Коринфиязухъе кӀиабилеб кагъат 2 - Аллагьасул Калима

2 бетӀер

¹ Дица хӀукму гьабуна, дун вачӀунилан нужее квеш кколеб батани, гьанже нужехъе вачӀинчӀого чӀезе. Нуж пашманлъизаризе бокьун гьечӀо дие.

² Нуж пашманлъизаруни, дица пашманлъизарураз гурони, лъица дун вохизавилев?

³ Дица доб кагъат хъван букӀана нужехъе вачӀараб мехалъ, вохизавизе кколез дун пашманлъизавизе бокьичӀого. Дир ракӀчӀола, дун вохун вугони, нуж киналго рохизе рукӀиналда.

⁴ Доб кагъат хъвалеб мехалъ дун цӀакъ пашманго вукӀана: ракӀги къварилъун букӀана, бераз магӀуги тӀолеб букӀана. Нуж пашманлъизаризе гуреб, нужеде бугеб дир рокьул гьарзалъи бихьизабизейин дица доб кагъат хъван букӀараб.

ГӀайиб ккарасдасаги тӀасалъугьа

⁵ Дун пашманлъизавунилан нужеда ракӀалде ккарав чияс дун гуро пашманлъизавурав. Гьес цодагьалго пашманлъизаруна нуж киналго, гьелъул хӀакъалъулъ тӀокӀаб бицине бокьун гьечӀо дие.

⁶ Нужер гӀемерисез гьабураб тамихӀги гӀела гьев чиясе.

⁷ Гьанже, тӀасаги лъугьун, гьесул ракӀбатизабизе ккела нужеца, – цӀакъго пашманлъун, тату хунгутӀизе.

⁸ Гьединлъидал дица нужеда гьарулеб буго: гьевги нужее вокьулевлъи бихьизабе гьесда.

⁹ Нужер хӀалбихьизе ва сундулъго дие мутӀигӀал ругищалиги лъазе хъван букӀана дица доб кагъат.

¹⁰ Нуж тӀасалъугьарасдаса дунги тӀасалъугьуна. Дун тӀасалъугьунев вугони (тӀасалъугьине рекъараб жоги бугони), МасихӀги нугӀлъун гьавун, тӀасалъугьуна дун – нужее пайдаялъе.

¹¹ Дица гьедин гьабула, илбисалъ нилъго гуккунгутӀизе, – гьелъул къасдал лъаларел чагӀи гурелъулха нилъ.

Павел чапарасул хъулухъ

¹² МасихӀил хӀакъалъулъ Рохалил хабар лъазабизе дун Троадаялде вачӀараб мехалъ, ТӀадегӀанас дие нуцӀа рагьун батана.

¹³ Амма дир ракӀ гӀодобе биччалеб букӀинчӀо дир диналъул вац Тит гьенив ватичӀелъул. Гьединлъидал, гьенир ругезе къолъикӀги гьабун, дун Македониялде ана.

¹⁴ МасихӀил бергьенлъиялъул байрамалде ниж рачунев Аллагьасе рецц! Аллагьас ниж ритӀула, махӀ гьуинаб нахул кьеккен гьабулеб гӀадин, МасихӀил хӀакъалъулъ киса-кибего лъазабизе.

¹⁵ Хвасарлъулезеги холезеги ниж руго – МасихӀица Аллагьасе къурбанлъун кьеккен гьабулеб гьеб махӀ гьуинаб нах.

¹⁶ Холезе ниж руго – хвалил махӀ, хвасарлъулезе ниж руго – чӀаголъиялъул гьуинаб махӀ. Гьеб нижее бугеб тӀадкъай тӀубазабизе щал ярагьунел?

¹⁷ Аллагьасул рагӀабийилан гьерсалги рицун, цогидал гӀемерисел гӀадин гӀиси-бикъинаб дармиде машгъуллъуларелъулха ниж! Аллагьасул чапарзаби ругелъул, Аллагьасда рагӀулеб бугеб гӀадин, МасихӀидеги цолъун, ракӀбацӀцӀадго бицуна нижеца Рохалил хабар.