Jacques 5 - Ajie New Testament

Ké Yakoa Yè Pâi Pa Kigör̂ödiwi

¹ Âri-ve pa kigör̂ödiwi! Tââ vè kau na gëve xè-i pâr̂â bwêêpë ré yè pwa yèr̂i-ve.

² Na wê bo na pâr̂â lèèwi xe-ve, aè na ùr̂i na pâr̂â mêr̂ê-ve.

³ Na wê pee na mwâné mè xe-ve, aè nè yè yù vè vee i-ve na wêr̂ê-ê, mâ nè yè mâ öi pie-ve na ûr̂û kêmör̂u. Gëve wê cowa ka vèâi pâr̂â lèèwi xe-ve tèi pâr̂â nédaa ka taadè!

⁴ Tö rhûû na vi kââr̂â i-ve rua na pè yadii i pâr̂â kâmö ré wakè vi yiur̂u döwöö xe-ve, wè gëve kërhùr̂ùù rai-r̂é, na bör̂i yexèvè rö duö böödê Ör̂ökau né Sabaot na mêr̂ê aʼ i pâr̂â kâmö pa vi yiur̂u.

⁵ Gëve wê cuè e rö-a bwêê jë, mâ waa rhî vè e i xe-ve, mâ vi or̂o, na bör̂i kiè na pâr̂â pwéé-ve rèi nédaa né vi yö vè mii.

⁶ Gëve wê cowa rhôôr̂u vè yèri, gëve wê cowa yö vè mii kâmö ka târi ka da mör̂ö yè-ve.

Kièo Vè Mwââ Mâ Pwaér̂ö

⁷ Tö ökâré pâ kaavèâi-nya mwêê, târâdâ na gëve kwéyë rua na ki pwa tëë na Ör̂ökau. Tö rhûû ö kâmö ré mar̂a, wè na vi târ̂î pè döwöö xè-i mi néjë, wè na târ̂î tâdâ ké yè kwa baayê xi-e.

⁸ Na e na ki gëve tö vi târâdâ bar̂ee na gëve, mâ pè mör̂ö wêê nénââ xe-ve, wè na wê tö vè ubwa na ké yè pwa i Ör̂ökau.

⁹ Pâ kaavèâi-nya mwêê, koa yè vi kââr̂â i dèxâ mâ dèxâ, cè ki mâ da rhôôr̂u-ve. Tö rhûû kâmö ka vi rhôôr̂u, wè na tömâ rö pwar̂a mèö mwâ.

¹⁰ Pâ kaavèâi-nya mwêê, tâ néxâi pâr̂â péröféta vè dâ yè-ve rö-i bwêêpë mâ vi pè mör̂ö, wè pâr̂â kâmö ré êr̂ê nô rö-i néé Ör̂ökau na cér̂é.

¹¹ Tö rhûû, gèré êr̂ê, êr̂ê, na kau mâmâ na ko-r̂é pâr̂â paxa bwêêpë xar̂a târâdâ. Gëve wê tö pwêr̂ê nô né ké pè mör̂ö-è i Iobu, mâ mèèwâ-ê ka e ré na nââ yè-è na Ör̂ökau, wè na vi rhâri xè-i vi kââwaa mâ vi méar̂i na Ör̂ökau.

¹² Pâ kaavèâi-nya mwêê, ö kââ-ré ka vi kwéjî, êr̂ê, koa yè vi kîbô mâ êr̂ê nékö mâ bwêê jë, mâ dèxâ kââ. Aè na e na ki mâ êr̂ê rö, üüwa, üüwa, mâ ké yè êr̂ê rö, aè, aè, koa wè-ve bèi rö yerii.

¹³ Na wêr̂êi, na wii na dèxâ rai-ve ka tö i bwêêpë? Na e na ki pwaér̂ö na ce. Aè na wii na kâmö ka vi or̂o? Na e na ki rhe pè kau Bâô na ce.

¹⁴ Na wii na kâmö ka pèii rai-ve ra? Na e na ki mâ aʼyè pâi béâr̂i rö-i Ékalésia cè ké-r̂é pwaér̂ö vè ki-e, mâ ôâ-ê xè-i jâr̂â élaiö rö-i néé Ör̂ökau.

¹⁵ Wè nè yè pè mör̂u kâmö ka pèii na vi pwaér̂ö rö-i tâ néwèi, mâ nè yè mâ' pè tömâ-ê na Ör̂ökau; aè nè yè wê waa pâr̂â nô ka yaané, nè yè bör̂i cöö rai-e na ce.

¹⁶ Tö ökâré vi êr̂ê vèa nô ka yaané xe-ve yè dèxâ, mâ pwaér̂ö na dèxâ vè ki dèxâ cè ke-ve mör̂u. Na wii na âwâné vi pwaér̂ö mör̂ö i kâmö ka târi.

¹⁷ Élia, wè kâmö ka virù gèré-é, na bör̂i pwaér̂ö wapaur̂u cè ki da kwa, na da bör̂i kwa i ö néjë rèi karir̂i nédö mâ kanii na ma rhaaxâ var̂ui.

¹⁸ Na bör̂i pwaér̂ö tëë na ce, na bör̂i koa mi xè nékö, na bör̂i tuö na pâr̂â êê ara rö néjë.

¹⁹ Pâ kaavèâi-nya mwêê, nè yè vi mür̂ü na dèxâ rai-ve rai avâr̂i, nè yè bör̂i aʼvè tëëtëë é tëë na dèxâ,

²⁰ na e na ki yè tâwai na ce, êr̂ê, ö kâmö ré aʼvè tëëtëë kâmö ka yaané mâ pè xi-e rai wêyê na vi mür̂ü rö-i na ce, wè na pè mör̂u dèxâ ko rai yerii, mâ na tawarui pâr̂â yaané ka pôr̂ô yéyé.