फिलिप्पि INTRO1 - आठपहरियाछाप्लाङाना चिनारि ना चिट्ठि पावालङा फिलिप्पि खालाङ्गाङि उलिसागा बिस्वासिचि लाउङ्सा छेप्टुना॥ फिलिप्पिम्बाक् माकेडोनिया ओलोडुना रोमि छेट्राङिना ठिक् खालाङ्गा डाना॥ ना चिट्ठि पावालङा उन् खाम्बाङ्ङि ठायाना बेला छेप्टुना, हिट्नुङ् आम्टेप्मा बिस्वासिचिङा उन् बिरोध ओचोगुङ् याङ्छामा ओचाट्टुएसुना डाना॥ हिट्ना बेला फिलिप्पि माङ्पाङ्ङिगा लाउङ्सा माङ्जोना हिसिक्मा पारचार ओचोगुएट्टुना डाना॥ हिट्डेउङ् पावालङाना आड्डिक् उनिङ्ग्वा टुगेसाना॥ ना चिट्ठि छेप्माना मुलि रिङ्उम्बाक् फिलिप्पिङि उलिसागा बिस्वासिचि लोङ्सा पोए-पोए लोमाचि लाउङ्सा डाना॥ हिट्नागाँ पावाल आभोरङि ठायाना बेला ओफाबा ओहाक्टुङ् घुवार ओफाडुना डाना॥ पावालङा हिट्नागाङि याङ्छामा टाना बेला चा हिट्नागा आँट् हिट्नुङ् भोरोसा पिमा ना चिट्ठि छेप्टुना॥ पावालङा हिट्निगा बिस्वासिचि ठेलोक् लिमाना ओसाट्टोङि येसु गाड्डे डोक् मेयोक् लिमा सिकाँ चोगुचिचि॥ हिट्नागाँगा चोलाङि खिरिस्टलोक्ना साङ्गाटिम्बाक् माङ्हाङ्ङाना बारदान ए नुङ् उन्ङा माट्टुटु॥ हिट्नागाँ ना बारदान याहुदि धारमाबिधिङिगा चाडाबाडा मानाँ ओचोगुङ् ओटोगुना माखाक्॥ ना रिङ् हिट्नागाँ येसुङि ओचोगुना बिस्वासलाम्मा ओटोगुना ए॥ पावालङा खिरिस्टङि उलिसागा लाउङ्साम्बाक् माङ्हाङ्लाम्मा खुसि हिट्नुङ् हाङ्हाङ् टोगुम्टुम् पिक्सा छेप्टुटु॥ ना चिट्ठिङि खिरिस्टियान बिस्वास, आनि चोलाङि टोगुम्ना खुसि हिट्नुङ् भोरोसा टोगुम्ना बारेङि पावालङा पारचिन्दा छेप्टुटु॥ ना चिट्ठिङि पावालङा फिलिप्पिङिगा बिस्वासिचि औधि माया चोगुचिगा रिङ् ठाहा टोगुम्टुम्॥ बिसाए-सुचि चिनारि १:१-११ पावालङाना रिङ् १:१२-२६ खिरिस्टङि टोगुम्ना चोला १:२७–२:१८ तिमोथि हिट्नुङ् इपाफोरडिटास लोङ्सा योजाना २:१९-३० साट्टुरचि हिट्नुङ् खातारालाम्मा ओछेक्छेक् लिमाना रिङ् ३:१–४:९ पावाल हिट्नुङ् फिलिप्पिङिगा ओसाइबाचि ४:१०-२० आन्ते ४:२१-२३ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.