Jacques 2 - Ajie New Testament

Koa Yè Tâ Néxâi Yè Wêê Mèè Kâmö

¹ Pâr̂â pâ kaavèâi-nya mwêê, koa yè tâ néxâi wêê mèè kâmö, rö ké tâ néwèi xe-ve yè Ör̂ökau xé-ré Ièsu Kérisö ka rhîrhér̂é.

² Wè nè yè wê vi ru wa vi kâ vèâi xe-ve na dèxâ kâmö ka wii na âyù mèè â mwâné mii mâ ka cur̂i mêr̂ê ka dö rhî, nè bör̂i vi ru bar̂ee na dèxâ kâmö ka rhauadè xar̂a jöö cur̂i,

³ gëve yè bör̂i rhîâgür̂ü kâmö ka cur̂i mêr̂ê ka e, mâ êr̂ê yè-è: «Cuè ria rö ka e-a!» Aè gëve yè êr̂ê yè kâmö ka rhauadè, êr̂ê: «Tömâ na gèi rö-ré, töwè na ki gëve êr̂ê, cuè wîr̂î ria rö kavèè duö köwi-nya xè ria!»

⁴ Na wêr̂êi, gëve da rhî vè dö kââ dèxâ kâmö rai dèxâ, aè gëve da pâr̂â paxa yè vi rhôôr̂u vè téé rö pâr̂â wêê nénââ xe-ve?

⁵ Pâr̂â pâ kaavèâi-nya ka dö wêê nénââ xi-nya mwêê, tö pwêr̂ê na gëve. Na wêr̂êi, na da pâbir̂i na Bâô pâr̂â paxa rhauadè rö-a bwêê jë, cè ké-r̂é kigör̂ödiwi i lèèwi rö-i tâ néwèi mâ vi ye nôâ yè-r̂é mwâcir̂i ré na êr̂ê baayê mâʼ yè pâr̂â paxa tâ néwèi-e?

⁶ Aè gëve dè pè vè yar̂i pâr̂â paxa rhauadè! Na wêr̂êi, na da pâr̂â kâmö paxa kigör̂ödiwi pa waa vè yaané-ve mâ pa yörhèè-ve na mwâ vi rhôôr̂u nô?

⁷ Na wêr̂êi, na da cér̂é ré aʼvè yaané néé ka e ré é ye néé-ve i?

⁸ Rhaaxâr̂ö gëve yè pwêr̂êwaa mââyöö ka vi kwéjî, na ûr̂û ka yu, êr̂ê: «Gè yè méar̂i kâmö ré tö vè ubwa i ûr̂û-i, gëve bör̂i dè waa nô ka e.»

⁹ Aè gëve yè vi tâ néxâi wêê mèè pâr̂â kâmö, gëve bör̂i dè waa nô ka yaané, aè na rhôôr̂u-ve na mââyöö êr̂ê, gëve pâr̂â paxa tar̂a kwéjîr̂i mââyöö.

¹⁰ Wè ö kâmö ré yè pwêr̂êwaa pâr̂â mââyöö wânii, na bör̂i tar̂a kwéjîr̂i rö rhaaxâ, na bör̂i ûr̂û ka rhau tar̂a kwéjîr̂i röi.

¹¹ Wè ö ce ré êr̂ê: “Koa yè cuu pâr̂â”, né êr̂ê bar̂ee êr̂ê: “Koa yè vi yö vè mii”. Ökâré gè yè da waa nô ka yaané, na gèi yö vè mii rö, gè bör̂i kâmö ka tar̂a kwéjîr̂i mââyöö.

¹² Na ki gëve êr̂ê nô, töwè na ki gëve waa nêr̂ê, na e na ki gëve ûr̂û pâr̂â pa é yè rhôôr̂u-r̂é xè-i mââyöö né târi yè kâmö.

¹³ Wè ö kâmö ré da vi méa, é yè bör̂i da méar̂i-e rö ka vi rhôôr̂u. Wè nè vi êr̂ê ki-e na vi méar̂i rö ka vi rhôôr̂u.

Tâ Néwèi Mâ Pâr̂â Nêr̂ê

¹⁴ Pâ kaavèâi-nya mwêê, ö jië na pè kwê na ki êr̂ê na dèxâ kâmö, êr̂ê: “Na wii na tâ néwèi xi-e, aè na da wii na nêr̂ê rö pwar̂a-è? Na wêr̂êi, na tâwai na vi tâ néwèi-ré, ké yè pè mör̂u-é?”

¹⁵ Nè yè vâr̂â bwar̂i na dèxâ kaavèâi-i, na ki béé ër̂i wi, na ki kür̂ü-i, nè bör̂i yèri ki-e êê ara ka pâr̂i nédaa,

¹⁶ nè yè bör̂i êr̂ê yè-è na dèxâ rai-ve, êr̂ê: “Vèr̂i xar̂a aʼvui, mâ pixê, mâ wê kiè, aè gëve da nââ yè-è rö dèxâ kââ ka yè pâr̂i kar̂ö-è, nè bör̂i jië na ka tâ mwér̂é xè-i?”

¹⁷ Na ûr̂û-ré na tâ néwèi, wè na ki da tö vè rhaaxâ pâr̂â nêr̂ê, na bör̂i wê dè mé xè xi-e.

¹⁸ Aè nè yè êr̂ê na dèxâ kâmö, êr̂ê: «Na wii na tâ néwèi xi-i, aè gènyâ, wè na wii na pâr̂â nêr̂ê-nya.» Êr̂ê vèa yè-nya waanawê tâ néwèi xi-i ré yèri nêr̂ê rö-i, aè gö yè dè êr̂ê vèa yè-i na gènyâ tâ néwèi rö-i pâr̂â nêr̂ê-nya.

¹⁹ Gè cëi êr̂ê, rhaaxâ rö Bâô; na bör̂i dè e-ré, cér̂é dè cëi bar̂ee na pâr̂â awir̂è mâ cér̂é keexer̂e.

²⁰ Kâmö ka bwir̂i éé, gè da bar̂i tâwai êr̂ê, na döwi na tâ néwèi na ki yèri nêr̂ê-ê?

²¹ Na wêr̂êi, é da aʼvè târi Abérahama, pevaa xé-ré, xè-i pâr̂â nêr̂ê-ê rö ka nââ Isaka, o xi-e vè kwââvâr̂â rö bwêêwé kaa yâmar̂a?

²² Gè tö rhûû, wè cur̂u waa nêr̂ê vè rhaaxâ na tâ néwèi xi-e mâ pâr̂â nêr̂ê-ê, aè cér̂é yexèvè kwéyë tâ néwèi xi-e na pâr̂â nêr̂ê-ê.

²³ Na bör̂i yexèvè na nô ré é yu, êr̂ê: «Na tâ néwèi yè Bâô na Abérahama, é bör̂i nââ ö kââ-ré cè ki kââ né ké yè aʼvè târi-e?» É bör̂i ye néé-é, êr̂ê, kâmö ka vi wa ru Bâô.

²⁴ Tö ökâré gëve wê tâwai, êr̂ê, é aʼvè târi kâmö xè-i pâr̂â nêr̂ê, aè na da xè-i rö tâ néwèi.

²⁵ Dèxâ, é da xa aʼvè târi Rahaba, bwè kui dö wêyê xè-i pâr̂â nêr̂ê-ê, rö ka cëi xi-e duö kâmö dua vi rhâwaa, na bör̂i kâyâi-r̂u tëë rö-i dèxâ wêyê?

²⁶ Wè na ûr̂û ké wê mé i kar̂ö, na ki yèri ko, na ûr̂û-ré bar̂ee na tâ néwèi, wè na wê mé na ki yèri nêr̂ê-ê.