DANIEL 2 - SULAT KNINO BENO ALEKOT

Nai Nebukadnezar in nanait

¹ Anbi fai mese, tabu Kesel Nai Nebukadnezar naplenat nan ton nua in nanai. In nanait nane naoleb in nekan, talantia in kan tup anteni fa.

² Es nanet in anboin ale aetus ma atonas, mnane ma atoni-atoni ahinet he nati' ansefi in nanait le nane.

³ Leka sin anhake nalali anbi kesel in matan in namolok nak, “Au unanai ma au nekak anole he uhin in otan!”

⁴ Sin natae anbi a'at Aram, “Amoni nai au Usif tal nabal-bal! Muton nanait nane neu kai nai, ma of haim sefi in otan.”

⁵ Kesel natae nak, “Au aiti ulali fekat le i: So hi miton nanait le nane neu kau, onane amsa nok in otan. Leka hi ka miton man fa hi of malolo ki ma au of utselab hi ume.

⁶ Mes leka hi mibe'i, of au fe ani neu ki blua ma bale amasat ma of au fe neu ki toko alekot. Es nanet, tabu le i miton kau nanait nane nok in otan!”

⁷ Es nanet sin natae anteni nak, “Alekot Usif, leka muton muhunun kai ho nanait le nane, nalali te nabe'i haim sefi in otan!”

⁸ Leka kesel in nen lasi nane in natae nak, “Namneo onle sa' le au utenab ulali. Him polin tabu son-sona natuin hi mihin au tenab neu of au kas ki oke leka hi ka miton fa neu kau nanait le nane in otan.

⁹ Him nek mese he nati' mipoiba kau ma amfuli kau nok salit he nati' hi mife'un au fekat. Es nanet miton kau au nait le nane, ma of au uhin nak of nabe'i him sefi in oten.”

¹⁰ Ale ahinet nane natae nak, “Anbi pah pinan le i anfun natef kan mu'i fa atoni mese le he naton ho salit le nane usi. Ma fe kan mu'i nit fa kesel mese, maski in anaet ma apinat antoti lasi le namnes onane na'ko ale aetus ma atonas, mnane ma atoni-atoni ahinet anbi in sonaf.

¹¹ Au Usif, hom lomi lasi mese le mafena. Kan mu'i fa atoni mese he nati' natis nani so kalu smanaf-smanaf amates, mes sin ka namaika fa anbi mansian sin atnanan.”

¹² Leka kesel in nen lasi le nane in nato' ma in naplenat he nati' namate ale atoni ahinet anbi Babel.

¹³ Ma ankakan plenat le nane ma ale atoni ahinet, leko Nai Daniel ma in soba sin nami sin he nati' namate sin.

Uisneno naton nanait le nane nok in otan neu Nai Daniel

¹⁴ Ma Nai Daniel naeku nok Nai Ariokh, nakaf apaot neu kesel, le naloitan nalali he nati' namate sin.

¹⁵ Nok nek amnebet Nai Daniel naton neu in, nansa' kesel napoitan plenat amafenat nane. Nai Ariokh naton Nai Daniel neu sa' le anbol nalali.

¹⁶ Nok manapat Nai Daniel in nao neu kesel in matan ma antoti hen fe tabu sona neu in he nati' in ansefi nanait le nane in otan.

¹⁷ In totis nane natiabon, es nanet Nai Daniel anfani neu ume ma naton ale lasi neu Nai Hananya, Nai Misael ma Nai Azarya.

¹⁸ In anlenu sin he nati' anonen neu Uisneno abit neno tunan, he nati' In nek sin ma naton lasi tolo' na'ko nanait nane. Nok lasi nane of ka namate fa sin.

¹⁹ Anbi fai le nane amsa Uisneno naton sin lasi tolo' nane neu Nai Daniel anbi mnitas mese. Es nanet Nai Daniel anpules Uisneno abit neno tunan nak,

²⁰ “Uisneno neno nane ahinet ma abe'it amatanit kun, in mapules tal nabal-bal!

²¹ In es anlek ma anlulu nalali etin ma tabu, In es natetab ma namepan ana' plenat. In amsa es anfe nani nek ahinet, ma In es nasanut tenab alekot.

²² In es naton lasi le natolo'on, In es nahin ale lasi le anbol anbi mesokan. In nahenu nok pina meusine.

²³ Koi, Uisneno le au na'i sin nausi neune, au pules ma uliatas Ko. Natuin Hom fe neu kau hine ma be'it matani. Ho mutae mulali hai totis. Ma han taes neu kesel Ho muton mulali neu kai.”

Nai Daniel natonan ma ansefi nanait nane

²⁴ Nalali onane te Nai Daniel in nao neu Nai Ariokh le anlenu nalali in he nati' namate ale atoni ahinet anbi Babel. Nai Daniel nanolok nak, “Kais mumate ale atoni ahinet nane. Ho mok kau he au hake anbi kesel in matan, natuin au he utonan hit usif nanait le nane in otan.”

²⁵ Nok manapat Nai Ariokh neki Nai Daniel anhake anbi Kesel Nai Nebukadnezar in matan ma in namolok nak, “Ho ate kau au utef anbi ale atoni Yahudi mapolin nane sin atnanan atoni mese le nabe'i naton au Usif ho nanait nane in otan.”

²⁶ Es nanet kesel nak neu Nai Daniel le antek nak Nai Beltsazar nak, “Nabe'i ka he ho muton neu kau au nanait ma in otan nane?”

²⁷ Nai Daniel natae nak, “Au Usif, kan mu'i fa atoni ahinet, mnane, aetus ma atonas ai ahin afkun le he naton lasi nane neu ko Usif.

²⁸ Mes anbi neno tunan anmu'i Uisneno le of naton ale lasi tolo', ma In naton nalali neu au Usif sa' le of anbol anbi neno amunit. Tabu le i, amfe taub sona neu ho ate kau he au Sefi nanait ma mnitas le hom simo anbi tupas le nane.

²⁹ Anbi tabu au Usif ho fe amtup, au Usif ko munanai neu tabu amnemat. Uisneno es naton ale lasi tolo' ma naton neu au Usif ko sa' le of anbol.

³⁰ Lasi tolo' nane naton nalali neu ho ate ka natuin fa ho ate kau uhine nesin sekau am sekau amsa, mes he nati' au Usif ko muhin nanait nane in otan ma muhin au Usif ho nek lomit.

³¹ Le i mnitas le au Usif ho mit mani: Anbi ho matam Usif anmu'i fatu ma hau mahuma mese. Fatu ma hau mahuma nane naek kun ma nalim mes in human nane nahakataun.

³² In nakan nane anmo'e na'ko mnatu nesaf, in basan ma in niman anmo'e na'ko noni muti, in atnanan ma in bokon anmo'e na'ko noni molo,

³³ in sahan na'ko besi ma in haen bian na'ko besi ma bian na'ko afu lite.

³⁴ Leka au Usif ko, ho fe amkiso, fatu naek mese na'ko kefan in tunan le atoni kan poe nani fa, antutu hau ma fatu nane neu in haen le na'ko besi afu lite nane, tal naskuku.

³⁵ Anbi tabu nane hau ma fatu mahuma nane natsel ma anfani besi le nasitbon, afu lite, niti molo, noni muti ma mnatu le naskuku onle afu anbi bale hoi ane kase anbi fauk nais. Leka anin anfu of natpeneb nani in askukun, talantia kan mu'i fa sa'-sa'. Mes fatu le natseleb fatu ma hau mahuma nane of anfani tubu naek ma nahenu pah pinan.

³⁶ Au Usif ko ho nanait esle' nane, ma tabu le i ho ate kau of au sefi ko in otan.

³⁷ Au Usif ko hom fani kesel anbi ale kesel, ho es amu'i kum kuasat. Uisneno abit neno tunan anfe nalali ko plenat le i nok kuasat, be'it ma matani ma kan anaek.

³⁸ Anmo'e au Usif anfani kuasat neu pah pinan in aon bian le anmu'i amaika namfaun ma neu ale kolo ma ale muif bian. Au Usif ko es amfani nakaf amnatu na'ko hau ma fatu mahuma le nane.

³⁹ Mes leka au Usif ko ho plenat namsopu ana plenat bian of anbol mes of ka namnes fa nok ho plenat. Nalali te of anbol anteni plenat no tenu le naleta nok noni molo na'ko hau ma fatu mahuma nane, le of ankuas pah pinan anfun natef.

⁴⁰ Namuni na'ko nane of anbol anteni ana' plenat no ha le in matanin nane on besi. Ma of onle besi le nale'un ma naskuku ale sa'-sa', onane amsa ana plenat no ha le i of naskuku ma nale'un ale ana' plenat bian.

⁴¹ Haef ma kluluf na'ko hau ma fatu mahuma in haen le aon bian na'ko auf lite ma aon bian na'ko besi nane, naton nak anbi neno amunit plenat nane of anbation. Plenat nane anmu'i in matanin amsa natuin in auf lite nane maselo nok besi.

⁴² Haef kluluf bian na'ko besi ma bian na'ko auf lite in otan nak of anmu'i ana' plenat le nabe'i ma anmatani mes of anmu'i ana' plenat le anole ma anlimae.

⁴³ Besi le anselo nok auf lite nane anfani takaf nak plenat nane of namepnon nok lasi selo anbi matsaos mes haet nane son-sona, onle auf lite le kan ki' fa anbi besi.

⁴⁴ Anbi tabu ale kesel nane naplenat, Uisneno abit neno tunan of nahakeb plenat mese le anhake tal nabal-bal ma uf na'ko me-me of ka natselab fa in. Ana' plenat nane of naskuku ale ana' plenat bian.

⁴⁵ Ai ho ka mit mulali fa au Usif nak atoni kan poe fa fatu naek le antuil na'ko kefan in tunan ma antut naskuku fatu ma hau mahuma na'ko besi, noni molo, afu lite, noni muti ma mnatu nane? Uisneno le naek kun nane naton nalali neu ko au Usif ale lasi le of anbol. Nanait nane nabe'i masimo ma tonas ho ate kau le i namneo.”

Nai Daniel ansimo seunbanin na'ko kesel

⁴⁶ Es nanet Kesel Nai Nebukadnezar anli'tu anbi Nai Daniel in matan ma anfe plenat he nati' sin naupab Nai Daniel ma natulu neune fua tulu ma tulu-tulu bian.

⁴⁷ Kesel namolok nak, “Namneo, Daniel, ho Uisneno nane naek kun nesin ale uisneno teta. In es ankuas ale kesel, ma naton ale lasi tolo'. Au utuin lasi nane natuin hom sefi mulali lasi tolo' nane in otan.”

⁴⁸ Nalali te kesel anfe neu Nai Daniel toko amnanut, ma anfe neune tulu tnatas alekot namfau, ma naiti in anfani Kumlol Babel, ma naiti in amsa anfani atopus afinit neu ale afainekat anbi sonaf in nanan.

⁴⁹ Mes natuin totis na'ko Nai Daniel, kesel nana'at plenat Babel nane neu Nai Sadrakh, Nai Mesakh, ma Nai Abednego, ma Nai Daniel in namaika nabalah kesel in sonaf.