Иоанние Аллагьас загьир гьарурал ишал 2 - Аллагьасул Калима

2 бетӀер Эфесалда ругел иман лъуразул агьлуялде хитӀаб

¹ Эфесалда ругел иман лъуразул агьлуялде витӀарав чапарасухъе хъвай: «Анкьго цӀва кваранаб хъатикь ккурас, анкьго меседил чирахъалда гьоркьосан хьвадулев вугес гьадин абулеб буго:

² Дида лъала дур ишалги, дур захӀматаб хӀалтӀиги, дур сабруги. Дида лъала нужедаго гьоркьоре квешал гӀадамал дуца риччалареблъи. Дуца хӀалбихьана жал чапарзаби ругилан абулезул (гьел дир чапарзаби гурелха!), ва дуда гьел гьерсихъаби ратана.

³ Дуца сабру гьабула, дир цӀар сабаблъун гӀемераб къо хӀехьана дуца, амма гьелъ дур тату хвезабичӀо.

⁴ Цо бадибчӀвайги бугебха дуе гьабизе. Доб цебе букӀараб рокьи дур рекӀелъ хутӀун гьечӀо.

⁵ Гьединлъидал ракӀалде щвезабе гӀодове вортизегӀан мун кинаб борхалъиялда вукӀаравали. Тавбу гьабе дуца. Дол тӀоцере гьарулел рукӀарал ишалги гьаре. Дуца гьедин гьабичӀони, вачӀун гьенивегун, бугеб бакӀалдаса добегӀан хъурщизабила дица дур чирахъ, – дуца тавбу гьабизегӀан.

⁶ Амма дулъ цо лъикӀлъиги буго – дуе рокьуларо николаитазул ишал, диеги гьел цӀакъ рихарал руго.

⁷ ГӀундул ругезда рагӀизе биччанте иман лъуразул жамагӀатазда Илагьияб РухӀалъ щибилан абулеб бугебали. Бергьарасе дица Аллагьасул алжаналъуб бугеб гъотӀодаса пихъ кьела».

Смирнаялда ругел иман лъуразул агьлуялде хитӀаб

⁸ Смирнаялда ругел иман лъуразул агьлуялде витӀарав чапарасухъе хъвай: «ТӀоцевесес ва ахирисес, хун вукӀун чӀаголъарас гьадин абулеб буго:

⁹ Дида лъала дуе бугеб гӀакъуба-къварилъиги, дур мискинлъи-язихълъиги, – хӀакъикъаталда мун бечедав вугевха. Дида лъала Аллагьасул халкъин жидедаго абулезул мацӀги бугьтанги, – амма гьеб Аллагьасул халкъ гуро, илбисалъул агьлу буго.

¹⁰ Дуца хӀехьезе ккезе бугелдаса хӀинкъуге мун. Гьале илбисалъ, нужер хӀалбихьизе, цо-цо чи туснахъалде рехила. АнцӀго къоялъ букӀина нужее гьеб къварилъи. Холев вугониги, божи-иман рехун течӀони, дуе шапакъатлъун абадияб гӀумру кьела дица.

¹¹ ГӀундул ругезда рагӀизе биччанте иман лъуразул жамагӀатазда Илагьияб РухӀалъ щибилан абулеб бугебали. Бергьарасе кӀиабилеб хвалица щибго зарал гьабиларо».

Пергамалда ругел иман лъуразул агьлуялде хитӀаб

¹² Пергамалда ругел иман лъуразул агьлуялде витӀарав чапарасухъе хъвай: «КӀибалаб ва рекӀараб хвалчен бугес гьадин абулеб буго:

¹³ Кинаб бакӀалда мун вугевали лъала дида, илбисалъ жиндирго тах лъураб бакӀалда вуго мун. Амма дир цӀар цӀакъ лъикӀ цӀунулеб буго дуца. Нужер гьенив – илбисалъул чӀей бугеб бакӀалда – дие нугӀлъи гьабурав, дир цӀакъго божарав чи Антипа чӀвараб мехалдагицин, дида божун, дидаса инкар гьабичӀо дуца.

¹⁴ Дуе бадирчӀваял гьаризе кколел ишалги ругелха. Дуца аскӀоре риччалел руго БилгӀамил дин босарал гӀадамал. Исраилил халкъ къосинабизе бокьун, гьев БилгӀамицайин Балакида малъун букӀараб гьересиаллагьзабазе гӀоло къурбаналъе кьураб жо кваназе ва хъахӀбалъи гьабизе.

¹⁵ Дур гьенир руго николаитазул дин ккурал гӀадамалги.

¹⁶ Гьединлъидал тавбу гьабе. Тавбу гьабичӀони, кватӀичӀого дун духъе вачӀина ва дирго кӀалзул хвалчаца вагъила гьелгун.

¹⁷ ГӀундул ругезда рагӀизе биччанте иман лъуразул жамагӀатазда Илагьияб РухӀалъ щибилан абулеб бугебали. Бергьарасе балъгояб нигӀмат кьела дица, хъахӀаб гамачӀги кьела. Гьеб ганчӀида хъван букӀуна, жиндие щварав чиясда гурони, лъиданиги лъалареб цӀияб цӀар».

Тиатираялда ругел иман лъуразул агьлуялде хитӀаб

¹⁸ Тиатираялда ругел иман лъуразул агьлуялде витӀарав чапарасухъе хъвай: «Аллагьасул Васас – цӀа гӀадин берал кенчӀолел ругес ва цӀадаб биунеб мазгаралда релълъарал хӀатӀал ругес – гьадин абулеб буго:

¹⁹ Дида лъала дур ишалги, рокьиги, божи-иманги, тӀагӀат-гӀибадатги, дур сабруги, дол тӀоцере рукӀараздаса дур ишал гьанже цӀикӀкӀун ругеллъиги лъала.

²⁰ Дуе бадибчӀвай гьабизе жоги бугебха. Аллагьасул балъголъи загьир гьабизе лъалилан чӀарай Иезабел абулей гӀаданалъ дир лагъзал гуккизе риччалел руго дуца. ХъахӀбалъи гьабизе ва гьересиаллагьзабазе къурбаналъе кьураб жо кваназе малъулеб буго гьелъ гьезда.

²¹ Тавбу гьабизе заман кьун букӀана дица гьелъие. Амма гьелъие бокьичӀо жиндирго хъублъи рехун тезе.

²² Балагьея, хъубал ишалги рехун тун, тавбу гьабизегӀан, дица гьей унтул бусаде рехила, гьелда цадахъ къосун рукӀараздеги балагь рещтӀинабила.

²³ Гьелъул лъималаздеги хвел тӀаде тӀамила дица. Гьебмехалда киналго жамагӀатазда лъала тӀул-ракӀалда бугебщинабгицин бихьулев чи дун вукӀин. Нужер щивасул ишазда рекъон кьела дицаги щивав чиясе.

²⁴ Божи-имангун Тиатираялда хутӀарал нужеца дозул дин босичӀо ва илбисалъул балъголъийилан доз абулеб жоялъулги хӀалбихьичӀо. Нужер мугъзада цӀияб гьир баччизабиларо дица.

²⁵ Амма нужехъ бугебаб щулаго ккве, дун гьениве вачӀинегӀан.

²⁶ Дие гӀоло ахиралде щвезегӀан захӀмат баччун бергьарасе дица кьела халкъазда тӀад кверщел.

²⁷ Инсухъа дие кверщел щвараб гӀадин, гьесухъеги щвела, маххул тӀилица цере къотӀун, гьел рехъаде рачине ва, щагӀил хъуби кинигин, гъуризе кверщел.

²⁸ Ва дица гьесие кьела рогьалил цӀва.

²⁹ ГӀундул ругезда рагӀизе биччанте иман лъуразул жамагӀатазда Илагьияб РухӀалъ щибилан абулеб бугебали».