FÌLÌPYƐŊ 3 - Bafia Nouveau Testament

Ɓɛ̀pwààpwaà ɓɛ ɓɛyiì-ɓìɓan

¹ Ɓɔɔsoŋ̀, ɓigomìnɛ, ɓì ghɛ̀ɛ̀sɛɛ kì nyàànyaa ɓi Kan ɓiɗùm; ki yeesii ɓi mɛ nsoò lɛsàg lɛ mɓiìti mìni kìkàni ɓiɓan ɓi m̀mɛ ka kàn mini abɛ̀y; rìkì ɗiǹ ɗi ri ɓi kìrɔɔ kin.

² Ɓi konàg rì bu, ɓì konàg rì ɓìɓeɓtàg ɓi ɓɛ̀kìì-ɓìsay, ɓì ki konag ti rì ɓumɓɛ ɓɛ ri ɓɛ̀kɛ̀rɛn lɛ ɓɛɛ ɓɔŋ̀ ɓɛ̀ro ɓum.

³ Lɛ ɓìsi yɛɛ ri ɓumɓɛ ɓɛ mɛ kɛ̀rɛn syeesyee à kɛ̀rɛ̀n lɛ ɓìsi yɛɛ̀ ɓɔɔɓɔgsì Bɛ̀ll rì Ǹghay à Bɛ̀ll, tì saàsànɛ̀n ɓi Yeesus Kiris ɓi ɗùm, tyɛ̀ ki ki foŋ ntyweeyi wis ɓi kìɓan ki mɛmùù.

⁴ Kɔm̀ lɛ mɛ̀ɛmiɗ màa ghɛ̀ɛ̀sɛɛ kì foŋì ǹtyweeyi wɛm̀ ɓi mɛ̀mùù. I ɓum ɓɛdɛŋ ɓɛɛ̀ fèki lɛ ɓɛ ri rì ìtèɗ wulɛ ɓɛ tyweeyì mɛ̀mùù, gɛ̀n yaŋ ri mɛ̀

⁵ ànɛ ǹkɛ̀rɛ̀ngà ɓi mɛ̀ru taàraa ànɛ yɛ̀ɛ ǹ-yalɛ̀ngà, mɛ̀ nki rì muu Isirayɛl ɓi rìpwìɗ ɗi Bɛŋzyamɛŋ, kìyalì ki ɓɛ Ebìreegh. Ɓi ɓɛg ànɛ a rìɓèŋ ɗi ɓidɔ̀gsɛna, ǹɗì Fàrìzyɛŋ.

⁶ Bi ɓɛg anɛ a coo rifalɛ̀n ɗi ɓi rìgherɛ̀n ɗis, ǹɗì ŋwaànɛ à yeèyèèsìghà kìseŋi ki Kiris. Ɓi ɓɛg ànɛ a rìɓa ɗi saaɗ yɛ̀ɛ ɓìdɔ̀gsɛna ɓyɛɛ̀ kpaakpàà, com ki ŋwaà rì lɛ à kpaa à ràɗ rì mɛ̀, ki yin.

⁷ Kìɓan kifog, ɓyom ɓìn ɓìcèm ɓi ɓi ɓaghà mɛ̀ rì kɔ̀misɔ̀n, mɛ̀ ǹtekà ɓyɔ lɛ ɓi rì rìɗimzì ɓisuu Kiris.

⁸ Ǹghɛɛ gì lɛ ɓìɓan ɓìcèm ɓi ri rìɗimzì di ù fèegh ɓyɔ rì coo kirɔɔ ki ki laŋi ɓìrɔɔ ɓìcèm, kìrɔɔ kìn kɛɛ ri rìyi ɗi Yeesus Kiris; ɓisu wii nnɛ ǹgherɛ̀ngà lɛ mmɛm̀ ɓìɓan ɓìcèm, fɔɔnnɛ nseesee ɓyom ɓìcèm yɛ̀ɛ ɓyaaɓi ɓi kìkùnkùn lɛ di nfɔǹ Kiris,

⁹ ǹki ɓa lɛ ǹɗì saaɗ à mum ɓi rìràrɛ̀n ɗi rì nyi, saaɗ ànɛ̀n kɛ̀ɛ ɓa ti saaɗ à mɛ̀ɛmiɗ, ànɛ à rèsii lɛ ǹti m̀ɓègì ɓìdɔ̀gsɛna, à ɓa lɔŋ saaɗ ànɛ mum ànɛ à gherɛɛ Kiris à ti à ɓalàg rì nyi. Saaɗ ànɛ̀n nnyɛɛ fuu yì yɛ̀ɛ Bɛ̀ll, à ki ɓa nto lɛ rìgherɛ̀n.

¹⁰ Com ki nkɔ̀nkɔ̀n ki ri lɛ: n-yi Kiris, ǹ-yi ìtèɗ wu rìghèmɓɛ̀n ɗii, ɗi a ɓìloŋ, ǹteɗ gàɓ ɓi mɛ̀tɔɓ mii, ǹki pisɛn nyi ɓi rìwu ɗi à wughà

¹¹ lɛ i bee i ɓaa, mɛ̀ ǹghèmɓɛɛgɛy girig a ɓìloŋ.

Pol à rì ɓi mɛ̀ree lɛ a kpaŋ̀ ɓi ǹɗɛli wulɛ kìɓan ki ɓɛ fen a lɔ̀ŋkii kɛ̀ kɛɛ̀ ɓa ti

¹² Ki yin loo lɛ m̀mɛ kpaŋzɛn mɛ̀ree lɛ nteɗ mɛ̀lèɓ, nsoò lɛ m̀mɛ kpaŋ ɓi nɗɛli wulɛ kìɓan ki ɓɛ feèdì a lɔ̀ŋkɛm̀, kɛ̀ kɛɛ̀ ɓa ti. Kìɓan kifog, nka kɛ̀nkɛn lɔŋ asu rì mɛ̀ree, ǹki tèeteèsì nyoo lɛ nkobɛn mɛ̀lèɓ mɛ ɓi mɛ̀ree mɛ̀n ɓisuulɛ Yeesus Kiris à mɛ ɓan mɛ.

¹³ Ɓɔɔsoŋ̀, ǹ-yin ɗi fèg ànɛ lɛ, m̀mɛ kòbɛn mɛlèɓ, kìɓan kifog, com ki mɛ̀ɛ nkìkì ki ri lɛ, ǹti ǹɗimzàg ɓìɓan ɓi ɓi mɛ rɔ̀ɓ yi mɛ̀ ajɛ̀m, mɛ̀ ǹnànàɓ lɔŋ ɓi ɓi ri mɛ̀ beèbɛ̀y.

¹⁴ Fɔɔnnɛ nghɛghɛŋi lɛ nkɛǹ kìkpaŋzɛɛ, di nteɗ mɛ̀lèɓ mɛ ɓi ǹɗeèghreŋi wu wu ɓaghày mɛ̀ aɗyòò yɛ̀ɛ Bɛ̀ll, ɓi Yeesus Kiris.

¹⁵ Ɓìsi ɓɛ̀sɛ̀ɛ̀ ɓɛ̀cèm ɓɛ tì ti ɓɛ̀sɛ̀ɛ̀mɛn ɓi cɛɓ ki ɓi nghay, tì ghɛ̀ɛ̀sɛɛ kìɓaà rì fèg ànɛn; nni i ki kpaŋi lɛ ɓì wooghrɛɛ ɓi jɛ̀ɛ̀ ɓi kìɓan kidɛŋ Bɛ̀ll à rì mìni ɓiì lomi kitɛɛtɛn ɓi kìɓan kiǹ.

¹⁶ Wɔ̀lɛ ɓì nɗɛli wu tì ti wu miì, tì ghɛ̀ɛ̀sɛɛ lɛ tì kɛ̀nkɛ̀n lɔŋ asu ǹɗaŋ.

¹⁷ Ɓɔɔsoŋ̀, nɔ̀ɔ̀tiina mɛ̀kòò mɛm̀, ɓì seesèè ɓɛ̀roɓɛ ɓɛɛ̀ nɔ̀ɔnɔɔ̀tì kìfèèghrɛnà kis.

¹⁸ Maà kakàlì mìni lɛ kìgwey ki ɓum ki ri wɔɔ ki ɓìsyɔ̀ɔ̀ ɓyaa ɓyɛɛ̀ rèrèsi lɛ ɓɛri ɓumɓɛ ɓɛ ɓeèzɛɛ kɔrɔs à Kiris, m̀ɓììtii mìni kìkalii ɓiɓan ɓiǹ ɓigomìnɛ rì mìsì ɓi mɛ̀tam.

¹⁹ Rìsyɔn ɗyaa ɗi ri lɛ, ɓɛ ri ɓiì ɗyaŋì; ɗùm ɗyaa ɗyɛɛ rì ɓɔ bɛ̀ll yàà, com ki kɛɛ̀ sòosoòtì ɓɔ kɛɛ̀ki ɓɛ foŋi rìkem ɗyaa miì; lɔŋ ɓìɓan ɓi ɓi ziinɛ ɓyɛɛ̀ɓi ɓɔɔ̀ fèfèg.

²⁰ Ɓi san ànɛ a lɔ̀ŋkis, kìlɔ̀ŋ kis kɔɔ ri aɗyòò; wɔɔnnɛ Kan wìs Yeesus Kiris à ǹghɛɓsì wìs ànɛ ti ɓoŋɓòŋ à rì ɓiì ɓaà yì.

²¹ Nnyɛɛ ri lɔ̀ghi nyoo yìs inɛ ì rì nyìighnyìg lɛ yɛ̀ɛ ɓa nyoo ì ǹlònlomɛn yɛ̀ɛ ìnkìì, rì ìtèɗ wu a rì rì wɔ, wɛɛ̀ wu à ti fogì ɓyom ɓìcèm miì ɓi rìlàmì ɗii azi.