Фессалоникиязухъе кӀиабилеб кагъат 2 - Аллагьасул Калима

2 бетӀер «ВачӀина кӀудияб квешлъи гьабизе бугев чи»

¹ ТӀадегӀанав ГӀиса МасихӀ вачӀине вукӀиналъул ва нилъ гьесда аскӀоре данделъизе рукӀиналъул рахъ босани, дица нужеда гьарулеб буго, вацал,

² лъилниги кашпу-караматалдалъун, яги вагӀза-насихӀаталдалъун, яги нижеца битӀарабилан абулеб кагътидалъун гьениб нужехъе хабар щвани ТӀадегӀанасул къо тӀаде гӀунтӀун бугилан, нуж рихха-хочуге ва гьедигӀан бигьаго къосинеги къосунге.

³ Лъицаниги кингоги гуккизе чӀоге нуж. Гьеб къо тӀаде щвелалде гӀадамал Аллагьасда данде питнаялъе рахъина. Ракьалде вачӀина кӀудияб квешлъи гьабизе бугев ва хвалде иналъе хӀалтӀизе вугев чи.

⁴ Гьев чи дандечӀезе вуго гӀадамаз Аллагьлъун рикӀкӀунесдеги, гьез тӀагӀат-гӀибадат гьабулебщиналдеги. Жив гьездасаги тӀадегӀанав вугилан чӀела. ХӀатта Аллагьасул Мукъадасаб рокъов гӀодов чӀун, жив Аллагь вугиланги лъазабила гьес.

⁵ Дун гьенив вугеб мехалъ гьеб киналъулго хӀакъалъулъ бицун букӀанагури дица, нужеда ракӀалда гьечӀищ гьеб?

⁶ Гьанже нужеда лъала, гьев вачӀине мех щвезегӀан, сунца ккун чӀезавун вугевали.

⁷ Бахча-хьван жиндирго иш гьанжего гьабулеб буго гьеб квешлъиялъ. Амма гьеб ккун чӀезабун бугев нухдаса нахъе вачинегӀан, квешлъи загьирлъиларо.

⁸ Гьеле гьебмехалъ загьирлъила дов кӀудияб квешлъи гьабизе бугев чи. ТӀадегӀанав ГӀисаца тӀаде пун иш лъугӀизабила гьесул, ГӀиса вачӀиналъул кӀодолъиялъ хвезавила гьев.

⁹ ВачӀун гьев чияс, илбисалъул къуваталдалъун, батӀи-батӀиял гьересиял мугӀжизаталги гӀаламаталги рихьизарила.

¹⁰ БатӀи-батӀияб хӀилла-рекӀкӀалдалъун гуккила жидедаго тӀаде тамихӀ цӀалеб бугел гӀадамал. Гьедин ккела жиндалъун хвасарлъизе рукӀараб хӀакъабщинаб гьезие бокьуларелъул ва гьез гьебги нахъчӀвалелъул.

¹¹ Гьеб сабаблъунин Аллагьас гьезухъе битӀулеб гьел къосинарулеб къуват ва гьересиялда гьел божизарулел.

¹² Гьедин хӀакъабщиналдаги божичӀого, квешабщиналдаса лазат-кеп босаразе тамихӀ гьабила!

Павелил насихӀатал

¹³ ТӀадегӀанасе рокьулел нуж сабаблъун ккун нижеца кидаго Аллагьасе рецц гьабула, вацал, тӀоцере хвасарлъулеллъун Аллагьас нуж тӀаса рищун ругелъул. Нуж хвасарлъила – Илагьияб РухӀалъ нуж рацӀцӀалъизаридал ва хӀакъабщиналда божидал.

¹⁴ Аллагьас нуж тӀаса рищана, нижеца бицараб Рохалил хабаралъухъ гӀенеккидал. ТӀадегӀанав ГӀиса МасихӀил машгьурлъи нужехъеги щвезейин нуж тӀаса рищарал.

¹⁵ Гьединлъидал, вацал, нуж къвакӀун чӀа ва вагӀза-насихӀатаздаги кагътидаги нижеца малъараб хӀакъабщинаб кьуричӀого ккве.

¹⁶ ТӀадегӀанав ГӀиса МасихӀица ва жиндие нилъги рокьарав, къин гьечӀеб къвакӀиги щулияб хьулги нилъее жиндирго баркатгун кьурав нилъер Эмен – Аллагьасги

¹⁷ нужер ракӀал къвакӀизареги ва лъикӀал ишазулъги рагӀабазулъги нужее квербакъаги.