Actes 2 - Ajie New Testament

Na Pwa Mi Na Ko-Ar̂ii

¹ Na wê pwa na nédaa né Pénétékös, cér̂é bör̂i wê rhau tö vè rhaaxâ rö kaa töö ka rhaaxâ.

² Na bör̂i pwa ria mi xè nékö na dèxâ mâr̂ââ ku i ko, na ûr̂û kayâ kau, na bör̂i rhâri na mwâ-ré cér̂é cuè rö-i xè-i.

³ Na bör̂i tö vèa yè-r̂é na pâr̂â kur̂umé ka tö vidù ka ûr̂û kêmör̂u, na bör̂i te vidù rö bwêêwé-r̂é.

⁴ Cér̂é bör̂i wê rhau rhâri xè-i Ko-Ar̂ii, cér̂é bör̂i rhavûû ké aʼ i pâr̂â mêr̂ê aʼ ka vi rhîyâi-e, ûr̂û ké nââ yè-r̂é i Ko-Ar̂ii cè ké-r̂é tëvë.

⁵ Aè cér̂é tö Iérusalèm na bör̂i pâi xè Juda, pâi paxa bar̂a i Bâô, mi xè pâr̂â névâ tö é ria né nékö.

⁶ Na wê mâ pwânûr̂i na mar̂a ku-ré, cér̂é bör̂i rhau rhâmâ vi ya vèâi-r̂é na pâr̂â paxa pôr̂ô yéyé, mâ cér̂é cêrhö aau na cér̂é pwêr̂ê-r̂é na cér̂é aʼ i vidù pâr̂â mêr̂ê aʼ xé-r̂é.

⁷ Cér̂é bör̂i cêrhö mâ buèi, mâ êr̂ê: «Tö rhûû cér̂é da rhau pâi mi xè Galilé na pâi-â tëvë-a?

⁸ Aè na wêr̂êi gèré pwêr̂ê vidù mêr̂ê aʼ xè pâr̂â névâ xé-r̂é ré é ër̂i-r̂é rö-i?

⁹ Pâi mi xè Patia, mâ Médi, mâ Élama, mâ pâi paxa cuè rö Mésopotamia, mâ Juda, mâ Kapadokia, mâ Ponéto, mâ Asia,

¹⁰ mâ Férugia, mâ Paméfulia, mâ Aigupito, mâ pâr̂â névâ rö Libia ka tö vè ubwa yè Kurini, mâ pa vâr̂â mi xè Roma, pâi xè Juda,

¹¹ mâ pâi ré waa ar̂ii cér̂é Kérété, mâ Arabia, wè, gèré pwêr̂ê-r̂é na cér̂é êr̂ê vèa rö pâr̂â mêr̂ê aʼ xé-r̂é awir̂è né nêr̂ê Bâô.»

¹² Cér̂é bör̂i rhau cêrhö mâ vi rhèè, mâ êr̂ê, êr̂ê: «Ö jië na nô né ökââ-â?»

¹³ Aè bör̂i kâmö, wè, cér̂é kaʼwa-r̂é, mâ êr̂ê: «Cér̂é rhâri xè-i divââ ka mö ké döwöö na pâi-â!»

Vi Pur̂â I Pètèru

¹⁴ Na bör̂i tömâ na Pètèru, cér̂é pâi pa pârör̂ö na ma rhaaxâ mâ aʼvè kau rua mâ êr̂ê, êr̂ê: «Gëve pâi xè Juda, mâ rhau gëve pâr̂â kâmö ré tö Iérusalèm, tâ pâgür̂ü nô-â na gëve mâ pwêr̂ê nô xi-nyâ.

¹⁵ Cér̂é da vi bwéjé na pâi-â ûr̂û ké tâ néxâi xe-ve, wè na mö ké karir̂i rö na pè mèèxa né nédaa.

¹⁶ Aè ökâré nô ré na êr̂ê mâʼ na pérövéta Ioéla, êr̂ê, wè na êr̂ê na Bâô, êr̂ê:

¹⁷ “Tèi pâr̂â nédaa ka taadè, wè Gö yè mâ piyöwîî ko-nyâ rö bwêêwé pâr̂â kar̂ö wânii, Wè cér̂é yè pérövéta na pâr̂â pâlè-ve pâi mâ powè dowa, Aè cér̂é yè mâ ngërhûû pètâbâ na pâi dowa pâlè-ve, Aè cér̂é yè mâ ngëxë na pâr̂â pâi kau xe-ve.

¹⁸ Üüwa, wè tèi pâr̂â nédaa ré gö yè piyöwîî ko-nyâ rö bwêêwé pâr̂â kâmö yar̂i xi-nyâ powè mâ pâi, Cér̂é yè bör̂i tëvë ûr̂û pérövéta.

¹⁹ Gö yè mâ pèri pâr̂â pètâbâ tö rua nékö, Mâ pâr̂â ar̂inadö rö-a bwêê jë; Wè war̂a mâ kêmör̂u, mâ pûr̂û é ka rhâva ka pûr̂û rua;

²⁰ É yè mâ pugèwè mèèxa cè ki orê, Mâ var̂ui cè ki war̂a, Baayêr̂î ki yè pwa na nédaa i Ör̂ökau, wè nédaa ka kau mâ ka rhîrhér̂é;

²¹ Nè yè bör̂i pwa na ké yè pè mör̂u pâr̂â kâmö ré yè aʼyè néé Ör̂ökau.”»

²² «Pâi xè Israèl éé, pwêr̂ê wîr̂î nô-â! Wè, Ièsu, wi xè Nazarèt, ö kâmö ré na yejîî-e yè-ve na Bâô xè-i pâr̂â awir̂è, mâ pâr̂â pètâbâ, mâ pâr̂â ar̂inadö, ré na waa na Bâô rö-i Ièsu rö négowé né-ve, ûr̂û ké tâwai xe-ve ûr̂û-ré;

²³ wè na kâyâi-e na Bâô rö-i rhî vè e ka tö vâ mâ rhî tâwai ka baayê, gëve bör̂i dawir̂i-e rö kêê, mâ yö vè mii-e xè-i néxar̂a â pâr̂â kâmö ré da bar̂a yè Bâô.

²⁴ Na bör̂i pè mör̂u-é tëë na Bâô, mâ cöö rai-e mârhër̂ë né pèii mé, wè na da tâwai aau tuwir̂i-e rö-i.

²⁵ Wè na êr̂ê mâ' na David xè xi-e êr̂ê: “Gö tö rhûû Ör̂ökau na na bâ tö yawi rö némèè-nyâ, Wè na tö ékar̂a-nyâ é gaamëë cè ki mâ da rhùr̂ùù-nyâ.

²⁶ Ökâré pûû ké vi pwérhar̂a i wêê nénââ xi-nya, mâ na mâmâ na kur̂umé-nya; Aè nè yè wê tâ mui na kar̂ö-nya mâ néwèi.

²⁷ Wè gè yè da kâyâi ko-nya na névâ né pèii mé, Aè gè yè da kâyâi ar̂ii xi-i cè ki vi na ka tö rhûû bo.

²⁸ Wè gè wê pèri vèa yè-nya pâr̂â wêyê né mör̂u, Aè gè yè pè rhâri-nya i vi or̂o i némèè-i.”»

²⁹ «Pâ kaavèâi-nyâ éé, na e na ki târi yè-nyâ cè göi êr̂ê vèa yè-ve rö-i avâr̂i xè-i David bèmûû, êr̂ê na wê pèii mé na ce, aè é wê cowa kérui-e mâ', na bör̂i tö pwar̂a-ré na kaa vi uyû xi-e cêmè rua xina.

³⁰ Wè na pérövéta na ce, na bör̂i rhîâgür̂ü-é na ce, êr̂ê, na wê cowa kîbô yè-è na Bâô, êr̂ê, gö yè pè tömâ dèxâ rö bwêêwé mwâcir̂i xi-e, xè-i pâr̂â mör̂u-é.

³¹ Wè na rhîâgür̂ü baayê ma' na ce, mâ êr̂ê nédaa né ké mör̂u tëë i Kérisö, êr̂ê: “Nè yè da nââ-ê aau rö névâ né pèii mé, Nè bör̂i da bo na kar̂ö-è.”

³² Ökâré Ièsu, wè na pè mör̂u-é tëë na Bâô, wè rhau gëve-a pâi ré yè ye vè avâr̂i-e.

³³ É pè tömâ-ê rö-i é gaamëë i Bâô, na bör̂i cëi rai Pevaa Ko-Ar̂ii ré é wê êr̂ê mâ', é wê piyöwîî rö xi-e, ûr̂û ké tö rhûû mâ pwêr̂ê xe-ve.

³⁴ Wè na da tèi na nékö na David, aè na êr̂ê na ce, êr̂ê: “Na êr̂ê na Ör̂ökau yè Ör̂ökau xi-nya, êr̂ê, Cuè na gèi rö ékar̂a-nya é gaamëë,

³⁵ Cêmè rèi nédaa ré gö yè waa pâr̂â pa vi rhîaa xi-i Vè kavèè duö köwi-i xè ria.”

³⁶ Tö ökâré, na e na ké-r̂é rhîâgür̂ü na pâr̂â wêê mwâ wânii rö Israèl êr̂ê, Ièsu ré gëve pè cevè-è rö sataurö, wè na wê cowa pugèwè-è na Bâô cè ki Ör̂ökau mâ Kérisö.»

³⁷ Cér̂é wê pwêr̂ê röi, na bör̂i rhöwöxè pâr̂â pwéé-r̂é, cér̂é bör̂i rhau êr̂ê yè Pètèru mâ pâr̂â aposetolo wânii: «Pa kaavèâi éé, ö jië na nêr̂ê-vé ré gèvé yè waa?»

³⁸ Na bör̂i êr̂ê yè-r̂é na Pètèru, êr̂ê: «Vipââr̂i na gëve, cè ki mâ dè batiyi-ve vidù wânii rö néé Ièsu Kérisö, cè ki cöö virai pâr̂â nô ka yaané xe-ve, aè gëve yè wii yè kwââvâr̂â, wè Ko-Ar̂ii.

³⁹ Aè ka é êr̂ê baayê ma', wè dè ke-ve mâ pâr̂â pâlè-ve, mâ vè ki bar̂ee pâr̂â kâmö ré tö vè mwâi, wè nè yè aʼyè-r̂é na Ör̂ökau Bâô xé-ré.»

⁴⁰ Wè na vi vaa na ce, mâ pur̂â-r̂é i pâr̂â nô ka pôr̂ô yéyé: «Gëve dè pè mör̂u-ve rai pâr̂â cî kani ka téé-a.»

⁴¹ É bör̂i wê batiyi-r̂é, pâi ré cëi nô xi-e, bör̂i tèi nédaa-ré, wè cér̂é mi vè béé-r̂é bar̂ee na ûr̂û karir̂i mille.

Mör̂u Vè Rhaaxâ

⁴² Aè cér̂é bâ tuwir̂i vè mör̂ö ké vi pur̂â i pâr̂â aposetolo, xè-i rhaaxâ wêê nénââ, mâ cér̂é kâvii var̂awa, mâ pwaér̂ö.

⁴³ Na bör̂i pwa yèr̂i pâr̂â kâmö wânii na bar̂a, wè na pôr̂ô yéyé na pâr̂â pètâbâ, mâ pâr̂â ar̂inadö ré cér̂é waa na pâr̂â aposetolo.

⁴⁴ Aè cér̂é rhau tö vè rhaaxâ na pâi pa tâ néwèi, mâ na tö vè rhaaxâ na pâr̂â nékwêêr̂ê-r̂é.

⁴⁵ Cér̂é vi rhöwöi pâr̂â döwöö xé-r̂é, mâ pâr̂â nékwêêr̂ê-r̂é, mâ vi wii vè pâr̂i pâr̂â kâmö paxa rhauadè.

⁴⁶ Wè cér̂é bâ tö rhaavu rö mwâ waa ar̂ii rèi pâr̂â nédaa, wè cér̂é kâvii var̂awa rö dèxâ mwâ mâ dèxâ mwâ, mâ ara néara-r̂é xar̂a vi or̂o, mâ wêê nénââ ka avâr̂i,

⁴⁷ mâ pè kau Bâô, aè cér̂é méar̂i-r̂é na pâr̂â kâmö wânii. Aè na nââbéé ké pôr̂ô xé-r̂é rèi pâr̂â nédaa na Ör̂ökau röi pâr̂â kâmö ré wê pwa yèr̂i vi pè mör̂u.