Matthieu 2 - Ajie New Testament

Pâi Pa Gaamëë Cér̂é Pwa Na Ka Rhûû Ièsu

¹ É wê ër̂i Ièsu rö Bétéléma rö Juda, rèi pâr̂â nédaa i Héroda ör̂ökau, tö rhûû, wè cér̂é bör̂i pwa na pâr̂â mâgöi, wè cér̂é mi xè-ye-a na Iérusalèm,

² cér̂é bör̂i cêmè vi ërëwaa, êr̂ê: «Âri kâmö ré é ër̂i-e cè ki ör̂ökau i pâi xè Juda? Wè gèvé wê tö rhûû mi xè-ye-a âr̂âwir̂è xi-e, wè gèvé wê pwa mi na ka tâ nôô yè-è.»

³ Na wê tö pwêr̂ê na Héroda ör̂ökau, na vi wâré mâ wâré na ce, cér̂é pâi xè Iérusalèm wânii.

⁴ Na bör̂i kâ vèâi wânii na ce pâr̂â kâmö paxa vi kwéjî rai pâi paxa nâânévâ mâ pâr̂â kâmö ré vi yu pèci né névâ, na bör̂i ërëwaa-r̂é na ce, êr̂ê: “É ër̂i Kérisö rö-wè?”

⁵ Cér̂é bör̂i êr̂ê yè-è, êr̂ê: «Tö Bétéléma rö Juda cè ki ûr̂û ka yu i mâ' xiréé pérövéta, êr̂ê:

⁶ “Gèi Bétéléma, névâ rö Juda, Gè da yar̂i aau rai paxa winô rö Juda; Nè yè mâ pwa rö pwar̂a-i na kâmö ka vi winô, Nè yè mâ vi na ka ër̂i pâr̂â kâmö xi-nya rö Israèl.”»

⁷ Héroda wè na wê cowa aʼyè uyûi pâr̂â mâgöi, na tâ pâwir̂i wa nédaa né ké tö vèa i âr̂âwir̂è.

⁸ Na bör̂i tùr̂ùwaa-r̂é na Bétéléma, na bör̂i êr̂ê yè-r̂é, êr̂ê: «Vèr̂i na gëve na ka mèyè-è nô né o yar̂i, gëve bör̂i pwa yèr̂i-e, mâ êr̂ê yè-nya tëë, cè göi vèr̂i bar̂ee na ka tâ nôô yè-è.»

⁹ Cér̂é wê pwêr̂ê nô i ör̂ökau, cér̂é bör̂i wê vi tö rhûû âr̂âwir̂è ré cér̂é wê tö rhûû mi mâ' xiréé xè-ye-a, wè na vi baayêr̂î némèè-r̂é, cêmè rö ö kââ-ré na tö vër̂ëë yè o yar̂i, na bör̂i tömâ rö-i.

¹⁰ Cér̂é tö rhûû âr̂âwir̂è, cér̂é bör̂i vi or̂o vè kau.

¹¹ Cér̂é bör̂i pwa ru rö mwâ, cér̂é vi tö rhûû o yar̂i mâ Maria pâni-e, cér̂é bör̂i rhawir̂i-r̂é mâ pè kau-é, cér̂é bör̂i cîî mwâ nékwêêr̂ê-r̂é, mâ nââ yè-è pâr̂â kwââvâr̂â xé-r̂é, mwâné mii mâ borhêê mâ muro.

¹² Na wê cowa pè bwayûi-r̂é na Bâô rö ngëxë, êr̂ê, koa yè vi tëë na pwar̂a Héroda, cér̂é bör̂i vi a mwâr̂â na névâ xé-r̂é rö-i dèxâ wêyê.

É Ör̂ö Na Aigupito

¹³ Cér̂é bör̂i wê vi, tö rhûû, na bör̂i tö vèa yè Ioséfa na angéla i ör̂ökau rö ngëxë, na bör̂i êr̂ê yè-è êr̂ê: «Tömâ rua, mâ pè vèr̂i o yar̂i mâ pâni-e, mâ ör̂ö xar̂a-r̂u na Aigupito, mâ tö-i cêmè rèi ö nédaa ré gö yè mâ pè bwayûi-i rèi, wè nè vi na Héroda na ka mèyè o yar̂i cè ki yö vè mii-e.»

¹⁴ Na bör̂i tömâ rua na ce, mâ rhèè o yar̂i mâ pâni-e tèi bwê na Aigupito.

¹⁵ Na bör̂i tö-i kwéyë rua rèi ö nédaa ré na mé rèi na Héroda, na bör̂i yexèvè ö nô ré na êr̂ê mâ' xiréé na ör̂ökau, wêyê na pérövéta, êr̂ê: «Gö wê cowa aʼyè o xi-nyâ mi xè Aigupito.»

Ké Yö vè mii Pâr̂â O Yar̂i

¹⁶ Na wê tâwai na Héroda, cér̂é vi aʼnévua yè-è na pâr̂â mâgöi, na bör̂i rhôê vè kau mâmâ, na bör̂i kâ vè târi ké yè vi yö vè mii pâr̂â o yar̂i wânii rö Bétéléma, mâ pâr̂â wêê mwâ wânii ka tö vè ubwa, na bör̂i rhavûû rö-i cî kani ka kaar̂u na nédö xé-r̂é, na bör̂i a cêê yè pâr̂â o yar̂i aau, cè ki ûr̂û rèi ö nédaa-ré na ërëwaa e mâ pâr̂â mâgöi rèi na ce.

¹⁷ Na bör̂i yexèvè na ké êr̂ê i Iérémia pérövéta, êr̂ê:

¹⁸ «É pwêr̂ê mêr̂ê tââ rö névâ rö Rama Mâ tââ yimémé mâ vi nénââwêr̂ê vè kau, Wè Rakéla, wè na tâârùù pâr̂â pâlè-è, Na bör̂i viö rai tââmêr̂ê, wè na wê yèri-r̂é röi.»

Na Rhöö É Mi Tëë Xè Aigupito. Pèii Mé I Héroda

¹⁹ Na wê mé na Héroda, tö rhûû, wè na bör̂i tö vèa yè Ioséfa na angéla i Ör̂ökau rö ngëxë rö névâ rö Aigupito.

²⁰ Na bör̂i êr̂ê yè-è, êr̂ê: «Tömâ rua, mâ pè vèr̂i o yar̂i mâ pâni-e na névâ rö Israèl, wè cér̂é wê mé na pâi ré vi mèyè mâ o yar̂i cè ké-r̂é yö vè mii-e.»

²¹ Na bör̂i tömâ rua, mâ pè o yar̂i mâ pâni-e, mâ vi na névâ rö Israèl.

²² Aè na bör̂i pwêr̂ê na ce, êr̂ê, na ör̂ökau xè Juda na Arékélao, pè bawi Héroda pevaa xi-e, na bör̂i bar̂a rai vi nai, wè na wê cowa ké pè bwayûi-e rö ngëxë, na bör̂i vi teyâ na ce na ékar̂aè rö Galilé.

²³ Na bör̂i pwa rö dèxâ névâ ré néé-é na Nazarèt, na bör̂i tö-i cè ki yexèvè pâr̂â nô ré cér̂é êr̂ê mâ na pâr̂â pérövéta, êr̂ê: «É yè ye néé-é, êr̂ê, wi xè Nazarèt.»