Jeremi INTRO1 - Bible azumeinaWana ni modo zla d’a kuruta Alona mi yi Jeremi á mbud’um ma djok vun mama ni go ki biza d’a 626 d’a avok vuta hi Jesus Christ-sa, kur atchogoid’a hamul ma Juda-na Josiyas-sa. Jeremi mi djok vuna mi suma kur Jerusalem kur leud’a hi Josiyas-sa, kur leud’a hi goroma Jojakim-mba, kur leud’a hi Jojakin-nda gak dabid’a hi leud’a hamul ma dabid’a Sedekiyas-sa. Mi djok vuna kal bizad’a dok fid’i. Nebukanezar amul ma Babilon-na mi hle Jerusalem kur biza d’a 587 d’a avok vuta hi Jesus Christ-sa, mi b’lak Jerusalem ki gong nga kud’ora hAlona d’a kuruta, mi yo suma ablaud’a magomba, mi izi sä Babilon. Bugola, mi tin Gedaliya ma ngolâ yam suma Juda-na. Wani azigar suma Juda-na a tchumu, a ring a i Ezipte. A ve Jeremi kad’enga, a i ki sed’emu. Jeremi mi mit sä Ezipte. Kur Jerusalem Jeremi mi wala ndak ka nga d’i mba yam suma Juda-nid’a, nAlona tamba ba, mi sunud’ï kazi á ngobozi yam filei mazina, yam tcho mazi d’a tetenga mi. Mi zud’uzi ala azi ar tcho mazid’a woyo, azi hulongî gen Ma didina, azi ar vun mazi ma djin ma ki Ezipte-na woyo, azi ge yazi kä ad’u suma Babilon-na. Hina wani, va mba mi lazi d’i. Hina pî, sum ndazina a ar nga tcho mazid’a woi d’i, wani a dum ala mi le huneîd’a mi le ni sunda mi suma Babilon-na, a djobom vunam heî mi. Zla d’a a tchugut kamba nad’enga heî, kayam mi nga mi le yam sum mama ki hur ma tuna. Kayam ndata, mi vad’ud’a mi Ma didina, mi tchiya. Wani Ma didina mi ngomom kur sun ndata mi. Jeremi mi djok vuna yam hle d’a amul ma Babilon-na mba mi hle Jerusalem-mba, wani mi de zlad’a yam Vun ma Djin ma Awilina kAlona. Gologi sapitre d’a 32-d’a. Kur sapitre ndata mi gus asinena á tak tin hur mama woi ala Alona mba mi kuza. Kur atchogoi d’a Jesus nga mi le sun mamba aduk Juif-fîd’a, suma hiuna a djib’er ala Jesus ni Jeremi. Gol Mat 16.14. Ata yima Jesus mi hat mam suma hata á mbruk avungôna á tche kur kopmina, mi dazi yam süm guguzlu ndata ala: Wana ni Vun ma Djin ma Awilina hAlona ma hle tam d’igi buzuwan ma mba djang ngei kagi na na. Gol Luc 22.20 ki 1 Kor 11.25. Kur mbaktum ndata ti tak kei ala ni mam tamba ba, mi oî vun vun ma djoka hi Jeremi-na. t Wani ni wal mata Alona mi yi Jeremi 1.1-19 Vun ma djok ma teteng ma kur atchogoid’a hi Josiyas-sa, kur ra hi Jojakim-mba, kur ra hi Jojakin-nda, kur ra hi Sedekiyas-sina mi 2–25 Ahle suma teteng suma a le ki Jeremi-na 26–45 Jeremi mi djok vuna yam andjaf suma dingâ 46–51 Hle d’a a hle Jerusalem-mba 52.1-34 |
Azumeina Bible © Alliance Biblique du Tchad, 1999.
Bible Society of Chad