Ndumba INTRO1 - Bible azumeinaWana ni modo zla d’a kuruta Mbaktum mba a Ndum ki Israel-lîd’a, a yat hina, ni kayam ba, ti de zla d’a yam ndumba hi Israel-lîd’a yat ablaud’id’a. Wani zla d’a a b’irit kata a tagat nga woi pet ti. Zla d’a gangrang nga hiu d’a kurut ta a le sunda ki sed’eta a tagat nga woi pet tuo mi. Bugol la Israel-lâ a ve gat ta teteng nga Ma didina mi dat mi Moise yam ahina d’a Sinai-d’id’a, a min tazi á i yam ambas sa Ma didina mi hlazi vunam kata. Gol sapitre d’a 1.1–10.10. Kur tit mazid’a a i Kades-Barneya avun hagad’a hambas ndatid’a. Wani a le mandarâ á kal kua. Ata yi máma Alona mi kazi sariyad’a kazi a le bizad’a abagei hur fulâ dok fid’i. A hulong kazigazi abo ma sutna á tit tit ta fiyaka tua ba, a fe ambas sa Mowap-pa abo ma yorogona hapo d’a Matna. Gol sapitre d’a 10.11–21.35. Ades sapitre d’a teteng nga dananda nga d’i tagei andjaf ahlena teteng suma a le yam ambas sa Mowap-pina. Ni kua kolâ ba, Israel-lâ a mba fe lovota á kal yam ambas sa Kanan-nda. Gol sapitre d’a 22.1–36.13. Mbaktum ndata ni Mbaktum mba yam Buzuk ka Abud’id’a ki Mbaktum mba yam Sunda hi Suma hi Levi-nid’a vunat ma arâ, nga d’i tagei suma hAlonina ala gagazi azi ni suma. Atazi deng tad’a nga, gigrita nga, ad’enga nga bei tin hurâ nga, ngol mazid’a ki kid’ak mazid’a nga mi. Ata yima dingâ nga d’i tagei d’engzenga hAlona d’a mam mba bei dabid’a ba d’a yam sum mamid’a. Ni d’engzeng mam mba nga d’i pat vama mam tchol kama ki d’ingêr mamba woi d’uo d’a. Sun nda Moise mi lat aduk Alona ki sum mamid’a tad’enga heî. Ni ma sun ma nga mi de vama Alona mi min ala suma a lum mbeyû na woina. Kur sun mam ndata mi nga kur kid’eî ir ra vat zenenda, mi nga tchola avok Alona d’igi grang ma bei kaud’a ba na na yam suma bei d’engzengâ. t Wana ni wal mata Israel-lâ a nga abagei hur ful ma Sinai-na 1.1–10.10 Azi tchol hur ful ma Sinai-na á id’a 10.11–21.35 Azi nga hur ful la Mowap-pa 22.1–36.13 |
Azumeina Bible © Alliance Biblique du Tchad, 1999.
Bible Society of Chad