Zóɓà-ɓòɖòɔ̀ kã́á mɔ̀ ma Háɖàɖɛ́zɛ̀ kɛɛ gbo ɖekè, ké ɔ ɖu ma ɔ toún, hwɔ ɖé Hámà-hwɔ̀ɖɔ̀ɔ̀ wĩín dyí. Dèɓé vɔ̃ ma ɔ gbo, ti ɓɛ́ Háɖàɖɛ́zɛ̀ nì ma nyɔ ɓě cĩ́ ma ɖé Dyùféɖétì Bɔɔ-kpàɔ̀ kɔ̃ɛɛ kpɔ̃uń muɛń, ɓɛ́ wa ké ɔ xwíɖíi nì ɖeɛ.

⁴ Ké Dèɓé zà ma Háɖàɖɛ́zɛ̀ hwíì-sǒ táázĩ̀ìn ɖò kè sǒ-nàìn-nyɔ̀ táázĩ̀ìn mɛ̀nɛ̌ìn-sɔ̃́ ɔ kè sójà táázĩ̀ìn kpáɖá-nyɔ ɖò xwa. Ké ɔ cɛ̃ ma sǒ séín ɓě ɓɛ́ ɔ zà ma Háɖàɖɛ́zɛ̀ xwa kɛɛ ɓo-ɖeín-tɛ̃̀ìn, ɔ sèìn sǒ ɓěɔ̀ nyɔ ɓɛ́ìn hwíì hɔ̃dɛ̀ɖɛ̀ ɖò nàìn nyɛɛ ɖòùn.

⁵ Ti ɓɛ́ Dèɓé vɔ̃ ma kà Háɖàɖɛ́zɛ̀ gboɛɛ, Síwíɖíà-nyɔ̀ ɓě nì ma ɖé Dìmásìkɔ̀-hwɔ̀ɖɔ̀ɔ̀ múɛɛ ɖoɓo ma sójà ɓě, ɓɛ́ wa ké ma Háɖàɖɛ́zɛ̀ gbo kpá ɖé toɔ̀ gbo. Ké Dèɓé vɔ̃ ma wa gbo ɖekè, ké ɔ ɖáɓá ma Síwíɖíà-nyɔ̀ ɓěɔ̀ sójà táázĩ̀ìn kpáɖá-nyɔ sè sɔ̃́.

⁶ Hwɛ̀ ké Dèɓé dè ma sójà-kpòò ɓě dyi ɖé Síwíɖíà-nyɔ̀ ɓěɔ̀ hwìɛ̀, ɖé waà dìɓà-hwɔ̀ɖɔ̀ mɔ̀à Dìmásìkɔ̀ kɛɛ mú, ɓɛ́ Síwíɖíà-nyɔ̀ ɓěɔ̀ ké ma ɔ xwíɖíi nì. Ké wa pɛ́ɛ̀ìn ma ɔ tácì dyéɖéín. Dà séín Dèɓé muɛɛ, Bounɓoɔ̀ nyuɛ ké ɔ ɖu ma to.

⁷ Ti ɓɛ́ Dèɓé ɖu ma Háɖàɖɛ́zɛ̀ toún wɛ̃ɛ, ɔ zà ma dyí-zĩ̀ìn-ɖɛ̀ ɓě mɔ̀ góò-ɓàɖàà-ɖɛ̀ kɛɛ Háɖàɖɛ́zɛ̀ɛ̀ gɔ̌mànà-nyɔ̀ ɓěɔ̀ xwai, ké ɔ kpa ma dyí-zĩ̀ìn-ɖɛ̀ ɓěɔ̀ ɖé Jùɖúsɛ̀ɖɛ̀ìn-hwɔ̀ɖɔ̀ɔ̀ mú.

⁸ Ké Dèɓé zà ma bàɖàsǐ pàɖǎ ɖé Téɓà-hwɔ̀ɖɔ̀ɔ̀ kè Kúùn-hwɔ̀ɖɔ̀ɔ̀ mú. Wa mɔ̀ hwɔɖɔ ɓě ɓɛ́ Háɖàɖɛ́zɛ̀ kɔ̃̀ ma wuɖuí kɛ. Ɔ mɔ̀ bàɖàsǐ ɓɛ́ Sã́ɖómà nyu ma kà mú-dèɖèìn-ɖɛ̀ vɛ̀nɛ̀ɔ̀ kè cúè-ɓò ɓěɔ̀ ɔ kè bàɖàsǐ-ɖɛ̀-fùù ɓěɔ̀ mú ɓó Gèɖèpɔ́ɔ̀ gbǒɔ̀ bììɛ.

⁹ Ti ɓɛ́ Tóì mɔ̀à Hámà-hwɔ̀ɖɔ̀ɔ̀ kã́áɔ̀ kɛɛ wɔ̃́ɔ ma kà Dèɓé ɖǎ ma Háɖàɖɛ́zɛ̀ mɔ̀à Zóɓà-kã̀ǎɔ̀ kɛɛ sójà séín ɓěɔ̀ toún ɖuɛɛ,

¹⁰ púɛɛ, ɔ ɖoɓo ma ɔ dyú-gàà Jówàɖàùn ɖé Dèɓé gbo, ɓɛ́ Jówàɖàùn ké ma Dèɓé nyíɔún zà, ɓɛ́ ɔ ké ma Dèɓé zùo po ɓó Háɖàɖɛ́zɛ̀ toún ɖu jè, sepóɛɖé Tóì kè Háɖàɖɛ́zɛ̀ ɖǎ ma to vɔ̃uń hwèɖèìn. Tóì tò ma nyíí-ɖɛ̀ ɓě mɔ̀ góò-ɓàɖàà-ɖɛ̀ ɓě kè séɓàɖà-ɓàɖàà-ɖɛ̀ ɓě ɔ kè bàɖàsǐ-ɓàɖàà-ɖɛ̀ ɓěɛɛ Dèɓé gbo.

¹¹ Ké Dèɓé zàìn ma ɖɛ ɓě ɓɛ́ Tóì tò ma kà ɔ gboɛɛ Bounɓoɔ̀ xwáɖáún kà dyúáɖò kà ɔ zàìn ma kà séɓàɖà-ɓàɖàà-ɖɛ̀ ɓě kè góò-ɓàɖàà-ɖɛ̀ ɓě ɓɛ́ ɔ zà ma kà ɓóɖó ɓě ɓɛ́ ɔ ɖu ma kà toún wɛ̃ɛ kɔ̃in nyɛɛ Bounɓoɔ̀ xwáɖáún wɛ̃. Ɓóɖó ɓěɔ̀ mɔ̀ Íɖɔ̀ùn-ɓòɖòɔ̀ kè Móà-ɓòɖòɔ̀ kè Ámànà-ɓòɖòɔ̀ kè Féɖésìà-ɓòɖòɔ̀ ɔ kè Àmáɖɛ̀-ɓòɖòɔ̀.

¹² Sɔ̀ìn ɓóɛ gboɛɛ, Àbísàì kɔ̃̀ ɖe mɔ̀à Zɛ̀wúɖúdyà kɛɛ ɖáɓá ma Íɖɔ̀ùn-nyɔ̀ ɓěɔ̀ táázĩ̀ìn ɓaɖa-bùè sè mɛ̀nɛ̌ìn-tã ɖé Tɔ̃́ Bɔɔ-kpàɔ̀ kɔ̃.

¹³ Ké ɔ dè ma sójà-kpòò ɓě dyi ɖé Íɖɔ̀ùn-nyɔ̀ ɓěɔ̀ hwìɛ̀, ɓɛ́ Íɖɔ̀ùn-nyɔ̀ séín ɓěɔ̀ ké ma Dèɓé xwíɖíi nì. Dà séín Dèɓé muɛɛ, Bounɓoɔ̀ nyuɛ ké ɔ ɖu ma to.

¹⁴ Ɓó tia ɓaɖaa, Dèɓé mɔ̀ ma Éézùɖùɛ̀-ɓòɖò gànáɔ̀ nàìn-nyɔ̀, ké ɔ nyu ɖɛ sɛ́ɖɛ́ìn dyíɛ kè ɖɛ nɔ̀mɔ̀ dyíin nyɛɛ ɓó ɔ nyɔ séín ɓěɔ̀ bìì.

¹⁵ Ké Jóà kɔ̃̀ ɖe mɔ̀à Zɛ̀wúɖúdyà kɛɛ nì ma Éézùɖùɛ̀-sòjà ɓěɔ̀ kɔ̃in, ké Jɛ̀hósáfà mɔ̀à Àhíɖùɛ̀ dyú-gààɔ̀ kɛɛ mɔ̀ ma Éézùɖùɛ̀-ɓòɖòɔ̀ céè-ɖɛ̀ céè-nyɔ̀.

¹⁶ Ké Záɖò mɔ̀à Àhítùɛ̀ dyú-gààɔ̀ kɛ kè Àhímɛ̀nɛ̀ mɔ̀à Ábìáfàà dyú-gààɔ̀ kɛɛ, wa mɔ̀ ma sáa-zà-nyɔ̀ vɛ̀nɛ̀ ɓě, ké Sɛ̀wáɖádyà mɔ̀ ma gɔ̌mànàɔ̀ céè-ɖɛ̀ céè-nyɔ̀.

¹⁷ Ké Bɛ̀nádyà mɔ̀à Jɛ̀hódyáɖàà dyú-gààɔ̀ kɛɛ mɔ̀ ma Dèɓé dyí-gmɔ̀-nyɔ̀ ɓě mɔ̀à Kɛ́wèɖè-nyɔ̀ ɓěɔ̀ kè Pɛ́ɖè-nyɔ̀ ɓěɔ̀ kɛɛ nyɔ vɛ̀nɛ̀, ké Dèɓéɛ̀ dyú-gàà ɓěɔ̀ mɔ̀ ma gɔ̌mànà-nyɔ̀ vɛ̀nɛ̀ ɓě.