Galates 2 - Ajie New Testament

Paulo Mâ Bör̂i Aposetolo

¹ Aè tèi nédèè pâr̂â nédö ka pârör̂ö na ma kavùè, wè gö vi tëë na Iérusalèm gövu Barabas, aè gö aʼyè bar̂ee Tito.

² Aè gö vi wa dèxâ êr̂ê vèa. Gö bör̂i wê pèri yè-r̂é ö vi rherhî ré gö vi vaa i yè pâi pa dö töö, mâ gö pèri vidù bar̂ee yè-r̂é paxa mâʼ na rhenô né-r̂é, koa-wi bwir̂i kè xi-nya, mâ ké vi rhâmâ xi-nya mâʼ.

³ Aè tö rhûû wi-a Tito ré tö gövu, wi xè Héléni, wè é da wapaur̂u-é na ka pè vâr̂â yêr̂ê-ê,

⁴ na pûû-é na pâr̂â pâ kaavèâi pa veevee ré wê vi ru mâ cuur̂i-r̂é rö pwar̂a-ve na ka pwêr̂ê yè târi ré gèvé tö xar̂a rö-i Kérisö Ièsu, cè ké-r̂é pè ria-vé vè kâmö xé-r̂é.

⁵ Gèvé bör̂i da cëi ké yè tâ nôô yè-r̂é rha pè mèèxa, cè ki tö mör̂ö rö pwar̂a-ve na ké avâr̂i i vi rherhî.

⁶ Aè pâr̂â kâmö paxa mâʼ na rhenô né-r̂é – ké waa xé-r̂é mâ na da tâ mwér̂é yè-nya, wè na da vi rhî waa kâmö na Bâô, wè pâi-ré paxa mâʼ na rhenô né-r̂é, wè cér̂é da waa bé yè-nya.

⁷ Aè cér̂é dè rhîâgür̂ü, êr̂ê, é nââ yè-nya vi rherhî vè ki pâr̂â kâmö é da pè vâr̂â yêr̂ê-r̂é, na ûr̂û-ré yè Pètèru vè ki pâr̂â kâmö ré é pè vâr̂â yêr̂ê-r̂é,

⁸ wè ce ré waa wêê nénââ i Pètèru yè nêr̂ê né aposetolo vè ki pâr̂â kâmö é pè vâr̂â yêr̂ê-r̂é, wè Bâô ré waa rö xi-nya vè ki pâi pa dö töö,

⁹ aè Iakobo, mâ Kéfa, mâ Ioané dè pâi ré é êr̂ê-r̂é, êr̂ê, cér̂é pâr̂â rhea, wè cér̂é wê tö rhûû vi méar̂i vi bwir̂i ré é nââ yè-nya, cér̂é bör̂i nââ yè-vu Barabas köwi é gaamëë né vi rhaaxâ, cè gövu vi wa pâi pa dö töö, aè cér̂é vi wa pâr̂â kâmö ré é pè vâr̂â yêr̂ê-r̂é na cér̂é.

¹⁰ Cér̂é rhî vè e rö, cè gövu dè tâ néxâi yè rö pâr̂â kâmö pa rhauadè xè pâr̂â ékalésia xé-r̂é rö Iérusalèm. Ö kââ-ré kââ ré wê cowa wêêgûr̂û-nya xè ka waa.

Paulo Wè Na Aʼcaa Kéfa Rö Anétioka

¹¹ Aè na wê pwa rö Anétioka na Kéfa, gö bör̂i tömâ rö némèè-è, wè na wê vi mür̂ü.

¹² Wè na mö ké yèri bör̂i pâi pa mi rai Iakobo, na bör̂i wê ara cér̂é pâi pa dö töö na ce, aè cér̂é wê pwa, na bör̂i ökwiyùù-é mâ tö koa, wè na bar̂a i-r̂é paxa é pè vâr̂â yêr̂ê-r̂é.

¹³ Aè cér̂é bör̂i veevee na bör̂i xè Juda ûr̂û Pètèru, na bör̂i koyo aau bar̂ee rö veevee xé-r̂é na Barabas.

¹⁴ Gö bör̂i tö rhûû na cér̂é da vi vè târi rö-i avâr̂i i vi rherhî, gö bör̂i êr̂ê yè Kéfa rö némèè-r̂é wânii, êr̂ê: «Gèi kâmö xè Juda, gè câwâ rö-i wêyê né dö töö, aè gè da câwâ xè-i pâi xè Juda, na bör̂i wêr̂êi gè wapaur̂u pâi pa dö töö cè ké-r̂é câwâ rö-i wêyê né pâi xè Juda?»

Cér̂é Mör̂u Xè-I Tâ Néwèi Na Pâi Xè Juda Mâ Pâi Pa Dö Töö

¹⁵ Gèré pâi xè Juda rö-i kar̂ö, aè gèré da dèxâ ka vi mür̂ü rai pâi pa dö töö.

¹⁶ Gèré wê tâwai, êr̂ê, é da aʼvè târi kâmö rö-i pâr̂â nêr̂ê né mââyöö, aè xè-i rö tâ néwèi yè Ièsu Kérisö, gèvé bör̂i a paxa tâ néwèi bar̂ee yè Ièsu Kérisö, cè ki mâ aʼvè târi-vé rö-i tâ néwèi yè Kérisö, aè na da rö-i pâr̂â nêr̂ê né mââyöö, wè na yèri aau rha kar̂ö ré é yè aʼvè târi-e xè-i pâr̂â nêr̂ê né mââyöö.

¹⁷ Aè gèré yè vi mèyè, cè ki mâ aʼvè târi-ré na Kérisö, aè gèré pâr̂â paxa vi mür̂ü, na wêr̂êi, nè kâmö ré waa nêr̂ê yerii na Kérisö? Aè!

¹⁸ Wè gö yè vâi tëë pâr̂â kââ ré gö wê cowa kâ vè maii, gö bör̂i dè êr̂ê vèa-nya, êr̂ê, gö kâmö ka tar̂a kwéjîr̂i.

¹⁹ Wè gö wê mé yè mââyöö xè-i mââyöö, cè ki göi xa mör̂u yè Bâô.

²⁰ É wê cowa pè sataurö i-nya vèâ Kérisö, aè na ki gö mör̂u, na bör̂i da gènyâ-ré, aè dè Kérisö ré mör̂u rö xi-nya, aè ö mör̂u ré gö mör̂u-i rö kar̂ö, wè gö mör̂u-i rö tâ néwèi yè O i Bâô, ré wê méar̂i-nya, mâ wê nââ-ê vè ki-nya.

²¹ Gö da aʼvè bwir̂i vi méar̂i vi bwir̂i i Bâô; wè nè tâwai wii na aʼvè târi mi xè-i mââyöö, nè yè bör̂i döwi na ké mé i Kérisö.