FÌLÌPYƐŊ 2 - Bafia Nouveau Testament

Kiris à sɛɛ̀dɛ̀ngà, Bɛ̀ll à kemzì nyi

¹ I ǹtyweeyi wu yɛ̀ɛ Kiris wu ki rì lɛ wu fɔɔsì mum ǹɗem, i rìfalɛ̀n ɗi itèɗ ɓi ǹkɔ̀nɛ̀n ɗi ki rì wɔɔ, i rìràrɛ̀n ɗi rì Nghay ɗi ri wɔɔ, i ǹɗem wu nyìighnyìg wu geesɛ̀n wu ri lɛ wu ɓa wɔɔ,

² kìina lɛ kìnyàà kɛɛ ron mɛ̀ nɗem, di ɓì ɓaa jɛ̀ɛ̀ bog. Ɓaana rì rìkuu ɗi ǹkɔ̀nɛ̀n ɗìfog, ɓì ɓa ǹɗem wufog, ɓì ki ɓa ti ɓɛfèg ɓɛ̀fog.

³ Kɛ̀ ɓi kì kiɓan kidɛŋ rì ǹɗem wu kalɛn nsoò lɛ ɓisuu rikem ɗi kɛ̀ɛ̀-su. Wɔ̀lɛ sɛɛ̀dɛɛna mìniìɓɔmiɗ ɓi zi, ɓì teɗ ɓum ɓɛmbog fɛlɛ yɛ̀ɛ ɓɛ ceeghii mìni.

⁴ Mum ǹcèm ànɛ ɓi mìni kɛ̀ɛ yiti lɔŋ lɛ kìrɔɔ kii ki nyimiɗ, à ghɛ̀ɛ̀sɛɛ girig kì yitii kirɔɔ ki ɓɛro ɓɛm̀bog.

⁵ Ɓi nyìinyìm wìn, ɓaana rì mɛ̀yitì mɛ Yeesus Kiris à ɓaghà rì mɔ.

⁶ Nyi ànɛ à ɓaghà yɛ̀ɛ Bɛ̀ll, à ghɛngà ɓi lɛ rìɓa ɗi lɛ, rì nyi rì Bɛ̀ll ɓɛɛ ɓa ǹɗɛli wufog, ɗi ri com ki à ghɛ̀ɛ̀sɛɛ kì sɔrii ɓi-tèɗ;

⁷ wɔ̀lɛ à kòrìghà rìɓa ɗii ɗiǹ ɗìcèm à teɗ rìɓa ɗi ǹkìì-kìsay; à lɔ̀ɔ̀ghrɛ̀n ɓi kìpisɛn ki ɓum; à rèsɛ̀ngà yɛ̀ɛ zɛy rì zɛy à mum,

⁸ à sɛɛ̀dɛ̀n nyimiɗ ɓi zi à ki ɓa ri mɛ̀wog à kpaŋ a rìwu; rìwu ɗincèm lɛ ɗi ɓi kɔrɔs aɗyòò.

⁹ Kìɓan kiǹ kɛɛ̀ ki Bɛ̀ll à ɓɔgsìghà nyi ɓi-kɔ̀ɔ̀ wu wu teŋmɛɛ wu cee mɛ̀kɔ̀ɔ̀ mɛ̀cèm à ki fa nyi ɗii ɗi ɗi laŋi mii mɛ̀cèm

¹⁰ lɛ di ɓyom ɓìcèm ɓi ɓi ɓyɛɛ̀ ghɛghɛɓ aɗyoo, rì ɓi ɓyɛɛ̀ ghɛghɛɓ ɓi ziinɛ, rì ɓi ɓyɛɛ̀ ghɛghɛɓ ɓi zi ɓiɗùm, ɓyɛɛ ɓag mɛ̀ɗu ɓi zi, ɓi ɓɔgsì ɗii ɗi Yeesus,

¹¹ ɓɛ̀sɛ̀ɛ̀ ɓɛ̀cèm ɓɛ ki làmɓɛ̀n ɓi myɔm maa lɛ Yeesus Kiris à rì Kan ɓi rìkem ɗi Bɛ̀ll Seŋì.

¹² Fɔlɔɔ nnɛ, mìni ɓum ɓɛm ɓɛ nɗem ɓɛ ɓyàa kìkì mɛ̀ mɛ̀wog, mɛ̀wog min mɛ̀ kɛɛ̀ sugtɛn lɔŋ lɛ cààmɛ̀n ki ǹɗì mìni jàŋbog, wɔ̀lɛ mɛ ghɛɛ̀sɛɛ kì ghɛnɛɛ ti à cee fɔlɔɔ, cààmɛ̀n ki ǹɗì mìni ki fìràɓ. Salina ɓisuu gòri yìn, rì coo bɔgsɛ̀n lɛɛ̀gwey.

¹³ Ɓisuulɛ Bɛ̀ll nnyɛɛ kìki kisay ɓi mìni, à fafà mìni lɛ rì ǹɗem, rì ìtèɗ wu kìyen ɓiɓan ɓi ɓi ghɛɛ̀sɛɛ rì syeesyee wìì a ɗyomzɛ̀n.

¹⁴ Com kìcèm ki ɓì rì lɛ ɓì kì, kìina kɔ kɛ̀ɛ̀ tìrùrùmì nsoò lɛ tìkàna

¹⁵ di fɔɔnnɛ ɓì ɓa kɛ̀ɛ̀ bɛ̀lɛn, ɓì ki ɓa ɓɛtɛnɛn, ɓì ɓa ɓɔn ɓɛ Bɛ̀ll ɓɛ ɓɛ ri kɛ̀ɛ̀ kìɓeɓtàg ki kiɓan kidɛŋ ɓi nyìinyìm à gbàà ì ɓum ìnɛ ì rì ɓìɗyoŋi ì ki ɓa ti ɓɛ̀ɓèèɓeè; ɓì ghɛ̀ɛ̀sɛɛ kìlònlomi ɓi nyìinyìm wàà fɛlɛ yɛ̀ɛ tyɔɛy,

¹⁶ ɓì rèrèsì ɓɔ ɓɔlɛ à cɛɓ; kìɓan kiǹ ki ri mɛ̀ ɓiì ɓaà kìɓan ki nkeŋkem miì ɓi ŋwos a Kiris, ki ki rèsi lɛ ǹkpuùkpùtɛ̀ngà ɓi, kɛ̀ɛ nki ɗiɗig mɛtɔɓ zɛy.

¹⁷ Wɔ̀lɛ nsoò bwaɓ yɛm̀ yaa ki kpaŋì ɓi sìg à com ki ɓɛ funɛɛ Bɛ̀ll, lɛ yɛɛ ɓɔɓtɛn ɓi rìfa ɗi rìgherɛ̀n ɗin ɗyɛɛ̀ ɓɔɔɓɔgsì Bɛ̀ll rì ɗyɔ, fɔlɔɔ a fa lɔŋ mɛ kìnyàà, ǹki nyààrɛn ǹɗaŋ ri mìni ɓɛ̀sɛ̀ɛ̀ ɓɛ̀cèm.

¹⁸ Mìni girig, nyààrɛɛna, ɓì ki nyààrɛn ǹɗaŋ ri mɛ̀.

Pol à rèsii ɓɔ lɛ à ɓiì romì Timote a lɔ̀ŋkaa

¹⁹ Ǹɗì rì dyàɓɛn ɓi Kan Yeesus, lɛ cààmɛ̀n lɛsàg ǹɗì ɓiì romìì Timote a lɔ̀ŋkin, lɛ di ɓɛ̀ɓɔlɛ ɓin ɓɛ ǹɗì ɓiì terì ɓɛɛ foŋdi mɛ̀ ìtèɗ ɓi nɗem;

²⁰ ɓisuulɛ ǹ-yin ɗi ŋwaàdɛŋ ànɛ tì rì mɛ̀yitì mɛ̀fog rì nyi, ànɛ à rì lɛ à ghɛ̀ghɛ̀rì lòo ǹɗem aɗyòò ɗì rìɓa ɗin.

²¹ Lɛ ɓum ɓɛ̀cèm ɓɛɛ̀ kaakaa lɔŋ kirɔɔ kaa ki ɓɔmiɗ, ɓɛ̀ kɛɛ̀ kaa ki Yeesus Kiris.

²² Ɓì yii lɛ Timote à mɛ fa ɓirèmzɛnà ɓi ɓi resii lɛ à rì mum à ǹtyweeyi; ɓì yi girig lèg ànɛ à falɛ̀ngà ɓi kìsay ki Syeesyee à Ɓɔlɛ ǹɗaŋ ri mɛ̀ lɔŋ yɛ̀ɛ man ànɛ à rì seŋi a mɛ̀kòò.

²³ Nyi nnɛ nfèfeg lɛ nɗom̀ yì mìni, di m̀manɛɛ kì yiì rìsyɔn ɗi kiɓan kɛm̀ lɛ syeesyee.

²⁴ Fɔɔnnɛ ǹɗì rì ǹtyweeyi ri Kan lɛ cààmɛ̀n lesàg mɛ̀ɛmiɗ. Nkpaŋ lɔŋ foo.

²⁵ Mɛ̀ɛ nghɛɛ kìrɔɔ lɛ mpɛɛziì mìni kì romìì Epafirodit à geni wɛ̀m ànɛ ti kiki kisay ri nyi, tì ɗùùɗùù ǹɗaŋ ri nyi; rì nyi innɛ ɓìi nɗomiì mɛ̀ nghɛɓsɛn ɓisuu ɓyom ɓi ɓi nkaakààrɛ̀n mɛ̀.

²⁶ Àa ǹɗì rì coo zày ìnɛ lɛ di àa ghɛɛ̀daagh mìni ɓɛ̀sɛ̀ɛ̀ ɓɛ̀cèm, wɔ̀lɛ kìɓan ki ki ǹ-yeesii nyi lɛɛ̀gweey, ki ǹɗì kiɓan ki ɓɔlɛ à fìroɓ fii anɛ ɓìi nteri foo.

²⁷ Ki ri lɔŋ fɔlɔɔ lɛ, àa nɗoɓi yɛ̀ɛ mɛ̀nɔ̀ɓɔ̀, à ɓosɛ̀n rìwu, kìɓan kifog Bɛ̀ll àa nwoogh nyi nyìighnyìg, nni àa nyi cɛ̀ncii innɛ Bɛ̀ll àa nwoogh nyìighnyìg, àa nwoogh girig mɛ̀ nyìighnyìg, lɛ kɛ̀ɛ mɓa lɛ, mɛ̀ ɓi ǹɗemi-kɛŋɛn abɛ̀y, wudɛŋ, wu yu tì kì ɓɔɓtɛɛ ɓi wiǹ.

²⁸ Fɔɔnnɛ ǹfyaŋzii yì mìni kì romìì nyi mɛ̀ree rì mɛ̀ree lɛ, ɓi woòg kìrɔɔ yɛ̀ɛ ɓì rì nyi ɓiì ghɛɛdii, ǹɗemi-kɛŋɛn wu ǹɗì rì wɔ, wu ghaɓɓɛ̀n.

²⁹ Ɓì ghɛ̀ɛ̀sɛɛ min lɛ ɓì ghàɓ nyi rì kɔɔ̀kɔɔ̀ à kìnyàà ànɛ ɓi Kan ɓi ɗùm, ɓì ki nyaasag rikuu ɗi ɓum ɗi yɛ̀ɛ nyi.

³⁰ Ɓisuulɛ, àa m̀mɛɛ̀ wu lɛ kìsay ki Kiris, àa mmɛ̀ɛ ɗimzi cɛɓ kii, lɛ a yu mɛ̀ rì ǹghɛɓsɛn wu ɓìi n-yin lɛ ɓì yù rì wɔ mìniìɓɔmiɗ.