फिलिप्पि INTRO1 - बान्तावा राईछाप्लाखाओ अ़सिन्खा ओ छाप्लावा पावल्आ युरोप्ओ फिलिप्पि सहरादाओ बुयाओ साम्भुङ्चिओ निम्पाङ छाप्तुओ। फिलिप्पि माकेदोनियानि लोवाङाओ रोमि धिखाहुप्ओ अ़क्तात सहरा याआङा। ओ छाप्लावा छाप्तुङुहिदा पावल छेक्खादा छुक्तायुङ्सा। देम ख्रिस्तियान्चिआ खोसोओ अ़देङ्सालाप्पादा फित्चि अ़मेत्ताकि खोसोओ अ़मिन्मा अ़तुक्तापुवा। मोन्ग़रि फिलिप्पि सहरादाओ साम्भुङ्दा सोज्जेओ चिन्माय़ङ्चि खाअ़लुसाङा। खोन्ओसा खो चाअ़त्लो लिसाङा। मेन ओ छाप्लावाआ ऩङानुमा खोन्कि साकोङ्छ़ङ पोइसुओ ना पावल्आ ख्रिस्तएदा याआङाओ अ़धुन्ओ अ़साङ्कोङ्छ़ङ्आनि य़ङ्मा ऱन। ओ छाप्लावा फिलिप्पि सहरादाओ ख्रिस्तियान्चि आलाङ प़माचि निम्पाङ छाप्माय़ङ ओ। पावल हाप्तादिसाहिदा मोचिआ मोहा अ़फासा। मोवात्नि पावल खोन्कि मोचिएदा ताओ दुखादा मोचि राक खोन्कि सोम्कुवा प़माचिओ निम्पाङ ओ छाप्लावा छाप्तुओ। मोचि आप्पि नुलोक मुमान्चिन खोन्कि ऱक्भाक ह़ङ्म़ङ ह़ङ्मादाङ्का येसुओ अ़चुच़माथाङ्मा म़चिन्नान्चिन्ने निम्पाङ पावल्आ यायोक प़ङुचि। ख्रिस्तएदा मोचिओ अ़चुह़ङ्म़ङ निनाम्हाङ्ओ अ़चुआसिखा ओ। मो खोचिआ ओ यहुदि साम्योक य़ङ्हुप्चि म़मुचिओसा माआङ, मेन मोचिओ अ़चुसाकोङ्छ़ङ्लाम्पा अ़तोक्ताओ निम्पाङ पावल्आ मित्मेतुचि। ख्रिस्तदा काह़ङ्चि निनाम्हाङ्एदाङ्का ताओ ऩङानुमा खोन्कि सेवाङ्निओसोओ अ़तुक्वादा छाप्तुयुङ्सु। ओ छाप्लावाआ ख्रिस्तियान साकोङ्छ़ङ खोन्कि ह़ङ्म़ङ्दाओ ऩङ्नुमा, सोम्कुवा, अ़क्भुङ लिमा खोन्कि काचिदा अ़क्सुसुवा लिमादा क़रुओसा ओ छाप्लावा नि छाप्लावाचिदाङ्का निवा मुयाङ। ओदा पावल्आ फिलिप्पि सहरादाओ साम्भुङ्चि देम सोमातुक्तुयुङ्सुचि, मोसोओ अ़तुक्वादा खाङ्मुसुयुङ्सु। थुत्मेत्लो अ़तुक्वा ऩङ अ़सिन्खा १:१-११ पावल्ओ अ़आङ्मा १:१२-२६ ख्रिस्तदाओ ह़ङ्म़ङ १:२७–२:१८ तिमोथि खोन्कि इपाफ्रोदाइतस्ओ निम्पाङ अ़मित्चिऩङ २:१९-३० देङ्सालाप्पा काच़चि खोन्कि क़माचिदाङ्का रात्मान्चिन चाप्चेत्माय़ङ ३:१–४:९ पावल खोन्कि फिलिप्पि अ़यावाचि ४:१०-२० अ़चिन्मा ४:२१-२३ |
© Wycliffe Bible Translators, Inc. All rights reserved.
Wycliffe Bible Translators, Inc.