फिलिप्पि 1 - आठपहरिया1 ना चिट्ठिम्बाक् आच्याँ खिरिस्ट येसुङाना सेवा काचोक् पावाल लोक् तिमोथिलाम्मा ए॥ ना चिट्ठि आङा फिलिप्पि खालाङ्गाङिगा खिरिस्ट येसुङि उलिसागा माङ्हाङ्ङाना सोब्बे सेङ्सेङ्गा ओयाप्मिचि लाउङ्सा, हिट्नुङ् माङ्पाङ्ङिगा ओठेडोङ्चि हिट्नुङ् माङ्पाङ्ङिगा घुवार काफाबाचि लाउङ्सा छेप्टुएट्टुङ्॥ 2 आनिना माङ्हाङ् पाबा लोक् आनि टाङ्बा येसु खिरिस्टङा खानि मायादाया हिट्नुङ् हाङ्हाङ् मापिडियाक्॥ पावालङाना पोए-पोए हिट्नुङ् बिन्टि 3 जाइले आङा खानि मिट्नाँनि हिट्ना बेला खानि लाउङ्सा आङाना माङ्हाङ् पोए-पोए ठाङ्सुङ्टुङ्॥ 4 खानि सोब्बे लोङ्सा बिन्टि चोगुङ्नाँ सोरोक् आचाप् टासा बिन्टि चोगुङ्टुङ्॥ 5 पोङ्भोने खानिङा नुना खाबोर बिस्वास आचोगुम्ना बेलालाम्मा डोक् ना नुना खाबोर याप्मिचि लोमाउङ्सा आङा घुवार आफाडेट्टिङा॥ 6 माङ्हाङ्ङा खानि निङ्ग्वाङि ठिक् नुना टोॽवा उटुम् चोगुएसुए, हिट्नुङ् उन्ङा एडोक् येसु खिरिस्ट नोक्ना उङ्ना बेला हिट्ना टोॽवा चोक्मा हिडुटु नुङ् आङा बिस्वास चोगुङ्टुङ्॥ 7 खानि ख्वाप्पा लाउङ्सा खानि बारेङि आङा हिट्डे मिप्मा नुयुक्, पोङ्भोने आङा खानि आड्डिक् माया चोक्नानिगा॥ पोङ्भोने आङा हाट्ले खाम्बाङ्ङि लिङा चा आथाबा नुना खाबोर जोगाँ चोक्मा हिट्नुङ् नुना खाबोर छेम्बाना ए नुङ् पारमान् पिमाना टोॽवाङि चा माङ्हाङ्ङा आनि एक्केउ टोॽवा चोक्माउङ्सा दाया आचोगेसे॥ 8 आङा खानि टुब्माना आड्डिक् निङ्ग्वा चोगुङ्ना रिङ् छेम्बा डोक् ए नुङ् माङ्हाङ्लाउङ्सा ठाहा युङ्ग्वा, पोङ्भोने खिरिस्ट येसुङा खानि माया माचोगि गाड्डे डोक् आङा चा खानि माया चोक्नाँनि॥ 9 हिट्नुङ् खानिङा पाइले आचोगुम्ना नुङ्ना आड्डिक् याप्मा ठिबाङ्ङा आरको माया चोक्माना रिङ्ङि पोसा खाडानि नुङ् बिन्टि चोगुङ्टुङ्, हिट्नुङ् छेम्बा डोक् माङ्हाङ् खोड्डेना हिट्नुङ् पाक्उम्बाक् छेम्बाना हिट्नुङ् माहामाना हिट्ना याप्मा-याप्मा ठाहा आटोगुम्टुम्॥ 10 हिट्डेउङ् एडोक् खानिङा सोब्बे नुङ्ना ओचेट्नुना रिङ् साम्मा आहिडुम्टुम्, हिट्नुङ् येसु खिरिस्ट उङ्ना बेला खानि सुद्दो हिट्नुङ् फाट्टुर मालेगा याप्मिचि आलिसिटि॥ 11 हिट्नुङ् येसु खिरिस्टङाना बोल्लाम्मा खानि चोलाङि धारमिक्ताङाना टोॽवा चोगानुम्, ना ओचेट्नुना टोॽवा याप्मिचिङा उनिसुङ् माङ्हाङ् मान् उपिडुटु हिट्नुङ् उनिङ् ओचोन्डुटु॥ पावालङाना हारका 12 आम्भु-आन्झाचि, नाहि आचोलाङि उलिसागा ओचाफेन्गा रिङ्चिङा याप्मा याप्मिचिङा नुना खाबोर खेम्मा ओटोगुना रिङ् खानिङा चा ठाहा टोगानुम् नुङ् आनिङ्ग्वा युङ्ग्वा॥ 13 आङा खिरिस्टङाना बारेङि नुना खाबोर पारचार चोगुङ्नाँ आङा खाम्बाङ्ङि ठायाङ्ना रिङ् रोमङिना हाङ्पाङ्ङिगा ख्वाप्पा टिलिङ्गाचि हिट्नुङ् आरु याप्मिचिलाउङ्सा ठाहा युङ्ग्वा॥ 14 हिट्नुङ् आङा खाम्बाङ्ङि ठायाङ्नाँ याप्मालेङ् बिस्वासि भुम्भु-झान्झाचि टाङ्बाङा आँटि चोगुएसुचे, हिट्नुङ् माङ्हाङ्ङाना रिङ् आँटिलो उलिसाउङ् पारचार ओचोगुएट्टु॥ 15 कोइ-कोइङाम्बाक् छेम्बा डोक् उन्चि मिक् टुगाउङ् हिट्नुङ् आरु नुङ्ना याप्मा चोगुङे नुङ् निमेट्मा खिरिस्टङाना बारेङि पारचार ओचोगुएट्टु, टरो आरुङाम्बाक् उन्चि ओचेट्नुना निङ्ग्वाङा डोक् ओचोगुएट्टु॥ 16 हिट्नागा ओचेट्नुना निङ्ग्वाङा पारचार काचोक्चिङा आङा माया याङ्ओचोक्ङागा, पोङ्भोने माङ्हाङ्ङा नुना खाबोरङाना छेम्बाना रिङ् जोगाँ चोक्ङा आङा नाहि याङ्युङ्साना नुङ् हिट्नागाँ ठाहा ओटोगुएसुए॥ 17 आरुचिङाम्बाक् सोझो निङ्ग्वाङा माखाक् टरो आङा खाम्बाङ्ङि लिसाङ्नाँ झान् याप्मा याङ्छामा ओटोगुङ् नुङ् ओचाफेम्मा निङ्ग्वा ओचोगुङ् खिरिस्टङाना पारचार ओचोगुए॥ 18 जेसुकै उलियाक्, हाट्ले ओचेट्नुना निङ्ग्वा उलियाक् आथाबा ओचाफेन्ना निङ्ग्वाङा उलियाक् खिरिस्टङाना बारेङि जोसोङ् चा पारचार चोक्मा डोक् मुलि रिङ् ए॥ हिट्डेउङ् आङाम्टे हारका लिङा॥ छेम्बा, आङा हारका लिङा, 19 पोङ्भोने खानिङा आङा लाउङ्सा बिन्टि आचोगुमुङ् हिट्नुङ् टाङ्बा येसु खिरिस्टङा आपिडाना सेङ्सेङ्ना हाङ्साङा घुवार याङ्फाडाउङ् छुट्कारा टोगुङ्ना नुङ् आङा ठाहा टोगुङ्टुङ्॥ 20 आङा खोना बेला चा मोम्मासिमा उलिनिङ् चा नुङ् आङाना आड्डिक् आनिङ्ग्वा हिट्नुङ् आसा युङ्ग्वा, टरो आङा पाइले चोगुङ् गाड्डे डोक् मिकेट्ङे खिरिस्टङाना बारेङि चेक्मा कोन्ङा॥ हिट्नुङ् आङा सिङा चा, हिङ्ङा चा आचोलालाम्मा खिरिस्टङाना मान् चोगुङ्टुङ् नुङ् आङा भोरोसा युङ्सुङ्टुङ्॥ 21 पोङ्भोने आङा हिङाङे भोने खिरिस्ट लाउङ्सा हिङ्ङा, टरो सियाङे भोने चा आङा लाउङ्सा ओचेट्नुना डोक् लियुक्॥ 22 टरो ना येम्ङि आङा हिङ्माना भोने खिरिस्ट लोङ्सा ओचेट्नु टोॽवा चोक्मा हिडुङ्टुङ्॥ टरो खोनाम्बाक् ओचेट्नु लियुक्ना हिट्ना आङा माप्मा डोक् हिनिङ्ना॥ 23 आङाम्टे नागाचि इप्पोक् रिङ् सेक्मा निङ्ग्वा रिमा डोक् हिनिङ्गेट्निङ्॥ आङाउम्टे ना चोला नाडुङुङ् खिरिस्टलोक् युङ्माना आनिङ्ग्वा युङ्ग्वा, पोङ्भोने नाम्बाक् आङा लाउङ्सा आड्डिक् डोक् ओचेट्नु लियुक्॥ 24 टरो खानि लाउङ्सा भोने आङा उहिङ्ग्वाट् युङ्मा डोक् ओचेट्नु लियुक्॥ 25 टरो खानि ख्वाप्पा लाउङ्सा आझै आङा चाहाब् लिसाङ्ना रिङ् आङा ठाहा टोगुङ्टुङ्॥ हिट्डेउङ् खानिङा आचोगुम्ना बिस्वासङि खानि बोल्लेउ चोक्मा हिट्नुङ् खानि बिस्वासङि खुसि लिमा घुवार फामा आङा युङ्मा कोन्युक् नुङ् आङा छेम्बा डोक् ठाहा टोगुङ्टुङ्॥ 26 हिट्डेउङ् जब आङा खानि सोरि फेरि लिङा आङाना कारानङा खानिङा खिरिस्ट येसुङाना आझै याप्मा उनिङ् चोम्मा आहिडुम्टुम्॥ 27 मुलि रिङ्म्बाक् खिरिस्टङाना नुना खाबोर गाड्डेना खान्डुना खानि चाल चालान् लिमा कोन्युक्॥ हिट्नुङ् आङा खानि टुब्मा आप्मा चा, टुब्मा आप्निङ्चा खानिङा ठिक्ए निङ्ग्वा आचोगिउङ् ठिक्ए उदेसेङि जोम् याप्मिचिङा नुना खाबोर बिस्वास ओचोगुवाक् नुङ् टोॽवा आचोगुम्ना रिङ् खेम्मा ओटोगुङ् नुङ् निङ्ग्वा चोगुङ्टुङ्॥ 28 हिट्नुङ् खानि बिरोधिचिलोक् खोना रिङ्ङि चा किट्नेनिन्॥ ना रिङ्ङा खानि साट्टुरचि माङ्हाङ्ङा जाखाम् चोगुचिगा रिङ्ङाना पारमान् हिट्नुङ् उन्ङा खानि माहिङिना रिङ्ङाना पारमान् मापिडिटि॥ माङ्हाङ्ङा डोक् नागा सोब्बे चोगुटु॥ 29 पोङ्भोने माङ्हाङ्ङा खानिङा खिरिस्टङि बिस्वास चोक्माउङ्सा एडोक् मापिडिगा माखाक्, टरो उन्ङि याङ्छामा आङ्डानुम् नुङ् चा खानि मौका मापिडेसे॥ 30 खानिङा पाइले आङा आङ्डुङ्ना याङ्छामा आनिसुम्मे, हिट्नुङ् हाट्ले चा आङ्डेट्टुङ्ना रिङ् खानिङा आखेम्सेट्टुम्॥ हिड्डेना याङ्छामा डोक् खानिङा चा आङ्डेट्टुम्॥ |
© 2023, Wycliffe Bible Translators, Inc. and Nepal Bible Society
Wycliffe Bible Translators, Inc.