Эстер 3 - Аллагьасул Калима

Гьаман ягьудиял тӀагӀинаризе ургъи

¹ Гьелдаса заман ун хадуб, парччахӀ Ахашверошица тӀадегӀанлъизавуна АгагӀил наслуялъул чи Гьамедатил вас Гьаман. Гьес гьев киналго чӀухӀбузда гьоркьоб бищун борхатаб бакӀги кьун, кӀодо гьавуна.

² ПарччахӀасул кавудахъ гьесда цере хӀалтӀулел киналго чукъби, Гьаманида цере наку чӀван къулулаан, гьединаб букӀиндал парччахӀасул буюрухъ. Амма Мардохайица чӀвалеб букӀинчӀо гьесда цебе наку ва бетӀерги къулулеб букӀинчӀо гьесие.

³ «Аб щай дуца парччахӀасул амру тӀубазабулареб?» – ан цӀехолеб букӀана Мардохайида парччахӀасул кавудахъ хъулухъ гьабулел чукъбуз.

⁴ Къоялдаса къоялде гьедин гаргадулаан гьел, амма гьес гӀинцин тӀамулеб букӀинчӀо. Цинги гьез кинабго Гьаманида бицана, Мардохайида жиндирго рагӀудаса кьуричӀого чӀезе кӀолищали хӀалбихьизе – Мардохайица жив ягьудияв вугин бицун букӀиндал гьезда.

⁵ Мардохайица жинда цебе наку чӀвалеб гьечӀолъи ва гьес жиндие бетӀер къулулеб гьечӀолъи бихьидал, Гьаманил кутакалда ццин бахъана.

⁶ Амма цохӀо Мардохай тӀагӀинави цӀакъго гӀодобегӀанаб ишлъун бихьана гьесда. Гьесда бицана щиб халкъалъул чи Мардохай кколевали. Гьединлъидал Гьаманил къасд ккана тӀолабго Ахашверошил парччахӀлъиялда бугеб, кинабго Мардохайил халкъ – ягьудиял гъуризе.

⁷ Ахашверош парччахӀлъун вахъун анцӀила кӀиабилеб соналъул тӀоцебесеб моцӀалъ, ай, нисан моцӀалъ, Гьаманида цебе рехана «пур», ай, можоро, жиб-жиб къоялъе ва моцӀалъе. Можоро анцӀила кӀиабилеб моцӀалде, ай, адар моцӀалде ккана.

⁸ Гьаманица абуна парччахӀ Ахашверошида: «Дур парччахӀлъиялъул киналго вилаятазул тӀолалго халкъазда гьоркьоб тӀибитӀараб, амма гьезие чияраб цо халкъ буго. Гьезул къануналги цогидал халкъазулалда релълъарал гьечӀо ва парччахӀасул къануналги гьез гӀадахъ росуларо. ПарччахӀас гьеб жо хӀехьезе бегьиларо.

⁹ ПарччахӀасе бокьани, биччанте гьес буюрухъ кьезе гьеб халкъ тӀагӀинабеян, цинги дица цӀан анцӀазарго талант гӀарцул кьела парччахӀасул гӀарац-меседалъул тӀалаб гьабулел рагьтӀателазухъе гьесул хазинаялде тӀаде жубазе».

¹⁰ ПарччахӀас жиндирго килщидаса бахъун, парччахӀасул мугьру тӀад бикӀараб баргъич кьуна агагӀияв Гьаммедатил вас Гьаманихъе, ягьудиязул тушманасухъе.

¹¹ Гьес абуна Гьаманида: «Гьеб гӀарацги дур, ва гьеб халкъалдаги дуего бокьараб гьабе», – ян.

¹² ТӀоцебесеб моцӀалъул анцӀила лъабабилеб къоялъ ахӀана парччахӀасул катибал; Гьаманил аманаталда рекъон хӀадурана буюрухъ ва хъвана кагътал. Гьел буюрухъ тӀад хъварал кагътал ритӀана парччахӀасул вилаятазул бутӀрузухъе, щибаб вилаяталъул сардарасухъе, киналго халкъазул нуцалазухъе, щибаб халкъалъухъе гьезул жидерго мацӀалда ва хъвай-хъвагӀаялда рекъон. Гьел кагътал хъвана парччахӀ Ахашверошил цӀаралдасан ва гьесул мугьруги чӀвана гьезда.

¹³ ПарччахӀасул тӀолалго вилаятазде ритӀана чапарзаби гьеб буюрухъгун, гӀисинал-чӀахӀиял батӀалъи гьечӀого, лъималгун ва руччабигун киналго ягьудиял цохӀо къоялда жанир – анцӀила кӀиабилеб моцӀрол анцӀила лъабабилеб къоялъ, ай, адар моцӀалъ – гъурун, чӀван тӀагӀинареян, ва гьезул боцӀи-рикъзиги хъамал гьабеян.

¹⁴ Къануналъулалда бащад жиндир кӀвар бугеб гьеб хъвай-хъвагӀаялъул кагътал киналго вилаятазда тӀиритӀизареян, ва, киналго халкъазда рагӀизе ва гьел гьеб къоялде хӀадурун рукӀине, гьелъул гӀакӀа ахӀеян лъазабуна.

¹⁵ ПарччахӀасул амруялда рекъон чапарзаби хехлъи гьабун нухде рахъана. Гьеб буюрухъалъул Шушан хъалаялда гӀакӀа ахӀана. ПарччахӀ ва Гьаман сухӀмат-кепалде журана, Шушан шагьарин абуни кӀудияб ургъаликье ккана.