ESTER 2 - SULAT KNINO BENO ALEKOT

Nasaeb bi Ester anfani kesel in fenai

¹ Tabu fauk-fauk namuni na'ko nane, maski kesel ka nato' anteni fa, mes in fe natenab piut kesel Fenai bi Wasti in mo'et ma lasi fekat le in naiti nalali neu in.

² Es nane te afainekat-afainekat le anhaumak nok kesel sin natiaba lasi tenab mese on i, “So leko nami li'feto-li'feto amasat neu ko Usi.

³ So nati' Usi ho maiti ameput-ameput bi ale propinsi pah i he sin nami li'feto-li'feto amasat oke te neki sin ok-oke neu sonaf fenai anbi Susan i. Nai Hegai, ameput le natetab nani anfani nakaf ume toko sonaf fenai, of in anpao sin ma anpanote sin humkenu.

⁴ Oke onane te, so leko Usi ho ambeti li'feto le Usi hom lomi amnesin, ma musaeba in anfani fenai on aseka kesel Fenai bi Wasti.” Kesel ansimo fainekat nane ma in nanaoba nani.

⁵ Anbi kot Susan nane anmu'i atoni Yahudi mese kanan Nai Mordekhai Nai Yair anmone, Nai Kis ma Nai Simei anmone na'ko uf Nai Benyamin.

⁶ Anheke nan Nai Mordekhai leka kesel Babel, Nebukadnezar in nis ma anbe'u Yerusalem. Anpolin Nai Mordekhai nok Nai Yoyakin, Kesel Yehuda, nok atoni mapolin bian anteni.

⁷ In nok in amaf anaet anfeto, li'feto amasat mese ma in aon leok le'uf kun, in kanan bi Ester, fun in kanan bi Hadasa. Nai Mordekhai naiti bi Ester anfani in anhoni natuin bi Ester in amaf ma in ainaf anmate nalalilen.

⁸ Leka naton nalali kesel aplenat, li'feto namfau nabuab sin anbi Susan ma bi Ester in nok sin amsa. Neki in amsa neu kesel in sonaf ma nana'at in neu Nai Hegai nakaf ume toko sonaf fenai.

⁹ Ma Nai Hegai in nekan naskek anae le'uf leka in nit bi Ester ma in anlomi in kun. Ma in anpanote namasab in human nok alekot ma anfe neune bukae le anbeti nateta nani neune. Ma oke te natnanib bi Ester neu bale alekot anesit anbi sonaf fenai nane ma in anlek li'feto hitu alek-lekot anbi kesel in sonaf he antuthae in.

¹⁰ Natuin fainekat Nai Mordekhai, bi Ester ka naton fa nak in atoni Yahudi.

¹¹ Neno-neno Nai Mordekhai in naoinson anbi eno po'an sonaf fenai he natoti neu bi Ester in amonin ma lasi sa' ka le of anbol neu in.

¹² Natuin lekat lulut, ale fenai anpanat sin ma namasab sin humkenu anbi ton mese in nanan: funan ne in nanan neki mina le anselo nok atu fomeni, ma funan ne in nanan anteni neki fomneni huma-huma le anselo nok mina fomeni bian anteni. Oke onane te li'feto mese-mese napeni sona he antam naeku nok Kesel Nai Ahasyweros.

¹³ Anbi tabu li'feto mese he antam naeku nok kesel, in nabe'i anpake bale sa' natuin in alomin kun.

¹⁴ Neki li'feto nane neu sonaf anbi fai, ma noka fa te neki in neu sonaf bian, ma Nai Saasgas es anpanat sin, in mepu es anpanat kesel in fenai kliko sin. Li'feto nane of ka nabe'i fa antam naeku nok kesel anteni, so leka kesel anlomi ma no'an nok antek in kanan.

¹⁵ Fun tabu antia neu bi Ester he antam naeku nok kesel. – Bi Ester, Nai Abihail le Nai Mordekhai amaf anaet in anfeto le Nai Mordekhai naiti nalali in anfani in anhoni kun; fun es-es le ankiso bi Ester sin nekan namneku anae le'uf kun. Leka in anao ma naeku nok kesel, bi Ester in anpake natuin lekat ma fainekat na'ko Nai Hegai, nakaf sonaf fenai.

¹⁶ Onane te sin neki bi Ester antam naeku nok Kesel Nai Ahasyweros anbi kesel in sonaf anbi fun bo', nane funan Tebet, anbi tabu in naplenat nan ton hitu.

¹⁷ In neki malinat ma alekot neu kesel anesin ale li'feto-li'feto bian. Ma kesel antao sobe mnatu plenat neu bi Ester in anakan ma naiti in anfani fenai anseka kesel Fenai bi Wasti.

¹⁸ Nalali te, kesel anmo'e fesat anaek on nanaeba bi Ester ma anhone ale ameput ma anaet sin, ma anmo'e fesat anaek nanaeba bi Ester. In naton neno snasat neu pah ok-oke ma in anbati atnatas nok athoes neu in to.

Nai Mordekhai nafetin kesel na'ko lasi maten

¹⁹ Fun anbi tabu nane naiti nalali Nai Mordekhai anfani kesel in ameput.

²⁰ Bi Ester amsa in fe ka naton fa nak in atoni Yahudi, natuin Nai Mordekhai nakain in. Bi Ester anmo'e piut natuin Nai Mordekhai on afi in fe liana ma anpanat in anbi in ume.

²¹ Anbi neno mese, leka Nai Mordekhai fe in antuthae anbi sonaf, atoni nua kesel in ameput sin, Nai Bigtan ma Nai Teres, sin anmalokin lasi he namate Kesel Nai Ahasyweros, natuin sin kan lomi fa in.

²² Nai Mordekhai in nahin sin salit nane ma in natiaba nani neu bi Ester. Bi Ester in kan pao anteni fa, mes in naton nani lasi nane neu kesel natuin sa' le Nai Mordekhai in nahin nani.

²³ Fun sin antae lasi nane ma napeni lo namneo. Atoni nua en nane naboni sin. Anmatom nok kesel in aplenat, antui nani lasi nane anbi sulat plenat in nanan.