Actes 28 - Ajie New Testament

Paulo Rö Néyî Rö Malita

¹ Aè gèvé wê mör̂u, gèvé bör̂i rhîâgür̂ü, êr̂ê, Malita na néé néyî-a.

² Aè cér̂é méar̂i-vé vè kau na pâi pa dö töö, wè, cér̂é kui kêmör̂u yè-vé, mâ rhau cëi-vé rö-i, wè na kau na kwa mâ rhâô.

³ Na bör̂i yâ kêê na Paulo mâ nââ rö kêmör̂u, na bör̂i cêê mi na mârhùr̂ii ka vi kùxè, na ör̂ö i pixê, na bör̂i kè-ru rö néxar̂a â-ê.

⁴ Cér̂é bör̂i tö rhûû mârhùr̂ii na pâi pa dö töö na na cör̂ö rö köwi-e, cér̂é bör̂i vi êr̂ê: «Na kâmö ka yö vè mii kâmö na wi-a, ré na wê mör̂u mi xè nérhëë, aè na da kâyâi-e na ka vi rhôôr̂u cè ki mör̂u.»

⁵ Na bör̂i kwir̂è virai mârhùr̂ii-a na kêmör̂u na Paulo, aè na da yaané xè-i na ce.

⁶ Cér̂é bör̂i târ̂î ké yè cùù rua na kar̂ö-è, mâ ké yè bèi xi-e na ki mé, aè na mwââ yéyé na ké târ̂î-e xé-r̂é, cér̂é bör̂i tö rhûû na na yèri nô ka yaané ka yè pwa yèr̂i-e, cér̂é bör̂i wê pugèwè pâr̂â vi tâ néxâi xé-r̂é, mâ êr̂ê, ce rö dèxâ bâô.

⁷ Aè na tö vè ubwa rö-i na pâr̂â wêê mwâ i ör̂ökau né néyî-ré, néé-é na Pubilia, wè, na paur̂u-vé na wêê mwâ xi-e, na méar̂i-vé vè kau rö-i rèi karir̂i nédaa.

⁸ Aè pevaa i Pubilia, wè na tö-a pèii xar̂a pixê mâ peer̂u war̂a, na bör̂i vi rhâi-e na Paulo, mâ pwaér̂ö, mâ yùù duö néxar̂a â-ê rö bwêêwé mâ waa-é e.

⁹ Ökâré cér̂é bör̂i rhau pwa yèr̂i-e na pâr̂â kâmö paxa pèii rö néyî-ré, na bör̂i rhau pè mör̂u-r̂é bar̂ee na ce.

¹⁰ Aè cér̂é pè kau-vé xè-i pâr̂â kââ ka e ka pôr̂ô yéyé, aè tèi ökâré gèvé yè wê lèè xè-i, cér̂é bör̂i nââ yè-vé pâr̂â kââ ka pâr̂i-vé.

Na Pwa Rö Roma Na Paulo

¹¹ Bör̂i tèi nédèè karir̂i var̂ui, gèvé bör̂i lèè rö dèxâ kwâ xè Alésanédia, ré tö ka wérâ rèi nékwénavö rö néyî, aè na «Duavividu» na néé-é kwâ.

¹² Gèvé bör̂i wê cir̂i rö Sirakusa mâ tö-i karir̂i nédaa.

¹³ Gèvé bör̂i vi xè-i, gèvé tö-a yakar̂a vi mâ cir̂i rö Régio, aè tèi nédèè rha nédaa, na bör̂i ku mi na lëu, bör̂i kaar̂u tëë nédaa gèvé bör̂i cir̂i rö Putéoli.

¹⁴ Gèvé bör̂i pwa yèr̂i pâi pâ kaavèâi rö-i, cér̂é bör̂i aʼyè-vé na ka cuè rö pwar̂a-r̂é kanii na ma kaar̂u nédaa, gèvé bör̂i vi na Roma.

¹⁵ Cér̂é bör̂i wê pwêr̂ê-vé rö-i na pâi pâ kaavèâi, cér̂é bör̂i vi mâ pwa rö néjana rö Apio Foro, mâ rö Karir̂i Mwâ êê ara cè ké-r̂é vi javirù gèvé, na bör̂i wê tö rhûû-r̂é na Paulo, na bör̂i ëi yè Bâô, mâ mör̂ö na wêê nénââ.

¹⁶ Gèvé bör̂i pwa rö Roma, na bör̂i kâyâi na kénéturio pâr̂â kâmö êê pö yè kavèè pâi pa vi târ̂î, aè é dè kâyâi yè Paulo cè ki dè cuè rhar̂i rö dèxâ mwâ, wè na wii na rha paa ka vi târ̂î-e.

Na Vi Pur̂â Na Paulo Rö Roma

¹⁷ Bör̂i tèi nédèè karir̂i nédaa, na bör̂i kâ vèâi pâr̂â dö kâmö i pâi xè Juda na Paulo, cér̂é bör̂i wê vi kâ vèâi-r̂é, na bör̂i êr̂ê yè-r̂é na ce «Pâ kaavèâi éé, na yèri nô ka yaané gö waa yè pâr̂â kâmö, mâ yè pâr̂â câwâ i pâr̂â pâi kau xé-r̂é, aè é kâyâi-nya mi tö êê pö mi xè Iérusalèm na néxar̂a â pâi xè Roma.

¹⁸ Cér̂é wê cowa ërëwaa-nya, cér̂é bör̂i tâ néxâi ké yè kâyâi-nya tëë, wè, na yèri dèxâ pûû-é rai-nya ka yè pâr̂i ké yè mé.

¹⁹ Aè cér̂é rhî vè döwi na pâi xè Juda, ökâré pûû ké aʼ vèr̂i xi-nya yè Kaisara, na da xè-i ké wii dèxâ nô ka yaané gö yè vi kââr̂â i wa névâ xi-nya.

²⁰ Aè xè-i rö nô-ré, gö bör̂i aʼyè-ve cè gèré vi javirù, mâ vi tëvë gèré-ve, wè, na pûû-é na vi târ̂î-i pâi xè Israèl na ké pöi-nya kwé vaö-a.»

²¹ Cér̂é bör̂i êr̂ê yè-è, êr̂ê: «Gèvé da cëi pâr̂â pèci né-i mi xè Juda, aè na yèri bar̂ee dèxâ kâmö rai pâi pâ kaavèâi ka pûû vi êr̂ê vèa mâ êr̂ê dèxâ nô ka yaané xi-i.

²² Aè gèvé rhî vè e ké yè tö pwêr̂ê rö-i vi tâ néxâi xi-i, wè gèvé wê tâwai, êr̂ê, é aʼvè yaané-i rö-a bwêê jë waa ar̂ii-a.»

²³ Cér̂é bör̂i vi aʼdâ dèxâ nédaa, na bör̂i wê pwa, cér̂é bör̂i pôr̂ô na pâr̂â kâmö pa vi pwa yèr̂i-e rö ökâré na tö-i, aè na êr̂ê vèa mâ ye vè avâr̂i mwâcir̂i i Bâô yè-r̂é na Paulo, mâ wapaur̂u-r̂é yè Ièsu rö-i mââyöö i Mosé mâ pâr̂â pérövéta, rhavûû rèi mélöö kwéyë rua tèi rhêêrè.

²⁴ Aè cér̂é cëi nô-ré na êr̂ê na bör̂i, aè cér̂é da cëi na bör̂i.

²⁵ Aè na da rhaaxâ na wêê nénââ xé-r̂é, cér̂é bör̂i wê vidù rhar̂i tèi nédèè ké êr̂ê i Paulo rhaaxâ rö nô, êr̂ê: «Na avâr̂i na ké êr̂ê mâ' i Ko-Ar̂ii yè pâr̂â pâi kau xe-ve, wêyê na Isaia pérövéta, mâ êr̂ê:

²⁶ “Vi êr̂ê yè névâ-ré, êr̂ê: Gëve yè bâ pwêr̂ê rö, aè gëve yè da rhîâgür̂ü, Gëve yè bâ tö rhûû rö, aè gëve yè da rhéwêr̂ê.

²⁷ Wè na wâréuu na wêê nénââ i pâr̂â kâmö-a, Mâ cér̂é pè wâré mâ wâré pâr̂â böödê-r̂é, Aè cér̂é rhîwir̂i pâr̂â pièmè-r̂é, Wé-r̂é tö rhûû na pâr̂â pièmè-r̂é, Mâ pwêr̂ê na pâr̂â böödê-r̂é, Mâ rhîâgür̂ü, Mâ vipââr̂i, koa wè-nya pè mör̂u-r̂é.”

²⁸ Tö ökâré, rhîâgür̂ü na gëve, êr̂ê, é tùr̂ùwaa vi pè mör̂u i Bâô yè pâr̂â névâ ka orê, aè cér̂é yè pwêr̂ê-ê.»

²⁹ Na wê êr̂ê röi pâr̂â nô-ré, cér̂é bör̂i vi na pâi xè Tuda mâ vi caawîî-r̂é na cér̂é xè-i.

³⁰ Aè na kaar̂u nédö wânii na ké tö-i Paulo rö dèxâ mwâ ré na wê urhii wîr̂î. Na rhau cëi röi pâr̂â kâmö ré wè pwa yèr̂i-e.

³¹ Na vi vaa i mwâcir̂i Bâô, mâ aʼpâgür̂ü pâr̂â nô né Ör̂ökau Ièsu Kérisö, na tëvë vè târi, aè é da aʼrhua-è.