فيلِبّي 4 - كِتاب العَهد الجَّديد مِن الكِتاب المُقَدَّس

¹ عَلَشان دا، يا أخواني، إنتو الأنا بَحِبّكُم و عاوِز بِشِدَّه أشوفكُم، يا فَرَحي و تاجي، ثَبِّتو كِدا في الرَّب، يا مَحبوبين.

نَصايح

² بَطلُب مِن أَفُودِيَة، و بَطلُب مِن سِنْتِيخِي أن تَفتَكِرو فِكر واحِد في الرَّب.

³ و أسألَك إنتَ كَمان، يا شَريكي المُخلِص، ساعِد النِّسوان ديل، عَلَشان هُم إشتَغَلو سَوا مَعاي في الإنجيل مَعَ أَكْلِيمَنْدُس و باقي العامِلين مَعاي. و أساميهُم في كِتاب الحَياة.

⁴ أفرَحو في الرَّب كُلّو وَكِت. و بَقول مَرَّه تانيَه، أفرَحو.

⁵ خَلّو كُل النّاس يَعرِفو صَبِركُم. الرَّب قَريب!

⁶ ما تِتحَيَّرو في أي شي. لَكِن في كُلّو شي، خَلّي طَلَباتكُم بِتكون مَعروفَه لِلَّه، بِصَلاه و طَلَب مَعَ شُكر.

⁷ و سَلام الله، الفوق كُلّو فَهم، بِحفَظ قُلوبكُم و أفكاركُم في المَسيح يَسُوع.

⁸ و في الآخِر، يا أخوان، كُل الهو حَقيقي، و كُل الهو مُحتَرِم، و كُل الهو عادِل، و كُل الهو نَضيف، و كُل الهو مَحبوب، و كُل الهو خَبَرو كوَيس، إذا فيهو الخير، و مُستَحِق الحَمد، فَكِّرو في الحاجات دي.

⁹ الإنتو إتعَلَّمتو، و قِبِلتو، و سِمِعتو مِنّي، و شُفتو فِيني، أعمِلو بِدا. و إلَه السَّلام بِكون مَعاكُم.

شُكراً لِلهَدايا

¹⁰ أنا أفرَح بِالرَّب فَرَح عَظيم، عَشان إنتو مَرَّه تانيَه خَلّيتو بالكُم لَي هَسَّع بَعَد وَكِت طَويل. صَحيح كُنتو تَخَلّو بالكُم لَي لَكِن ما كان عِندَكُم فُرصَه تَوَرّو دا.

¹¹ و أنا ما بَقول دا بِسَبَب إحتياجي. عَشان إتعَلَّمتَ بَكون رَضيان في أي حال الأنا فيهو.

¹² أنا عارِف الإحتِياج، و أنا عارِف أعيش في كَترَه. في كُلّو شي و في كُلّو حال، إتعَلَّمتَ سِر الرّاحَه، إذا أنا شَبعان ولّا جَعان، إذا عِندي مال كَتير ولّا عِندي إحتِياج.

¹³ أنا بَقدَر أعمِل كُلّو شي في المَسيح البِشَدِّدني.

¹⁴ لَكِن عَمَلتو حاجَه جَمِيلَه لَمّا شارَكتوني في تَعبي.

¹⁵ و إنتو، يا ناس فيلِبّي، عارفين في بِدايَة الإنجيل، لَمّا مَرَقتَ مِن مَكِدونيَّه، ما في كَنيسَه واحدَه شارَكَت مَعاي تَدّيني و تاخُد مِنّي، إلّا إنتو بَس.

¹⁶ و لَمّا كُنتَ في تَسَالُونِيكِي كَمان، رَسَّلتو لَي مَرَّه و مَرَّتين لِإحتياجي.

¹⁷ أنا ما بَطلُب الهَديَه، لَكِن بَطلُب الثَّمار اليَزيد لِحِسابكُم.

¹⁸ قِبِلتَ كُلّو شي، و أنا في راحَه. أنا بِقيت مَليان مِن وَكت أخَدتَ مِن وأبفروديتس هَداياكُم الإنتو رَسَّلتوها. هي هَديَه ريحَتا طَيبَه، و ضَبيحَه مَقبولَه، اليَبسِط الله.

¹⁹ و إلَهي بيَملا كُلّو إحتياجكُم بِحَسَب غِناهو في المَجد في المَسيح يَسُوع.

²⁰ و لِإلَهنا و أبونا، المَجد لِلأبَد. آمين.

²¹ سَلِّمو عَلى كُل القِدِّسين في المَسيح يَسُوع. الأخوان المَعاي، يَسَلِّمو عَليهُم.

²² كُل القِدِّسين يَسَلِّمو عَليهُم، خُصوصاً هُم المِن بيت قَيصَر.

²³ نِعمَة الرَّب يَسُوع المَسيح مَعَ روحكُم.