Jeremaya INTRO1 - Wëël JwøkLuubö Mo Cäänö Kaper Wëël Jeremaya Kanya poot Jeremaya ni poot thiinh, beeye kanya ö Wuuö Jwøki na cwøl eni nee luum Wuuö Jwøk købe jï jø Juuda ni beege jø poge. Kanya ö Wuuö Jwøki na cwøl Jeremaya, Wuuö Jwøk aköö jïre, «Ni dïcäŋi, ïïna mooa ki teek ki man køpï luumma dëët akwöm mo wïth juurre, ki dëët akwöm mo nyeye, man näk mo geni cööda wøk, ni keeth geni, ni raany geni, ni nyak geni; ni cäŋ ge tïïyö ni teek, ni këël tietge piny.» (1:4-10) Wëël Jeremaya cäänö kiper bëëtö mar Jeremaya, ni beeye mana ö Jeremaya na jïëc cwödö mar Wuuö Jwøk ki gø, ki mana køp luum Wuuö Jwøk jï jø poge, ki jï wïth juurre. 'Ba luubö mana cïp Wuuö Jwøki jï Jeremaya, beeye luubö mano købe døc jï jø poge, ni beege nyeye moge, ki dïbwöthe moge, ki dïlämme moge, ki nyïïkuk Jwøk moge, ki jï jø poge bëët. 'Ba kanya ö Jeremaya na køp luum Wuuö Jwøk yie, beeye yïth nïra beet nyec Juuda moa na abïïc na näk aŋuudi kanya bëëtge ni ŋati man nø bëëde na nyeya; ni nyeye moøgø beege nyeya ma Jöcaya, ki nyeya ma Jeyöakac, ki nyeya ma Jeyöakëm, ki nyeya ma Jeyöakin, ki nyeya ma Cëdëkiya. Manøgø atägö yïth cwiiri ma pïëraŋween kanya bëëde ni pääny marge ma Jerucalem poot kär raany jø lenynyi mo Nabukedenecör nyeny Babiløn. Wëël Jeremaya thuwø cäänö kaper luum gïïa tägö kanya ö jø lenynyi mo Nabukedenecör ni raanyge Jerucalem, ni 'kälge jiy ki jø Juuda møga ni kïthge geni Babiløn, ni mak ge ka tøŋ. Luubö mana cïp Wuuö Jwøki jï Jeremaya nee købe, pälle bäre beeye ki man kööm jø Juuda, ni eni jääla geni, kiper mana kweerge ki man wïnyge luum Wuuö Jwøk, ni kweerge ki man ba wecge raay moge. 'Ba kiper mana kweerge, Jeremaya luup mo ena nyïm akøbe man näk mo jø leny mo Babiløn Jerucalem makge maaø ni raanyge gø. 'Ba Jeremaya abëëdö ni cwïnye opädhö døc ki man køp luubö manøgø jï jø poge; 'ba gïna tägö luum Wuuö Jwøk atïmö ni bëëdö ni gwenni cwïnye ni caala maac mo liel, ni ba løny jïre ki man kan gø cwïnye. (20:8-9) 'Ba ki kwör møøk ki ri luubö mana køp Jeremaya, da luubö mo wëëga bäät jiy nithïk, ni beeye luum Wuuö Jwøk mana caare ki man mooc jiye ki bëët-mëër ki ŋäädhe mo ena yi nyïm man näk mo geni duue duuö ki Babiløn paana kïth geni yie ki tøŋ, ni duu geni poge. (29:10-14) Jeremaya luubö mana caan Wuuö Jwøki, ni beeye luubö mo nyään mano tuude ki jiye, akøbe ki man ö Wuuö Jwøki ni göör ciik moe yïth cwïny jiye, ki man wec gïïa bacge. (31:33-34) Jeremaya, eni patha nyikuŋ Jwøk mo yïth jiy met ki gø. 'Ba ki køør luubö mana käl baŋ Wuuö Jwøk na købe, jiy mo thööth amännö ki eni, ni ö jiyi møøk røk dïbwöthe ni tïmge ni ge manynya 'näk ki eni. Nyeya aciel, ni beeye nyeya ma Jeyöakëm, wëëlö mana näk luup moa car Wuuö Jwøki jï Jeremaya ogöör piny yie, aleeŋ yi maac. (36:11-26) Jeremaya ena bëëdö ni nyïïawäädi moe beege jiy mo nøk keerge. Ki røk nyïïawäädi moe beeye nyen ma nyï Ithiöpia mo nyeŋŋe Ebet-Melek, ŋata käl Jeremaya wøk ki cer thøø (38:4-13), ki Baruk ŋata ŋäcge cwïnyge ki gø, ni wø bëëdö ki eni ciel, na göör luup piny moa caane, eni na nyikuŋ Jwøk. (36:1-32) Luup moa no ogöörö yi wëël Jeremaya beege ii: Kanya ö Wuuö Jwøki na cwøl Jeremaya (Tielø 1:1-19) Kanya ö Jeremaya na køp luup mo Wuuö Jwøk yïth nïne moa beet Jöcaya, ki Jeyöakac, ki Jeyöakëm, ki Jeyöakin, ki Cëdëkiya, ni gena nyec Juuda (Tiel 2:1—25:38) Kanya ö Jeremaya na caan gïïa tägö ri bëëtö mare (Tiel 26:1—45:5) Luup ajäla moa caan kiper wïth juurre møøk (Tiel 46:1—51:64) Kanya raany Jerucalem (Tiel 52:1-32) ø |
© The Bible Society of Ethiopia
Bible Society of Ethiopia