Actes 3 - Ajie New Testament

Ké Pè Mör̂u Kâmö Ka Vikeya

¹ Cur̂u rhau tèi rua na mwâ waa ar̂ii na Pètèru mâ Ioané rèi pè mèèxa né pwaér̂ö rèi négowé né tè ye-a i mèèxa,

² Aè ökâré dèxâ kâmö ka vikeya mi xè ka ër̂i-e, wè é bâ vi yûi-e rèi pâr̂â nédaa mâ nââ-ê rö mèö bé né mwâ waa ar̂ii néé-é na «Rhîrhér̂é», cè ki pëër̂ii kââ rai pâr̂â kâmö ré yè vi ru rö mwâ ka ar̂ii.

³ Na bör̂i tö rhûû Pètèru mâ Ioané na cur̂u mö ké vi ru rö mwâ ka ar̂ii, na bör̂i pëër̂ii kââ rai-r̂u na ce.

⁴ Cur̂u bör̂i méâwaa-è na Pètèru mâ Ioané, mâ êr̂ê yè-è êr̂ê: «Tö rhûû-vu mi.»

⁵ Na bör̂i pwêr̂êwaa-r̂u na ce, wè na tâ néxâi êr̂ê, nè yè wii na dèxâ kââ ré cur̂u yè waa yè-è.

⁶ Na bör̂i êr̂ê yè-è na Pètèru, êr̂ê: «Na yèri mwâné mè, mâ mwâné mii rö pwar̂a-nya, aè gö yè nââ yè-i rö ö kââ-ré wii rö pwar̂a-nya, êr̂ê, rö-i néé Ièsu Kérisö, wi xè Nazarèt, wè tömâ rua mâ vâr̂â.»

⁷ Na bör̂i tuwir̂i köwi-e é gaamëë na Pètèru mâ rhèè vè tömâ-ê rua. Na bör̂i wê mör̂ö, na duö köwi-e, mâ duö yù né bwiida xi-e,

⁸ na bör̂i koyo rua na ce, mâ tömâ, mâ vâr̂â, cér̂é bör̂i rhau vi ru vèâ rö mwâ waa ar̂ii, wè na vâr̂â mâ vi koyo rua mâ pè kau Bâô.

⁹ Cér̂é bör̂i rhau tö rhûû-é na pâr̂â kâmö wânii, na na vâr̂â mâ pè kau Bâô.

¹⁰ Cér̂é bör̂i rhîâgür̂ü-é, êr̂ê, ö kâmö ré bâ cuè ânââ rö mèö bé né mwâ ka ar̂ii, néé-é na Rhîrhér̂é, cér̂é bör̂i buèi, mâ cêrhö i ö kââ-ré pwa yèr̂i-e.

Vi Pur̂â I Pètèru Rö Mwâ Ka Ar̂ii

¹¹ Aè na bâ vi wa Pètèru mâ Ioané na ce, cér̂é bör̂i rhau rhâmâ wa-r̂é na pâr̂â kâmö wânii na bar̂aadè, néé-é na «bar̂aadè i Solomona», wè cér̂é vi buèi vè kau.

¹² Na bör̂i tö rhûû-r̂é na Pètèru, na bör̂i êr̂ê yè-r̂é, êr̂ê: «Pâi xè Israèl éé, gëve wêr̂êi, gëve vi buèi mâ méâwaa-vu? Êr̂ê, na wii na ar̂inadö xi-vu mâ câwâ xi-vu ka pâr̂i Bâô ré pè vâr̂â kâmö-a?

¹³ Ö Bâô i Abérahama, mâ Isaka, mâ Iakobo, mâ Bâô i pâr̂â bèmûû-vé, wè na wê pè kau kâmö yar̂i xi-e Ièsu, ö kâmö ré gëve wê kâyâi mâ vi yiâ rö némèè Pilato, na na wê tâ mwér̂é yè-è na ké yè kâyâi-e.

¹⁴ Aè gëve aʼvi yiâwîî ö kâmö ka ar̂ii mâ ka târi mâ vi pëër̂ii ki yè cöö yè-ve dèxâ kâmö ka wê yö vè mii kâmö.

¹⁵ Aè gëve yö vè mii Ör̂ökau né mör̂u, ökâré na pè mör̂u-é tëë na Bâô xè ka mé xi-e, aè gèvé pâi pa ye vè avâr̂i nô-ré.

¹⁶ Aè xè-i ké tâ néwèi néé Ièsu i wi-ré, ré gëve tö rhûû mâ tâwai; na bör̂i pè mör̂ö-è na néé-é, wè tâ néwèi mi xè-i Ièsu, ré rhau nââ mör̂u-ré rö némèè-ve wânii.»

¹⁷ «Aè xina, pâi pâ kaavèâi-nya éé, gö tâwai êr̂ê, ö nô ré gëve waa, wè gëve da rhîâgür̂ü, na ûr̂û-ré na pâr̂â ör̂ökau xe-ve.

¹⁸ Aè na yexèvè ûr̂û-ré na Bâô ö nô ré na wê aʼvè néxâi mâ', wêyê, wè néwâ pâr̂â pérövéta xi-e, êr̂ê, nè yè vi nénââwêr̂ê na Kérisö xi-e.

¹⁹ Tö ökâré, vipââr̂i na gëve, mâ pugèwè-ve cè ki mâ cöö virai pâr̂â nô ka yaané xe-ve,

²⁰ cè ki mâ pwa yèr̂i-ve na pâr̂â nédaa né pè maaxé xè-i Ör̂ökau, mâ cè ki tùr̂ùwaa yè-ve ö kâmö ré na wê kâ vè tö vâ vè ke-ve na Bâô.

²¹ Wè Ièsu Kérisö, ce wè na e na ki tö rua nékö kwéyë rua rèi pâr̂â nédaa ré é yè ye vè avâr̂i pâr̂â kââ wânii ré na êr̂ê na Bâô, wêyê, wè néwâ pâr̂â pérövéta xi-e ka ar̂ii xiréé mâ.

²² Na êr̂ê na Mosé, êr̂ê: “Nè yè pè tömâ dèxâ rai pâ kaavèâi-ve na Ör̂ökau Bâô cè ki pérövéta ûr̂û-nyâ, gëve yè pwêr̂êwaa-è röi pâr̂â kââ wânii ré nè yè êr̂ê yè-ve.

²³ Aè pâr̂â kâmö ré yè da pwêr̂êwaa pérövéta-ré, wè é yè kâ vè bwir̂i-r̂é rö négowé né ba-a.”

²⁴ Aè pâr̂â pérövéta wânii ré bâ aʼvè néxâi yawi, wè na rhavûû na Samuèl, cér̂é rhau êr̂ê vèa baayê pâr̂â nédaa-ré.

²⁵ Gëve-a, wè gëve pâlè pâr̂â pérövéta, mâ pâlè ö vi kîbô ré na waa na Bâô cér̂é vèâ pâi kau xiréé, na na êr̂ê yè Abérahama, êr̂ê: “É yè aʼvui pâr̂â wêê mwâ rö bwêê jë xè-i mör̂u-i.”

²⁶ Na bör̂i pè tömâ kâmö yar̂i xi-e na Bâô, mâ kâyâi-e baayê yè-ve cè ki aʼvui-ve mâ na aʼrhua-ve vidù rai pâr̂â nô ka yaané xe-ve.»